पौलुस अग्रिप्पा राजाना मुन्ने गवाइ वेहंतोर
26
1 अग्रिप्पा राजाल पौलुसुन, “इंदके नीवा पोल्लें वेहा परांतिन,” इत्तोर. अस्के पौलुस, ‘नना वळकंतन’ इंचि वेहालय ओना कय तेहचि वळकुमड सुरु कीतोर. 2 “अग्रिप्पा राजा! यहुदिल्क नावापोर्रो बदय्ते तप्पु दोस्तुर अव अन्नि पोल्लें नीवा मुन्ने वेहालय नाकु मोका दोर्कता इंचि कुस आसेक मंतन. 3 नीकु यहुदि रीति-रिवाजकु आनि ओरां विचाराल्क एरपाट मंतां. इंचि निमे नावा पोल्लेन बेस केंजालय विनंति कींतन.4 नना सिन्नास्केटाल नावा लोकुल्कुनतोनि येरूसलेमते मत्तन, आनि नावा मनमुळ बल्हा मत्ता अंटुर यहुदिल्कुंक एरपाटे मंता. 5 मावा दर्मतां रीत-रिवाजकुन, परिसिल्कु अंटोर्कन्ना एक्को नोमुंदुर, अवने नना वरोन परिसिन आंदुन. इदुन यहुदिल्कु बेस एरपाट कींतुर आनि ओर इनकुत्ते इद पोल्लेता गवाइ इंका हिया परांतुर. 6 पेन मावा एनकटा पेद्दाल्कुंक पोल्ले हीसि मत्ता, अदे पोल्ले निजम इंचि नना बरोसा कीतन. अदुनहाटींगे, इंदके नावा न्यायम आयना मंता. 7 अदे पोल्ले पूरा आंता इंचि बरोसा इरसि, मावा पन्नेंडु गोत्राल्कुनुर इस्राएल लोकुल्कु पूरा मनसुने नर्का-पिय्यल उंदेतीर पेंदा सेवा कीसंतुर. इदे बरोसा इरताहाटीं राजा, यहुदिल्क नावापोर्रो तप्पु दोस्तुर. 8 पेन हातुर्कुन मर्रा तेहंता इंचि मीवा लोप्पोटाल बोनके विस्वासम बारि हिल्ले?
9 नना इंका मुन्ने नासरेत नाटेना येसुन पोर्रोल विस्वासम कियानोर्कुन वेल्लेने तकलिप कियना इंचि विचारम कियुंदुन. 10 पजा नना अल्हेने येरूसलेमते कीतन इंका. वेल्लेटुर पवित्र लोकुल्कुन जेलने वाटनाहाटीं नना पेर्मालोरल्कुना हेंदाल अदिकारम तल्किस जेलने वाटतन. आनि ओर्कुन हव्कानेंके इंका, ओर्कुन हव्कट इंचि इनुंदुन. 11 यहुदिल्कुना दर्मसास्त्रम कराहना लोहकुने ओर्क सिक्सा हीसि, येसुन अपमानम कीम्टु इंचि ओर्कुन बलमि कीयना कोसिस कियुंदुन. ओरापोर्रो नाकु इच्चोर होंगु मनुंदु गदा ओर्कुन तकलिप कियालय नना पलाते सहरकुने इंका होनुंदुन.
पौलुस येसुना दर्सनमतुन वेहतोर
12 अल्हेने उंदि मल्का नना पेर्मालोरल्कुना हेंदाल अदिकारम आनि परमिसन एतकुंचि दमिस्क सहरते होंचेके मत्तन, 13 होननेंके पीयल आता नना हर्देने मत्तन, अस्के मब्बुनाल उंदि पोडदुंकना एक्को वेलगु नावा आनि नातोनि मत्तोरा सुट्टु मेर्सता. 14 मेर्सतस्के मोमोट अंटुरम हिडार्तोम. अस्के नाकु उंदि अल्कीर केंजा वाता. अद इब्रानि बासाते नाकुन, “साऊल, ए साऊल, नाकुन निमे बारी तकलिप कीसंतिन? मुल्कि पोर्रो कादे तनमड नीकु वेल्ले कस्टम,” इंचि केंजा वाता. 15 “सामि निमे बोन आंदिन?’ नना पूसकीतन. सामि इत्तोर, ‘निमे बा येसुनय्ते तकलिप कीसंतिन ओने नना आंदुन,’. 16 गानि इंदके निमे तेदा आनि नित्ता, निमे नावा बारेमते हूळता पोल्लेन आनि नना नीकु हूप्सना पोल्लेन लोकुल्कुंक गवाइ वेहालय, नावा सेवक इंचि नीकुन निल्हंतन. 17 नीवा जातिता यहुदिल्कुनगा आनि वेरे जातितुरगा नीकुन लोहंतन, ओरा हेंदाल नीकुन कापाळंतन. 18 ओर्कुन हीकटताल वेलगुनेके, देय्याल्कुना मुक्यना ताकतताल पेंदाहेके तिरियना हर्रि हूप्सालय नीकुन लोहसेक मंतन. ओर अल्हा तिरियते, ओरा पापाल्क मापि आयार, अल्हेने ना पोर्रो बोरय्ते विस्वासम कीसि पवित्र आतुरो, ओरा लोपो कलियसि मनालय दोर्कार,’ इंचि येसु नाकु वेहतोर.
19 अदुनहाटिं अग्रिप्पा राजा! पोर्रोटाल नाक हूपिस्ता दर्सनम हूळतन आनि दाना आदेसतुन केंजतन. 20 केंजसि, मुन्ने दमिस्क सहरतोर्कुंक, दान पजा येरूसलेमते मनानोर्कुंक आनि यहुदियाता पूरा एरियाते आनि वेरे जातितुर्कुन इंका मनसु मार्सकुंचि पेनदगा वटु. वासि, मनसु मार्सकुत्तोम इंचि बेसता कबाह्क कीसि हूप्सट,’ इंचि वेहतन. 21 इदे कारनमते यहुदिल्क गुळिते नाकुन पीसि हव्कालय हूळसेके मत्तुर. 22 गानि इयाटा दाका पेन नाकुन सहायम कीता. अदुनहाटीं नना इगे नित्तिसि सिन्नाल्कु आनि पेद्दाल्क अंटोर मुन्ने गवाइ हीसेके मंतन. आनि बव पोल्लें अय्ते अयना मंतां इंचि पेंदा कबुरतोर आनि मूसल मुन्नेन वेहतुर, अव पोल्लें आयाका वेरे नना बतले वेहोन. 23 अव पोल्लें बतल इत्ते, किरिस्तुंकु तकलिप अर्रा पींता आनि ओरे हातुरा लोप्पोटाल मोदाला तेदानोर आंदुर आनि ओर यहुदिल्कुंक आनि वेरे जातितुर्कुंक वेलगुना पोल्लें वेहंतोर,” इंचि पौलुस इत्तोर.
पौलुस अग्रिप्पा राजाना मनसुन तिराहलय हूळतोर
24 इल्हा ओर वेहासेक मननेंके पेसतुस वरगेयसि, “पौलुस निमे पागल आतिन. एक्को करियतदे नीकुन पागल कीसंता,” इंचि इत्तोर. 25 अस्के पौलुस, “पेसतुस महाराज, नना पागल हिल्लेन, नना निजम आनि तेडियसे वेहासेक मंतन. 26 ईव पोल्लें मूलाते मकीसि कीतव आयो आनि बोर्के तेडियो इत्ताप आयो, इवन्नि अग्रिप्पा राजांक बेस एरपाटे. अदुनहाटीं वेरियाकुंटा ओना मुन्ने वळ्कसेक मंतन. 27 अग्रिप्पा राजा! पेंदा कबुरतोर रासतवुन विस्वासम कींतिना, कियिना? निमे विस्वासम कींतिन नाकु एरपाटे,” इंचि पौलुस इत्तोर. 28 अस्के अग्रिप्पाल पौलुसुन, “गळसेमतेने नाकुन क्रिस्चन कियालय आतिना? इंचि इत्तोर. 29 “गळसेमतेने आयि, वेल्लेजेमने आयि, सिराप निमेने आयो गानि इय्याला इगे केंजानुर अंटुर, इव बेडींने आयाका, कडमता पोल्लेने नावालेसिं आयना इंचि पेंदुक पारतना किसेक मंतन,” पौलुस इत्तोर.
30 अल्हा इत्ता पजा, अग्रिप्पा राजल आनि ओना हेलड बर्निका, ओरतोनि राज्यपाल आनि उद्दिस मत्तुर अंटुर तेदतुर. 31 अगटाल पलाते पेय्सि, “ईन हव्कना हिलाकुंटे जेलने इर्राना सिक्सा लायक बतल तप्पु किया हिल्लोर,” इंचि ओर-ओरे वळ्ककुत्तुर. 32 अग्रिप्पा राजल पेसतुसुन, “कैसर राजाना मुन्ने नावा न्यायम आयगोम इंचि, इनाका मंचि मत्ते, ईन होळसियमड आसि मनवड,” इंचि इत्तोर.