बोम्मना पूजा कियमट
10
1 विस्वासुल्कुनिटा! इद पोल्ले मीक तेळियका मनमळ नाक इस्टम हिल्ले. अद बतल इत्ते, मना एनकटा तादो-बाबुर मब्बु तेर्पेता हिळु मंचि अंटुर समुद्रमता नड्डुमताल ताकतुर. 2 आनि मूसाना पज्जो ओर अंटुर मब्बुना हिळु आनि समुद्रमता नड्डुमताल ताकसि बाप्तिस्मा एततालेसिं आता. 3-4 आनि ओर अंटुर उंदे आत्माता गाटो तित्तुर, उंदे आत्माता एर उट्टुर. पेन ओर्क बंडाताल एर हीता. अद बंडा इत्तेने किरिस्तु आंदुर, ओरे ओरतोनि ताकुंदुर. 5 गानि पेन ओराव्टेताल वेल्लेटुर लोकुल्कुनपोर्रो कूस मनाहिल्ले. अदुनहाटीं ओर अदे बय्लि जेगाते हातुर. 6 बल्हा अय्ते मना तादो-बाबुर पेनदुक इस्टम हिल्वा पोल्लेने ताकतुर, अल्हा मनम ताका मनि इंचि इव पोल्लें मनाकु उदारनलेसिं वेहंता. 7 ओरागटाल इच्चुर बोम्मां कीसि मोळ्कतुर, अल्हा मिमेट बोम्मंक मोळ्कना आयो. ओरा बारेमते दर्मसास्त्रमते, “लोकुल्कु तिनालय, उनालय उदतुर आनि तेदसि एगरालय दल्गतुर,” इंचि रासि मंता. 8 ओरागटाल इच्चुर बोगमतनम कियुंदुर. अदुनहाटीं ओर उंदे रोजते इरवै मूंड वेय्कुना मंदितुन हव्कमळ जर्गता. मनम ओरालेसिं बोगमतनम किया मन्नि. 9 ओरागटाल इच्चुर पेनदा पट हूळुंदुर, आनि तरासकु कस्कीसि हातुर. मनम ओरालेसिं सामिना पट हूळा मनि. 10 ओरागटाल इच्चुर गुल्गुंदुर, आनि नासडेम कियाना दूता हेंदाल ओर नासडेम आतुर. ओरालेसिं मिमेट गुल्गमटु. 11 मना तादो-बाबुर्क जर्गता पोल्लें उंदि उदाहरनलेसिं मंचि, आकिर युगमते इव मनाकु तेळियागोम चेतावनि इंचि रासमळ जर्गता.12 बोरय्ते नना विस्वासमते गट्टिगा नित्तिसि मंतन इंचि विचारम कींतोरो, ओर विस्वासमताल अर्रामन्नि इंचि कापाळकुनना. 13 अंटुर्क वायानसोंटवे परिक्सां मीक वातां, दानकन्ना एक्को परिक्सां मीक वाया हिल्लें. गानि पेन विस्वासमतद आंद. अद मीतोनि आया पर्वसोंटा एक्को परिक्साने अर्रा हिय्यो, परिक्सां वाते मिमेट सहन कियागोम इंचि अंटेताल पेय्सना हर्रिगुडा पेन कींता.
सामिना उपारम आनि बोम्माना उपारम
14 अदुनहाटीं नावा पावरमगल्ला दंटातोरिटा! बोम्मन पूजानाल लक्कु मंटु. 15 मिमेट बुद्दिमंतुल्कु आंदिर इंचि नना वेहसेक मंतन. नना वेहाना पोल्लेन मिमेट कुद निरनेयम एतट. 16 मनम दन्यवाद कीसि, उंदे गिलासते अंगुर पानकम उट्टस्के, किरिस्तुना नेत्तुर मना अंटुराहाटीं हीतोर इंचि हूपिचेके मंतोम. मनम उंदे हारितुन तुकडां कीसि तित्तस्के किरिस्तुना मेंदुल मना अंटुराहाटीं हीतोर इंचि हूपिचेके मंतोम. 17 मनम अंटुरम उंदे हारिता तुकडां तित्ताहाटीं, मनम वेल्लेटुर मंचिगुडा उंदे मेंदुललेसिं मंतोम.
18 इस्राएल लोकुल्कुनेके हूळाट! गद्देपोर्रो मोक्कु हीतवुन तितस्के, गद्देपोर्रोटा मोक्कु मावा अंटुराहाटीं इंचि हूपिचेके मंतुर. 19 नना बतल वेहसेक इत्ते, बोम्मांक मोळ्कता गाटोक बतल हिल्ले, बोम्मन लोपोगुडा बतल हिल्ले. 20 इच्चोरे गदा, बोम्मंक मोळ्कानोर, देय्याल्कुंक मोळ्कसेक गानि पेनदुक आयो. अदुनहाटीं मिमेट देय्याल्कुनतोनि पोत्तु आयमळ नाक इस्टम हिल्ले. 21 मिमेट सामिना गिलासतद आनि देय्यमता गिलासतद इल्हा रोंडुनद उन्ना पर्रिर, अल्हेने सामिना उपारम आनि देय्यमता उपारम रोंडुने पोत्तु आया पर्रिर. 22 इल्हा कीसि मनम सामिंक होंग वायानाल कींतोम. मनम पेनदुकन्ना बलवंतुल्कुमा? आयोम. 23 अन्नि मनाहाटीं बेसे आंदुं, गानि अन्नि कबळतव आयों. अन्नि मनाहाटीं बेसे आंदुं, गानि अन्नि बक्तिते एद्गनाहाटीं बेस आयों. 24 बोरे आयिर ओना पाय्दातुने हूळा मनि, इंका वरोना पाय्दातुनगुडा हूळाना. 25 हाटुमताल बवन्ना हव्विं अस्सि तिना वच्चु. तिनकना, तिना मन्निना इंचेके मीवा मनसुन सवाल कियमटु. 26 बारित्ते, “बूमि आनि बूमि पोर्रोटव अन्नि सामिनवे आंदुं” इंचि दर्मसास्त्रमते रासि मंता. 27 बोरन्ना विस्वास कियवोर मीकुन गाटोक केयानय्ते, मीक होनना मनसु आते, होंट. अगा होत्ता पजा, बतलय्ते मीक तिनालय हींतोर अदुन मनसुने बतले सवाल कियाका तिंटु. 28 गानि मीकुन बोरन्ना, “इद बोम्मनगा मोळ्कतद आंद,” इंचि इनानय्ते, वेहतोनाहाटीं आनि मनसुना पोल्लेनाहाटीं तिनमट. 29 इत्ते, “मनसु” मीवद आयो गानि मुन्नेटा मनकना मनसुना बारेमते इंचेके मंतन. मीवाहाटीं इंकावरोन बारि वेहा हिय्यना. 30 नना दन्यवाद कीसि गाटो तिंतन अय्ते दन्यवाद कीताहाटीं बदनाम बारि आयाना? 31 अदुनहाटीं मिमेट उनमळ, तिनमळ बतल कियाना गानि पेनदा महिमाताहाटींगे कियाना. 32 यहुदि लोकुल्कुंक, ग्रीक लोकुल्कुंक आनि कलिसियातोर्कुंक अड्डम आयाना लायक मनमट. 33 ननागुडा ओर पिस्सागोम इंचि, नावा पाय्दा हूळाका, वेल्लेटुर लोकुल्कुना पाय्दाताहाटीं, अन्नि पोल्लेने अंटुर्कुन कूस इरंतन. बारित्ते ओर्क मुक्ति दोर्कगोम.