Yamiroore dow wonduɓe e tuundi
5
1 Joomiraaɗo haaldi e Muusaa wi'i:— 2 Njamiraa Israa'iilankooɓe mburtina neɗɗo fuu nyawraaɗo nguru maa kente maa tuunirɗo hoorem meemude maayɗo. 3 Neɗɗo oon, nde wo debbo nde wo gorko fuu, sey wurtinee hoɗorde ndeen taa tuunina joonnde am hakkunde Israa'iilankooɓe.
4 Israa'iilankooɓe ngaɗiri noon. Ɓe mburtini tuunɓe ɓeen fuu yaasin hoɗorde hono no Joomiraaɗo yamiri Muusaa noon.
Yomnitagol hakke
5 Joomiraaɗo wi'i Muusaa:
— 6 Kaaldaa e Israa'iilankooɓe, mbi'aa ɗum'en: Si gorko maa debbo waɗii hakke mo ɓiɓɓe-Aadama mboowi waɗude fu, joomum heɓii junuuba yeeso Joomiraaɗo. Na tilsi jukkee. 7 Ndelle sey joomum haalta hakke mo waɗi oon, de yoɓa mo toonyii oon fodde bonanda muuɗum. Dow buuɗi njobdi ndiin o ɓeyda mbuuɗu ngootu dow buuɗi joyi fuu. 8 Si tawii gaɗaaɗo ko boni oon wuuraa wooɗi walaa donoowo fuu, njobdi ndiin hokkee almaami e innde Joomiraaɗo. Gaɗuɗo ko boni oon du, sey hokka almaami njawdiri faa waɗana ɗum sadaka mooytoowo hakke.
9 Jakka mo Israa'iilankooɓe ngaddata to almaami e kujje ceniiɗe ɗe ɓe ngaddata yeeso muuɗum fuu wo kam jeyi. 10 Kujje ceniiɗe ɗe ɓe ngoodi fuu wo kamɓe njeyi. Ko ittanaa almaami du, wo kam jeyi.
Kabaaru debbo jikkaaɗo jeenu
11 Joomiraaɗo wi'i Muusaa:
— 12 Mbi'aa Israa'iilankooɓe: Inan no ngaɗoton si debbo jambake gorum waɗii jeenu: 13 Si gorko goɗɗo fukkodake e makko tawii goriiko faamaay, wooɗi du seedee walaa, o tuuniniri hoore makko noon e ley cuccukka. 14 Maa tawii wo kiram waɗi de gorko oon na miiloo o jambake ɗum de wanaa goonga, 15 ko laatii fuu, sey goriiko oon yaara mo to almaami de waɗa sadaka conndi sa'iiri kilooji tati. Taa o rufa nebbam maa uurdi dow mayri sabo wo ndi sadaka kiram e haaltude hakke.
16 Almaami darnowa debbo oon yeeso Joomiraaɗo. 17 O watta ndiyam ceniiɗam ley loonde, de o ɓoɓta bolonngu leydi nokkuure seniinde ndeen, o watta e majjam. 18 Almaami oon darna mo yeeso Joomiraaɗo, fiirta sukundu makko de watta sadaka kiram oon ley juuɗe makko tawa ina tiigii ndiyam kuddijam ɗaam e juuɗe muuɗum.
19 Almaami waɗa o hunoo, wi'a o: «Si ɗum fewre a fukkodaaki e gorko goɗɗo, a jambaaki gora dawranoowo ma, si a tuuninaay hoore maaɗa fu, kisa kuddi ndiyam ndiin. 20 Ammaa si tawii wo goonga a jambake gora dawranoowo ma, de pukkodiɗaa e gorko goɗɗo, tuuninɗaa hoore maaɗa fu…» 21 Almaami waɗa debbo oon hunoroo kuddi wi'aa: «Joomiraaɗo haɗe ɓeyngu de waɗa reedu maaɗa ɓuuta faa yimɓe maaɗa ndaarde a kuɗirteeɗo. 22 Ndiyam kuddijam ɗaam naata ley reedu maaɗa, ƴuufina ndu de halka ɓeyngu maaɗa.»
Ndeen debbo oon jaabo wi'a: «Aamiina aamiina.»
23 Caggal ɗuum almaami winnda kuddi ndiin dow ɗerewol de tummba ngol ley ndiyam kuddijam ɗaam. 24 O yarna ɗam debbo oon faa ɗam naatida e kuddi cattundi ndiin ley muuɗum. 25 Almaami jaɓa sadaka kiram mo o tiigii e juuɗe makko oon, holla ɗum Joomiraaɗo de yaara ɗum dow sakkirde. 26 Katin o itta conndi sadaka ndiin tamre junngo, o wula ndi dow sakkirde. Wo ɗum sadaka miccintinoowo. Caggal ɗuum o yarna debbo oon ndiyam ɗaam. 27 Nde debbo oon yari ɗam fu, inan ko laatotoo: si nii tawii wo goonga o waɗii jeenu, o tuuninii hoore makko fu, ndiyam kuddijam ɗaam naatan e makko, ɓuutina reedu makko de halka ɓeyngu makko. Noon debbo oon laatorto kuɗirteeɗo hakkunde lenyol muuɗum. 28 Ammaa si tawii o waɗaay ko o jikkaa ɗuum, o tuuninaay hoore makko, wo o laaɓuɗo fu, faa'e hewtataako o, wooɗi du o heɓan ɓeyngu.