पौलुसुन इटलि एरियाता रोम सहरते लोहमड
27
1 आयंका माकुन डोंगाते इटलि लोहाना निर्नायम कीसि, पौलुसुन आनि इच्चुर ओनतोनि जेलने मत्तुर्कुन, अगस्तुसa दलमता युलियुस पोर्रोलतोर दरोगाना कय्दे अपाजेपतुर. 2 अद्रमुतियुम सहरता डोंगाते मोमोट उदतोम, अद डोंगा एसिया एरियाता ओड्डु पीसि मत्ता नाह्कुनाल पेय्सता. मेसिडोनिया एरियाता तिसलनूका सहरतोर अरिसतरकुसb पोर्रोलतोर इंका मावातोनि मत्तोर. 3 इंकुंदी रोजु मोमोट सिदोन सहरतगा एवतोम. अगा एवतस्के युलियुस दरोगानकु पौलुसुन पोर्रो दया वाता. अदुनहाटीं पौलुसुना दंटागाह्कु ओन अवरिचागोम इंचि, “निमे होंचि नीवा दंटागाह्कुंक कलियसि वा,” इंचि दरोगाल पौलुसुन इत्तोर. 4 अगटाल मोमोट पेय्सनेके वळि माकु एदुर मत्ताहाटीं साइप्रस दीबेता वळि वायवा बाजुनाल पेय्सतोम. 5 मर्रा मोमोट किलिकिया आनि पंपुलिया एरियाक दग्गेटा समुद्रम दाटसि लुकिया एरियाता मूरा इनना सहरतगा रेयतोम. 6 अगा सिकंदरिया सहरताल इटलि एरियाक होनालय डोंगा तयार मत्ता. माकुन ओयना दरोगाल अद डोंगाते उपिस्तोर.7 वळि माक एदुर मत्ताहाटीं, मेल्लगा-मेल्लगा बच्चुंगो रोजकुनदाका वेल्ले कस्टमते कनिदुस सहरकु दग्गेरे एवतोम. एदुर वळि माकुन मुन्ने होना हिया हिल्ले. इंचि मोमोट क्रेति दीबेता ओड्डु साटने, सलमोने इनना जेगा पक्का पीसि दाटतोम. 8 अदुन दाटसि, समुद्रमता ओड्डुनाल वेल्ले तकलिपुने डोंगातुन मुन्नेडकु जर्पुसेके, ‘डोंगा नित्तनद बेसता जेगा’ इनना जेगातगा एवतोम. अगटाल लसया सहर दग्गेरेने मत्ता.
9 पय्नमते वेल्ले रोजकु आसि उपासमता रोजc इंका पेय्सि होत्ता. वातावरनम कराब मत्ताहाटीं डोंगातुन मुन्ने ओयालय इंका वेर्रे मत्ता. अदुनहाटीं पौलुस तेदिस डोंगाते मत्तोर्कुन, 10 “दादालोरिटा! मनम इगेटाल पेय्सते वेल्ले तकलिप आंता इंचि नाकु अनपिचेके मंता. डोंगा आनि अवुने मत्ता सामानय्ते मुळगारे गानि मनां जीवां इंका होना परांतां,” इंचि इत्तोर. 11 गानि पौलुसना पोल्लेतुन दरोगाल केंजाका, डोंगा ताकिचनोर आनि डोंगा मालकुना पोल्लेतुन एक्को विस्वासम कीतोर. 12 अद जेगा पीनि कालमते (इग्गमते) मनालय बेस मनाहिल्ले, अदुनहेंके वेल्लेटुर लोकुल्कु, “बच्चोन बिराना आया परते अचोने बिराना क्रेति दीबेता पिनिक्स सहरतगा होंचि आगते बेस मनंता,” इंचि इत्तुर. बारित्ते पिनिक्स सहरतगा डोंगां आगना उंदि जेगा इल्हा मंता, दक्सिन-पस्चिम आनि उत्तर- पस्चिमता हेंदाल होळिया वांता. पीनि कालम अद जेगाते वळि दल्गो.
समुद्रमते तुपान तेदमड
13 पजा दक्सिन बाजुनाल वळि मेल्लग-मेल्लगा वासेके मत्तय्ते ओर इंदके मनम पिनिक्स सहरते एवा परांतोम इंचि इनकुत्तुर. अस्के ओर अगटाल लंगरd तेहकुत्तुर आनि क्रेति दीबेता ओड्डु साटने डोंगातुन होना हीतुर. 14 गानि गळसेम मत्तारित्ते दीबेता हेंदाल उंदि पेद्दा वळि दुमारम तेदता. दानु उत्तर-पूर्वी तुपान इंतुर. 15 मोमोट मत्ता डोंगा तूपान लोप्पो दोर्कता. आ तूपानता वळि एदुर मत्ताहाटीं डोंगा मुन्नेळ्क होना परा हिल्ले. अस्के मोमोट वळि दोब्बुतेके डोंगा होनिकाटी इंचि दान अल्हेने होडसीतोम. 16 अल्हा मोमोट कौदा इनना सिन्ना दीबेक साटने होननेंके, डोंगाता पज्जो दोहचि इग्गिसि ओयना पडवन पेद्दा तकलिपने डोंगा पोर्रो एक्किस्तोम.e 17 पडवां, पोर्रो एक्किसतारित्ते डोंगाते कबळ कीयानोर वेल्लेने आय्डाते डोंगातुन नोंडेने, सुट्टु इगिसि दोहतुर. आनि सुरतिस इनना उस्के जेगाते डोंगा दिगाबडार इंचि आ वेर्रेकु डोंगाता परदातुन रेहतुर आनि डोंगातुन वळिते होडसीतुर. 18 अस्के इंकुंदी रोजु वळि दुमारमते पक्का तकलिप आताहेंके ओर माल पोहचीयालय दल्गुतुर. 19 आनि मूंडो रोजुने ओरा कयकुने डोंगाता सामान (विसरें) पोहचीतुर. 20 पजा वेल्लेने रोजकु माकु पोडदु आनि सुक्कां दिसा हिल्लें. आनि तुपानते पक्का वळि वायुंदु, मोमोट पिसोम इंचि आसे होडुस्तोम.
21 वेल्ले रोजकुनाल बोर बतल तिना हिल्लुर. अस्के पौलुस ओरा नड्डुम नित्तिसि, “दादालोर्कुनिटा! नावा पोल्लें केंचि क्रेति दीबेताल पेय्सका मंचि मत्ते, मनाकु ई तकलिप वायाकोनवड आनि नुकसान इंका आयाकोनवड. 22 अल्हा आय्ना गानि मीकु विनंति कींतन मिमेट हिम्मत इर्रट. मीवा लोप्पोटाल बोनदे जीवा होन्नो गानि डोंगाता मात्रम नुकसान आंता. 23-24 बारित्ते, बद अय्ते नावा पेन, नना अदे पेंदा सेवा कींतन दाना दूता निने नर्का वासि, “पौलुस निमे वेरियमा, नीकु निजमे कैसर राजाना मुन्ने नित्तना मंता आनि डोंगाते मत्तुर अंटुर्कुनगुडा नीवातोनि पेन पिसागोटंता,’ इंचि पेंदा दूता इत्ता. 25 अदुनहाटीं दादालोरिटा! हिम्मत इर्रट, पेन नाकु बल्हा वेहता अल्हेने आयार, इंचि नाकु बरोसा मंता. 26 गानि बल्हा अय्ना मनम बदाना दीबेतगा उस्केते होंचि हिर्कंतोम,” इंचि इत्तोर.
27 पदनालूं रोजकु अय्नागानि मोमोट अद्रिया समुद्रमता एते हीके-हेके वळिक तिरीयसेक मत्तोम. तिरीयसेक मननेंके नळजाम नर्काटा वेलाकु मनम बदाना ओड्डुंकु एवतोम बारे इत्ताप डोंगा ताकसानोर्कुंक अनपिस्ता. 28 ओर समुद्रमता लोतु कहतुर अय्ते अगा नूटा इरवय पूटकु मत्ता. इंका इच्चुर लक्कु होत्ता पजा मर्रा कहतुर अय्ते अस्के टोंबै पूटकु मत्ता. 29 अस्के, बंडाना लोपो डोंगा हिर्कार इंचि ओर वेरियतुर आनि डोंगाता पज्जोटा बाजुंक नालुं लंगर्कु वाटसि बस्के पंगांता इंचि हूळसेक मत्तुर. 30 डोंगा ताकसानुर अगटाल वित्तालय, “डोंगाता मुन्नेटा बाजुंक लंगर्कु वाटंतोम,” इंचि बोंकिचि पडवां रेहतुर. 31 अस्के पौलुस सिपाइल्कुना अदिकारिन आनि सिपाइल्कुन, “ईर गिंटा डोंगाते मनाकुंटे मिमेट इंका पीसिर,” इंचि इत्तोर. 32 इत्तस्के, सिपाइल्कु पडवां दोहता नोंडेन नेमाह्चि पडवन एते अराहतुर.
33 पंगायना वेलाते पौलुस अंटोर्कुन गाटो तिननाहाटीं विनंति कीसि, “इयाडकु पदनालूं रोजकु आसि होत्तां आनि मिमेट रंदिताहाटीं उपासम मंतिर, बतले तिन्ना हिल्लिर. 34 अदुनहाटीं मिमेट गाटो तिंटु इंचि विनंति कीसेक मंतन. मिमेट तित्तेने जीवाते मनांतिर. बारित्ते इगे मत्तोरगाटाल बोनदना तल्लाता उंदि केल्लु इंका नुकसान आयो,” इंचि इत्तोर. 35 इल्हा वळकातारित्ते ओर अंटुरा मुन्ने हारि पीतोर आनि पेंदुक दन्यवाद कीतोर. आनि हारितुन तुकडां कीसि तिनालय दल्गुतोर. 36 ओन हूळसि, अंटोर्कु हिम्मत वाता आनि ओर इंका तिनालय दल्गतुर. 37 डोंगाते मोमोट अंटोरम रोंडु नुहकुना डेब्बै हारुर (२७६) मंदि मत्तोम. 38 ओर पीरनिंडा गाटो तित्तारित्ते, डोंगाते मत्तव गोहकुन समुद्रमते पोहचि डोंगातुन अल्कगा कीतुर.
डोंगा पय्मड
39 पंगातारित्ते ओर्कु समुद्रमता ओड्डु दिसता, गानि अद बद देसेम इंचि एरपाट किया हिल्लुर. आयानय्ते डोंगातुन ओड्डुंक दल्गिचि इरकोम इंचि इत्तुर. 40 ओर लंगर्कुना नोंडें नेमाहचि, अवुन समुद्रमते होडसीतुर आनि अस्केने ओर पतवारकुंकf दोहाचि मत्ता नोंडें ओदोल कीतुर. ओदोल कीसि डोंगातुन वळि मुन्नेळ्क ओयि इंचि पर्दां एक्किचि डोंगातुन ओड्डुंक ओतुर. 41 पजा बगा अय्ते रोंड समुद्राल्कु कलियंतां असोंटा जेगातगा डोंगातुन ओतोर, अगा डोंगाता मुन्नेटा बाजु उस्केकु दल्गिसि, मुन्नेळकु जर्गाकोंटा दिगाबळता. आनि पज्जोटा बाजुनाल जोरसे वायानव तडां दल्गिस डोंगा पय्यालय आता.
42 अस्के कैदील्कु बोरे ईतार्सि वित्ता मन्नि इंचि सिपाइल्कु ओर्कुन हव्कना विचारम कीतुर. 43 गानि दरोगानकु पौलुसुन पिसागोटानद मत्ता, अदुनहाटीं ओरा पिलानतुन आपतोर. आनि ओर्कु आदेस हीतोर गदा, “बोर्क अय्ते ईता वांता, ओर मुन्नेने डेयसि ओड्डुंकु पेयसटु. 44 कडमता लोकुल्कु बारे बल्लां आनि डोंगातां उरुंगता तुकडांना पोर्रो उदसि पेय्सटु,” इंचि इत्तोर. इल्हा अंटोर बतल आयाकोंटा ओड्डुंकु वातुर.