विस्वासुल्कुना नड्डुम जगडम आयानदुन न्यायम कियमळ
6
1 बस्के अय्ते मीवा लोपो जगडम आंता, आ जगडमता न्यायम कियालय विस्वासुल्कुनगा होनाका मिमेट विस्वासम कियवोरगा होंचि न्यायम कियाना हिम्मत बारि कींतिर? 2 पेनदा लोकुल्कु आकिर वेलाते दुनियाता न्यायम कींतुर, इद मीक एरपाट हिल्लेना? मिमेट पूरा दुनियाता न्यायम कींतिर अय्ते, इव सिन्ना-सिन्ना पोल्लेना न्यायम कियाना लायक हिल्लिरा? 3 मिमेट पेनदा दूतानगुडा न्यायम कींतिट इंचि मीक एरपाटे मंता. अय्ते रोजता पिस्वरतव सिन्ना पोल्लेन मिमेट न्यायम किया परिरा? 4 मीवा लोपो गिंटा इल्हा जगडाल्क मनानय्ते, बोरय्ते कलिसियाता पोल्लें बतले तेळियवोर मंतुर, असंटोरगा न्यायम किया वेहालय बारि दांतिर? 5 मी विस्वासुल्कुना नड्डुम न्यायम कियाना लायक वरोरगुडा तेल्वितोर हिल्लोरा? मीक सिग्गु वायागोम इंचि इल्हा इंचेके मंतन. 6 वरोर विस्वासि इंका वरोर विस्वासिंक अड्डम न्यायम कियालय पंचादितगा दांतोर, अदगुडा विस्वास कियवोरा मुन्ने. 7 निजम इत्ते मीवा लोपो लोल्लिं कियमळे तप्पु आंद. दानकन्ना अन्यायम ओर्सकुनमळ बेस आयोना? नुकसानतुन ओप्कुनमळ बेस आयोना? 8 अल्हा कियवा, मिमेट तप्पुड कबळ कींतिर, नुकसान कींतिर, अदगुडा मीवा विस्वासुल्कुने कींतिर.9-10 अन्यायम कियाना लोकुल्कु पेनदा राज्येमते वारसदार आयुर इंचि मीक तेळियोना? मिमेट दोकाते अरमट. व्यबिचारम कियानोर, बोम्मान पूजें कियानोर, बोगमतनम कियानोर, मांडसा मांड्सातोनि बोगमतनम कियानोर, मुर्तळ मुरतळतोनि बोगमतनम कियानद, दोंगातनम कियानोर, आस्ति कियानोर, कल्लु उन्नानोर, तेर्हानोर, इंकावरोन मुळहानोर पेनदा राज्येमता वारसदार आयोर. 11 मुन्ने मीवा नड्डुम इच्चुर इल्हे मत्तिर. गानि मिमेट येसु किरिस्तुना पोर्रोलते आनि पेनदा आत्माते नोर्कुंचि, पवित्र आनि सत्तेमतोर आतिर.
मेंदुल्तुन पेनदा महिमाताहाटीं वाळकुंटु
12 नना बतलन्ना किया वच्चु, गानि अव अन्नि पायदातव आयों. नना बतलन्ना किया वच्चु, गानि नना अवुना कय्दा हिळु मन्नोन. 13 गाटो पीटाहाटीं आनि पीर गाटोताहाटीं मंता इंचि मिमेट इंतिर, गानि पेन इव रोंडुन इंका नासडेम कींता. मेंदुल बोगमतनम कियालय आयो सामिनाहाटीं मंता, सामि मना मेंदुलताहाटीं मंतोर. 14 पेन दाना ताकततोनि सामिन हामुरताल जीवाते तेहता, अल्हेने मनाकुनगुडा हामुरताल जीवाते तेहंता. 15 मीवा मेंदुल्कु किरिस्तुना मेंदुल्ता उंदि बागाल्कु आंदुं इंचि मीक एरपाट मंता गदा! एरपाट मतस्के नना अवुन ओसि बोगमदाना मेंदुललेसिं कीकाना? बस्केने किय्योन. 16 बोरय्ते बोगमदानतोनि मींडंतोर, ओर दानतोनि उंदि मेंदुल आंतोर. “ओर इव्वुर उंदि मेंदुल आंतुर” इंचि दर्मसास्त्रमते रासि मंता.a 17 गानि बोरय्ते सामिनतोनि उंदि आंतोर, ओर ओनतोनि आत्माते उंदि आंतोर. 18 व्यबिचारमताल लक्कु मंटु. मेंदुल्ता पलाताल वायना पापाल्कु अच्चोर बतल किय्यों, गानि बोरय्ते व्यबिचारम कींतोर, ओर ओनादे मेंदुल्क अड्डम पापम कींतोर. 19 मीवा मेंदुल पवित्र आत्माता गुळि आंद, अद पेनदाहेंदाल मी लोपो वासि मनंता, ई मेंदुल मीवद आयो, मीक तेळियोना? 20 बारित्ते पेन मीकुन दरा दोस्सि एतता, अदुनहाटीं मिमेट मीवा मेंदुल्ता हेंदाल दाना कदर कीम्टु.