वेरे-वेरे बासां आनि बविस्यवानिं
14
1 अस्के, पावरम इद मीवा लक्से मन्निकांटि. आत्माता वरमकुन पह्काटु, बविस्यवानि वेहना वरम पह्कसेकेन मंटु. 2 बारित्ते, ओनकु तेळियवा बासाते वळ्कनोर, ओर मनकलोर्कुनतोनि आयो गानि पेनतोनि वळ्कंतोर. ओर मर्ममता पोल्लें पेनदा आत्माताल वळ्कंतोर, अव पोल्लें मनकलोर्कुंक तेळियों. 3 गानि बविस्यवानि वेहानोर, मनकलोर्कुना बक्तितुन बेर्सागोटालय, दैरनेम हियालय, सांतिते मनालय वेहंतोर. 4 वेरे-वेरे बासाते वळ्कानोर, ओनदे बक्तितुन बेर्सागोटंतोर. गानि बविस्यवानि वेहानोर, कलिसियातोर्कुन बक्तितुन बेर्सागोटंतोर. 5 मिमेट अंटुर वेरे-वेरे बासाते वळ्कगोम इंचि नना इनकुंतन. गानि दीनकन्ना एक्को बविस्यवानि वेहमळे बेस इंचि इनकुंतन. बारित्ते वेरे-वेरे बासाते वेहानोर, कलिसियातोर्कुन बक्तिते बेर्सागोटालय ओरा बासाते वेहाकुंटे बतल पाय्दा हिल्ले. अदुनहाटीं वेरे-वेरे बासाने वेहानदाकन्ना बविस्यवानि वेहमळे एक्को पाय्दातद आंद. 6 विस्वासुल्कुनिटा! नना मिहगा वासि पेन नाक हीता पोल्लेन वेहकन, तेल्विता पोल्लेन वेहकन, बविस्यवानि वेहकन, आनि कराहकन अस्के मीक पाय्दा आयार. अवुन होळसिसि वेरे-वेरे बासाते वेहते मीक बतल पाय्दा आयार? 7 अल्हेने तुरेल आनि बिन-बिनते जीवा हिल्ले. अय्नागानि अवुन बरोबर नेकिचकुंटे, बतल नेकसेक मंता इंचि बल्हा तेळियंता? 8 आनि तूताकोमता आवाज बरोबर पेय्साकुंटे लडाइ कियालय बोर तयार आंतुर? 9 अल्हेने मिमेटगुडा इंका वरोंक तेळियना पोल्लेते वेहाकुंटे, मीवा पोल्ले ओर्क बल्हा तेळियार? मिमेट वळिते वळ्कताप आंता. 10 दुनियाते बच्चुंगो तीरकुना बासां मंतां, गानि अर्तम हिल्वद बदे बासा हिल्ले. 11 अदुनहाटीं अद बासाता अर्तम नाक तेळियाकुंटे, नना वळ्कानोनतोनि वेरे देसेमतोन आंतन, ओर नावाहाटीं वेरे देसेमतोर आंतोर. 12 अल्हेने मिमेटगुडा पेनदा आत्माता वरमकुने निंडिस मंतिट, अवुनाहेंदाल कलिसियातोर्कुना बक्ति बेर्सना कोसिस कीम्टु. 13 अदुनहाटीं वेरे-वेरे बासाते वळ्कानोर, दाना अर्तम वेहाना ताकत हीम इंचि पारतना कियाना. 14 बारित्ते, नना गिंटा वेरे-वेरे बासाते पारतना कीते, नावा आत्मा पारतना कींता गानि नावा बुद्दि कबळ किय्यो. 15 अय्ते नाक बतल कियमळ गावाले? नना नावा आत्माते पारतना कींतन, नना नावा बुद्दितेगुडा पारतना कींतन. नना नावा आत्माते पाटा पारंतन, नना नावा बुद्दितेगुडा पाटा पारंतन. 16 निमे गिंटा सिराप आत्माते दन्यवाद कियानय्ते, नीवा पोल्ले तेळियवोर अगा उदता मनकल आमेन इंचि बल्हा इननुर? निमे बतल वळ्कतिन ओनकु तेळिया हिल्ले. 17 निमे अय्ते पेनदुक बेस दन्यवाद कींतिन, गानि इंका वरोना बक्ति बेर्सालय अद कबळ किय्यो. 18 नना मी अंटुर्कन्ना एक्को वेरे-वेरे बासाने वळ्काना वरम नाक मंता, अदुनहाटीं नना पेनदुक दन्यवाद कींतन. 19 गानि कलिसियातोर्कुनतोनि वेरे-वेरे बासाते पदि वेय्कुना पोल्लें वळ्कनादानकन्ना, ओर्कुन कराहलय तेळियना बासाते हेय्युं पोल्लें ना बुद्दिते वेहामळे नाक बेस. 20 विस्वासुल्कुनिटा! मिमेट तेल्विते सिन्ना-पिलाल्कुनालेसिं मनमट, गानि पेद्दा मनकलोर्कुनालेसिं मंटु. गानि कराब पोल्लेने सिन्ना-पिलाल्कुनलेसिं तेळियवाप मंटु. विचारम कियमळते पेद्दोरालेसिं मंटु. 21 दर्मसास्त्रमते, “नना तेळियवा बासाने वळ्कनोर्कुना हेंदाल, पराया लोकुल्कुना तोळदाल, ईरतोनि वळ्कंतन, अय्नागानि ईर नावां केंजुर,” इंचि रासि मंता. 22 अदुनहाटीं तेळियवा बासाते वळ्कमळ, विस्वासुल्कुनाहाटीं आयो, गानि विस्वासम कियवोराहाटीं चिन्ह आंद. आनि बविस्यवानि वेहमळ विस्वासम कियवोराहाटीं आयो, गानि विस्वासम कीतोराहाटीं चिन्ह आंद. 23 कलिसियातोर्क गिंटा उंदगा जमा आतस्के, अंटुर तेळियवा बासाते वळ्कालय दल्गते, मीवा लोपो बासा तेळियवोर आनि विस्वासम कियवोर गिंटा वायानय्ते, ओर मीकुन पागल आतुर इंचि इंतुर. 24 गानि मिमेट गिंटा तेळियना बासाते बविस्यवानि वेहते, बोरन्ना विस्वासम कियवोर हिलाकुंटे तेळियवोर मनकल मीहगा वासि केंजते, ओना तप्पुकु ओन्कु तेळियसि, ओर पापमतुन एरपाट कीकुंतोर. 25 ओना मनसुने मक्किस मत्तव पूरा दिसंतां. अदुनहाटीं ओर बोकबोर्लें आर्सि पेनदुन मोळकंतोर आनि “निजमे पेन मीवा लोपो मंता,” इंचि ओप्कुंतोर.आरादना कियानाहाटीं तरिका मनना
26 विस्वासुल्कुनिटा! इंदके बतल कियाना? बस्के अय्ते मिमेट जमा आंतिर, अस्के वरोर पाटा पारालय, वरोर कर्हालय, वरोर पेनदा पोल्ले बय्यार कीसि वेहालय, वरोर वेरे बासाते वळ्कालय, वरोर वेरे बासाता अर्तम वेहालय तयार मनंतुर. इवन्नि कलिसियातुर्कुना बक्ति बेर्सनाहाटीं आयमळ गावाले. 27 वेरे-वेरे बासाते वळ्कना मते, इव्वुर हिलाकुंटे एक्कोते-एक्को मुव्वुर वरोन पजा वरोर वळकिर आनि वरोर दाना अर्तम तेळियागोट्सि वेहिर. 28 गानि अर्तम तेळियागोट्सि वेहानोर गिंटा हिलाकुंटे, वेरे बासाते वळ्कना मनकल चुपचाप मंदना आनि ओना मनसुने पेनतोनि वळ्कना. 29 पेनदा कबुरतोर इव्वुर हिलाकुंटे मुव्वुरे वेहिर, कळमतोर वेहता पोल्लेन परिक्सा कीसि हूळिर. 30 गानि उद्दिस मत्तोरव्टेताल बोर्कन्ना अदे वेलाते पेनदा पोल्ले दोर्कसि अदुन वेहंतन इनकुनाय्ते, मुन्नेटाल वेहासेक मत्तोर चुपचाप उद्दना. 31 मिमेट अंटुर करियना आनि अंटुर सांतिते मंदना इंचि वरोर-वरोर बविस्यवानि वेहा परांतिट. 32 बविस्यवानि कियानोर ओरा आत्मातुन बल्हा इत्ते, अल्हे तिर्हा परांतुर. 33 बारित्ते पेन गळबळ कियानद आयो, सांति हियना पेन आंद. अन्नि कलिसियातुर पेनदा लोकुल्कु इल्हे मनंतुर. 34 कलिसियातुर जमा आतस्के मुर्ताह्क चुपचाप मंदना, बारित्ते अवुंक वळ्कना अदिकार हिल्ले. गानि कय हिळु मंदना आदेस मंता. इल्हा दर्मसास्त्रमतेगुडा रासि मंता. 35 अवुंक बतलन्ना करियना इच्चा मत्ते, लोन होत्ता पजा अव अवुना मुय्दुर्कुन पूसकियाना. बारित्ते कलिसियाते मुर्तळ पूसकियमळ इत्ते सिग्गु होनना पोल्ले आंद. 36 बतल! पेनदा पोल्ले मिहगाटाले पेय्सतना? सिराप मिहागळ्के वाताना? 37 बोरन्ना गिंटा, “नना पेनदा कबुरतोन” हिलाकुंटे, “नना पेनदा आत्मा मत्तोन” इंचि इनकुनानय्ते, नना मीक रासता पोल्लें सामिना हुकुम्कु आंदुं इंचि ओन्क तेळियाना. 38 गानि बोरन्ना गिंटा इदुन ओप्कुनाकुंटे, ओनगुडा ओप्कुनमटु. 39 अदुनहाटीं विस्वासुल्कुनिटा! बविस्यवानि वेहालय तयार मंटु, वेरे बासाते वेहते ओन आपमटु. 40 गानि अन्नि पोल्लें बेस आनि उंदान पजो उंदि जर्गिंकांटि.