कलिसियातोर लोपो बोगमतनम किया मन्नि
5
1 मीवा नड्डुम वरोर बोगमतनम कीतोर इंचि नाक केंजा वाता. ओर ओना बाबोना मुत्तो इत्ते सिन्ना यावान इन्कुत्तोर अले! इसोंटा तप्पुड कबळ पेनदुन एरपाट कियवोरगुडा किय्युर. 2 इदुनाहाटीं मीक दुक्कम आया मत्ता, गानि मिमेट पेद्दिरकेम कीसेक मंतिर. असंटोन मीवा लोप्पोटाल पेचहाचि गेदमिसि हियागोम. 3 नना मिहागटाल मेंदुल्ते लक्कु मंतन, गानि नावा आत्माते मीवातोनि मंतन. आत्माते मीवातोनि मंचि ओनद नना मुन्नेने न्यायम कीतन. 4 बस्के अय्ते मिमेट येसु सामिना पोर्रोलते उंदगा जमा आसि उदंतिर, अस्के आत्माते अगा मनंतन आनि मना सामि येसुना ताकत मीवातोनि मनंता. 5 असोंटा तप्पुड कबळ कियानोन ओना मेंदुल्तुन नासडेम कियालय पेद्दा देय्यामता कय्दे अप्पाजेप्ना. बारित्ते, ओरगिंटा पस्चाताप कियानय्ते, येसु किरिस्तु वायाना रोजुने ओना आत्मा पिस्सार. 6 मिमेट पेद्दिरकेम कियमळ बेस आयो, इच्चुर पुल्लाटा पिंडि वेल्लेन पिंडिते कल्पते, पूरा पिंडितुन पुल्लगा कींता अद मीक एरपाटे मंता. 7 पळाना पुल्लाटा पिंडितसंटोन तेंडिस पोहाचि मिमेट पूना पिंडि मुद्दा आया परांतिर, बारित्ते मिमेट निजमे पुल्लाटोर आयवाहाटीं, येसु किरिस्तु मना दाटसि होनना पंडुगुना गोर्रे पोरिनलेसिं मोक्कु आतोर. 8 अदुनहाटीं मनम पळाना पुल्लाटा पिंडितसोंटा कराब कबाह्कुने, दुस्ट गुनाल्कुने आयो गानि इमानदारता, सत्तेमता पुल्लगा आयवा हारिनसोंटा पंडुगु कियमळ गावाले.9 नना मुन्ने रासि लोहता सिट्टिते, बोगमतनम कियानोर्कुनतोनि कलियसि मनमट इंचि रासि मत्तन. 10 इदुना अर्तम इल्हा आयो गदा, बोगमतनम कियानोर्कुनतोनि, आस्ति कियानोर्कुनतोनि, दोंगा कीसि तिनानोर्कुनतोनि, बोम्मान पूजां कियानोर्कुनतोनि कलियसि मनामन्नि इत्ताप आयो. इल्हा इनानय्ते मरि दुनियातुने होळ्सा पींता. 11 नना इनना पोल्ले बतल इत्ते, मीवा लोप्पोटाल बोरन्ना ओनद ओर विस्वासिन इंतोर, गानि ओर बोगमतनम कियमळ, आस्ति कियमळ, बोम्मान मोळ्कुमळ, अपमानम कियमळ, रिम्मा आयमळ, दोंगा कीसि तिनमळ इसोंटा गुनम ओना लोपो मनानय्ते ओनतोनि कलियसि मनमट आनि ओनतोनि गाटो तिनमटु इंचि रासि मत्तन. 12 विस्वासम कियवोर्कुना न्यायम नना बारि कीकन? बोरय्ते विस्वासमते मंतुर, ओरा न्यायम मिमेट कियिरा? 13 विस्वासम कियवोरा न्यायम पेने कींता. अदुनहाटीं आ बोगमतनमतोन पेचहाचि गेदमटु.