पौलुसना बासन
22
1 पौलुस, “दादालुर्कुनिटा आनि पेद्दाल्कुनिटा, नाकु मीवा मुन्ने इच्चुर वळकनद मंता अदुन केंजट.” इंचि वळकालय दल्गुतोर. 2 ओर इब्रानि बासाते वळकानदुन केंजसि इंका इच्चो सपुडदाका आतुर. 3 “नना यहुदि मनकन आंदुन. नना किलिकिया एरियाता तरसुस सहरते पुटतन. आनि इद येरूसलेम सहरते बेरसतन. इंका गमलियेल इनानोना कय्दा हिडु मंचेके ओनहेंदाल बेस सदवु करियतन. अचोने आयका मना पेद्दाल्कुना नियम्क आनि रीति-रिवाजुक मत्ताप बेस टेरनिंग दोर्कुता. मिमेट बल्हा अय्ते इय्याला पेंदाहाटीं मीवा बक्तितुन हुपिच्चंतिरो, अल्हेन नना इंका हुपिचेक मनुंदुन. 4 नना पेंदा हर्रि पीसि ताकाना लोकुल्कुन बच्चोनो तकलिप कीतन, दीनहेंदाल इच्चुर लोकुल्कुना जीवां इंका होत्तां. मुर्तड-मांडसा इनाकोंटा अंटोर्कुन पीसि जेलने वाटुंदुन. 5 पेद्दा पेर्माल आनि अंटोर यहुदि पेद्दाल्क नावा ई कबळहाटीं गवाइ मंतुर. अचोने आयका दमिस्क सहरते मनना यहुदि दादालोर्कुंक सिट्टिं राससि दमिस्क सहर होनालय पेय्सतन. अगा होंचि पेंदा हर्रि पीसि ताकानोर्कुन दोर्का पीसि येरूसलेमते तायगोम आनि ओर्कु सिक्सा आयगोम. इदे नावा उद्देसम मत्ता.”पौलुस ओना मनसु मारियता संगति वेहांतोर
6 इल्हा नना दमिस्क सहर होनालय पेय्सतन. नना दमिस्क सहर दगेर्क एवतन बारे! अस्के पियल वेलाक मब्बुनाल उंदेदम उंदि पेद्दा वेलगु नावा सुट्टु जग्गरा मेर्सता. 7 नना अल्हेन बूमिपोर्रो हिड अरतन. अस्के उंदि अल्किर नाकुन, ‘साऊल, साऊल! निमे नाकुन बारि तकलिप कीसंतिन?’ इंचेके इत्ता. 8 अस्के, ‘निमे बोन आंदिन सामि?’ इंचि इत्तन. अस्के, “निमे बोर्कुन अय्ते तकलिप कीसंतिनो आ नासरेत नाटेना येसुन आंदुन,” इंचि आ अल्किर इत्ता. 9 नावातोनि मत्तुर ओर अद वेलगुन हूळतुर गानि नावातोनि वळकता अल्किर मात्रम ओर्क केंजा वाया हिल्ले. 10 पजा, ‘अय्ते नना बतल कीकन सामि? इंचि पूसकीतन. अस्के, ‘निमे तेदा आनि दमिस्क सहरते होन. बव कबाह्क अय्ते कियालय नना नीकुन पेर्कुत्तनो अव कबाह्क अगा नीकु वेहमड़ जर्गंता.’ इंचि सामि नाकु वेहतोर. 11 आ जग्गरा वेलगुन हूळसि नावा कळकु दिसाकोंटा आतां. अदुनहाटीं नावा दंटातुर नाकुन कय पीसि दमिस्क सहरते ओतुर.
12 अगा हनन्या पोर्रोलतोर वरोर मनकल मत्तोर. ओर मूसाना नियम परकारम ताकुंदुर. आनि अगाटा अंटोर यहुदिल्क इंका ओन बेस मनकल इनुंदुर. 13 ओर नाहेके वातोर आनि नावा दग्गेरे नित्तिसि, ‘साऊल दादा! नीवा कळकु मर्रा दिस्सींकांटी,’ इंचि इत्तोर. ओर अल्हा इत्ता इन्मडे नावा कळकु दिसालय दल्गुतां आनि नना ओन हूळतन. 14 पजा ओर नाकुन, ‘मना एनकटा पेद्दाल्कुना पेन दाना इच्चातुन एरपाट कियालय, नितिमंतुड आता दाना सेवकुन हूळालय आनि ओना तोडदा पोल्लेन केंजालय नीकुन पेर्कुत्ता. 15 बारित्ते निमे बतल अय्ते हूळतिन आनि बतल अय्ते केंजतिन अदुना बारेमते दाना हेंदाल अंटोर लोकुल्कुना मुन्ने गवाइदार आंतिन. 16 अय्ते इंदके आलसेम बारि कीसंतिन? तेदा, तेदसि बापतिस्मा एता आनि सामिना पोर्रोलते पारतना कीम, अस्के ओर नीवा पापाल्कुन नोर्रांतोर,’ इंचि इत्तोर.
17 आयंका नना येरूसलेम तिरियसि वासि गुळिते पारतना कीसेके मत्तन, अस्के अल्हेन दर्सनम हूळतन. 18 दर्सनमते मनानेंकेन नना सामिन हूळतन, अस्के, “बिराना तेदा! तेदसि येरूसलेम सहरताल पेय्सि होन, नावा बारेमते निमे वेहाना गवाइतुन ओर ओपकुन्नुर,” इंचि सामि नाकु वेहतोर. 19 अस्के, ‘यहुदिल्कुना दर्मसास्त्रम कराहना हरेक लोते होंचि नीवा पोर्रो विस्वासम कियानोर्कुन दोर्का पीसि ओर्कुन जेलने वाटता संगति आनि तंता संगति ओर लोकुल्कुंक बेस एरपाटे मंता. 20 अचोने आयका नीवा गवाइदार स्टिपनुन हव्कानेंके, ‘हव्कानंटे नावद इंका कय मत्ता’ इंचि हुपिचेक, ओन हव्कानोरा कपडिंना कावेल कीसेक नना अग्गेन नित्तिसि मत्तन सामि,’ इंचि इत्तन. 21 अस्के सामि नाकुन, ‘निमे होन, नना नीकुन वेल्लेन लक्कु वेरे जातितोरा लोप्पो लोहंतन,’ इंचि इत्तोर.
पौलुसुन यहुदिल्कुना पेद्दा पंचादिता मुन्ने निल्हांतुर
22 इद पोल्ले वेहनदाका यहुदि लोकुल्कु पौलुसना बासन केंजतुर, पजा जोरसे वरगेयसि, “ई मनकल जीवाते मनमड़ बेस आयो. इसंटा मनकन ई बूमिपोर्रोटाल हिलाकोंटा कीम्टु.,” इंचि इत्तुर. 23 ओर जोर-जोरसे वरगेयसेक मत्तुर, अंगिपोर्रो केर्ता कोटकुन तेंडसि विसिरसेके मत्तुर इंका मब्बुन हेके दुब्बा तेहासेक मत्तुर. 24 अस्के सिपाइल्कुना अदिकारि पौलुसुन किल्लाते ओयानहाटीं आदेस हीतोर. आनि ‘लोकुल्कु ओना विरोदमते इल्हा बारिंक वरगेयसंतुर, कारनम बतल आंद तेळियनाहाटीं, ओन पोट्टे देब्बां तंचि-तंचि पूस कीम्टु,’ इंचि वेहतोर. 25 गानि बस्के अय्ते पौलुसुन पोट्टे देब्बां तनालय दोहचेके मत्तुर, अस्के अगा नित्तिसि मत्ता दरोगान, “तप्पु कीतोर इंचि निर्नायम पेय्सका मुन्नेन वरोन रोम रहिवासिन पोट्टे देब्बां तनमड़ मीवाहाटीं न्यायामेना?” इंचि पौलुस पूसकीतोर. 26 अल्हा इत्तद केंजसि आ दरोगाल सिपाइल्कुना अदिकारिनगा होत्तोर. होंचि, सिपाइल्कुना अदिकारिन, “मिमेट इद बतल कीसंतिर? ईर रोम रहिवासि अले!,” इंचि इत्तोर. 27 अस्के आ सिपाइल्कुना अदिकारि पौलुसनगा वासि, “नाकु वेहा, निमे रोम रहिवासिन आंदिना?” इंचि पूसकीतोर, अस्के पौलुस “आ” इंचि इत्तोर.
28 पजा सिपाइल्कुना अदिकारि, “नना रोम रहिवासि आयानाहाटीं वेल्लेन कोत्तां कर्स कीतन,” इंचि इत्तोर. अस्के, “नना अय्ते पुट्तस्केटाले रोम रहिवासिन आंदुन,” इंचि पौलुस इत्तोर. 29 पजा ओन पूसकियालय हूळसेक मत्ता सिपाइल्कु बिराना पजोळ्क आतुर आनि सिपाइल्कुना अदिकारिगुडा, ‘रोम देसेमता वरोन रहिवासिन दोहाचि वाटतोम’ इंचि वेल्ले वेरियकुत्तोर.
30 यहुदि लोकुल्कु पौलुसुन पोर्रो बारि दोसेम दोस्तुर. निजम बतलो पलाते अरगोम इंचि सिपाइल्कुना अदिकारिना मनसुने मत्ता. अदुनहाटीं सिपाइल्कुना अदिकारि इंकुंदी रोजु, पेद्दा पेर्मालोर्कुन आनि यहुदिल्कुना पेद्दा पंचादितोर्कुन जमा आयालय आदेस हीतोर. अंटोर जमा आतास्के पौलुसुन पेचाहचि ओरा मुन्ने तच्चि निलाहतोर.