आरादनातस्के मुर्ताह्कु तल्ला मुचमळ
11
1 नना किरिस्तुनालेसिं ताकतन, अल्हेने मिमेटगुडा नावालेसिं ताकट. 2 अन्नि पोल्लेने नाकुन मिमेट मति कीसेक मंतिट, नना मीक कराहचि अप्पाजेप्ता पोल्लेने ताकसेके मंतिट, इंचि नना मीकुन तल्सकुंचेके मंतन. 3 गानि मीक इद पोल्ले तेळियमळ गावाले, किरिस्तु, मांडसाता तलातालेसिं आंदुर, मांडसा मुर्ताह्कुना तलातालेसिं आंदुर, पेन किरिस्तुना तलातालेसिं आंदु. 4 बोरन्ना मांडसा पारतना कियानेंके, हिलाकुंटे बविस्यवानि कियानेंके तलातुन मुच्चुकुनानय्ते ओर तलातुनa अपमानम कींतोर. 5 गानि बदन्ना मुर्तळ पारतना कियानेंके हिलाकुंटे बविस्यवानि कियानेंके दाना तला मुच्चुकुनाकुंटे, अद दाना तलाता अपमानम कीताप आनि गुंडु कीताप आंद. 6 बदन्ना मुर्तळ गिंटा तलातुन मुच्कुनाकुंटे दाना केल्कुन कतरिचकुनना. अद केल्कुन कतरिचकुनमळ, हिलाकुंटे गुंडु कीकुनमळ इद सिग्गु पोल्ले आंद इंचि अनपिच्ते, अद तलातुन मुच्चुकुनना. 7 मांडसा ओना तल्लातुन मुचमळ बेस आयो, ओर पेनदा रुपम आनि महिमालेसिं मंतोर, गानि मुरतटा हेंदाल मांडसक कदर आंद. 8 बारित्ते, मांडसा मुर्तटाल वाया हिल्लोर, गानि मुर्तळ मांडसाताल वाता. 9 मांडसा मुर्तटाहाटीं तयार कियमळ आया हिल्ले, गानि मुर्तळ मांडसाताहटीं तयार कियमळ आता. 10 अदुनहाटीं पारतना कियानेंके पेनदा दूतां हूळसेक इंचि मुर्तळ, मांडसाता अदिकारता कय्दा हिळु मंतन इंचि हूप्सालय दाना तला मुचकुनमळ गावाले.11 अय्नागानि पेनदा लोपो मांडसा हिल्वा मुर्तळ मंदा पर्रो, मुर्तळ हिल्वा मांडसा मंदा पर्रोर. 12 बारित्ते, मुर्तळ मांडसाताल तयार आता, अल्हेने मांडसा मुर्तटाल पुटसेक मंतोर, गानि इवन्नि पेनदाले तयार आसेक मंता. 13 अय्ते, मिमेटे विचारम कीम्टु, मुर्तळ तला मुचकुनवा पेनदा पारतना कियमळ बेसे ना? 14 मांडसा तलाता केल्क बेर्सागोटकुनमळ ओनाहाटीं सिग्गु होनना पोल्ले आंद, इद मीक एरपाटे मंता. 15 गानि मुर्तळ दाना केल्कु पोळगु बेर्सागोटकुत्ते दानकु कदर आंद. दाना तलातुन मुचकुनालय पेन दानकु केल्क हीता. 16 इदुना बारेमते बोरन्ना वादम कियानय्ते, ओनकु तेळियाना गदा, मावा इसोंटा रीत आयो आनि कलिसियातोरदगुडा इसोंटा रीत आयो.
पेनदा उपारम
17 मिमेट कलिसियाकुने जमा आयमळ पाय्दा आयो गानि नुकसाने आंता. अदुनहाटीं नना मीवा पेद्दातनम कीसेक हिल्लेन. 18 बस्के अय्ते मिमेट कलिसियाते जमा आंतिर, अस्के मीक वरोनद-वरोंक अर्राका अलग आसेक मंतिट इंचि नना मोदाला केंजतन. इद निजमे इनकुंतन. 19 मीवा लोपो अलग आयमळ बेसे. बारित्ते बोर निजमते पिस्संतोर, ओर दिस्सि अरांतोर.
20 मिमेट सामिना उपारम तिनालय इंचि जमा आंतिर, गानि अदुन सामिना उपारम इन्नुर. 21 बारित्ते मिमेट तिनानस्के वरोंक मुन्ने वरोर, बोनद ओरे तिंतिर. अदुनहेंदाल बोरो कर्वुने मनंतुर, बोरो रिम्मांतुर. 22 मीक तिनालय-उनालय लोन हिल्लेना? हिलाकुंटे पेनदा कलिसियातोर्कुन हय्साकुंटा आनि गरिबोर्कुना इज्जत पोगोटालय आतिरा? इंदके मीकुन नना बतल इनकन? इदुनाहाटीं मिमेट बेस कीतिर इनकना? बस्केने इन्नोन.
23 बारित्ते, सामिनाहेंदाल इव पोल्लें नाक दोर्कतां आनि अवुन नना मीक अप्पाजेप्तन. येसु सामिन बद रोज अय्ते पीसिय्याना मत्ता अद नर्का उंदि हारि एततोर, 24 पेनदुक दन्यवाद कीसि, हारितुन उराहतोर, उराहचि ओर्क हीसेके, “इद मीवाहाटीं नावा मेंदुल आंद, नावा मतिताहाटीं इल्हेने कीम्टु,” इंचि वेहतोर. 25 इल्हा अद तित्ता पजा, अंगुर पानकमता गिलास एतसि, “इद पानकम नावा नेत्तुरता पूना करार आंद, इदुन बस्के अय्ते उंटिर अस्के नावा मति कियाना,” इंचि वेहतोर. 26 बारित्ते, मिमेट बस्के-बस्के अय्ते इद हारितुन तिंतिर आनि अंगुर पानकम उंटिर, अस्के सामिना हामुरतुन ओर मल्सि वायानादाका वेहंतिर. 27 अदुनहाटीं बोरय्ते सामिंक इस्टम हिल्वा रीतुने ताकसि, हारितुन तिंतोर आनि अंगुर पानकम उंटोरो, ओर सामिना मेंदुल आनि नेत्तुरता दोसि आंतोर. 28 इंचि हरेक मनकल कुद बल्हा मंतोर इंचि ओनद ओर परिक्सा कीसि हूळकुत्ता पजाने हारितुन तिनमळ गावाले आनि अंगुर पानकम उनमळ गावाले. 29 बारित्ते सामिना मेंदुल बारेमते तेल्पिच्कुनाका तिनमळ-उनमळ कीते, इदुना हेंदाल ओर ओना पोर्रोने न्यायम तर्कुंतोर. 30 अदुनहाटीं मी लोपो वेल्लेटुर कमजोर आतुर, बीमार्क आतुर आनि वेल्लेटुर हासिगुडा होत्तुर. 31 गानि मनम कुद बल्हा मंतोम इंचि परिक्सा कीसि हूळते, पेन मनाकु न्यायम किय्यो. 32 गानि मनाकु दुनियातोर्कुनतोनि सिक्सा आया मनि इंचि सामि मनाकुन बेस पोल्ले वेहाचि सुदरांचता. 33 अदुनहाटीं नावा विस्वासुल्कुनिटा! सामिना उपारम तिनालय जमा आतस्के अंटुर वायानाल एदुर हूळसि, कूळसि तिंटु. 34 बोरन्ना गिंटा कर्वुने मत्ते लोने तिंचि वायिर. इल्हा कलियमळता हेंदाल सिक्सा तपंता. कळमता पोल्लेन बारेमते नना वातस्के वेहंतन.