पौलुस जेलताल पेय्सालय कैसर राजानेके विनंति कीतोर
25
1 पेसतुस राज्यपाल कैसरिया सहरते वासि, मूड रोजकु आतारित्ते, अगटाल येरूसलेम सहरते होत्तोर. 2 अगा पेद्दा पेर्मालोर आनि यहुदि पेद्दाल्क वासि पेसतुस राज्यपालना मुन्ने पौलुसुन पोर्रो तप्पु दोस्तुर. 3 ओरा विचारम, हर्दे मकिस मंचि ओन हव्कना मत्ता. अदुनहाटीं ओर, “मावा पोर्रो दया कीसि ओन येरूसलेमते लोहचीम इंचि पेसतुस राज्यपालुन विनंति कीतुर.” 4 अस्के पेसतुस, “पौलुस कैसरिया सहरता जेलते मंतोर, नना बिराना अगा दांतन. 5 अदुनहाटीं मिहागटाल यहुदि पेद्दाल्कुन नावातोनि लोहचीम्टु. आ मनकानद बतलन्ना तप्पु मत्ते, ओना तप्पुन मिमेट हूप्सा परांतिर,” इंचि इत्तोर.6 पेसतुस राज्यपाल एनमिदी पदि रोजकु ओरतोनि मंचि, कैसरिया सहरते वापस होत्तोर. इंकुंदी रोजु कोरटते न्यायम कियाना जेगातगा उदसि पौलुसुन तायालय आदेस हीतोर. 7 पौलुस वातारित्ते, येरूसलेमताल वाता यहुदिल्कु ओना सुट्टु नित्तुतुर. आनि ओना पोर्रो वेल्लेने पेद्दा तप्पुकु दोस्तुर, गानि उंदि इंका तप्पु निजम कीसि वेहा पर्राहिल्लुर. 8 अस्के पौलुस, “नना यहुदिल्कना दर्मसास्त्रमता नियमकुना अड्डम बतले कबळ किया हिल्लेन, गुळितगा बतले तप्पु कबळ किया हिल्लेन, कैसर राजांक अड्डम बतले वळका हिल्लेन,” इंचि इत्तोर. 9 पौलुस अल्हा इत्ता पजा, यहुदिल्कुन कुस कियालय पेसतुस पौलुसुन, “इव पोल्लेना न्यायम येरूसलेमतगा नावा मुन्ने आयागोम इंचि नीवा मनसु मंताना,” इंचि इत्तोर. 10 अस्के पौलुस, “इंदके नना कैसरना कोरटतगा नित्तिसि मंतन, इगेने नावा न्यायम आया पींता. नना यहुदिल्कुनतोनि बतल तप्पु किया हिल्लेन इंचि निमे इंका बेस एरपाट कींतिन. 11 नावद गिंटा हामुटा सिक्सा लायक तप्पु मत्ते, नना हायालय तयार मंतन. गानि बदय्ते तप्पु लोकुल्कु नावापोर्रो दोस्सेक मंतुर, अद गिंटा निजम हिलाकुंटे नाकुन बोरे ओरा कय्दे हिया पर्रुर. नावा न्यायम इगे आयाकुंटे, कैसर राजानगा आयागोम इंचि विनंति कीसेक मंतन,” इंचि इत्तोर. 12 पजा पेसतुस ओना पंचादिते उदता पेद्दाल्कुनतोनि वळ्कसि, “निमे कैसर राजानगा न्यायमताहाटीं विनंति कीतिन अय्ते ओनागेन दाकिन,” इंचि इत्तोर.
पौलुसुन अग्रिप्पा राजाना मुन्ने केयमड
13 कोन्नि रोजकु आतारित्ते, अग्रिप्पा राजालa आनि ओना हेलड बर्निका गिंटा पेसतुस राज्यपालुंक कलियालय कैसरिया सहरते वातुर. 14 ओर इव्वुर वेल्लेने रोजकु अगा मत्तुर. मत्तस्के, पेसतुस राज्यपाल पौलुसुना न्यायमता बारेमते अग्रिप्पा राजांक इल्हा वेहतोर गदा, “मुन्नेटा पिलिक्स राज्यपाल, वरोर मनकन इगेने जेलने इरसि होत्तोर. 15 बस्कय्ते नना येरूसलेमते मत्तन, अस्के पेर्मालोर्क आनि यहुदि पेद्दाल्क ओनपोर्रो तप्पु दोस्सि, ‘ईनकु हामुरता सिक्सा हीम,’ इंचि नाकुन इत्तुर. 16 नना ओर्कुन इत्तन, ‘बचोदाका तप्पु दोस्तोरा मुन्ने, तप्पु कीता मनकल नित्तिसि, ओना तप्पुना बारेमते वळ्कोर, अचोदाका ओन्कु सिक्सा हियना रोमन लोकुल्कुना रीत हिल्ले,’ इत्तन. 17 अल्हा इत्तस्के, ओर लोकुल्कु नावातोनि इगे वातुर आनि नना आल्सेम कियाका, इंकुंदी रोजु न्यायम कियाना जेगातगा उदसि, आ मनकन तायालय आदेस हीतन. 18 ओना पोर्रो तप्पु दोस्सानुर नित्तिसि ओना तप्पुकु वेहतुर, गानि नना इनकुत्ताप बदे तप्पु ओना पोर्रो वेहा हिल्लुर. 19 सिराप ओर ओरा दर्मतां पोल्लेना बारेमते, आनि वरोर हासोत्तोर येसु पोर्रोलता मनकना बारेमते वेहतुर. पौलुस बारे, ‘येसु इनानोर हातोर गानि जीवाते मंतोर,’ इल्हा इंतोर. 20 इसोंटा पोल्लेन बल्हा न्यायम कीकन इंचि नाकु तेळियाकोंदु. अदुनहाटीं नना ओन, “इव पोल्लेन पय्सला कियालय येरूसलेम दांतिना?” इंचि पूसकीतन. 21 अस्के ओर इत्तोर, “नावा न्यायम कैसर राजानगा आयागोम, अदवेरदाका इगेने जेलते मनंतन,’ इंचि विनंति कीतोर. अदुनहाटीं नना ओन कैसरनगा लोहन दाका ओर इगेने मन्निर,” इंचि आदेस हीतन.
22 अस्के अग्रिप्पा राजाल पेसतुसुनतोनि, “आ मनकल इनना पोल्लें नाकु केंजना मनसु मंता,” इंचि इत्तोर. “अल्हा अय्ते, ओना पोल्लें नाडि केंजकिन,” इंचि पेसतुस इत्तोर.
23 इंकुंदी रोजु अग्रिप्पा राजाल आनि बर्निका बेस सोक आसि वातुर. आनि ओर सिपाइल्कुना अदिकारिल्कु, सहरता पेद्दा मनकलोर्कुनतोनि पंचादि कीयाना जेगाते होत्तुर. अस्के ‘पौलुसुन पीसि वटु’ इंचि पेसतुस आदेस हीतारित्ते, पौलुसुन तत्तुर. 24 अस्के पेसतुस राज्यपाल इत्तोर, “अग्रिप्पा राजाल आनि इगे जमा आतुर लोकुल्कुनिटा! ई मनकन मिमेट हूळसंतिर, येरूसलेमतुर आनि इगेटुर इंका, वेल्लेटुर यहुदुल्क नहगा वासि, ‘ईन जीवाते इरमळ बेस आयो’ इंचि वरगेयसेक विनंति कीतुर. 25 गानि ईर हामुटा सिक्सा लायक बतले तप्पु कीयवाप नाकु दिसता. आनि ओर कुद कैसर राजाना मुन्ने न्यायम आयागोम इंचि विनंति कीतोर, अदुनहाटीं ईन कैसर राजानेके रोमते लोहना विचारम कीसेक मंतन. 26 गानि ईना बारेमते कैसर राजांक बतल रासना नाकु तेळिया हिल्ले. अदुनहाटीं ईना पोल्लें केंजता पजा, बदाना पोल्ले नाकु रासालय दोर्कार बारे इंचि मीवा मुन्ने ईन तत्तन, अस्सल अय्ते अग्रिप्पा राजाना मुन्ने तत्तन. 27 जेलते मत्ता मनकना बारेमते ओना तप्पु बतले वेहवा, उंदे मल्का ओन कैसर राजानगा लोहमड नाकु बेस दिस्सो,” इंचि इत्तोर.