माल्टा दीबेते पौलुस
28
1 इल्हा बलहोनो कीसि ओड्डुंकु पेय्सतारित्ते अद दीबेता पोर्रोल माल्टा आंदु इंचि माकु तेळियता. 2 आ दीबेते मनना लोकुल्कु मावा पोर्रो वेल्ले दया हुपिस्तुर. पिर्रु आनि पीनि इरगा मत्ताहेंके ओर तडमि मासतुर आनि माकुन दगेरा केयकुत्तुर. 3 पौलुस कट्टेना हेरकि तडमिते वाटसेकेने मत्तोर अस्के उंदि नय तरासु हेरकीताल तडमि सेकाकु पलाते पेय्सि ओना कयदुकु हुटता. 4 तरासु कयदुकु वेलाड अरसि मत्तद हूळसि दीबेता लोकुल्कु वरोंक-वरोर, “निजमे, ईर तप्पकोंटा बोनो गानि हव्कतोर. ईर समुद्रमताल अय्ते पिस्सि पेय्सतोर गानि न्यायम मात्रम ईन पिसा हियानाल हिल्ले,” इंचि इत्तुर. 5 गानि पौलुस मात्रम आ तरासुन तडमितेन वाटसीतोर. इंका ओन्कु बतले नोप्पिगुडा आया हिल्ले. 6 ओन कसकुतगा तोयार हिलाकुंटे ओर उंदे मल्का हिडारसि हायानुर इंचि हूळसेके मत्तुर. वेल्लेनेजेम अय्नागानि ओन्कु बतल आया हिल्ले. अस्के ओरा मनसु बदलांचि, “ईर बदो पेन आंदुर,” इंचि इत्तुर.7 आ दीबेता पेद्दा अदिकारि पबलियुस इनानोना नेलिं दग्गेरेने मत्तां. ओर माकुन केयसि ओसि मूंड रोजकुना दाका हेडिमितुरा लेसिं बेस हूळतोर. 8 पबलियुसुना बानकु एडकि आनि पेल्का दोस्सि (नेत्तुर बयलि), कटुलते मींडसि मत्तोर. पौलुस ओनगा लोपो होंचि, पारतना कीसि, ओना पोर्रो कय इरसि बेस कीतोर. 9 अल्हा आतद हूळसि आ दीबेता कडमता रोगमतुर इंका अगा वासि बेस आतुर. 10 ओर माकुन वेल्ले कदर कीतुर आनि मोमोट अगटाल पेय्सनेंके माकु बतल-बतल गावाले मत्ता अवन्नि डोंगाते तच्चि इरतुर.
पौलुस माल्टा दीबेताल रोम सहरतेके होनमड
11 मूंड नेल्कु आतारित्ते सिकंदरिया सहरताल वाता डोंगाते मोमोट पेय्सतोम. आ डोंगा पीनि कालम पेय्सना दाका माल्टा दीबेतगा आगसि मत्ता. डोंगाता मुन्नेटा बाजुंक एमडाल्कुना पेनकुना बोम्मा रेहचि मत्ता. 12 मोमोट सरकुस सहरते एवसि, अगा मूंड रोजकु मत्तोम. 13 अगटाल मोमोट तिरियसि रेगियुम सहरते एवतोम. इंकुंदि रोजु दक्सिन बाजुनाल वळि तेदता. अस्के मर्रा उंदि रोजु अगटाल पेय्सि पुतियुलि सहरते वातोम. 14 अगा माकु इच्चुर विस्वासुल्क कलियतुर आनि ओर माकुन ओरतोनि एडुं रोजकु मंटु इंचि इत्तुर. आनि ई रीतुने मोमोट रोम सहरते एवतोम. 15 बस्के अय्ते रोम सहरता विस्वासुल्कुंक मोमोट वासेक इंचि तेळियता अस्के ओर माकु कलियालय अप्पियुस हाटुम दाका आनि आगाना मूंड जेगाना दाका वातुर. पौलुस ओर्कुन हूळसि, पेंदुक दन्यवाद कीतोर आनि ओन्कु वेल्ले दैर्यनेम वाता. 16 मोमोट रोम एवतारित्ते वरोर सिपाइना पहाराते पौलुसुंक मनालय अलग उंदि लोन दोर्कता.
पौलुस रोमता यहुदिल्कुंक कलियमड
17 मूंड रोजकु आता पजा पौलुसु अगाटा यहुदि पेद्दा लोकुल्कुन केयतोर आनि ओर उंदगा जमा आतारित्ते ओरतोनि, “दादालुर्कुनिटा, मना लोकुल्कुन आयि मना एनकटा पेद्दाल्कुना रीति-रिवाजकुन आयि नना बतले किया हिल्लेन गानि नाकुन येरूसलेमते रोम लोकुल्कुना कय्दे यहुदिल्कु पीसि हीतुर. 18 रोमि अदिकारिल्कु नावा चौकसी कीतारित्ते नाहेके हव्कना सिक्सातसोंटा बतले तप्पु मनाहिल्ले अदुनहाटीं ओर नाकुन होडसींतोम इत्तुर. 19 गानि यहुदिल्कु, ‘ईन होळसिया मन्नि’ इंचि इत्तुर. अदुनहाटिं, ‘कैसर राजानगा नावा न्यायम आयागोम,’ इंचि नाकु विनंति किया पीता. गानि नना इगे नावा लोकुल्कुना पोर्रो तप्पु दोसालय वाया हिल्लेन. 20 ई पोल्लेन मीतोनि कलियसि वळ्कालय मीकुन केयतन. इस्राएल लोकुल्कु वरोर वायाना मंतोर इंचि बोनद एदुर हूळसेक मत्तुर, ओर येसे आंदुर इंचि नना विस्वासम कीतन. अदुनहाटीं नाक बेडीं अरतां,” इंचि पौलुस इत्तोर. 21 अस्के यहुदि पेद्दा लोकुल्कु पौलुसुनतोनि, “नीवा बारेमते यहुदिया एरियाताल बतले सिट्टि दोर्का हिल्ले आनि अगटाल वायानुर यहुदिल्कु इंका नीवा बारेमते बदे कबुर ताया हिल्लुर आनि निवद तप्पु इंचि इंका वेहा हिल्लुर. 22 गानि नीवा विचारम बतल मंता, इद मोमोट नीवा हेंदाल केंजंतोम. बारित्ते माकु एरपाटे गदा लोकुल्कु अंटोर नासरेत पार्टितोर्कुंक अड्डम वळ्कंतुर,” इंचि इत्तुर.
23 अस्के ओनतोनि कलियालय उंदि रोजु पक्का कीतुर. पक्का कीता रोजुने ओर आगसि मत्ता लोतगा यहुदिल्कु वेल्लेटुर जमा आतुर. पौलुस हक्केटाल पोळदु होनना दाका पेंदा राज्येम बारेमते ओर्कु गवाइ वेहतोर. अल्हेने मूसाना नियमताल आनि पेंदा कबुरतोर रासता पुस्तकाल्कुनाल येसुना बारेमते ओर्कु तेळियागोट्सि वेहतोर.
24 ओर वेहता पोल्लें इच्चुर्कु नच्चुतां आनि इच्चुर्कु नच्चुवा विस्वासम किया हिल्लुर. 25 पजा ओरद-ओर्के वरोन पोल्लें वरोंकु अर्राका अगटाल तेदसि होनालय आयानेंके पौलुस इंका उंदि पोल्ले इत्तोर, पवित्र आत्मा यसाया इनना पेंदा कबुरतोना हेंदाल, मीवा एनकटा पेद्दाल्कुनतोनि वेहता पोल्ले निजमे आंदु, अद इल्हा-
26 “निमे लोकुल्कुनगा होंचि इल्हा वेहा,
मिमेट बस्केडकु केंचेके मनंतिर गानि अर्तम कीकुन्निर.
मिमेट बस्केडकु हूळसेके मनंतिर गानि एरपाट कीयिर.
27 बारित्ते ई लोकुल्कुना मनसु गटिगा आता,
ओर केवकुने तक्को केंजांतुर, आनि
ओर ओरां कळ्क मुच्चुकुत्तुर.
अल्हा कियाकुंटे ओर कळ्कुने हूळसि मनेर,
केव्कुने केंजसि मनेर,
मनसुने एरपाट कीसि मनेर,
नावाहेके तिरियसि मनेर आनि
नना ओर्कुन बेस कीसि मनेन.’a इंचि वेहतोर.
28 अदुनहाटीं मिमेट एरपाट कियना गदा, पेन मुक्ति हियना कबुरतुन वेरे जातितोरगा लोहता. ओर अदुन केंजंतुर,” 29 पौलुस इव पोल्लें इत्तारित्ते यहुदिल्कु वरोंकु वरोर वरगेयसेके अगटाल पेय्सि होत्तुर.