येरूसलेम सहरता पय्नम
21
1 ओर माकुन सार्ला कीता पज्जो मोमोट डोंगा उदसि सवरगा कोस इनना दीबेक होत्तोम. अगटाल इंकुंदी रोजु रुदास इनना दीबेक आनि अगटाल पतरा इनना सहर होत्तोम. 2 अगा माकु पिनिके इनना एरियाकु होनानद उंदि डोंगा दोर्कता अय्ते मोमोट अंटे उदसि पेसतोम. 3-4 बस्के अय्ते माकु साइप्रस दीबे दिसालय दल्गता अस्के मोमोट दान मावा डेमा बाजुंक होळसि सिरिया एरियाता हेके तिरियतोम. बारित्ते सूर सहर सिरिया एरियाते मत्ताहेंका डोंगाते मत्ता माल सुर सहरते रेहनद मत्ता. पजा मोमोटगुडा अग्गेन रेयतोम. अगा माकु सिस्युल्क कलियतुर अय्ते ओरतोनि मोमोट एडुं रोजकुनदाका आगतोम. ओर पवित्र आत्मा हेंदाल पौलुसुन, ‘निमे येरूसलेम होनुमा’ इंचि इत्तुर. 5 वारम आता पज्जो अगटाल मोमोट मावा पय्नम पेसतोम. अगाटा विस्वासुल्क ओरा मुत्तोहकु, पिलाल्कु अंटोर सहरता पलाते समुद्रम ओड्डुन दाका मातोनि वातुर. अगा मोमोट टोंगरां उहचि पारतना कीतोम. 6 ओर माकुन सार्ला कीतंका मोमोट डोंगा एकतोम. आनि ओर ओरा लोहकुने वापस होत्तुर.7 सूर सहरताल डोंगाते उदसि पय्नम कीसेके मोमोट पोलेमा इनना सहरते वासि रेयतोम. अगाटा दादालोर-अक्काह्कुंक कलियसि ओरतोनि मोमोट उंदि रोज मत्तोम. 8 aइंकुंदी रोजु मोमोट अगटाल पेयसि कैसरिया सहर होत्तोम. अगा होंचि मोमोट, पिलिपुस पोर्रोलता पेंदा सेवाकुना लोन आगतोम. ई पिलिपुस येरूसलेम सहरते गाटो पंचि दोसनाहाटीं पेरता एडुर लोप्पोटाल वरोर मत्तोर. 9 ओन्कु नालुं मिय्याह्कु मत्तां, अवुनव इंका मरमीं आया हिल्लें. अय्ते अव नालुं इंका बविस्यवानि वेहुंदुं. 10 मोमोट अगा कोन्नि रोजकु आगसि मत्तोम, अस्के यहुदिया एरियाताल वरोर पेंदा कबुरतोर वातोर ओन पोर्रोल अगबुस. 11 ओर मावा दग्गेर्क वासि पौलुसना नडिता पट्टा तेंडकुत्तोर आनि ओना कय्कु-काल्कुन दोहकुंचि, “इद पट्टा बोनद अय्ते आंदो ओन, येरूसलेम सहरते यहुदि लोकुल्कु इल्हेन दोहाचि वेरे जातितोर्कुंक अप्पजेपांतुर, इंचि पवित्र आत्मा वेहचेक मंता,” इल्हा इत्तोर. 12 इद केंजतारित्ते मोमोट आनि आगटा लोकुल्कु ‘निमे येरूसलेम सहर होनुमा, इंचि बतिमलाडतोम. 13 अस्के पौलुस, “इल्हा अळसि-अळसि नावा मनसुन कमजोर बारि कीसंतिर? नना येरूसलेम सहरते सिराप दोहांतुर इंचि आयो गानि, येसु सामिना पोर्रोलहाटीं हायालय इंका तयार मंतन,” इंचि इत्तोर. 14 मोमोट बच्चो वेहिना गानि ओर केंजवाहेंका, ‘पेंदा इच्चा मत्ताप जर्गिकांटी’ इंचि मोमोट सपुडदाका आतोम.
15 इल्हा कोनि रोजकुन पज्जो मोमोट मावा तयारिं कीसि येरूसलेम सहर होत्तोम. 16 मावातोनि कैसरिया सहरतुर इच्चुर सिस्युल्क इंका वातुर. ओर माकुन साइप्रस दीबेतोर वरोर मनकल मनासोनना लोन ओतुर. मोदोलता विस्वासुल्कुनाल ओर वरोर सिस्युड आंदुर. माकु ओनागेन आगनद मत्ता.
पौलुस याकोबुंक कलियांतोर
17 मोमोट येरूसलेम सहर एवतारित्ते अगाटा दादालोर-अक्काह्क पेद्दा आनंदमते माकुन कल्पुकुत्तुर. 18 इंकुंदी रोजु पौलुस माकुन अंटोर्कुन पीसि याकोबुंकुb कलियालय होत्तोर. अगा येरूसलेम सहरतोर अंटोर विस्वासि पेद्दाल्क मत्तुर. 19 मोदगाला पौलुस ओर्क अंटोर्क सेनार्ति कीतोर. पजा पेन ओन दाना सेवाते वाळकुंचि वेरे जातितोरा लोप्पो बता-बता कबाह्क कीता, अव उंदि-उंदि कबळता बारेमते ओर्क वेहतोर. 20 पौलुस वेहतद केंजसि पेद्दाल्क अंटोर पेंदा स्तुति कीतुर. पजा पौलुसुन, “दादा, बचोनो वेयकुना मंदि यहुदिल्कु इगे विस्वासुल्क आतुर इत्ता संगति निमे हूळसेकेन मंतिन. आनि ओर अंटोर मूसाना नियमतुन बेस पीसि ताकसेक मंतुर. 21 गानि निमे, मूसाना नियमतुन पीसि ताकमटु, मर्कुनद कतना कियमटु इंका यहुदिल्कुना रीति-रिवाजकुन होळसीम्टु इंचि वेरे जातितोरा नड्डुम मनना यहुदिल्कुंक कराहतिन इंचि बोरो इगे वेहतुर. 22 अय्ते इंदके बतल कीकोम मरि? निमे इगे वातिन इत्ता संगति ओर्कु बल्हानना तेळियंते. 23 अदुनहाटीं निमे मोमोट वेहताप कीम. माहगा मोक्कु मोळक्कुत्तोरू नालुर मनकलोर मंतुर. 24 निमे ईरकुन नितोनि ओम आनि ओरतोनि कलियसि निवदगुडा सुद्दिकरन कीकुन. अचोने आयका ओरा तल्ला कोरियनाहाटीं कर्सुंक कोत्तां इंका निमेने हीम. इल्हा कीतिन इत्ते नीवा बारेमते केंजतद अंता वट्टि आबद्दमे. इंका निमे मूसाना नियम परकारमे ताकसंतिन इंचि ओर्कु तेळियसि दांता. 25 मोमोट अय्ते वेरे जातिता विस्वासुल्कुंक दीनकन्ना मुन्नेन उंदि सिट्टि राससि अव्टे, ‘बोम्मांक मोळकतदुन तिनमटु, गोंदके पिसकीसि हव्कता जिवरासिंना नेत्तुर, हव्वीं तिनमटु आनि बोगमतनमताल लक्कु मंटु, इल्हा राससि लोहतोम,” इंचि इत्तुरc.
26 इल्हा पौलुस आ नालुर्कुन पीसि इंकुंदी रोजु ओरतोनि कलियसि ओरगुडा सुद्दिकरन कीकुत्तोर. पजा अगटाल येरूसलेमता गुळिते होंचि, पुरागा सुद्दिकरन आयगोम इत्ते बच्चुं रोजकु एदुर हूळसेके मनापींतनो अदुन बारेमते पेर्मालोरकुंक वेहतोर. अचोने आयका आकिरता रोजकुने ओनतोनि वाता हरेक मनकंक ओना सताताहेंदाल मोक्कु हियापींता इंचिगुडा वेहतोर. 27-28 एडुं रोजकु दगेर-दगेरा पूरा आयानवे मत्तां, एसिया एरियाताल वाता इच्चुर यहुदिल्क पौलुसुन गुळिते हूळतुर. ओर अंटोर लोकुल्कुंक पौलुसना बारेमते एकरेवुल्क वेहचि ओन पीतुर. पजा वरगेयसि, “इस्राएलता लोकुल्कुनिटा, मिमेट अंटोर माकु सहायम कीम्टु. ईर मनकल अन्नि एरियाने तिरियसि मना इस्राएलता लोकुल्कुना विरोदमते, मूसाना नियमता विरोदमते आनि ई गुळिता विरोदमते लोकुल्कुंक कराहसेक मंतोर. अचोने आयका इंदके युनानि लोकुल्कुन गुळिते केयसि तच्चि पवित्रामाता गुळितुनगुडा हेडाह्तोर,” इंचि इत्तुर.d 29 (लोकुल्कु तिरपिमुस पोर्रोलतोर वरोर इपिसुसता मनकन पौलुसुनतोनि तिरियनेंके हूळसि मत्तुर, ओने पौलुस गुळिते तत्तोर बारे इनकुत्तुर.) 30 अस्के पूरा सहर अंता गजबज आता. लोकुल्कु अंटोर विच्चि वासि उंदगा जमा आतुर. आनि पौलुसुन दोर्का पीसि गुळिताल पलाते इग्गिस ओतुर आनि बिराना तल्पुल्कु वाटतुर. 31 लोकुल्क ओन हव्कना विचारम कीसेक मनानेंकेन रोमि पोलिस दलमता सिपाइल्कुना अदिकारिंक, पूरा येरूसलेम सहरते लोल्लि आता इंचि कबुर तेळियता. 32 अस्के ओर बिराना इच्चुर सिपाइल्कुन आनि दरोगालोर्कुन पीसि पौलुसुन तनना यहुदिल्कुनहेके पेस्तोर. यहुदिल्क, सिपाइल्कुना अदिकारि आनि सिपाइल्कुन हूळतारित्ते पौलुसुन तनमड आपतुर. 33 पजा आ सिपाइल्कुना अदिकारि पौलुसुनगा होंचि ओन पीसि गोलसुकुने दोहनाहाटीं आदेस हीतोर. आयंका ओर लोकुल्कुन, ‘ईर बोर आंदुर, ईर बतल कीतोर?’ इल्हा पूसकीतोर. 34 अस्के इच्चुर लोकुल्कु उंदितीर, इंकिच्चुर लोकुल्कु इंकुंदि तीर वेहालय आतुर. इल्हा वेल्लेन लोल्लि आसि निजम बतल ओन्कु तेळिया परा हिल्ले. अदुनहाटीं ओर पौलुसुन किल्लाते ओयालय आदेस हीतोर. 35-36 पौलुस पायरिनगड्क एवतोर अस्के वेल्लेन मंदि लोकुल्क, “ओन हव्कट, ओन हव्कट,” इंचेके उंदेतीर मोत्कुंचेके इरगा लोल्लि कियालय दल्गुतुर. अदुनहाटीं सिपाइल्कुंक ओन ओरा बुजाल्कुन पोर्रो तेहकुंचि किल्लाता लोप्पो ओया पीता.
37 सिपाइल्क पौलुसुन किल्लाता लोप्पो ओयका मुन्ने पौलुस, “नना नितोनि बतलन्ना वळका परांताना? इंचि सिपाइल्कुना अदिकारिन पूसकीतोर. अस्के आ सिपाइल्कुना अदिकारि, “अबा! नीकु युनानि बासा इंका वळका वांताना? 38 अय्ते मरि कोन्नि रोजकु मुन्ने रोम सरकारूंक विरोद कीसि नालुं वेय्कुना आतंकवादिल्कुन उस्के बूमिते केयसि ओता, इजिप्त देसेमता मनकन निमेन गदा?” इंचि पौलुसुन पूसकीतोर. 39 अस्के पौलुस, “नना किलिकिया एरियाता उंदि बेस पोर्रोल होत्ता तरसुस सहरता यहुदि मनकन आंदुन. नना नीकु विनंती कींतन, ई लोकुल्कुनतोनि नाकुन वळका हीम,” इंचि इत्तोर.
40 सिपाइल्कुना अदिकारिन हेंदाल वळकाना अदिकारम दोर्कुतस्के पौलुस पायरिनपोर्रो नित्तिसि लोकुल्कुंक कय हुपिच्चि सपुडदाका मनालय सय्गे कीतोर. लोकुल्कु सपुडदाका आतास्के पौलुस इब्रानि बासाते वेहालय दल्गुतोर.