No Lewinkooɓe ngollirani Almaami'en
3
1 Inan ƴuwdi Haaruuna e Muusaa wakkati Joomiraaɗo haaldunoo e Muusaa dow waamnde Sinayi.2 Haaruuna na tawdanoo e ɓiɓɓe nayo, ɗum woni: Nadabu, hammadiijo makko, tawti Abihu e Eliyajar e Itamar. 3 Ɓee ngoni ɓiɓɓe Haaruuna ɓe nebbam jooraa dow ko'e muɓɓen de ngaɗaa almaami'en. 4 Ammaa Nadabu e Abihu maayii yeeso Joomiraaɗo ley ladde Sinayi sabo ɓe ngaɗanii ɗum sadaka ure ɗe ndagaaki. Ɓe keɓaayno ɓeyngu. Ndelle Eliyajar e Itamar keddodii e gollal almaamaaku ngaal ɗakkol baabiiɓe Haaruuna.
5 Joomiraaɗo haaldi e Muusaa wi'i:
6 — Ngaddaa ƴuwdi Lewi de ngaɗaa ɓe laatoo wallitooɓe almaami Haaruuna. 7 Ɓe ngollana mo kanko e lenyol Israa'iila fuu ko laatii golle ley hukum Ceniiɗo fuu. 8 Ɓe ndaarana kujje gonduɗe e makko de ɓe ngollana Israa'iilankooɓe ko laatii gollal ley hukum oon fuu. 9 Ngattaa Lewinkooɓe e junngo Haaruuna e ɓiɓɓe muuɗum, ɓe laatoo wallitooɓe mo e innde Israa'iila. 10 Ndelle kakkilaa wooɗa, sabo Haaruuna tan e ɓiɓɓe muuɗum kalfinaa gollal almaamaaku ngaal. Si mo wanaa jeyaaɗo e maɓɓe naati ngal fu, wo bareteeɗo.
11 Joomiraaɗo wi'i Muusaa katin:
12 — Inan miin e hoore am mi suɓake Lewinkooɓe hakkunde Israa'iilankooɓe heddiiɓe faa ɓe loomta lunnde hammadiiɓe Israa'iila. 13 Ko laatii awru Israa'iilankooɓe e daabaaji muɓɓen fuu wo miin jeyi, gilla nde kalkunoomi hammadiiɓe Misira e dikkorɗi daabaaji muɓɓen. Wo miin jeyti ɗum. Miin woni Joomiraaɗo.
Limgal Lewinkooɓe
14 Joomiraaɗo haaldi e Muusaa ley ladde Sinayi yoornde wi'i:
15 — Limaa worɓe ƴuwdi Lewi fuu gilla mo lewru wooturu yaade yeeso, fodde cuuɗi muɓɓen.
16 Muusaa waɗi ko Joomiraaɗo yamiri ɗuum.
17 Ɓiɓɓe Lewi wo Gerson e Kehat e Merari.
18 Inan inɗe ɓiɓɓe Gerson fodde cuuɗi muɓɓen: Libini e Simey.
19 Inan inɗe ɓiɓɓe Kehat fodde cuuɗi muɓɓen: Amram e Yitsehar e Heberon e Ujjiyel.
20 Inan inɗe ɓiɓɓe Merari fodde cuuɗi muɓɓen: Mahili e Muusi.
Ɓee ngoni Lewinkooɓe ɓe Muusaa limi fodde cuuɗi muɓɓen.
21 Ƴuwdi Gerson: wo lenyol Libini e ngol Simey. Kamɓe mbi'ete Gersoninkooɓe. 22 Limgal worɓe maɓɓe wo 7 500 ƴuude mo lewru wooturu yaade yeeso. 23 Gersoninkooɓe ɓeen na keedi caggal hukum Ceniiɗo faro gorgal. 24 Eliyasaf ɓii Layel woni hooreejo maɓɓe. 25 Iɓe kaybana hukum oon e wudere huuraande e wudere dambugaare. 26 Kamɓe njeyi gollal ɓilugol gude kuuruɗe dammbugal hukum e hirsirde e ɓoggi e kujje darnirteeɗe hukum oon fuu.
27 Ƴuwdi Kehat: wo lenyol Amram, ngol Yitsehar, ngol Heberon e ngol Ujjiyel. Kamɓe mbi'ete Kehatinkooɓe. 28 Limgal worɓe maɓɓe wo 8 600 ƴuude mo lewru wooturu yaade yeeso. Kamɓe kalfinaa nokkuure seniinde. 29 Iɓe keeda faro horɗoore hukum oon. 30 Elisafan ɓii Ujjiyel woni hooreejo maɓɓe. 31 Golle maɓɓe wo ndaarande keesuwal Amaana e taabawal e joƴƴinirɗe fitillaaji e cakkirɗe e kujje gonɗe ley nokkuure seniinde e wudere senndoore ɗum, kamɓe njeyi ronndaade ɗum fuu. 32 Eliyajar ɓii almaami Haaruuna woni hooreejo Lewinkooɓe ɓurɗo fu manngu. Kanko woni mawɗo hawjotooɓe nokkuure seniinde ɓeen fuu.
33 Ƴuwdi Merari: wo lenyol Mahili e ngol Muusi. Kamɓe mbi'ete Merarinkooɓe 34 Limgal worɓe maɓɓe wo 6 200 ƴuude mo lewru wooturu yaade yeeso. 35 Suriyel ɓii Abihayil woni hooreejo maɓɓe. Kamɓe keedi soɓɓirre hukum oon. 36 Merarinkooɓe kaybanta nyiɓe hukum Ceniiɗo oon e pale e leɗɗe tiigiiɗe o e darorɗe muɓɓen e gollitirɗe fuu. Kamɓe njeyi haybande gineeji ɗiin fuu, 37 tawti leɗɗe tiigiiɗe wudere fiiliinde hukum oon e darorɗe muɓɓen e tonteeje e ɓoggi muɓɓen fuu.
38 Muusaa e Haaruuna e ɓiɓɓe muuɗum na keeda yeeso hukum oon faro lettugal. Kamɓe kaybanta nokkuure seniinde ndeen e innde Israa'iila fuu. Si mo wanaa almaami ɓattake ɗum fu, wo bareteeɗo.
39 Lewinkooɓe worɓe gilla mo lewru wooturu yaade yeeso fuu wo 22 000 fodde cuuɗi muɓɓen. Limgal ngaal wo Muusaa e Haaruuna ngaɗi ɗum dow yamiroore Joomiraaɗo.
No hammadiiɓe Israa'iila ndimɗiniraa
40 Joomiraaɗo wi'i Muusaa:
— Limaa hammadiiɓe Israa'iila fuu gilla mo lewru wooturu yaade yeeso de mbinndaa inɗe muɓɓen. 41 Ndeen, ittanaa kam Lewinkooɓe faa laatoo jeyal am loomta hammadiiɓe Israa'iila. Miin woni Joomiraaɗo. Noon dikkorɗi daabaaji maɓɓe du laatorto jeyal am lunnde dikkorɗi daabaaji Israa'iilankooɓe.
42 Muusaa limi hammadiiɓe Israa'iila fuu hono no Joomiraaɗo yamiri noon. 43 Hammadiiɓe gilla ɓe lewru wooturu ɓe inɗe muɓɓen mbinndaa fuu wo 22 273.
44 Joomiraaɗo wi'i Muusaa:
— 45 Cenndaa Lewinkooɓe faa laatoo jeyal am loomta hammadiiɓe Israa'iilankooɓe. Miin woni Joomiraaɗo. Noon dikkorɗi daabaaji maɓɓe du laatorto jeyal am loomta dikkorɗi daabaaji Israa'iilankooɓe. 46 Hammadiiɓe Israa'iilankooɓe ɓurdi limgal Lewinkooɓe worɓe 273. 47 Ndelle faa heddiiɓe ɓeen ndimɗinee, sey mono fuu yoɓanee buuɗi cardi 5 fodde ponndirɗe nokkuure seniinde ɗi teddeefi ngootu muɓɓen fuu wo garamuuji 10. 48 Kokkaa buuɗi ɗiin Haaruuna e ɓiɓɓe muuɗum, ɗi laatoo ko rimɗinta hammadiiɓe Israa'iila 273 heddiiɓe ɓeen. 49 Muusaa hawrondini buuɗi rimɗingol heddiiɓe ɓe Lewinkooɓe loomtaay ɗiin. 50 O jaɓi buuɗi 1 365 to Israa'iilankooɓe fodde ponndirɗe nokkuure seniinde. 51 Ndeen o hokki buuɗi rimɗingol ɗiin Haaruuna e ɓiɓɓe muuɗum fodde no Joomiraaɗo yamiri mo.