क्रुसुनपोर्रो वेलळ वाटता किरिस्तुना बारेमते बेसता कबुर
2
1 विस्वासुल्कुनिटा! नना मिहगा वातस्के, नावां पेद्दा पोल्लेने हिलाकुंटे पेद्दा तेल्विते पेनदा बारेमते गवाइ वेहा हिल्लेन. 2 गानि नना मीवा नड्डुम मननेंके क्रुसुंक वेलळ वाटता येसु किरिस्तु आयाका इंका वेरे बदे पोल्ले वळ्कोन इंचि निरनेयम कीसि मत्तन. 3 आनि नना मीहगा मननेंके मेंदुल्ते कमजोर आसि मत्तन. वेल्ले वेर्रेते आनि वनुकसेके मत्तन. 4 नावा वळ्कमळ आनि नना वेहता कबुर, नावा तेल्विता पोल्लेने मनाहिल्लें, गानि पेनदा आत्मा आनि ताकतते निंडसि मत्ता. 5 अदुनहाटीं मीवा विस्वासम मनकलोर्कुना तेल्विते परकारम आयो गानि पेनदा ताकतता परकारम मनागोम.पेनदा तेल्वि
6 मोमोट इद दुनियाता हिलाकुंटे इद दुनियाते नासडेम आयाना अदिकारिल्कुना तेल्वि वेहोम, गानि विस्वासमते गट्टिगा मत्तोर्कुंके तेल्वि वेहंतोम. 7 गानि मोमोट मर्ममतद आनि मक्किचि मत्तद पेनदा तेल्वितुन वेहंतोम, अद बूमि पुट्टका मुन्नेने मावा पेद्दातनमताहाटीं पेन तयार कीसि इरता. 8 ई तेल्विता बारेमते दुनियाता अदिकारिल्कुंक बोर्के तेळिया हिल्ले, ओर्क गिंटा तेळियसि मत्ते, इद महिमाता सामि येसु किरिस्तुन क्रुसुनपोर्रो मोल्लां कोह्का कोन्नेर. 9 गानि दर्मसास्त्रमते,
“कळ्कुने बोरे हूळवव,
केव्कुने बोरे केंजवव,
बोरा मनसुने वायवव पोल्लें,
दानपोर्रो पावरम कियानोराहाटीं पेन तयार कीसि इरता,” इंचि रासि मंता.a
10 गानि पेन दाना आत्माता हेंदाल अवुन मनाकु हूपिस्ता. बारित्ते अद आत्माकु अन्नि एरपाटे, पेनदा मर्ममगुडा एरपाटे. 11 वरोर मनकना विचाराल्क मनकना आत्मा आयाका इंका बोर एरपाट कींतोर? अल्हेने पेनदा विचाराल्क पेनदा आत्मा आयाका इंका बोरे एरपाट किय्योर. 12 इंदके मनाकु दुनियाता आत्मा दोर्का हिल्ले, पेन हीता पोल्लें तेळियालय पेनदा आत्मा मनाकु दोर्कता. 13 माक इव पोल्लें मनकना तेल्विते कराहतव आयों गानि पेनदा आत्माते कराहतव आंदुं. अवे पोल्लेन मीक तेळियागोट्सि वेहंतोम. 14 बोनगा अय्ते पेनदा आत्मा हिल्ले ओर पेनदा आत्माता पोल्लेन ओप्कुन्नोर. ओनकु अव मुर्क पोल्लें अनपिचंतां. बारित्ते अव पोल्लें पेनदा आत्मातेने तेळिया परांतां, अदुनहाटीं ओनकु तेळिया पर्रों. 15 बोनगय्ते पेनदा आत्मा मंता, ओर अन्निन अर्तम किया परांतोर, गानि ओना बारेमते वेरे मनकल बोरे अर्तम किया पर्रोर.
16 इदुन बारेमते,
“सामिना मनसु बोनकु तेळियंता, ओनकु बोर करहा परांतुर?
गानि किरिस्तुना मनसु मनागा मंता,” इंचि दर्मसास्त्रमते रासि मंता.b