4
1 पेनदा मुन्ने आनि जीवाते मत्तोरद, हातोरद न्यायम कियना किरिस्तु येसुना मुन्ने इंका ई दुनियाते ओना मर्रा वायमळतुन आनि ओना राज्येमतुन मुन्ने इरसि नना नीकु आदेस हींतन गदा, इद दुनियाते पेनदा मुन्ने, मर्रा वासि राज्येम कियानुर अस्के जीवाते मत्तोरद आनि हातोरद न्यायम कियना येसु किरिस्तुना मुन्ने, नना नीकु दटांचि वेहानद बतल इत्ते, 2 पेनदा पोल्लेतुन, टाइम दोर्किना दोर्काकोन्ना प्रचार कियालय तयार मन, अन्नि तीरकुना ओप्केते ओर्कु कराहसेके, दटांच्सेके तेळियागोट्सि वेहा. 3 नना इल्हा बारि वेहासेक इत्ते, बेस बोदातुन लोकुल्कु केंजुर असोंटा कालम वायना मंता. ओर ओरा मनसुंक वाताप ताकंतुर आनि ओरां दुर्दा केव्कुंक बतल अय्ते केंजमळ इस्टमो, असोंटा पोल्लें कराहना गुरुल्कुन सततातोनि कल्पकुंतुर. 4 ओर सत्तेम पोल्लेन केंजुर आनि तयार कीसि वेहना कतां केंजालय दांतुर. 5 गानि निमे बसोंटा परिस्तिति वायिना, पजोळ्क होनाकोंटा नित्तिसि मन. तकलिप्क वाते सहन कीम, बेसता कबुरतुन वेहाना नीवा कबळतुन कीसेके, निमे कियना पेनदा सेवाता कबळ पुरागा कीम.6 नना अय्ते पेनदुक मोक्कु हियना पट्टुनगड्कa एवतन. दुनियातुन होळसि होनना नावा वेला दग्गेर्क एव्ता. 7 सामिना पोर्रोटा विस्वासम बारेमता लडाइते, नना लडाइ बेस कीतन, नना बेस वित्तुतन. नावा विस्वासमतुन नना कापाळकुत्तन. 8 नावाहाटीं इर्सि मत्ता नितिता किरिटम, सत्तेमते न्यायम कियना सामि, ओर मल्सि वातानाडु नाकु अदुन हींतोर. सिराप नाके आयो गानि, बोर-बोरय्ते ओर दिसना रोजुन पावरमते एदुर हूळसेके मंतुरो, ओर्कु अंटोर्कगुडा हींतोर.
तिमोतिंकु पौलुसना आकिर पोल्लें
9 बच्चोर बिराना आते अच्चोर बिराना निमे नहगा वायाना कोसिस कीम. 10 बारित्ते देमासु इनानोर ई दुनियाता पावरमते नाकुन होळसि तेसलोनिका सहर होत्तोर. क्रेसेंस इनानोर गलातिया राज्येमते होत्तोर आनि तितुस इनानोर दलमतिया राज्येमते होत्तोर. 11 सिराप लूकाले नातोनि मंतोर. निमे वायनेंके मरकुसुन नितोनि पीसि वा. सेवा कबळते ओर नाकु वेल्लेन सहायम कींतोर. 12 तिकिकुस इनानोन नना इपिसुस सहर लोह्तन.
13 त्रोआस सहरते करपुस इनानोना लोन नना नावा कोट इर्सि वातन. निमे वायनेंके दान पीसि वा. अल्हेने नावा पुस्तकाल्कु, विसेस कीसि तोलतोनि तयार कीता, हुटसि मत्ता पुस्तकाल्कगुडा पीसि वा.
14 सिकंदर इनना कम्मरि नावाहाटीं वेल्लेन कराब कबाह्क कीतोर. ओर कीता कबाह्कुन पीसि, सामिगुडा ओन्क अल्हे हियानुर. 15 मनम वेहता पोल्लेंक ओर वेल्लेन अड्डम तिरियतोर. अदुनहाटीं निमेगुडा ओनागटल जेगर्ता मन.
16 नावा न्यायम जर्गनेंके, नना मोट्टा मोदाटा जवाब हीतन अस्के, नावाहेंदाल जवाब हियालय बोरे मना हिल्लुर. अंटोर नाकुन होळसि होत्तुर. ओर अल्हा कीतदुनहाटीं पेन ओर्कुन लेक्का तल्काकोंटेन बेस. 17 गानि नाहेंदाल बेसता कबुर अंटोर्क एव्सि, दान यहुदि आयवोर अंटोर केंजगोम इंचि, सामिना तोळ मंचेके नाकु बलम हीतोर. इल्हा नाकुन सिंहम तोडदाल कापाळतोर. 18 सामि मनना स्वर्ग राज्येमते नना होनालय, ओर नाकुन हरेक कराब कबाटाल कापाळनुर. ओनके बस्केळ्ताहाटीं पेद्दातनम दोर्कि. आमीन.
पौलुस आकिरते अंटोर्क नमस्कारम कींतोर
19 पिरिस्किल्ला, अकविल्ला आनि उनेसिपुरुसना लोतोर्कुंक नावा नमस्कारम वेहा. 20 इरास्तुस इनानोर कुरिंति सहरते आगतोर. तोरोपिमुस इनानोर बिमार मत्ताहाटीं नना ओन मिलेतुस इनना सहरतेन होळसि वातन. 21 पीनि कालम वायाका मुन्नेन निमे इग्गे वायना कोसिस कीम. इबुलुस, पुदेंस, लिनुस, क्लवदिया आनि कळमातोर अंटोर दादालोर नीकु नमस्कारम वेह्चंतुर.
22 सामि नीवा आत्माकु तोळ मन्निर.