पेनदा मर्ममता देकरेक कियानोर
4
1 अदुनहाटीं मोमोट किरिस्तुना सेवकुल्कुम आनि पेनदा मर्ममता देकरेक कियानोरम आंदुम इंचि मीक तेळियमळ गावाले. 2 अल्हेने पेनदा मर्ममता देकरेक कियानोर विस्वासम कियाना लायक मनमळ गावाले. 3 गानि नाकुन मीवाहेंदाल आयि हिलाकुंटे लोकुल्कुना पंचायतता हेंदाल आयि, विस्वासमते मंतोरा हिल्लोरा इंचि परिक्सा कीसि हूळमळ गावाले इद नावाहटीं सिन्ना पोल्ले आंद. नावद ननाने न्यायमगुडा किय्योन. 4 नहगा बतले दोसेम दिस्सेक हिल्ले, गानि नना दोसेम हिल्वोन आयोन. पेने नाकुन परिक्सा कीसि हूळंता. 5 अदुनहाटीं न्यायम कियाना वेला वायाका मुन्ने बोने न्यायम कियमट, सामि वायानाल एदुर हूळाट. ओर हीकळते मक्किस मत्ता पोल्लेन वेल्गुने तरंतोर, मनसुने मत्तवुन पलाते तरंतोर. अस्के पेन अंटुर्कुन मिमेट बेस कीतिट इंचि मेच्चुकुंता.6 विस्वासुल्कुनिटा! नना मीवाहाटीं अपुल्लोसना आनि नावा उदाहरन हीसि वेहतन. बारित्ते “दर्मसास्त्रमते रासता पोल्लेंक हब्बेरे होनमट” इंचि मंता. इदुन पोर्रोटाल मिमेट वरोन बेसतनमते आनि इंकावरोन विरोदमते पेद्दिरकेम कियमा. 7 बारित्ते नीकुन आनि इंकावरोन बोर अलग हूळंतुर? 8 ओहो! मीक गावाले मत्तव अन्नि पूरा आतां, मिमेट अय्ते सिरमंत आसि होत्तिर, मोमोट हिलाकुना मिमेट राजुल्कु आतिट. गानि मिमेट निजमे राजुल्कु आसि मत्ते मोमोटगुडा मीवातोनि राज्येम किय्येम. 9 गानि हामुरता सिक्सा आतोर्कुन बल्हा अंटोर्कन्ना आकिर इरंतुर, अल्हा प्रेरितुल्कुन इत्ते माकुन पेन इरता इंचि नाक अनपिचंता. बारित्ते, मोमोट पेनदा दूतानाहाटीं, दुनियाताहाटीं आनि मनकलोर्कुनाहाटीं तमासा हूपिस्ताप आतोम. 10 मोमोट किरिस्तुनाहाटीं मुर्कालोरम आंदुम, गानि मिमेट किरिस्तुना लोपो तेल्वितोर आंदिर. मोमोट बलम हिल्वोरम आंदुम, गानि मिमेट बलम मत्तोर आंदिर. मिमेट कदर मत्तोर आंदिर, गानि मोमोट कदर हिल्वोरम आंदुम. 11 इदवेरादाका मोमोट कर्वुने-दूपाते मंतोम, केर्रालय कपळिं हिल्लें, देब्बां तिंचेके मंतोम, लोन-दारा हिलाका मंतोम. 12 आनि मावद मोमोटे कबळ कीसेक मंतोम. माकुन तेर्हानोर्कुन, आसिर्वाद हींतोम. ओर माकुन तकलिप कींतुर, गानि मोमोट सहन कींतोम. 13 ओर माकुन अपमानम कींतुर, मोमोट दयाते वळ्कंतोम. इदवेरादाका दुनियाता नदरते मोमोट कचरालेसिं, मैलालेसिं मंतोम.
14 नना मीक सिग्गु वायागोम इंचि इव पोल्लें रासेक हिल्लेन, गानि नावा पावरमता पिलाल्कुनसंटोर इंचि तेळियागोट्सि वेहासेक मंतन. 15 मिहगा गिंटा किरिस्तुना बारेमते कराहनोर पदि वेय्कुना गुरुल्क मंदानुर, गानि मिहगा वेल्लेटुर बाबुर हिल्लुर. बारित्ते मुन्ने ननाने किरिस्तु येसुना बेसता कबुर तत्तन, अदुन मिमेट विस्वासम कीतिर इंचि ननाने मीवा बाबोनसंटोन आंदुन. 16 अदुनहाटीं मिमेट नावालेसिं ताकट इंचि विनंति कीसेक मंतन.
17 इदे पोल्ले वेहनाहाटीं नावा पावरमता आनि विस्वासमगल्ला मर्रिनसंटोर तिमोतिन मीहगा लोहतन. नना किरिस्तुन लोपो बल्हा ताकसेक मंतोनो, अन्नि जागाने कलिसियातोर्कुनगा नना कराहना बारेमते ओर मीक मति कीसि हींतोर. 18 नना मिहगा वासेक हिल्लेन इंचि इच्चुर लोकुल्कु पेद्दिरकेम कीसेक मंतुर. 19 गानि सामिना मनसु मनानय्ते नना बिराने मिहगा वांतन, अस्के पेद्दिरकेम कियानोरा पोल्लेन आयो गानि ओर्क बच्चोर ताकत मंतनो हूळंतन. 20 बारित्ते पेनदा राज्येम पोल्लेने आयो गानि पेनदा ताकतते मनंता. 21 मीक बतल गावाले? नना मीहगा कट्टे पीसि वाकाना, हिलाकुंटे पावरमते आनि मेत्ताटा आत्माते वाकाना?