Gollal Lewinkooɓe
Ƴuwdi Kehat
4
1 Joomiraaɗo haaldi e Muusaa e Haaruuna wi'i ɗum'en:— 2 Limon ƴuwdi Kehat hakkunde yimɓe Lewi, fodde koɗorɗe e cuuɗi muɓɓen, 3 ƴuude ɓe duuɓi 30 yaade 50, waawuɓe gollude ley hukum Ceniiɗo.
4 Gollal Kehatinkooɓe ley hukum toon, wo ndaarande kujje gollitirɗe ɓurɗe fuu senaade. 5 Wakkati eggol fuu, Haaruuna e ɓiɓɓe muuɗum kuunca wudere senndoore nokkuure seniinde de cuddira nde keesuwal Amaana. 6 Ɓe kuura dow keesuwal ngaal nguru lobbu de ɓe kuurira ɗum fuu lefol bulabulawol, sakitoo ɓe coorna cabbi tiigorɗi ngal.
7 Taabawal buuruuje ngaal du, ɓe kuura ɗum lefol bulabulawol de ɓe ndeka taasaaje e jarduɗe e taasahoy e jollooji sadaka njaram e buuruuje cakketeeɗe. 8 Caggal ɗuum ɓe kuura wudere woɗeere coy dow majjum de ɓe cudda dow ɗoon nguru lobbu sakitoo ɓe coorna cabbi tiigorɗi ngal.
9 Ɓe kooƴa lefol bulabulawol ɓe kuurira joƴƴinirde fitillaaji e fitillaaji ɗiin e nyifirkoy fitillaaji e ɓoɓtirɗe ndoondi e paali nebbam majji. 10 Ɓe piilira ɗum kanjum e gineeji majjum fuu nguru lobbu de ɓe ndeka ɗum dow leggal jaajungal ɓantirgal.
11 Ɓe kuura lefol bulabulawol dow sakkirde kaŋŋe ndeen de ɓe ndeka nguru lobbu dow muuɗum. Caggal ɗuum ɓe coorna cabbi tiigorɗi nde, 12 de ɓe ada kujje gollitirɗe ley nokkuure seniinde ɗeen, ɓe ngatta nder lefol bulabulawol, de ɓe tagga ɗe nder nguru lobbu, ɓe ndeka ɗe dow leggal jaajungal ɓantirgal.
13 Ɓe ɓoɓta ndoondi sakkirde ndeen de ɓe kuurira ɗum lefol boɗewol coy. 14 Ɓe ndeka kujje hirsirde gollitirɗe dow lefol ngool: ɗum woni ɓoɓtirɗe ndoondi e juwirɗe teewu e pelliiji e taasahoy mbiccirkoy ƴiiƴam e kujje gollitirɗe keddiiɗe. Ɓe kuurira ɗum fuu e nguru lobbu de ɓe coorna cabbi leɗɗe tiigorɗi ɗum.
15 Nde eggol maɓɓe hewti de Haaruuna e ɓiɓɓe muuɗum timmini huurugol kujje nokkuure seniinde e gollitirɗe muuɗum fuu, Kehatinkooɓe ngara ndonndoo ɗum. Taa ɓe meema kujje ceniiɗe ɗeen sabo ɗum saabanto ɓe maayde. Ɗee ngoni golle Kehatinkooɓe ley hukum Ceniiɗo.
16 Eliyajar ɓii Haaruuna ndaranta nebbam fitillaaji e uurdi mbuleteendi e sadaka conndi tabintinaaɗo weeti fuu, e nebbam ceninoojam. Kanko dawranta hukum oon e ko woni ley muuɗum tawti nokkuure seniinde ndeen e kujje muuɗum fuu.
17 Joomiraaɗo wi'i Muusaa e Haaruuna:
— 18 Kakkilon wooɗa taa ƴuwdi Kehat fiɗɗee hakkunde Lewinkooɓe. 19 Ndelle inan no ngaɗanton ɓe faa ɓe kisa maayde si ɓe ɓattowake kujje ceniiɗe ɗeen: Aan Haaruuna e ɓiɓɓe maaɗa kollon ɓe mono fuu ko jeyi gollude maa ko jeyi ronndaade. 20 Taa ɓe ndaara nokkuure seniinde ndeen sabo fay si ɓe leetorii nde maƴƴaango yitere, ɗum saabanto ɓe maayde.
Ƴuwdi Gerson
21 Joomiraaɗo wi'i Muusaa katin:
— 22 Limaa ɓiɓɓe Gerson fodde cuuɗi muɓɓen. 23 Limaa worɓe ɓe duuɓi 30 yaade duuɓi 50, mbinndaa ɓe faa ɓe ndaarana gollal hukum Ceniiɗo. 24 Inan gollal ngal Gersoninkooɓe njeyi gollude e ko njeyi ronndaade wakkati eggol fuu: 25 Kamɓe njeyi ronndaade wudere nguru lobbu huurirteende hukum Ceniiɗo e wudere guri jawɗi suddirteende hukum oon fuu, e wudere wonnde dammbugal 26 tawti leppi piiliiɗi galle hukum oon e sakkirde, e wudere wonnde dammbugal e ɓoggi majjum e kujje gollitirɗe ɗeen fuu. Gollal ngaal ɓe kalfinaa. 27 Wo Haaruuna e ɓiɓɓe muuɗum ndawranta Gersoninkooɓe ko ngollata e ko njeyi ronndaade fuu. Kamɓe du kollata ɗum'en ko njeyi gollude e ko njeyi ronndaade fuu. 28 Ɗum woni gollal Gersoninkooɓe ley hukum oon. Almaami Itamar ɓii Haaruuna kam dawranta ɓe.
Ƴuwdi Merari
29 Limaa worɓe ƴuwdi Merari fodde koɗorɗe e cuuɗi muɓɓen. 30 Limaa worɓe ɓe duuɓi 30 yaade 50 de ngattaa ɓe e gollal ley hukum Ceniiɗo. 31 Inan ko ɓe njeyi ronndaade wakkati eggol fuu: nyiɓe hukum e pale e leɗɗe tiigiiɗe ɗum e darorɗe muɓɓen. 32 Leɗɗe darnirɗe wudere fiiliinde hukum ndeen e darorɗe muɓɓen e tonteeje e ɓoggi e kujje gollitirɗe ɗeen fuu. Kalfinon mono fuu ko njeyi ronndaade. 33 Ngal woni gollal ngal Merarinkooɓe kalfinaa ley hukum oon. Itamar ɓii almaami Haaruuna kam dawranta ɓe.
Limgal Lewinkooɓe Gollooɓe
34-48 Muusaa e Haaruuna e hooreeɓe lenyi Israa'iila kawriti limi ƴuwdi Lewi fodde koɗorɗe e cuuɗi muɓɓen. Ɓe limi worɓe ɓe duuɓi 30 yaade 50 hewtuɓe gollude ley hukum Ceniiɗo.
Worɓe suudu Kehat limaaɓe fuu wo 2 750.
Worɓe suudu Gerson limaaɓe fuu wo 2 630.
Worɓe suudu Merari limaaɓe fuu wo 3 200.
Ɓee ngoni ƴuuruɓe e lenyol Lewi gollooɓe ley hukum oon hono nyiɓugol e ronndagol e golle goɗɗe ɓe Muusaa e Haaruuna limi de mbinndi inɗe muɓɓen fodde no Joomiraaɗo yamirnoo ɗum'en e hunnduko Muusaa. Ɓe fuu wo ɓe worɓe 8 580.
49 Ndelle e dow yamiroore Joomiraaɗo, Muusaa limi ɓe de halfini mono fuu ko jeyi gollude e ko jeyi ronndaade.