मोळ्कता उपारम
8
1 इंदके, बोम्मनगा मोळ्कता उपारमता बारेमते वेहंतन, मनम अंटुरम तेल्वितोर्कुम इंचि मनाकु एरपाटे मंता. तेल्विता हेंदाल गर्रा वांता, गानि पावरम बक्तितुन बेर्सागोटंता. 2 बोरन्ना गिंटा नाक पूरा तेळियंता इंचि इनकुंतोरो, ओन्क बतलय्ते तेळियमळ गावाले, अद इंदकेगुडा तेळिया हिल्ले. 3 गानि बोरन्ना गिंटा पेनदुन पावरम कीते, पेनदुक ओर एरपाटे.4 अदुनहाटीं बोम्मनगा मोळ्कता उपारमतुन तिनना बारेमते नना मीक वेहंतन, दुनियाते मनना बोम्माने पेन हिल्ले. पेन उंदे मंता, अद आयाका इंका वेरे पेन हिल्ले. 5-6 अय्नागानि स्वर्गमते आयि, बूमि पोर्रो आयि पेन्क आनि सामि इंचि इनानव वेल्लेने मंतां. गानि मनाकु उंदे पेन आनि ओरे मना बाबो आंदुर. ओनाहेंदाले इवन्नि तयार आतां आनि मनम ओनाहाटिंगे मंतोम. अल्हेने सामि वरोरे आंदुर. ओर येसु किरिस्तु आंदुर. पेन, ओनाहेंदाले इवन्नि तयार कीता, मनमगुडा ओनाहेंदाले पिस्सि मनंतोम.
7 गानि अंटुर विस्वासुल्कुंक ई तेल्वि हिल्ले. इच्चुर मोदाटाले बोम्मन मोळ्किस मत्ताहाटीं, अगा मोळ्कता उपारमतुन तिंतुर. अदुनहाटीं ओरा कमजोर मनसु कराब आसि दांता. 8 गाटो मनाकुन पेनदा दग्गेर्क ओयो. आनि मनम तिनाकुन्ना मनद नुकसान आयो, तिनना बतल पायदा आयो. 9 मिमेट बदाना उपारम तिंतिर आयावच्चु गानि उंदि पोल्ले मति इर्राट, मीवाहेंदाल विस्वासमते कमजोर मत्तोर पापमते अर्रानायो. 10 बारित्ते निमे तेल्विता मनकन, निमेने गुळितेa बोम्मनगा मोळ्कता उपारमतुन तिनानदुन कमजोर विस्वासि हूळानय्ते, ओरगुडा गुळिते मोळ्कतवुन तिनालय ओना मनसु आयोना? 11 ओनाहाटींगुडा किरिस्तु हातोर, इल्हा नीवा तेल्विहेंदाल, विस्वासमते कमजोर मत्ता दादाल पेनदागटाल लक्कु आंतोर. 12 इल्हा निमे विस्वासि दादालोर्कुंक अड्डम पापम कियमळ आनि कमजोर विस्वासिना मनसुन नोप्पिचमळ इद किरिस्तुंक अड्डम तप्पु कीसेक मंतिन. 13 अदुनहाटीं उपारमता हेंदाल गिंटा नना नावा दादालोर्कुन पापमते अर्हानय्ते, नना बस्केने हव्विं तिन्नोन. नावाहेंदाल ओर बस्केने पापमते अर्रा मनि.