आकिर रोजकुना तकलिप्क
3
1 आकिर रोजकुने इरगा तकलिप्कुना रोज्कु वायना मंता, इद मति इर्रा. 2 बारित्ते अव रोजकुने मनकलोर सतता बारेमतेन विचार कींतुर, कोत्तन पावरम कींतुर, सतता बारेमते पेद्दा-पेद्दा पोल्लें वेह्कुंतुर, गर्राते मनंतुर, बदनाम कियानोर आंतुर, तल्लुर-बाबोना पोल्ले केंजुर, दन्यवाद वेहुर, अपवित्र आंतुर, 3 दया-माया मन्नो, मापि कियना मनसु मन्नो, वेरेतोरा अपमानम कींतुर, ओप्केते मन्नुर, ओरा जीवा नोय्यो, जिवरासिनलेह्का कींतुर, बेसतदुन हय्सुर, 4 पसांचंतुर, मंचि-सेड्डा विचारम किय्युर, सतता बारेमते पोंगुडतनम पोंगंतुर, पेनदा पावरमकन्ना सुकमतुने एक्को पावरम कींतुर, 5 पलाताल पेनदा बक्ति कीतापे दिस्संतुर गानि आ बक्तिता बलमतुन मात्रम नम्मुर. इसंटोरगटाल लक्कु मन. 6 ई लोकुल्कुने इच्चुर इसंटोर मंतुर गदा, बव मुर्ताह्क अय्ते कमजोर मनसु आनि पापमता मोताते रका-रकाल्कुना आसेने निंडिस पिस्सेक मंतां, अव मुर्ताह्कुना लोह्कुने होंचि अवुन ओराहेके कीकुंतुर. 7 इव मुर्ताह्क बस्केळ्क करियसेकेन मनंतां, गानि सत्तेम बतल अव तेल्पिच्कुन्नों. 8 यन्नेस, यंब्रेस इनानोर मूसांक अड्डम तिरियतुर. ओर लेह्कने ई मनकलोरगुडा सत्तेमकु अड्डम तिरियंतुर. ई मनकलोरा बुद्दि हेळसोंचि विस्वासमते हर्रि तप्सि मंतुर. 9 गानि ईर इंका मुन्नेळ्क होना परुर. बारित्ते मूसांक अड्डम तिरियता इव्वुर मनकलोर बल्हा तेल्वि तक्कोतोर इंचि अंटोर्क तेळियसि होत्ता, अल्हेन ईरा तेल्वि तक्कोतनमगुडा अंटोर्क तेळियसि होन्नार.पौलुसना आकिरता आदेस
10 गानि निमे नावा कराहमळतुन, नावा ताकमळतुन, नना पिस्सना उद्देसमतुन, नावा विस्वासमतुन, नावा ओप्केतुन, नावा पावरमतुन, नावा दैरनेमतुन, 11 नना अंताकिया, इकुनियुम आनि लुस्रा इनना सहरकुने नना बोगांच्ता तकलिप्क, नना अर्ता बादां, इव अन्नि नीकु एरपाटे मंतां. आयना इव अन्नि तकलिप्कुनाल सामि नाकुन कापाळतोर. 12 किरिस्तु येसुना लोप्पो पेनदा बक्तिते ताकंतन इंचि इच्चा इर्राना अंटोर्क कस्टाल्क अय्ते वायानुंगे. 13 आनि कराब कियानोर, मुळाह्नोर, वेरेतोर्कुंक दोका हीसेके, ओर दोकाते अरसेके इंकिच्चो कराब आंतुर.
14 गानि निमे बतल करियतिनो, बतल विस्वासम कीतिनो आनि अवुन निमे बोनहेंदाल करियतिन नीकु एरपाट मंता. अवुने उंदेतीर ताकसेक मन. 15 अचोने आयका, निमे सिन्नस्केटाल पवित्र दर्मसास्त्रमकुना पोल्लेन करियतोन आंदिन. अवु नीकु किरिस्तु येसुनपोर्रो विस्वासम इरते दोर्कना मुक्तितुन दोर्किच्कुननाहाटीं बुद्दि, तेल्वि हींतां. 16 दर्मसास्त्रमते रासि मनना पूरा पोल्लें पेनदा प्रेरनाहेंदाल रासतव आंदुं. अव पोल्लें कराहनाहाटीं, तेळियागोट्सि वेहनाहाटीं, तप्पुन सुदरांचनाहाटीं आनि सत्तेमंतुल्क आयानाहाटीं टेरनिंग हियालय कबळ्क ओज्जंतां. 17 अद बल्हा इत्ते, दर्मसास्त्रमहेंदाल पेन दाना हरेक मनकन पुरागा दानालायक कीसि, अन्नि तीरकुना बेसता कबाह्क कियनाहाटीं, ओर्कुन तयार कींता.