किरिस्तुना जीवा अरमळ
15
1 विस्वासुल्कुनिटा! नना मीक वेहता बेसता कबुरतुन मर्रा उंदि मल्का मति कीसि हीसेक मंतन. अद बेसता कबुरतुन ओप्कुत्तिर आनि अवने गट्टिगा निल्सिगुडा मंतिर. 2 नना वेहता बेसता कबुरतुन मिमेट होळ्साकुंटा पीसि मत्ते पेन मीकुन पिसागोटंता. हिलाकुंटे मीवा विस्वासम कियमळ वेर्तम आंता. 3 अदुनहाटीं अन्निंकन्ना मुन्ने नावागह्क एवता पोल्लेतुने मीवागह्क एविस्तन. अद बतल इत्ते, दर्मसास्त्रमता पोल्ले मत्ताप, किरिस्तु मना पापाल्कुनाहाटीं हातोर, 4 बोंदा दोस्तुर आनि दर्मसास्त्रमते रासताप मूडो रोजुने जीवातेगुडा तेदतोर.a 5 जीवाते तेदतस्के कैपांकb दिसतोर, पजा पन्नेंडु प्रेरितुल्कुंक दिसतोर. 6 अद आता पजा, हेय्युं नुह्कुंकन्ना एक्को मंदिक उंदे मल्का दिसतोर. ओरागटाल वेल्लेटुर इदवेरदाकागुडा जीवाते मंतुर, गानि इच्चुर हातुर. 7 मर्रा याकोबुंक दिसतोर, दाना पजा अंटुर प्रेरितुल्कुंक दिसतोर. 8 अंटुर्कन्ना आकिरते, नना रोजकु निंडाका मुन्ने पुटतोनसंटोन, नाकगुडा दिसतोर. 9 बारित्ते, नना अंटुर प्रेरितुल्कुंकन्ना सिन्नोन आंदुन, नना पेनदा कलिसियातोर्कुन तिप्पल्क कीतोन आंदुन. अदुनहाटीं प्रेरित इनना लायकगुडा हिल्लेन. 10 गानि इंदके बतलय्ते मंतानो, पेनदा दयातेने मंतन. अद दया नाक एर्तम आया हिल्ले. नना कळमता प्रेरितुल्कुंकन्ना एक्को कस्टम कीतन. अय्नागानि निजम इत्ते नना किया हिल्लेन, पेनदा दया नावातोनि मत्ता, अदे कीता. 11 अदुनहाटीं नना पेनदा पोल्ले वेहना, ओर वेहना मोमोट अंटुरम उंदे पोल्ले वेहंतोम. अदुन मिमेट विस्वासम कीतिर.मनम जीवाते तेदमळ
12 किरिस्तु हातोरा लोप्पोटाल जीवाते तेदतोर इंचि मोमोट गिंटा कबुर वेहानय्ते, हातोर मर्रा जीवाते तेदुर इंचि मीवा लोपोटुर इच्चुर इंतुर. अल्हा बारि इंतुर? 13 हातोर मर्रा जीवाते तेदाकुंटे, किरिस्तुगुडा हासि जीवाते तेदा हिल्लोर. 14 किरिस्तु गिंटा जीवाते तेदाकुंटे, मोमोट वेहाना बेसता कबुर एर्तमे आनि मीवा विस्वासमगुडा एर्तमे आंद. 15 अचोने आयाका, किरिस्तु हातोरा लोप्पोटाल जीवाते तेदतोर इंचि मोमोट मीक वेहतोम. हातोर गिंटा जीवाते तेदाकुंटे, पेन किरिस्तुनगुडा जीवाते तेहा हिल्ले इंचि तेळियंता. अदुना हेंदाल मोमोट पेनदा बारेमते आबद्दम गवाइ वेहताप आंता. 16 अल्हेने हातोर गिंटा जीवाते तेदाकुंटे, किरिस्तुगुडा जीवाते तेदा हिल्लोर. 17 किरिस्तु गिंटा जीवाते तेदाकुंटे, मीवा विस्वासम एर्तम आंद आनि मिमेट इदवेरादाका पापमतेने पसांचि मंतिर. 18 अल्हा अय्ते, किरिस्तुन विस्वासम कीसि हातोरगुडा नासडेमताल पिस्सा पर्राहिल्लुर. 19 सिराप इद बूमिपोर्रो पिस्वरहाटींगे किरिस्तुना पोर्रो मना आसे इर्ते, मना गति अंटुर मनकलोर्कुंकन्ना एक्को गोसातद आयार. 20 गानि निजम बतल इत्ते, किरिस्तु हामुरताल जीवाते तेदतोर. बोरय्ते विस्वासुल्कु हासि होत्तुर, ओराव्टेताल जीवाते तेदतोर ओरे मुन्नेटोर आंदुर. 21 बल्हा अय्ते वरोर मनकनहेंदाल हामुर वाता, अल्हेने वरोर मनकना हेंदाल हामूरताल मर्रा जीवाते तेदमळगुडा वाता. 22 बारित्ते, आदमुन लोपो अंटुर हासि दांतुर, किरिस्तुन लोपो अंटुर जीवाते तेहमळ जर्गार. 23 हरेक मनकल वरोन पजा वरोर, मोदाला किरिस्तु जीवाते तेदतोर, किरिस्तु मर्रा वाता पजा ओना लोकुल्कु जीवाते तेदांतुर. 24 अदुन पजा, पूरा सरकार, पूरा अदिकार आनि ताकत इव अन्निन किरिस्तु नासडेम कीसि पेन बाबाना कय्दे राज्येम अप्पाजेप्पंतोर. अस्के बूमिता आकिर आयार.c 25 बारित्ते, किरिस्तु ओना पगातोर्कुन काल्कुना हिळु तरानादाका, ओर राज्येम कियमळ गावाले. 26 हामुर अन्निंकन्ना आकिर पगातद आंद, अदुनगुडा नासडेम कींतोर. 27 बारित्ते, पेन अन्निन किरिस्तुना काल्कुना हिळु इरता. अन्निन इंचि इत्ते, पेनदुन होळसिसि अन्निन इंचि बरोबर एर्का आंता. 28 अन्निन ओना अदिकारते इरता पजा, पेन अन्निन ताकिचागोम इंचि मर्रि कुद दाना अदिकारते आंतोर. बारित्ते पेने अन्निन ताकिचंता. 29 मर्रा जीवाते तेदाकुंटे, हातोराहाटीं येसुना पोर्रोलते बाप्तिस्मा एततुर, ओर बतल कियानुर? हातोर गिंटा जीवाते तेदाकुंटे ओराहाटीं बाप्तिस्मा बारि एताना? 30 आनि बस्केळ्क मना जीवातुन बारि डेंजरते इर्राना? 31 विस्वासुल्कुनिटा! मिमेट मना येसु किरिस्तुना लोपो विस्वासमते गट्टिगा मत्ताहाटीं, नना मीवा बारेमते पेद्दिरकेम वेहकुंचेके मंतन. अदुनहाटींगे नावा हामुरतुन रोज हूळसेक मंतन. 32 इपीसि सहरतगा, नना केडा जिवरासिनसोंटा मनकलोर्कुना रीतिते लडांचतन, अय्ते बतल पाय्दा आता? हातोर गिंटा तेदाकुंटे, दर्मसास्त्रमते रासि मत्ताप, “नाळि अय्ते हायानदे मंता, अदुनहाटीं तिनकोम-उनकोम,” इंचि मन्नेम.d 33 गानि हातोर मर्रा जीवाते अर्रुर इंचि इनानोरा हेंदाल दोकाते अरमट. “कराब लोकुल्कुना दंटा, बेस ताकानोर्कुन नासडेम कींता.” 34 अदुनहाटीं नितिते ताकसि उस्सारते मंटु, इंका पापम कियमटु. मीवा लोपो बच्चुटुरो पेनदुन एरपाट कियवोरगुडा मंतुर, मीक सिग्गु वायागोम इंचि इद पोल्ले वेहसेक मंतन.
जीवाते तेदता मेंदुल
35 गानि बोरन्ना, “हातोर जीवाते बल्हा तेदंतोर? जीवा अर्ता पजा मेंदुल बल्हा मनंता?” इंचि पूसकिया परांतुर. 36 ए बुद्दि हिल्वोना! निमे बूमिते एदता पेळे, मुन्ने हासि, पजाटाल मोलियंता. 37 निमे एदतद, मोलियता मोल्का आयो, पेळे आंद. अद गोह्कुना पेळे हिलाकुंटे इंका बदाना पेळे आयावच्चु. 38 गानि पेन दाना इच्चातीर दान्क रुपम हींता. वेरे-वेरे पेळेकु, वेरे-वेरे रुपम हींता. 39 गानि अन्नि मेंदुल्क उंदेतीर मन्नों, मनकना मेंदुल वेरे, जिवरासिना मेंदुल वेरे, पिट्टेना मेंदुल वेरे, जिम्माना मेंदुल वेरे मंता. 40 स्वर्गते मनानोरा मेंदुल आनि बूमि पोर्रो मनानोरा मेंदुलगुडा मंता. गानि स्वर्गमते मनानोरा मेंदुल्कुना महिमा वेरे आनि बूमि पोर्रो मनानोरा महिमा वेरे. 41 पोळ्दुना वेलगु वेरे, वेळ्सिता वेलगु वेरे आनि सुक्काना वेलगु वेरे. सुक्काना वेलगु उंदानद-उंदांक परक मनंता. 42 हातोर मर्रा जीवाते तेदमळगुडा इल्हे मंता. कळियसि होनना मेंदुल्तुन बूमिते दोसंतोम, गानि बस्केने कळियसि होनवा मेंदुल मर्रा जीवाते तेदंता. 43 मेंदुल बूमिते दोस्सनेंके दाना कदर मन्नो, गानि अद मर्रा जीवाते तेदानेंके दानकु वेरेने कदर दोर्कंता. मेंदुल बूमिते दोस्सनेंके दानकु ताकत मन्नो, गानि अद मर्रा जीवाते तेदानेंके वेल्लेने ताकतते तेदंता. 44 बूमिते दोसतद मना दिस्सना मेंदुल आंदु, मर्रा जीवाते तेदानद आत्माता मेंदुल आंदु. अल्हेने दिस्सना मेंदुल मंता, आत्माता मेंदुलगुडा मंता. 45 दर्मसास्त्रमते इदुना बारेमते, “मोदाटा मनकल आदाम जीवाता मनकल आतोर” इंचि रासि मंता. आकिर आदाम, इत्ते किरिस्तु, जीवा हियना आत्मा आतोर. 46 गानि आत्माता मेंदुल मोदाटद आयो, दिस्सना मेंदुले मोदाटद आंद. दाना पजाने आत्माता मेंदुल वांता. 47 मोदाटा मनकल बूमिता तोळिते तयार आतोर, गानि पजाटाल वायाना मनकल स्वर्गमताल वातोर.e 48 तोळिताल तयार आतुर अंटुर मनकलोर्क, तोळिता मनकनालेसिंगे आतुर. स्वर्गमता मनकलोर्क, स्वर्गमतालेसिंगे मंतुर. 49 मनम बल्हा अय्ते तोळिते तयार आतोना रुपम एततोम, अल्हेने स्वर्गमताल वायानोना रूपमगुडा एतंतोम.
50 विस्वासुल्कुनिटा! नना वेहानद बतल इत्ते, हव्वि आनि नेत्तुरता मेंदुल्कु पेनदा राज्येम दोर्का पर्रो, आनि कळियना मेंदुल्कु, कळियवा मेंदुल्तगा अदिकार दोर्का पर्रो. 51 केंजाट, नना मीक मर्ममता पोल्ले वेहसेक मंतन. अद बतल इत्ते, मनम अंटुरम हायोम, गानि मनम अंटुरम बदलांचंतोम. 52 आकिरता तूताकोम उह्कतस्केने, कळु रेप्पा तंतच्चोरजेमनेने जर्गंता. अद तूताकोमता आवाज केंजा वायानेंके, हातोर बस्केने कळियसि होनाकुंटा मनालय मर्रा जीवाते तेदंतुर आनि मनम जीवाते मनानोरम बदलांचि दांतोम. 53 बारित्ते, कळियसि होनना मेंदुल बस्केने कळियसि होनवा मेंदुललेसिं, आनि हायना मेंदुल बस्केने हायाकुंटा मनना मेंदुललेसिं मारिया पींता. 54 बस्के अय्ते कळियसि होनना मेंदुल, कळियसि होनवा मेंदुल्ते मारियंता आनि हायाना मेंदुल हायवा मेंदुल्ते मारियंता, अस्के दर्मसास्त्रमते रासि मत्ताप, “पेन हामुरतुन मिंगसि वाटता” इंचि रासि मत्ता पोल्ले पूरा आंता. 55 “ए हामुर! नीवा गेल्पु बगा मंता? ए हामुर, नीवा हापु बगा मंता?” इंचि रासि मंता. 56 हामुरता हापु पापम आंद आनि पापमता ताकत मूसाना नियम आंद. 57 मना सामि येसु किरिस्तुनाहेंदाल पेन मनाकुन गेल्सगोटंता, इंचि पेनदुक दन्यवाद. 58 नावा पावरमगल्ला विस्वासुल्कुनिटा! सामिना लोपो मीवा कस्टम एर्तम होन्नो इंचि मीक एरपाटे मंता. अदुनहाटीं मिमेट विस्वासमते हीके-हेके आयाकुंटा, गट्टिगा निल्सि मंटु आनि सामिना कबळते इंका एक्को बेर्स्सेके होंटु.