पेलिक्स राज्यपालना मुन्ने पौलुसुन निलाहमड
24
1 हेय्युं रोजकु आतारित्ते हनन्या पोर्रोलतोर पेद्दा पेर्माल, इच्चुर यहुदि पेद्दाल्कुन, तिरतुल्लुस पोर्रोलतोर वकिलुन पीकुंचि कैसरिया सहरते वातोर आनि ओर राज्यपालुना मुन्ने पौलुसुनद तप्पु हूप्सालय वातोर. 2 राज्यपाल पिलिक्स, पौलुसुन केयतारित्ते, तिरतुल्लुस इनना वकिल ओनपोर्रो तप्पु दोसि इनालय दल्गतोर, “राज्यपाल, नीवा हेंदाल मोमोट वेल्ले रोजकुनाल सांतिते मंतोम आनि नीवा तेल्विहेंदाल मावा देसेम सुदरांचेके मंता. 3 दीन मोमोट अन्नि जेगाने, अन्नि तीरकुने, आनि पूरा मनसुने ओपकुंतोम. 4 नना निक वेल्लेने पोल्लें वेहचि तिप्पल किय्योन, गानि विनंति कींतन मावां रोंड पोल्लें केंजा. 5 ई मनकल जेग्ळाल्कु पुटिच्चानोर, दुनियाते मनना अंटुर यहुदिल्कुन होंग वायागोटनोर आनि ईरु नासरेत पार्टिताa लिडर आंदुर. 6 मावा गुळितुन हेडहासेकगुडा मत्तोर, अदुनहाटीं ईन मोमोट पीतोम. (मावा नियम मत्ताप ईना न्यायम कींतोम इंचि मोमोट हूळतोम, 7 bगानि सिपाइल्कुना अदिकारि लुसियाल वासि जबरदस्तिते ईनु मावागटाल इगिस ओतोर.) 8 आनि तप्पु दोसानुर मीवा मुन्ने वायना इंचि आदेस हीतोर. मोमोट ईना पोर्रो बव तप्पुक अय्ते दोसतोम अव अन्नि निजमा-आबद्दमा निमेने पूस कीसि हूळा, पूसकीतारित्ते नीकु पूरा तेडियंता.” 9 अस्के यहुदिल्कु इंका ओनाहेके आसि, ‘इवन्नि पोल्लें निजमे’ इनालय दल्गतुर.10 पजा राज्यपाल, पौलुसुन वळकालय सयगे कीतोर, अस्के ओर, “निमे वेल्लेने वर्सानाल ई देसेमते न्यायम कीसेक मंतिन इंचि तेळियता. अदुनहाटीं नीवा मुन्ने नना कुसिते, नावा पोल्लें वेहंतन. 11 नना येरूसलेमते पेंदुन मोळकालय होंचि पन्नेंडु रोजकुंकन्ना एक्को आया हिल्ले, इद पोल्ले निजमे इंचि नीकु तेडियार. 12 नना गुळिते बोनतोने लोल्लि कीतद ईर हूळा हिल्लुर, आनि दर्मसास्त्रम कराहना लोहकुने आयि, सहरते आयि लोकुल्कुनतोनि जग्ळाम पुटिस्तद इंका ईर हूळा हिल्लुर. 13 इंदके नीवा मुन्ने, नावापोर्रो दोस्ता तप्पुकुन ईर निजम कीसि हूप्सा पर्रुर. 14 गानि उंदि पोल्लेतुन नीवा मुन्ने नना ओपकुंतन. नना पेंदा हर्दे ताकसि, मना पेद्दाल्कुना पेंदा पूजा कींतन. आ हर्दुन ईर तप्पुड पार्टि इंतुर. आनि मूसाना नियमते, पेंदा कबुरतोरा नियमते रासतव अन्नि पोल्लेन पोर्रो नना विस्वासम कींतन. 15 सत्तेमते ताकानोर्कुन आनि सत्तेमते ताकवोर्कुन पेन हातोरागटाल तेहंता इंचि ईर आसे इरताप, नना इंका आसे इरंतन. 16 अदुनहाटीं नना पेंदा मुन्ने आयि, लोकुल्कुना मुन्ने आयि बस्केडकु बेस मनसुने ताकालय हूळंतन.
17 नना वेल्लेने वर्सांनाल येरूसलेमते हिलाका मत्तन, गानि इंदके मावा गरिब लोकुल्कुनाहाटीं दान-दर्मम एविचि हियालय आनि गुळितगा पेंदुक मोक्कु हियालय वासि मत्तन. 18 नना गुळितगा सुद्दिकरन आसि, दंडकाल्कु महानेंके नाकुन हूळतुर. अस्के अगा वेल्ले मंदि मना हिल्लुर आनि लोल्लि मनाहिल्ले. 19 गानि एसियाताल वातुर इच्चुर यहुदिल्क अगा मत्तुर. ओर्कु गिंटा नावा तप्पु अनपिस्ते, ओर नीवा मुन्ने वासि, नावापोर्रो तप्पु दोस्सिरकाटी. 20 हिलाकुंटे यहुदि पंचादिते नावा न्यायम कीतुर, नावद बतल तप्पु दोर्किस्तुरो, इगे मत्तुर वेहाटु. 21 “हातुर इंका जीवा अरंतुर,” इंचि जोरते इत्तन. इय्याला अदे पोल्लेता न्यायम मीवा मुन्ने आसेक मंता, इंचि पौलुस इत्तोर.
22 पिलिक्सुंक, पेंदा हर्दा बारेमते बेस एरपाट मत्ता. अदुनहाटीं न्यायम कियानद आपसि, “सिपाइल्कुना अदिकारि लुसियाल वातारित्ते नीवा पोल्लेता पय्सला कींतन,” इंचि इत्तोर. 23 पजा दरोगान, ‘ईन दोहाकुंटा जेलते इर्रा, आनि ईना दंटातुर बतलन्ना हियालय वाते ओर्कुन आपमा,” इंचि आदेस हीतोर.
पिलिक्सुंक आनि ओना मुत्तोंक येसुना पोल्लें पौलुस वेहतोर
24 कोन्नि रोजकु आतारित्ते पिलिक्स ओना यहुदि जातिता मुत्तो दुरसिल्लानतोनि अगा वातोर. पजा पेलिक्स पौलुसुन केया लोहतोर, पौलुस वातस्के, येसु किरिस्तुन विस्वासम कियाना पोल्लेंन ओनहेंदाल केंजतोर. 25 गानि बस्कय्ते पौलुस पेलिक्सुनतोनि, “सत्तेमते बल्हा ताकाना, बल्हा ओपकेते मनना, पेन दुनियातुरा न्यायम आकरित्ते बल्हा कियार इव पोल्लेना बारेमे ओनतोनि चर्चा कीतोर. अस्के पिलिक्स वेरियतोर आनि पौलुसुन, “इंदके निमे होन, वेला दोर्कतस्के नना नीकुन मर्रा केयंतन,” इंचि इत्तोर. 26 पौलुस कोत्तां हियानुर बारे इंचि पेलिक्स आसे पडसि ओन ऊके-ऊके केयसि ओनतोनि वळ्कुंदुर.
27 रोंडु वर्सां इल्हेने पेय्सि होत्तरित्ते पिलिक्सना जेगाते पुरकियुस पेसतुस पोर्रोलतोर राज्यपाल आतोर. अस्के पेलिक्स होनना वेलाते, यहुदिल्कु ओनहेंदाल कुस आयनाहाटीं पौलुसुन जेलतेने इरतोर.