प्रेरितुल्कुना अदिकार
9
1 नना दासतनमताल इळबळिसि हिल्लेना? नना प्रेरितुन आयोना? मना सामि येसुन नना हूळा हिल्लेना? मिमेट सामिना लोप्पो नावा कबळता पलम आयिरा? 2 नना वेरे लोकुल्कुनाहाटीं प्रेरित आयाकुना गानि मीवाहाटीं अय्ते प्रेरित आंदुने. नना सामिन लोपो प्रेरितुन इंचि मिमेटे सिक्कालेसिं निसान आंदिट.3 बोरय्ते नावातोनि वाद-विवाद कियालय हूळांतुर, ओराहाटीं इद नावा जवाब आंद. 4 माकु तिनना-उनना अदिकार हिल्लेना? 5 कळमता प्रेरितुल्क, सामिना तम्मुह्क आनि कैपल (पत्रु) ईर ओरा मुत्तोह्कुन पीकुंचि तिरियताप मोमोटगुडा विस्वासि मुरतळतोनि मर्मिं आसि पज्जेके पीकुंचि तिरियना अदिकार माक हिल्लेना? 6 हिलाकुंटे पिस्वरहाटीं कबळ कियाकुंटा मनालय सिराप बरनाबास आनि नाके अदिकार हिल्लेना? 7 बोर ओना संतम कोत्तां कर्स कीसि सिपाइना नौकरि कींतोर? बोर अंगुरता बगिचा कीसि अंगुर पंडिं तिनाका मनंतोर? आनि बोर गोळ्कु-गोर्रें पोसकीसि अवुना पाल उनाका मनंतोर? बोरे मन्नोर.
8 नना मनकना रीतितेने इल्हा इंचेके मंताना? हिल्ले. मूसाना नियमगुडा इल्हे रासि मंता, 9 “कळाते बंति तिराहनेंके कोंदांकु मूस्का बुट्टी दोहा मनि.” इद पोल्ले सिराप कोंदानाहाटिंगे पेन वेहा हिल्ले, 10 मनाहाटींगुडा वेहता. बारित्ते ऊडानोर आसातेने ऊडंतोर आनि बंति तिरहानोरगुडा पंटाते पाल गावाले आसातेने बंति तिरहंतोर.a 11 मोमोट मीवा लोपो बेस आत्माता विज्जां वीततोम. अय्ते माक अव्सरम मत्तवुन मिमेट हीते, अवुन एतमळ बतल तप्पु आंदा? तप्पु आयो. 12 वेरेटोर्क गिंटा मी पोर्रो अदिकार मत्ते, दानकन्ना एक्को माक अदिकार मनंता. गानि किरिस्तुना बेसता कबुरतुन वेहानेंके मावाहेंदाल बतले अड्डम वायामन्नि इंचि मोमोट आ अदिकार एताका अन्नि सहन कीसेक मंतोम. 13 मीक अय्ते एरपाटे मंता, गुळितगा सेवा कियानोर्कुंक गुळितगाटाले गाटो दोर्कंता. गद्देतगा सेवा कियानोर्कुंक अगा अर्तवुनंटेताल तूस दोर्कंता.b 14 अल्हेने किरिस्तुना बेसता कबुर वेहानोर्कुंक, बोरय्ते अद कबुर केंजसि विस्वास कींतुर, ओरा हेंदाले पिस्वर आयाना इंचि सामि हुकुम हीतोर.
15 गानि नना बोना हेंदाले पिस्वरता पाय्दा एता हिल्लेन, मिमेट नावाहाटीं इल्हा कीम्टु इंचिगुडा नना रासेक हिल्लेन. बारित्ते, बोरन्ना नावा पेद्दिरकेम वेर्तम कियानादानकन्ना नाक हायमळे बेस अनपिचंता. 16 नना गिंटा बेसता कबुर वेहचि बतल पेद्दिरकेम कीसेक हिल्लेन. बारित्ते इद नावा जिम्मेदारि आंद, नाक बेसता कबुर वेहमळे गावाले. ओक्कला वेहाकुंटे नना बुळदि आकन. 17 नना गिंटा नावा इच्चाताल इदुन कीते नाक इनाम दोर्कंता. ना इच्चाताल कियाकुन्ना गानि दाना जिम्मेदारि पेन नाक अप्पाजेप्ता. 18 अय्ते नावा इनाम बतल? नना बेसता कबुर वेहानेंके नाक दोर्कना अदिकार एताका बेसता कबुर पुक्कटते वेहमळ, इदे नावा इनाम आंद. 19 बारित्ते, नना बोना कय्दा हिळु हिल्लेन, अय्नागानि वेल्लेटोर्कुन किरिस्तुनगा तराना इंचि नावद-नना अंटुरा दासुन आतन. 20 यहुदिल्कुन किरिस्तुनगा तरालय नना यहुदिल्कुनालेसिं आतन. मूसाना नियमते ताकानोर्कुन किरिस्तुनगा तरालय मूसाना नियमते ताकाना अव्सरम हिलाकुन्ना गानि नियम पीसि ताकतन. 21 मूसाना नियमते हिल्वोर्कुन किरिस्तुनगा तरालय नियम हिल्वोरालेसिं आतन. इत्ते पेनदा नियमतुन पास्कंतन इंचि आयो, गानि किरिस्तुना नियम पीसि ताकानोन आंदुन. 22 विस्वासमते कमजोर मत्तोर्कुन किरिस्तुनगा तरालय, नना ओरालेसिं आतन. बल्हाना आयि इच्चुरन्ना पिस्सागोम इंचि, बोर बल्हा मंतुर, ननागुडा ओरा अंटुरालेसिं आतन. 23 ओरतोनि बेसता कबुरता आसिर्वादते नाकगुडा तूस दोर्कना इंचि इवन्नि कीसेक मंतन.
24 पंदेम वाटसि वित्तनेंके अंटुरे वित्तंतुर, गानि इनाम वरोंके दोर्कंता इंचि मीक एरपाटे मंता. मिमेटगुडा पिस्वरता वित्तनेंके इनाम दोर्कनालेसिं वित्तट. 25 कर्सनोर अंटुर बेस सराव कीसि ओरद-ओर तयारते मनंतुर, अदगुडा वाळिस होनना किरिटम दोर्किच्कुनालय इवन्नि कींतुर. गानि मनम अय्ते बस्केने वाळिस होनवा किरिटम दोर्किच्कुनालय कींतोम. 26 अदुनहाटीं नना बद जेगातगळ्क अय्ते वित्तना, अगाळ्क बेस वित्तंतन, ननागुडा पिळ्किलते गुद्सेक लडांचंतन, वळिते लडांचताप आयो. 27 नना ना मेंदुल्तुन आपकुंचि नियंत्रनते इरंतन. नना वेरेतोर्कुंक बेसता कबुर वेहाचि, नावा लोप्पेने तक्को मत्ते बाता कबाटोन आयोन.