येरुसलेमता कलिसियातोर्कुनाहाटीं चंदा
16
1 येरुसलेमता पेनदा लोकुल्कुनाहाटीं चंदा जमा कियाना बारेमते, बल्हा अय्ते गलाति राज्येमता विस्वासुल्कुंक वेहतानो, अल्हेने मिमेटगुडा कियाना. 2 नना वाता पजाने चंदा जमा कियमटु, गानि मीवांटेताल हरेक मनकल ओना कमाइता इसाबते वारमता मोदाटाa रोज इच्चुक कोत्तां जमा कीसि इर्रट. 3 नना वाता पजा, मिमेट बोर्कुनय्ते इद कबळताहाटीं पेर्रांतिरो, ओर्क नना सिट्टिं हीसि, ओरा कय्देने मिमेट जमा कीता चंदा येरुसलेम लोहचिंतन. 4 ओक्कला नना गिंटा होनमळ कुदुरते, ओर नावातोनि वांतुर.पौलुसना पय्नेम होनना विचारम
5 नाक मकिदोनिया एरियाते होनना मंता, मकिदोनियाताल पजा मीहगा वांतन. 6 मीहगा वासि, आया पर्ते कोन्नि रोजकु हिलाकुंटे पूरा पीनि कालम मीवातोनि मनंतन. दाना पजा नाक बेके होनना मंता, हेके सार्ला कीम्टु. 7 बारित्ते, मकिदोनियाते होनानेंके नड्डुम आगसि मीक कलियमळ नाक इस्टम हिल्ले. सामिना इच्चा मते, मीवातोनि कोन्नि रोजकु मंदना इंचि नावा आसे मंता. 8 गानि इंदके, पेंतेकोस्त पंडुगुन दाका इपीसि सहरतेने मनंतन. 9 बारित्ते, इगे बेसता कबळ कियालय, नाक उंदि पेद्दा मोका दोर्कता, इंका विरोद कियानोरगुडा वेल्लेटुरे मंतुर. 10 तिमोति मिहगा वातस्के ओर मीवा नड्डुम दैरनेमते मननाल हूळट. ओरगुडा नावालेसिं सामिना सेवा कीसेक मंतोर. 11 अदुनहाटीं ओन बोरे सिन्नगा हूळा मनि, ओन सांतिते नहगा लोहट. मिहगाटा विस्वासुल्कुनतोनि ओर वायानुर इंचि नना एदुर हूळसेक मंतन. 12 अपुल्लोस दादान, विस्वासि दादालोर्कुनतोनि होन इंचि नना बच्चुंगो मल्कां वेहतन, गानि इंदके मिहगा वायाना विचारम ओनद हिल्ले, पजा मोका दोर्कतस्के वायानुर. 13 इंदके मिमेट उस्सारते मंटु, विस्वासमते गट्टिगा मंटु, दैरनेमते मंटु, ताकततोर आसि मंटु. 14 मिमेट कियाना कबाह्क अन्नि पावरमतेने कीम्टु. 15 विस्वासुल्कुनिटा! स्टिपनना लोतुर्कुना बारेमते मीक एरपाटे मंता, ओर अकाया एरियाते मोदाला विस्वासम कीतुर. ओर पेनदा लोकुल्कुना सेवा कियालय ओरद-ओर अप्पाजेप्कुत्तुर. 16 मिमेटगुडा असोंटोरा आनि ओरालेसिं सेवा कियानोरा पोल्ले केंजसि ताकट इंचि विनंति कीसेक मंतन. 17 मिहगाटाल स्टिपन, पुरतुनातुस आनि अकयकुस नहगा वातुर इंचि नना वेल्ले कूस आतन. बरित्ते मिमेट वायाकुना गानि, ओर वाताहाटीं मिमेट वाताप आता. 18 ओर वातुर इंचि नावा जीवक आनि मीवा जीवक सांति दोर्कता. अदुनहाटीं इसंटोर्कुन कदर हीम्टु.
आकिरता जोहर
19 आसिया राज्येमते मनना कलिसियातोर मीक जोहर वेहतुर. अक्विला, ओना मुत्तो प्रिस्किला आनि ओरा लोतागा जमा आयाना कलिसियातुरगुडा सामिना पोर्रोलते मीक जोहर वेहतुर. 20 इगेटा अंटुर विस्वासुल्कु मीकुन जोहर कीसेक मंतुर. मिमेट वरोंक-वरोर पवित्र पावरमते कलियसि जोहर वेहकुंटु. 21 नना पौलुसुन, नावा कय्दे जोहर इंचि मीक रासेक मंतन. 22 बोरन्ना गिंटा सामिन पावरम कियाकुंटा मत्ते, ओन्क सापनेम दल्गि. “मारानाता” इत्ते, सामि वा. 23 सामि येसु किरिस्तु मीक दया हिय्यिर. 24 येसु किरिस्तुना लोपोटा नावा पावरम मीवा अंटुरतोनि मंदना. आमेन.