पावरम कियमळ अन्निंकन्ना बेस पोल्ले आंद
13
1 नना मनकलोर्क वळ्कानव वेरे-वेरे बासां आनि पेनदा दूताना बासां वळ्कतेगुडा, नावा लोपो पावरम हिलाकुंटे, नना टंग-टंग इनना इत्तोळतसंटोन हिलाकुंटे गल-गल इनना गज्जेनसंटोन आंदुन. 2 नाक गिंटा बविस्यवानि वेहना वरम मनना, अन्नि मर्ममकु आनि तेल्विता पोल्लें तेळियना, गुट्टान जर्पनच्चो पूरा विस्वास मनना गानि नावा लोपो पावरम हिलाकुंटे नना बतले कबळतोन आयोन. 3 नावा पूरा दनमतुन गिंटा गरिबोर्कुंक तूसि हियिना, बेसता कबुर वेहनाहाटीं नावा मेंदुल बोळ्सालय हियिना, नावा लोपो पावरम हिलाकुंटे बतल पाय्दा मन्नो. 4 पावरमते ओप्के मंता, दया मंता. पावरम इंकावरोन पोर्रो कळ्क पोत्ता हिय्यो, पावरम पोमाडेंग किया हिय्यो, पेद्दिरकेम किया हिय्यो. 5 रीत हिल्वा कबाह्क किया हिय्यो, नाके पाय्दा गावाले इंचि इना हिय्यो, सिळांचा हिय्यो, बोरन्ना तकलिपकु कियाना अदुन मनसुने इर्रा हिय्यो. 6 कराब कबाह्कुने कूस आया हिय्यो, गानि सत्तेमते कूस आंतोर. 7 पावरम अन्नि पोल्लें सहन किया वेहंता, अन्नि पोल्लेन पोर्रो विस्वास किया वेहंता. अन्नि पोल्लेन पोर्रो आसे इर्रा वेहंता, अन्नि पोल्लेने ओप्केते इर्रंता. 8 पावरम बस्केने मारो. गानि बविस्यवानि वेहना वरम मारांता, वेरे-वेरे बासां वळ्कना वरम आगसि दांता, मर्मम तेल्पिच्कुनना तेल्वि मत्ते अदगुडा कबळ किय्यो. 9 बारित्ते मना तेल्वि पुरागा हिल्ले आनि बविस्यावानि वेहना वरम पुरागा हिल्ले. 10 गानि बस्के अय्ते अन्निन पुरागा कियाना पोल्ले वायार, अस्के पुरागा हिल्वद मायसि दांता. 11 नना सिन्ना-पेडन मतस्के, सिन्ना-पेडनलेसिं वळ्कुंदुन, सिन्ना-पेडनलेसिं विचारम कियुंदुन, सिन्ना-पेडनलेसिं मनसु मत्ता, गानि पेद्दागारिते सिन्ना-पेडनलेसिं वळ्कना पोल्लें होळसितन. 12 इंदके अद्दमते हूळताप मागुर-मागुर मनाकु दिस्सेके मंतोर, गानि आयंका ओना मुन्ने नित्तिसि हूळंतोम. इंदके नाक पुरागा तेळियो, नावा बारेमते पेनदुक पुरागा तेळियंता. ओर वाता पजा, नाकगुडा पुरागा तेळियंता. 13 इंदके विस्वासम, आसे, पावरम इव मूंड पोल्लें बस्केळ्क मनानवे आंदुं, गानि इंव्टेताल पावरम अन्निंकन्ना पेद्दा पोल्ले आंद.