पेनदा दासुल्कुना विचारम अलग-अलग मंदनायो
3
1 विस्वासुल्कुनिटा! पेनदा आत्मा मत्तोर्कुनतोनि वळ्कताप मीवातोनि वळ्का पर्रा हिल्लेन. पेनदा आत्मा हिल्वा दुनियाता लोकुल्कुनलेसिं, आनि किरिस्तुन लोपो इंदकेगुडा पिलाल्कुनसंटोरे इंचि मीवातोनि वळ्कतन. 2 नना मीक पाल उह्तन, गाटो तिहा हिल्लेन; बारित्ते मिमेट गाटो तिना पराकोंदिर, गानि इंदकेगुडा मिमेट गाटो तिना पराना लायक हिल्लिर. 3 बारित्ते इंदकेगुडा मिमेट मेंदुल्ता इच्चा मत्तापे ताकसेक मंतिट. इंका वरोना पोर्रो कळ्क पोत्तना, जगडाल्कु कियाना गुनम मंता. अय्ते मिमेट मनकना इच्चाते ताकानोर आयिरा? दुनियाता लोकुल्कुनालेसिं ताकसेक हिल्लिरा? 4 मिहगटाल वरोर, “नना पौलुसनोन आंदुन”, इंका वरोर, “नना अपुल्लोसनोन आंदुन” इंचि इंतिर. इल्हा मिमेट दुनियातोर्कुनलेसिं पेनदुन एरपाट कियवोर आतिरा बतला? 5 अपुल्लोस बोर आंदुर? नना पौलुसुन बोन आंदुन? मोमोट इव्वुरमगुडा पेनदा सेवकुल्कुमे. पेन माक बतल अय्ते कबळ अप्पाजेप्ता, अदुन वेहतोम आनि मिमेट विस्वासम कीतिर. 6 नना पेळे वाटतन, अपुल्लोस एर दोस्तोर, गानि दान बेर्सागोटतद पेने आंदु. 7 इत्ते, पेळे वाटनोर आयिर, एर दोस्सानोर आयिर ईर पेद्दोर आयुर, गानि दान बेर्सागोटनद पेने पेद्देदि आंदु. 8 वरोर वाटतोर आनि वरोर एर दोस्तोर, इल्हा ओरा-ओरा कबळता इसाबते ओर्क बूति दोर्कार. 9 मोमोट पेनतोनि कलियसि कबळ कियानोर्कुम आंदुम, मिमेट पेनदा नेलितसंटोर, पेनदा लोतसंटोर आंदिर.10 नाक पेन हीता कृपाता हेंदाल, वरोर बेसता मिस्त्रीनालेसिं पुनादि दोहतन, दान पोर्रो इंका वरोर रद्दा दोस्सेक मंतोर, इल्हा वरोर-वरोर दान पोर्रो दोस्सानोर बल्हा रद्दा दोस्सेक मंतोर, ओर बेस हूळसि दोस्सना. 11 येसु किरिस्ते पुनादि आंदुर. ओर दोहता पुनादि आयाका, इंका बोरे वेरे पूनादी दोहा पर्रुर. 12 बोरन्ना गिंटा बंगारम, एंडि, एक्को दराता बंडां, कट्टे, जाडि आनि बुस्सिते पुनादि दोहना मत्ते, 13 किरिस्तु मर्रा वायाना रोजुने अंटुरा कबळ दिसंता. बारित्ते अद रोज ओर तळमितोनि वांतोर, बोर बतल कबळ कीतोर इंचि तळमिते परिक्सा कियमळ जर्गंता. 14 अद पुनादि पोर्रो दोहता कबळ आगसि मनानय्ते, ओनकु इनाम दोर्कंता. 15 बोनदन्ना गिंटा ओर कीता कबळ वेस होत्ते, ओनकु नुकसान आंता. ओर अय्ते पिस्संतोर गानि तळमिताल पेय्सताप पिस्संतोर.
16 मिमेट पेनदा गुळि आंदिर, पेनदा आत्मा मीवा लोपो मनंता, इद मीक तेळियोना? 17 बोरन्ना गिंटा पेनदा गुळितुन नासडेम कियानय्ते, पेन ओन नासडेम किय्यार. पेनदा गुळि पवित्र मनंता, अद मिमेटे आंदिर. 18 बोरे आयिर ओनद-ओरे पसांचाकुनामनि. बोरन्ना गिंटा मिहागटाल ई दुनियाते नना तेल्वितोन इनकुनानय्ते, पेनदा नदरते तेल्वितोर आयालय, मोदाला मुर्कुनलेसिं आया पींता. 19 दुनियाता तेल्वि पेनदा मुन्ने मुर्कतनमतद आंद. बारित्ते दर्मसास्त्रमते, “पेन तेल्वितोर्कुन ओरा उस्सारतनमता लोपो पसांचंता,”a इंचि रासि मंता. 20 आनि मर्रा, “तेल्वितोर्कुना विचाराल्क वेर्तम आंदुं इंचि पेनदुक एरपाटे,”b इंचिगुडा दर्मसास्त्रमते रासि मंता. 21 अदुनहाटीं नना ईना हेंदोन, नना ओना हेंदोन इंचि मनकलोर्कुना पोर्रो पेद्दिरकेम किया मन्नि, बारित्ते अन्नि मीवंगे आंदुं. 22 पौलुस आयिर, अपुल्लोस आयिर, कैपल आयिर, दुनिया आयि, पिस्वर आयि, हामुर आयि, ताकाना कालमता पोल्लें आयि, वायाना कालमता पोल्लें आयि, अन्नि मीवंगे आंदुं. 23 मिमेट किरिस्तुनोर आंदिर आनि किरिस्तु पेनदोर आंदुर.