मर्मिना बारेमते
7
1 अव पोल्लेने बारेमते मिमेट नाक रासि मत्तिर. नना मीक वेहासेके, मांडसा बदाना मुर्तटुन इटमळ बेस आयो. 2 गानि व्यबिचारम जर्गमनि इंचि हरेक मांडसक मुत्तो गावाले, हरेक मुरतळ्क मुय्दो गावाले. 3 मुय्दो ओना मुत्तोना हक्कु पूरा कियमळ गावाले, आनि मुत्तो दाना मुय्दोना हक्कु पूरा कियमळ गावाले. 4 मुत्तोंक दाना मेंदुलपोर्रो अदिकार हिल्ले गानि दाना मुय्दोंक अदिकार मंता, अल्हेने मुय्दोंक ओना मेंदुलपोर्रो अदिकार हिल्ले गानि मुत्तोंक मंता. 5 अदुनहाटीं मिमेट वरोंक-वरोर अलग मनमट. गानि कोन्नि रोजकु पारतना कियालय अलग मनकोम इंचि मिमेट इव्वुर इनकुते, अलग मंटु. दाना पजा मर्रा कलियसि मंटु. बारित्ते, कुदता मनसुन आपकुना पर्वस्के देय्यम मीकुन परिक्साते अर्हालय हूळंता. 6 नना वेहानद आदेस आयो, मीक अनुमति आंदु. 7 अंटुर लोकुल्कु नावालेसिं मनागोम इंचि नाक अनपिचंता. गानि हरेक मनकंक पेनदाहेंदाल अलग-अलग वरम दोर्किस मंता, बोन्को बदो तीरनद, इंका बोन्को इंकुदि तीरनद वरम दोर्किस मंता.8 मर्मिं आयवोर्कुंक आनि मुंडा मोस्तवुंक नना वेहसेक मंतन, ओर नावालेसिं मर्मिं आयाकुंटा मत्तेने ओराहाटीं बेस. 9 गानि ओरगिंटा कुदता मनसुन आपा पर्राकुंटे मर्मिं कीकुन्निर. बारित्ते मेंदुल्ता इच्चा आसि तनलाडसेके मनना दानकन्ना मर्मिं आयमळ बेस.
10 गानि बोरां अय्ते मर्मिं आतां, ओर्क नावद आयो, सामिना आदेस मंता, मुत्तो दाना मुय्दोन होळ्सा मनि. 11 अद गिंटा होळ्सानय्ते, अद इंका वरोनतोनि मर्मिं आया कुंटेने मंदना, हिलाकुंटे दाना मुय्दोनतोनि मर्रा सांतिते कलियसि मंदना. आनि मुय्दो ओना मुत्तोन होळसिया मनि.
12 इंदके कळमतोराहाटीं नना वेहसेक मंतन, पेन आयो. बोनदन्ना विस्वासिना मुत्तो पेनदुन विस्वासम किय्यो, गानि दानकु ओनातोनि मनालय पसंद मत्ते, ओर दान होळ्सा मनि. 13 अल्हेने बदाना मुरतटा मुय्दो गिंटा विस्वासम किय्योर, गानि ओर दानतोनि कूस मंतोर, अय्ते अद ओन होळ्सा मनि. 14 बारित्ते विस्वासम कियवा मुय्दो, विस्वासम कीता ओना मुत्तोनतोनि मंचि पवित्र आतोर. अल्हेने विस्वासम कियवा मुत्तो, विस्वासम कीता दाना मुय्दोनतोनि मंचि पवित्र आसि दांता. अल्हा आयाकुंटा मंचि मते मीवा पिलाल्क पवित्र आयाकोन्नेर, गानि ओर इंदके पवित्र मंतुर.
15 अय्नागानि विस्वास कियवोर मुत्तो आयि मुय्दो आयि ओरगिंटा होळसंतन इनानय्ते होळसिरकांटि. इद पोल्लेतुन विस्वास कियाना दादल आयि अक्कल आयि आपामन्नि. बारित्ते, पेन मनाकुन सांतिते पिसालय केयता. 16 ए मुर्तटुनाa, नीवा विस्वास कियवा मुय्दोन पिसागोटंतिन इंचि निक बतल एरपाट? ए मांड्सातुनाb, नीवा विस्वास कियवा मुत्तोन पिसागोटंतिन इंचि निक बतल एरपाट?
पेन बारि केयतानो अदुनहाटींगे पिस्साटु
17 गानि बल्हा अय्ते मीकुन सामि निलाहतोर आनि बल्हा अय्ते मीकुन पेन केयता, अल्हेने मिमेट मंटु. इद अन्नि कलिसियाने नावा नियम आंद. 18 अद बल्हा इत्ते, पेनदुन विस्वासम कियाका मुन्ने कतना कीसि मनानय्ते, अदुन मकिचा मनि. पेनदुन विस्वासम कियाका मुन्ने कतना कियाकुंटा मत्ते, ओर कतना कीकुन्ना मनि. 19 कतना कियाना, कियाकुन्ना बतल आयो, गानि पेनदा आदेसते ताकमळे पेद्दा पोल्ले आंद. 20 हरेक मनकन ओर बल्हा मननेंके पेन ओन केयतानो, अल्हेने ओर मनागोम. 21 निमे गिंटा दास आसि मतस्के पेन केयते, निमे अदुना पिकिर कियमा. गानि अंटेताल इळबळाना मोका वाते, दाना पायदा एता. 22 बारित्ते, दास आसि मतस्के निमे सामिन विस्वास कीतिन, अंटेताल इळबळतिन. इळबळतस्के सामिन विस्वास कीतिन अय्ते किरिस्तुना दास आतिन. 23 पेन मीकुन कींमत हीसि अस्ता, दानहाटीं मनकलोर्कुना दास आयमटु. 24 विस्वासुल्कुनिटा! पेन मीकुन केयतस्के बल्हा मत्तिरो, अल्हेने दानतोनि कलियसि मंटु.
25 मर्मिं आयववुना बारेमते सामि नाकु बतले आदेस हिया हिल्लोर, गानि नावा मनसुना पोल्ले मीक वेहसेक मंतन. सामिना दयाता हेंदाल, नना दान बरोसा कींतन. 26 इंदकेटा तकलिपकुनाहाटिं मनकल बल्हा मंतोर अल्हेने मत्ते बेस इंचि नना इनकुंचेके मंतन. 27 निक मुत्तो मते अदुन होळ्सना कोसिस कियमा, मुत्तो हिलाकोंटे मर्मिं आयना विचारम कीयमा. 28 निमे गिंटा मर्मिं कीकुतेगुडा बतल पापम आयो, आनि लेय्या पेगिळ मर्मिं कीकुते अदगुडा बतल पापम आयो. अय्नागानि बोरय्ते मर्मिं आंतुर, ओरा पिस्वरते तकलिपकु वांतां. असोंटा तकलिपकुनाल नना पिसागोटंतन.
29 विस्वासुल्कुनिटा! नना वेहानद बतल इत्ते, वेला तक्को मंता. अदुनहाटीं इंदकेटाल मुन्ने बोन्कु मुत्तो मंता, ओर मुत्तो हिल्वाप मंदना. 30 अळानोर मत्ते, अळवोर लेहका मंदना, आनंदमते मत्तोर आनंदमते हिल्वाप मंदना, सामानकु अस्सानोर बतले हिल्वाप मंदना. 31 इद दुनियाते बतलय्ते कींतोम मनम दाना लोप्पेन मंदनायो. बारित्ते दुनियातव अन्नि नासडेम आयानव आंदुं. 32 मिमेट बदे पोल्लेते पिकिर किया मनि इंचि नना इनकुंचेके मंतन. मर्मिं आयवोर पेनदुन बल्हा कूस इर्राना इंचि पेनदा पोल्लेना पिकरते मनंतोर. 33 गानि मर्मिं आता मनकल ओना मुत्तोन बल्हा कूस इर्राना इंचि दुनियाता पोल्लेने पिकरते मनंतोर. 34 ओरा मनसु रोंडु तीरुकुने कबळ कीता. अल्हेने मर्मिं आयवा मुर्तळ पेनदुन बल्हा कूस कियाना इंचि मेंदुल्ते आनि आत्माते पवित्र मंचि पेनदा पोल्लेना पिकरते मनंता. गानि मर्मिं आता मुर्तळ मुय्दोन बल्हा कूस इर्राना इंचि दुनियाता पिकरते मनंता. 35 नना मीवा पायदाताहाटिंगे इद पोल्ले वेहासेक मंतन. मीकुन पसांचालय आयो, गानि मिमेट सत्तेमते ताकसि, उंदि मनसुने पेनदा सेवाते मंटु.
36 बोरन्ना गिंटा इल्हा इनकुनानय्ते, “मना मिय्यटाc लेय्यातनम होंचेके मंता, दाना अपमानम आयाका मुन्ने मर्मिं कियमळ गावाले,” इंचि दाना मर्मिं कीसि हिय्यिरकांटी, अद पापम आयो. 37 गानि ओरगिंटा मर्मिं कीसि हियमळ अव्सरम हिल्ले इंचि मनसुनाल निरनेयम कियानय्ते, अद दाना इच्चान आपापर्ते दान्क मर्मिं कियवा बेसे कीतोर. 38 बोरय्ते ओना मियाटा मर्मिं कीतोर बेसे कीतोर आनि बोरय्ते ओना मियाटा मर्मिं किया हिल्लोर ओर इंका बेस कीतोर.
39 मुय्दो पिस्सि मत्तोचादाका मुत्तो मुय्दोनतोनि होळ्साकोंटा मनंता, गानि ओरगिंटा हायानय्ते अद बोनतोनना सामिन विस्वासम कीतोनतोनि मर्मिं आया परांता. 40 गानि अद इंका वरोनतोनि मर्मिं आयाकोंटा मत्तेने बेस इंचि नना इनकुंचेके मंतन, अल्हेने नावा लोपो मनना पेनदा आत्माता हेंदाले नना मीक वेहासेक इंचि इनकुंचेके मंतन.