येसु किरिस्तुना बेस सिपाइ आयना
2
1 ना मर्रि तिमोति, किरिस्तु येसुनगा मनना दयाते निमे बेस बलवंतुन आम. 2 वेल्लेन मंदि लोकुल्कुना मुन्ने नाहेंदाल निमे केंजता पोल्लेन, बोरय्ते वेरेतोर्क कराह परांतुर, असोंटा विस्वासमलायक मनानोर्कुंक अप्पाजेप्पा. 3 किरिस्तु येसुना वरोर बेस सिपाइनालेसीं निमेगुडा तकलिप्क बोगांचा. 4 लडाइहाटीं पेय्सता बोरे सिपाइ वट्टि सम्सारम पोल्लेने हिरकोर. बारित्ते ओन्कु अद नवकरि बोरय्ते हीतोरो ओन्कु कुसि हियमळे ओना गुरि मनंता. 5 अल्हेने वरोर कुस्तिं अर्रानोर नियमकुन पीसि कुस्ति अर्राकोंटे ओन्कु किरिटम दोर्को. 6 कस्टपळना कास्तकारि मनकंक, पंडता पंटाता मोदाटा पाल एतना अदिकारम मंता. 7 नना वेहना पोल्लेना बारेमते विचारम कीम, अन्नि पोल्लें तेळियाहाटीं सामि नीकु बुद्दि हियानुर.8 नना वेहता बेसता कबुर परकारम, दाविद राजाना वंसंमते पुटसि, हामुरताल मर्रा जीवाते येसु किरिस्तुन मतिते इर्रा. 9 इदे बेसता कबुर वेहताहाटीं नना जेलुंक होत्तन. आनि वरोर तप्पु कीतोना कय्कुंक वाटताप नावा कय्कुंक बेडीं वाटतुर. गानि पेनदा पोल्ले मात्रम बेडिने दोह्चि हिल्ले. 10 अदुनहाटींगें नना, किरिस्तु येसुना लोप्पो दोर्कना मुक्ति पेन पेरतोर्क, पेद्दातनमतोनि दोर्कना इंचि बच्चुं कस्टाल्कय्ना अन्निन सहन कींतन.
11 इद पोल्ले विस्वासम कियनलायक मंता, अद बतल इत्ते, ओक्कला मनम ओनतोनि हातोम इनानय्ते, ओनतोनि पिस्संतोमगुडा. 12 मनम ओर्सकुंचेके मनानय्ते, ओनतोनि राज्येम इंका कींतोम. ओक्कला मनम ओन एरपाट किय्योन इनानय्ते, ओर इंका मनाकुन एरपाट किय्योर.
13 मनम विस्वासमलायक मनाकोन्ना ओर मात्रम विस्वासमलायक मनंतोर. बारित्ते ओनद ओर बस्केन एरपाट किय्योन इंचि इन्नोर.
पेन पेरता सेवाकुड
14 इव अन्नि पोल्लें निमे ओर्कु मति कीसि हीसेक मन्नु. इंका केंजानोर्कुन हेळाहनालायक बतले पायदा हिलुवा पोल्लेनाहाटीं वाद-विवाद किया मन्नि, इंचि ओर्कुन सामिना मुन्ने निलाह्चि दटांचि वेहा. 15 बस्केने सिग्गु होनाकोंटा, पेनदा पोल्लेता सत्तेमतुन बरोबर कराहनोनलेसीं पेन निल्हाता वरोर सेवाकुड आसि मनालय कोसिस कीम. 16 बक्ति हिलुवा वट्टि पोल्लेनाल तप्पिच्कुन, असोंटा पोल्लें लोकुल्कुन हेळाह्चि पेनदागटाल इंकिच्चो लक्कु कींतां. 17 असोंटा लोकुल्कुना वळ्कुमळ उंदि कुल्लिसि-कुल्लिसि पेद्दागा आयना पुन्नुलेह्का मनंतां. हुमिनयुस आनि पिलेतुस असंटोरे आंदुर. 18 ओर इव्वुरगुडा सत्तेम हरदाल तप्सोंचि, हासि मर्रा जीवाते तेदमळ आसोत्ता इंचि इंतुर. इसोंटा पोल्ले वळ्कीसि ओर इच्चुर लोकुल्कुन विस्वासतुन हेळाह्चंतुर. 19 गानि पेन दोह्ता पुनादि बस्केळ्क नित्तिसि मनंता. अद पुनादि पोर्रो, “सामिंक ओना लोकुल्कु बोर आंदुर, ओन्क एरपाटे,” आनि “सामिना पोर्रोल एताना हरेक मनकल, तप्पुड कबाह्कुनाल लक्कु मनगोम,” इंचि सिक्का वाटसि मंता.
20 सिरमंतुल्कुना लोह्कुने सिराप एंडि-बंगारमता बोळिंगें मनंतां इंचि आयो, अगा कट्टेतव आनि तोळितवगुडा बोळिं मनंतां. अव्टे एक्को इलुवातवुन पेद्दा-पेद्दा कबाह्कुनेन वाळकुंतुर आनि तक्को इलुवातवुन बारे बस्केळ्क वाळकुंतुर. 21 अदुनहाटीं बोरन्ना मनकल तक्को इलुवाताल मनानय्ते, ओर पेद्दा-पेद्दा कबाह्कुने वाळकुनना बोळिंलेह्काटोर आयनुर. अस्के ओर पवित्र आसि ओना मालकुना कबळ्क ओज्जंतोर आनि अन्नि तीरकुना बेसता कबाह्क कियालय ओर तयार मनंतोर.
22 लेय्या तानमते वायाना कराब इच्चानाल लक्कु मन. पवित्र मनसुने सामिंक आरादना कीसेके मनानोरतोनि कलियसि नितिते, विस्वासमते, पावरम आनि सांतिते मनालय कोसिस कीम. 23 तेल्वि तक्को आनि बेकार पोल्लेनाल लक्कु मन. नीकु अय्ते एरपाटे, असोंटा पोल्लें वाद-विवाद जगडाल्कुन पुटसंतां. 24 इंका सामिना सेवाकुड बस्केन जगडम कियाकोंटा, अंटोरपोर्रो दया हुप्पिचानोर आयगोम, ओर कराहनालायक मनगोम, ओप्केते मनगोम. 25 नीवा विरोदमते वळ्कानोर्कुंक सांत मनसुने तेळियागोट्सि वेहा. सत्तेमता बारेमते तेल्पिच्कुननाहाटीं पेन ओर्कु मार मनसु हियार. 26 अस्के ओर्कु बेस तेल्वि वासि, ओरा सतता इच्चातुन दोर्किच्कुननाहाटीं देय्यमता कयदाल इळबळानुर. बारित्ते देय्यम सतता इच्चान दोर्किच्कुननाहाटीं ओर्कुन दोह्चि वाटसि इर्ता.