कुरेंति कलिसियातोर्क पौलुस रासता मोदाटा सिट्टि
जोहर
1
1 नना पौलुसुन, किरिस्तु येसुना प्रेरित आयालय पेन नाकुन दाना मनसुनाल केयता. नावा आनि सोस्तिनेस दादाना हेंदाल जोहर.a 2 कुरेंति सहरते मंदनोर किरिस्तु येसुन लोपो पवित्र आता पेनदा चर्चनोर्कुंक, आनि वेरे-वेरे जेगाने मना सामि इत्ते, ओरा आनि मना येसु किरिस्तुना पोर्रोलते आरादना कियाना अंटुर बक्तुल्कुंक रासता सिट्टि, 3 मना पेन बाबाल आनि सामि येसु किरिस्तुनाहेंदाल कृपा आनि सांति दोर्कसेक मनिकाटि.पौलुस पेनदुन दन्यवाद कींतोर
4 किरिस्तु येसुन लोपो मीक पेन हीता दयाताहाटीं, नना पेनदुन बस्केळ्क दन्यवाद कींतन. 5-6 किरिस्तुना गवाइ मीवा लोपो गट्टिगा मत्ता इंचि, मिमेट अन्नि तीरुकुने वळ्कुमळते आनि बुद्दिते निंडिस होत्तिर. 7 अदुनहाटीं मिमेट पेनदा बदे आत्माता वरमते तक्को हिल्लिर, आनि मिमेट मना सामि येसु किरिस्तु मर्रा वायानद एदुर हूळसेक मंतिर. 8 ओर मर्रा वायाना रोजुने मिमेट दोसेम हिलाकुंटा मंदना इंचि पेन मीकुन आकिर दाका गट्टिगा इरंता. 9 पेन विस्वासम लायकतद आंद. अद दाना मर्रि सामि येसु किरिस्तुनतोनि कलियसि मंदालय मीकुन केयता.
विस्वासुल्कुना लोपो वरोनद-वरोंक अर्राकुंटा आयमळ
10-11 विस्वासुल्कुनिटा! मीवा लोपो जगडाल्क आसेक मंता इंचि क्लोयेना लोतोर नाक वेहतुर. अदुनहाटीं मिमेट अंटुर उंदे पोल्लेते ताकाटु, मीवा लोपो वरोनद-वरोंक अर्राकुंटा मनमट, गानि मिमेट उंदे मनसुने, उंदे विचारमते कलियसि मंटु इंचि नना मीक मना सामि येसु किरिस्तुना पोर्रोलते विनंति कीसेक मंतन. 12 नना वेहना पोल्ले इदे गदा, मीवंटेताल वरोर, “नना पौलुसुनोन आंदुन,” इंका वरोर, “नना अपुल्लोसनोन आंदुन,” इंका वरोर, “नना कैपानोन आंदुन,” इंका वरोर, “नना किरिस्तुनोन आंदुन,” इंचि इंतिर. 13 बतल, किरिस्तुन तूसुक कीतिरा? पौलुस क्रुसुनपोर्रो मीवाहाटीं जीवा हीतोरा? हिलाकुंटे पौलुसुना पोर्रोलते मिमेट बाप्तिस्मा एततिरा? 14 नना मीहागटाल किरिस्पुंक आनि गयुसुंके बाप्तिस्मा हीतन, बेस आता ओर्क आयाका बोनके हिया हिल्लेन, पेनदुक दन्यवाद कींतन. 15 हिलाकुंटे नावा पोर्रोलतेने बाप्तिस्मा एततिर इंचि बोरन्ना इंचि मन्नेर. 16 नना स्टिपनना लोतोर्कगुडा बाप्तिस्मा हीतन, ईर आयाका इंका बोर्कन्ना नना हीतना, नाक एर्का हिल्ले. 17 बारित्ते किरिस्तु नाकुन बाप्तिस्मा हियालय लोहा हिल्लोर, गानि बेसता कबुरतुन वेहालय लोहतोर. अदगुडा मनकना बुद्दि मत्ताप आयो, अल्हा वेहानय्ते किरिस्तु क्रुसुनपोर्रो हाता ताकतद अर्तम मन्नो.
पेनदा ताकत आनि तेल्वि किरिस्तु आंदुर
18 क्रुसता पोल्ले वेहमळ इत्ते नासडेम आयानोराहाटीं मूर्कतनम आंदु, गानि पेन मनाकुन पिसागोटता, अदुनहाटीं पेनदा पोल्ले मनाकु बलम आंदु. 19 इदुना बारेमते, दर्मसास्त्रमते इल्हा रासि मंता,
“तेल्विगल्लोर्कुना तेल्वितुन नासडेम कींतन,
आनि उस्सारगल्लोर्कुना उस्सारतनमतुन पास्कंतन.” b
20 अय्ते, बगा मंतोर तेल्विगल्लोड? बगा मंतोर करियतोर? ई दुनियाता वाद-विवाद कियानोर बगा मंतुर? इद दुनियातोरा तेल्वि पेनदा मुन्ने मुर्कतनम आंद. 21 बारित्ते, पेनदा तेल्वीतुन, दुनियाता लोकुल्कु ओरा सतता तेल्विते पेनदुन एरपाट किया हिल्लुर. मोमोट बदाय्ते मुर्कतनमता कबुर वेहंतोमो, अदुना हेंदाल विस्वासम कीतोर्क मुक्ति दोर्कना, इदे पेनदुक बेस अनपिचंता. 22 बारित्ते यहुदिल्क अय्ते चिन्हां गावाले इंतुर, ग्रीक लोकुल्क बारे तेल्वि पहकंतुर. 23 गानि मोमोट अय्ते क्रुसुनपोर्रो हाता किरिस्तुना पोल्लें वेहंतोम. इद यहुदिल्कुंक विस्वासम किया पर्वसंटा पोल्ले आंद. आनि यहुदि आयवोर्कुंक मुर्कतनमतसोंटा पोल्ले आंद. 24 गानि पेन बोर्कुनय्ते केयता, ओर यहुदिल्क आयिर, यहुदि आयवोर आयिर, ओराहाटीं पेनदा ताकत आनि पेनदा तेल्वि किरिस्तु आंदुर. 25 बारित्ते पेनदा मुर्कतनम इत्ते, मनकलोर्कुना तेल्विकन्ना वेल्ले तेल्वितद आंद, पेनदा ताकत कमजोर इत्ते, मनकलोर्कुंकन्ना वेल्ले बलमतद आंद. 26 विस्वासुल्कुनिटा! विचारम कीम्टु, दुनियाता लेक्काते मिमेट तेल्वितोर आयिर, एक्को बलमतोर आयिर आनि पेद्दा लोतोर आयिर, अय्नागानि पेन मीकुन केयता. 27 बुद्दि मत्तोर्कुंक सिग्गु वायालय दुनियाते बुद्दि हिल्वोर्कुन पेन पेरता. बलमता मनकलोर्कुंक सिग्गु वायालय, दुनियाते बलम हिल्वोर्कुन पेन पेरता. 28-29 आनि पेनदा मुन्ने बोरे मनकल पेद्दिर्केम किया मनि इंचि दुनियाते बतले हिल्वोर्कुन, हय्सवोर्कुन, बतले कबळ्क ओज्जुवोर्कुन, पेन पेरता. 30 पेनदा हेंदाले येसु किरिस्तुन लोपो मीवा पिस्वर मंता, किरिस्तुनाहेंदाल मनाकु तेल्वि, निति, पवित्र आतोम आनि पापमता सिक्साताल पिस्सतोम. 31 अदुनहाटीं दर्मसास्त्रमते, “बोरय्ते पेद्दिर्केम कींतोर, सामि बतलय्ते कीतोरो अव्टे पेद्दिर्केम कियागोम,” इंचि रासि मंता.