तिमोतिंकु पौलुस रासता रोंडोव सिट्टि
1
1 पेनदा इच्चाताहेंदाल किरिस्तु येसुना प्रेरित आता पौलुसना इद सिट्टि आंद. किरिस्तु येसुनपोर्रो विस्वासम इर्ते, बस्केळ्क पिस्सना पिसवर दोर्कंता इंचि पेन पोल्ले हीसि मत्ता, इदुना बारेमते वेहनाहाटीं नाकुन लोहचियमळ जर्गता.2 नावा पावरमगल्ला मर्रि तिमोतिंकु नना रासतन. नीकु मना पेनबाबनहेंदाल आनि सामि किरिस्तु येसुनाहेंदाल दया, कृपा आनि सांति दोर्किकांटि.
दन्यवाद आनि दैरनेम
3 नावा पारतनाने नीकुन बस्केळ्क मति कीसेके, ना तादो-बाबुर्कनालेह्का नना मनसुना पोल्लेते, बद पेनदद अय्ते सेवा कीसंतनो, अद पेनदुक दन्यवाद वेहचंतन. 4 नावाहाटीं निमे पोंगगोटता कांडेरतुन मति कीसि नना नर्का-पिय्यल नीकु कलियाना इंचि इच्चा कीसंतन, इवटेने नावा आनंदम पुरागा आंता. 5 नीवा आ सत्तेम विस्वासम नाकु मति मंता. आ विस्वासम, मुन्ने नीवा काको लुइस आनि नीवा यावल युनिसनगागुडा मनुंदु. अदे विस्वासम निहगागुडा मंता इंचि नाकु बरोसा मंता. 6 इदुनहाटीं नना नीकु मति कीसि हियानद बतल इत्ते, नना नीवा पोर्रो कय इरतस्के, पेनदाहेंदाल नीकु उंदि वरम दोर्कता. अद वरमतुन निमे बस्केळ्क एल्गिच्चि इर्रा. 7 बारित्ते मनाकु पेन हीता आत्मा मनाकुन पिरकिर्क किय्यका, मना लोप्पो अद बलम, पावरम आनि ओप्केतुन निहंता.
8 अदुनहाटीं मना सामिना बारेमते आयि, ओनाहाटीं जेलने मनना नावा बारेमते आयि वेरेतोर्क गवाइ वेहालय बस्केन सिग्गु अरमा. दानकु बदुल, बेसता कबुरतुन वेहनाहाटीं पेन हीता बलमते निमे नातोनि तकलिप्क सहन कियालय तयार मन्नु. 9 पेन मनाकुन कापाळसि, दाना पवित्र पोल्लेते केय्ता. इदंता मना कबाह्कुनहेंदाल जर्गा हिल्ले गानि सिराप ओना पिलान परकारम आनि ओना दया-मायाहेंकेन जर्गता. ई दया-मायातुन पेन बाबाल मनाकु ई दुनिया पुट्टका मुन्नेन किरिस्तु येसुनाहेंदाल हीतोर. 10 गानि इंदके इद पोल्ले, मनाकुन कापाळना किरिस्तु येसु वाताहेंका मनाकु तेळियसोत्ता. ई किरिस्ते हामुरतुन रद्द कीसि, बेसता कबुरताहेंदाल पिसवरतुन आनि अमरत्वतुन पलाते अराह्तोर. 11 इदे बेसता कबुरतुन प्रचार कियनाहाटीं प्रेरित आनि कराहनोर इंचि नाकुन निलाह्मळ जर्गता. 12 इदुनाहाटींगे नना इद जेलते तकलिप्क बोगांचेक मंतन. अय्नागानि नना सिग्गु अर्रोन. बारित्ते नना बोन पोर्रो विस्वासम इरतन ओर नाकु एर्के. इंका ओर नाकु बतल अय्ते अप्पजेप्तोरोa अदुन, मल्सि वायाना आ रोजु वायनदाका कापाळा परांतोर इंचि नाकु बरोसा मंता. 13 किरिस्तु येसुना लोप्पो मनना विस्वासम आनि पावरमता हेंदाल निमे बव सत्तेम पोल्लें अय्ते नाहेकेटाल केंजतिनो, अवुन पीसि वेरेतोराहाटीं उदाहरनलेह्का. 14 मना लोप्पो मनना पवित्र आत्माता बलमतोनि, नीकु अप्पाजेप्ता मंचितनमतुन निमे कापाळकुन.
15 आसिया राज्येमते मनानोर अंटोर नाकुन होळसि होत्तुर इत्ता पोल्ले नीकु एरपाटे. अव्टे पुगिलुस आनि हिरमुगिनेसगुडा मंतुर. 16 नावा कय्कुंक बेडीं वाटसि मंतां इंचि सिग्गु अर्राकोंटा, उनेसिपुरुस इनानोर, नाकु ऊके-ऊके कलियसि नाकु वेल्लेन प्रोत्साहन हीतोर. सामि ओना कुटुंबमपोर्रो दया हुप्सिरकांटी. 17 अचोने आयका ओर रोम सहरते वातस्के, नना दोर्कनदाका नाकुन मनसु तासि पह्कसेक मत्तोर. 18 नना इपिसुस सहरता मननेंके, ओर नाकु वेल्लेन रकाल्कुना सहायम कीतोर नीकु अय्ते बेस तेळियसि मंता. सामिना मल्सि वायाना आ रोजुने, ओनपोर्रो दया हुप्सालय सहायम किय्यि इंचि नना कोरसेक मंतन.