पवित्र आत्मा हिय्यना वरमकु
12
1 विस्वासुल्कुनिटा! आत्माता वरमकुना बारेमते मीक तेळियाका मनमळ नाक इस्टम हिल्ले. 2 मिमेट पेनदुन विस्वास कियाका मुन्ने, वळ्कवा बोम्मानगा मीक बल्हा वेहते, मिमेट अल्हे ताकिंदिर. 3 अदुनहाटीं पेनदा आत्माते वळ्कानोर बोरे आयिर, “येसु सापनेम दल्गतोर आंदुर,” इंचि इन्नुर. अल्हेने पवित्र आत्माते ताकवोर बोरे आयिर, “येसु सामि आंदुर,” इंचि इन्नुर. 4 वरमकु वेरे-वेरे मनना गानि पवित्र आत्मा उंदे आंद. 5 सेवागुडा वेरे-वेरे तीरुकना मनना गानि सामि वरोरे आंदुर. 6 वेरे-वेरे तीरुकना अदबूतामाता कबाह्क मनना गानि ओरा लोपो कबाह्क कियालय दैरनेम हियना पेन उंदे आंदु. 7 अंटुर विस्वासुल्कुंक पाय्दा आयागोम इंचि मा अंटेताल हरेक मनकानगा पेनदा आत्मा हियमळ जर्गता.8 बल्हा इत्ते, अदे आत्माता हेंदाल वरोर बुद्दिता पोल्लें वेहंतोर, अदे आत्माता हेंदाल इंका वरोर तेल्विता पोल्लें वेहंतोर. 9 अदे आत्माता हेंदाल वरोर विस्वासमते गट्टिगा मनंतोर, अदे आत्माता हेंदाल इंका वरोंक बीमार्क बेस कियाना वरम हियमळ जर्गंता. 10 अद आत्मा बोर्को-बोर्को अद्बूतामाता कबाह्क कियानद ताकत, बोर्को बविस्यवानि कियानद, बोर्को आत्मान लोपो तेडा बतल हूळानद, बोर्को वेरे-वेरे बासां वळकानद आनि इंका बोर्को बासाना अर्तम वेहना वरम हींता. 11 गानि इवन्नि अद उंदे आत्मा दाना इस्टम वाताप वरोंक-वरोंक तूसि हीसि कबाह्कुन पूरा कींता.
मेंदुल उंदि, दाना बागाल्कु वेल्लेने
12 मना मेंदुल उंदे गानि अवने बागाल्कु वेरे-वेरे मंता. अवन्नि बागाल्कु वेल्लेने मनना गानि उंदे मेंदुल्तव आंद, अल्हेने किरिस्तुगुडा मेंदुललेसिं मंतोर. 13 बारित्ते, मनम अंटुरम यहुदिल्क आयना, युनानि आयना, दासुल्क आयना, दासुल्क आयाकुना उंदे आत्मा हेंदाल, उंदे मेंदुल आयालय बाप्तिस्मा एततोम आनि मना अंटुर्कु उंदे आत्मा उहमळ जर्गता.
14 अदुनहाटीं मेंदुल्ते सिराप उंदे बागम हिल्ले गानि वेल्लेने बागाल्कु मंतां. 15 ओक्कला, काल गिंटा, “नना कय आयोन, अदुनहाटीं मेंदुल्ता बागम आयोन,” इंचि इनकुनना गानि अद मेंदुल्ता बागामे आंदु. 16 अल्हेने केव्वु गिंटा, “नना कळु आयोन, अदुनहाटीं मेंदुल्ता बागम आयोन,” इंचि इनकुनना गानि अद मेंदुल्ता बागामे आंदु. 17 ओक्कला, पूरा मेंदुल कळे मत्ते, बगाटाल केंजसि मन्नेम? पूरा मेंदुल केव्वे मत्ते, बगाटाल मूस्कीसि मन्नेम? 18 अदुनहाटीं पेन दाना इच्चा मत्ताप, हरेक बागमतुन मेंदुल्ते बगा-बगा इर्रानो अगा इर्ता. 19 अव अन्नि गिंटा उंदे बागम मंचि मत्ते, मेंदुल बगा मनवळ? 20 अदुनहाटीं बागाल्कु वेल्लेने मंतां, गानि मेंदुल उंदे आंदु. 21 इंदके कळु कय्दुन, “नीवातोनि नाक कबळ हिल्ले,” इंचि इना पर्रो. आनि तला काल्कुन, “नीवातोनि नाक कबळ हिल्ले,” इंचि इना पर्रो. 22 गानि मेंदुल्ते कमजोर मत्ताप दिस्सानव बागाल्के मनाकु वेल्ले अव्सरमतव आंदुं. 23 मना मेंदुल्ते बव बागाल्कुनय्ते तक्को कदरतव इनकुंतोमो अवुने मनम एक्को कदर हींतोम, अव बव अय्ते सिंगारम हिल्वव अव इंका एक्को सिंगारम आंतां. 24-25 गानि मुन्नेटाले सुंगारम मत्ता बागाल्कुन सुंगारम कियाना अव्सरम हिल्ले, गानि बवय्ते बागाल्कु कदर हिल्लोंगो अवुंक एक्को कदर दोर्कमळ गावाले. आनि अव बागाल्कु सिन्ना-पेद्दा बतल इनाका उंदांक-उंदि रंदि कियमळ गावाले, इंचि पेन इल्हा मेंदुल तयार कीता. 26 अदुनहाटीं मेंदुल्तद उंदि बागम गिंटा नोते, दानतोनि अव अन्नि बागाल्कुंक नोंता. उंदि बागमकु गिंटा कदर दोर्कते, अव अन्नि बागाल्कु कूस आंतां. 27 अल्हेने मिमेट अंटुर कलियसि किरिस्तुना मेंदुल आंदिर, आनि हरेक मनकल आ मेंदुल्ता बागाल्कु आंदिर.
28 कलिसियातोर्कुने पेन मुन्ने प्रेरितुल्कुन, ओरा पजा पेनदा कबुरतोर्कुन, ओरा पजा पेनदा पोल्लें कराहनोर्कुन, ओरा पजा अद्बूतामाता कबाह्क कियानोर्कुन, ओरा पजा बीमार्कुन बेस कियानोर्कुन, ओरा पजा सहायम कियानोर्कुन, राज्येम ताकसानोर्कुन आनि वेरे-वेरे बासां वळ्कानोर्कुन निलाहता. 29 इत्ते, अंटुर प्रेरितुल्क आयुर, अंटुर पेनदा कबुरतोर आयुर, अंटुर पेनदा पोल्लें कराहनोर आयुर, अंटुर अद्बूतामाता कबाह्क कियानोर आयुर, 30 अंटुर्कु बीमार्क बेस कियाना वरम दोर्का हिल्ले, अंटुर वेरे-वेरे बासां वळ्कानोर आयुर, अंटुर अव पोल्लेना अर्तम वेहा पर्रुर, 31 मिमेट पेद्दा-पेद्दा वरमकुना आसेते मंटु, इवे आयाका इवुंकन्ना बेसता हर्रि वेहंतन.