23
1 पौलुस पेद्दा पंचादितगा जमातोर्कुन उंदेतीर हूळसि, “नावा दादालुरिटा! नना, इय्यालादाका पेंदा मुन्ने बेसता मनसुने पिसतन,” इंचि इत्तोर. 2 अस्के हनन्या पोर्रोलतोर पेद्दा पेर्माल, पौलुसुना पक्काते नित्तिसि मत्तोर्कुन, “ओना तोड्डि पोर्रो तन्नाटु,” इंचि आदेस हीतोर. 3 अस्के पौलुस ओनतोनि, “ए चुना होकता गुरेतसंटोना! पेन नीकुन तनांता. बारित्ते, निमे दर्मसास्त्रमता नियम मत्ताप नावा न्यायम कियालय उदतिन, गानि दानकु अड्डम नाकुन तनालय आदेस बल्हा हीतिन?” इंचि इत्तोर. 4 अस्के पक्काते नित्तिसि मत्तुर, “निमे पेंदा पेद्दा पेर्माना अपमानम कीसंतिना?” इंचि इत्तुर. 5 “दादालुरिटा, ईरु पेद्दा पेर्माल आंदुर इंचि नाकु एरपाट मनाहिल्ले. बारित्ते, ‘नीवा अदिकारिनाहाटीं सेड्डा पोल्ले वळका मन्नि,’a इंचि नियमते रासि मंता,” इल्हा पौलुस इत्तोर.6 अगा यहुदिल्कुना पेद्दा पंचादिते उदसि मत्ता लोकुल्कु इच्चुर सदुकिर आनि इच्चुर परिसिल्कु आंदुर इंचि पौलुसुंक तेळियतारित्ते, ओरा मुन्ने जोरसे वरगेयसि, “दादालोर्कुनिटा! नना परिसिन आंदुन. नावा तादल-बाबो इंका परिसिल्कु आंदुर. हातुरद मर्रा जीवा अरंता इंचि नना विस्वासम कीताहाटीं मीवा मुन्ने निलसि मंतन,” इंचि इत्तोर. 7 ओर इल्हा इत्तारित्ते परिसिल्कु आनि सदुकिर लोप्पो लोल्लि आता. आनि ओर अलग-अलग आतुर. 8 बारित्ते, हातुर मर्रा जीवाते तेदुर, पेंदा दूतां हिल्लें, आत्मां हिल्लें इल्हा सदुकिर इंतुर. गानि परिसिल्कु बारे इव अन्नि मंतां इंचि इंतुर. 9 अगा वेल्ले लोल्लिं आतां. अगा उदसि मत्ता दर्मसास्त्रम कराहना परिसि गुरुल्कुनाल इच्चुर तेदिसि, “माकु ईना लोपो बतल तप्पु दिसेके हिल्ले. ईनतोनि बदाना आत्मा हिलाकुंटे बदाना पेंदा दूता वळकिस मंदार,” इंचि इत्तुर. 10 इल्हा ओरा लोप्पो इच्चोर लोल्लिं आतां गदा, पौलुसुन हव्कनुर बारे इंचि सिपाइल्कुना अदिकारि वेरियतोर. पजा, “पौलुसुन ओरागटाल अलग कीसि किल्लाते पीसि ओम्ट,” इंचि सिपाइल्कुंक आदेस हीतोर. 11 अदे नर्का सामि पौलुसनगा वासि, “पौलुस निमे वेरियमा. बल्हा निमे येरूसलेमते नावा गवाइ हीतिन, अल्हेने रोम सहरते इंका नीकु नावा गवाइ हियनद मंता,” इंचि इत्तोर.
पौलुसुन हव्कना पिलान
12 इंकुंदि रोजु हक्केरे पौलुसुन हव्कलय यहुदिल्कु पिलान कीतुर. कीसि ‘ओन हव्कवा मोमोट तिन्नोम-उन्नोम’ इंचि ओट्टु तित्तुर. 13 इल्हा पिलान कीतोरु नल्पै मंदिकन्ना एक्को मत्तुर. 14 ओर पेद्दा पेर्मालोर्कुनगा आनि यहुदि पेद्दल्कुनगा होंचि, “मोमोट बच्चोरदाका पौलुसुन हव्कोम, अच्चोरदाका मोमोट बतले तिन्नोम-उन्नोम इंचि गट्टिगा ओट्टु तित्तोम. 15 अदुनहाटीं इंदके मिमेट आनि यहुदिल्कुना पेद्दा पंचादितुर कलियसि सिपाइल्कुना अदिकारिनगा होंटु. अगा होंचि, ‘पौलुसुन, इंका बेस पूसकियानद मंता, ओन माहगा लोहचिम,’ इंचि तेडियागोटसि वेहाट. ओर मीहगा एवाका मुन्नेने ओन हव्कालय तयारते मनंतोम,” इंचि इत्तुर.
16 गानि पौलुसुन हव्कालय कोरसंतुर इंचि पौलुसुना हडेमर्रि केंजतोर. अस्के ओर किल्लाते होंचि पौलुसुंक पूरा वेहतोर. 17 वेहतारित्ते पौलुस वरोन दरोगान केयसि, “ई लेय्योन सिपाइल्कुना अदिकारिनगा ओम, ईर ओन्कु बतलो वेहंतोर अले,” इंचि इत्तोर. 18 अस्के दरोगाल सिपाइल्कुना अदिकारिनगा ओसि, “जेलने मनना पौलुस ईन मीहेके तायालय नाकुन विनंति कीतोर. ईर निक बतलो वेहंतोर अले,” इंचि इत्तोर. 19 पजा आ सिपाइल्कुना अदिकारि ओना कय पीसि, बोरे हिल्वगा ओसि, “वेहा, नावातोनि बतल वळकानद मंता?” इंचि पूसकीतोर. 20 अस्के लेय्योड, “यहुदिल्क उंदि आसि, पौलुसुन इंका बेस गट्टिगा पूसकियाना बहानाते नाडि यहुदिल्कुना पेद्दा पंचादिते केयागोटनाहाटीं, नीकुन विनंति कींतुर. 21 गानि निमे ओरा पोल्लें केंजमा. बारित्ते, नल्पैकन्ना एक्को लोकुल्कु पौलुसुन हव्कवा मोमोट तिन्नोम-उन्नोम इंचि ओट्टु तित्तुर. निमे ‘ओन ओम्टु’ इंचि आदेस हियानद एदुर हूळसंतुर,” इंचि वेहतोर.
22 वेहतस्के, आ सिपाइल्कुना अदिकारि, “निमे नाकु इव पोल्लें वेहतिन इंचि बोर्के वेहमा,” इंचि आ लेय्योन लोहचीतोर.
पौलुसुन पिलिक्स राज्यपालनगा लोहमड
23 अस्के आ सिपाइल्कुना अदिकारि ओना इव्वुर दरोगाह्कुन केयसि, “रोंडु नुह्कु सिपाइल्कु, डेब्बै मंदि गुर्राल्कुन पोर्रो उदिसि होनानुर, रोंड नुह्कु गोर्कां पियानुर्कुन नर्काटां तोम्मिद एगानेंके कैसरिया सहरते होनालय तयार इर्रट. 24 पौलुसुन ओयालय गुर्राल्कुन तयार इर्रट आनि ओन बेस कापाडसि पिलिक्स राज्यपालनगा ओम्टु,” इंचि वेहतोर. 25 ओर उंदि इल्हा सिट्टि रासतोर,
26 “महाराज पिलिक्स राज्यपाल नीकु,
कलादियुस लुसियाना हेंदाल
नमस्कार.
27 यहुदिल्क ई मनकन पीसि हव्कसेक मत्तुर, गानि ईर रोम रहिवासि इंचि नना केंजतस्के सिपाइल्कुन पीसि होंचि ओरागटाल ओन पिसागोटतन. 28 आनि ओना तप्पु बतल आंदु, इदुन एरपाट कियालय ओन ओरा पेद्दा पंचादिते ओतन. 29 अगा ओर, ओनपोर्रो तप्पुक दोस्तव अन्नि ओरा दर्मसास्त्राल्कुना हेंदाले मत्तां. अदुनहाटीं ओन हव्कनसोंटा हिलाकुंटे ओन जेलने वाटानसोंटा तप्पु ओनगा दिसा हिल्ले. 30 गानि ओन बोरो हव्कना मंता इंचि नाकु तेळियतस्के, ओन बिराना निहेके लोहचीतन. आनि ओनपोर्रो तप्पु दोस्सानोर बोरय्ते मंतुर ओर नीवा मुन्ने वासि ओना तप्पु बतलो नीकु वेहागोम इंचि ओर्क आदेस हीतन,” इंचि सिट्टि रासतोर.
31 सिपाइल्कुंक बल्हा आदेस हीतोर, अल्हेने पौलुसुन पीसि नर्कटद-नर्केने अंतिपत्रि सहरते ओतुर. 32 आनि इंकुंदी रोजु गुर्राल्कुन पोर्रो होनानोर्कुन ओनतोनि होनालय होळसि, कळमातोर किल्लाते तिरियसि वातुर. 33 ओर कैसरिया सहरते एवतारित्ते राज्यपालुंकु सिट्टि हीसि पौलुसुन ओना मुन्ने निलाहतुर. 34 राज्यपाल सिट्टि हदुवतोर आनि ‘निमे बद एरियातोन’ इंचि पौलुसुन पूसकीतोर. ओर किलिकिया एरियातोर इंचि तेळियतारित्ते, 35 ओर ओनातोनि, “नीवा पोर्रो तप्पु दोस्सानुर इगे वातारित्ते नीवा न्यायम कींतन,” इंचि इत्तोर. पजा पौलुसुन, हेरोद राजाना किल्लाते मनना जेलने इरतोर, आनि ‘ओना पहारा कीम्टु’ इंचि आदेस हीतोर.