पौलुस मेसिडोनिया दांतोर
20
1 लोल्लिंअंता मगता पज्जो पौलुस सिस्युल्कुन केयतोर आनि ओर्क बेस प्रोत्साहन हीसि ओर्कुन होळसि मेसिडोनिया एरियाकु होत्तोर. 2 मेसिडोनिया एरियाताल होननेंके आ एरिया पीसि मनना विस्वासुल्कुंक प्रोत्साहन हियानसोंटव बचोनो पोल्लें ओर्क वेहासेके होत्तोर. पजा ओर अकाया एरियातेa एवतोर. 3 अगा पौलुस मूंड नेल्क मत्तोर. अगटाल डोंगाते उदसि सिरिया एरियाते होनना विचारम कीतोर, गानि अचोटेने यहुदि लोकुल्कु ओन हव्काना पिलान कीसंतुर इंचि तेळियतस्के ओर मर्रा मेसिडोनिया एरियाकु मलसि होनना निर्नायम कीतोर. 4 बिरिया सहरता पिरूस इनानोना मर्रि सोपत्रु, तिसलनूका सहरता अरिसतरकुस आनि सेकुंदल, दिरबे सहरताल गयुसु, एसिया एरियाताल तुकिकुस आनि तिरपिमुस, इंका तिमोति. ईर अंटोर एसिया एरिया एवनाल पौलुसुनतोनि मत्तुर. 5 ईर अंटोर मुन्ने होंचि त्रोआस सहरते मावा एदुर हूळसेके मत्तुर. 6 गानि मोमोट पिलिप्पि सहरताल होयवा पिंडिता हारिना पंडगु होत्तारित्ते डोंगाते उदिस पेसतोम. त्रोआस सहरते ओर्कु होंचि कलियालय माकु हेय्युं रोजकु दल्गुतां. अगा मोमोट एडुं रोजकु मत्तोम.वरोर लेय्या पेडांक पौलुस जीवा अरहांतोर
7 आयंका मोमोट वारमता मुन्नेटा रोजुbहारि उरहालय उंदगा जमा आतोम अस्के पौलुस लोकुल्कुनतोनि वळकालय दल्गुतोर. ओन्कु इंकुंदी रोजु पय्नम होनना मत्ताहाटीं ओर नळजाम नर्कादाका वेहतोर. 8 मोमोट जमा आसि मत्ता पोर्रोटा अंतरम पोर्रो वेल्लेने वेडसिं मत्तां. 9 अगा युतुकुस पोर्रोलतोर वरोर लेय्या पेडल किडकिते उदसि निद्रा होंचेक मत्तोर. बारित्ते पौलुस वेल्लेने जेम वळकसेके मत्ताहेंके ओन्कु इरगा निद्रा वासि मूडो अंतरमताल डोलसि हिड अरतोर आनि ओनागा होंचि तेहतारित्ते ओर हासि मत्तोर. 10 पौलुस हिड रेय्सि ओना पोर्रो अरसि रोमबोच्चेकु अदमुकुंचि, “वेरियमटु, इंदके ओना लोप्पो जीवा मंता,” इंचि इत्तोर. 11 आयंका पौलुस पोर्रो होत्तोर आनि हारींना तुकडां कीसि तिंचि पंगायनाजेम ओरतोनि वळकसेक मत्तोर. आनि पजा अगटाल पेय्सि होत्तोर. 12 लोकुल्कु आ लेय्या पेडन जीवाते ओना लोन ओतुर, अदुनहाटीं ओर्कु बच्चोरो बेस अनपिस्ता.
त्रोआस सहरताल मितुलेन सहर होनना पय्नम
13 मोमोट पौलुसुन अग्गेन होळसि डोंगाते उदसि मुन्नेन अस्सुस सहरतेके होत्तोम. पौलुस कुद ताकसि वासि अस्सुस एवसि अगा माकु कलियंतन इंचि वेहतोर. 14 ओर अस्सुस सहरते माकु कलियतोर अस्के ओन डोंगाते एकिच्कुंचि मोमोट मितुलेन सहरते होत्तोम. 15 अगटाल पेयसि इंकुंदी रोजु मोमोट ‘कीयुस’ इनना दीबेक मुन्नेड्क एवतोम. मर्रा इंकुंदी रोजु सामोस इनना दीबेतुन दाटसि होत्तोम. मर्रा इंकुंदी रोजु आतारित्ते मोमोट मिलेतुस इनना सहरते एवतोम. 16 बल्हा कीसन्ना गानि पेंताकोस्तु पंडगुंक येरूसलेम सहरते मनगोम इंचि पौलुस गाबर आसेक मत्तोर. अदुनहाटीं एसिया एरियाते वेल्ले रोजकु आगिसि टाइम पाड़ कियमड़ इस्टम हिलाका, इपिसुसते आगाकोंटा मुन्नेड्क पेय्सि होनना विचारम कीतोर.
पौलुस इपिसुस सहरता पेद्दाल्कुन आनि विस्वासुल्कुन केया वेहांतोर.
17 पौलुस इपिसुस सहरता चर्चु पेद्दाल्कुंक कबुर लोहचि ओर्कुन मिलेतुस सहरते ओनागा केयतोर. 18 ओर अंटोर वातारित्ते पौलुस ओरतोनि, “नना एसिया एरियाते वातस्के, मोदाटा रोजुनाल मीवातोनि उंदि-उंदि निमसम बल्हा मत्तन, इद मीकु एरपाटे मंता. 19 यहुदिल्कुना हेंदाल नाकु बच्चोनो कस्टाल्क वातां. अयना, नना मनसुनाल गरिब आसि अळसेके सामिना सेवा कीतन. 20 मीवा बेसताहाटीं अवसरम मत्ता बदे पोल्ले आयि वेहलय नना बस्केन पजोड्क आया हिल्लेन. आनि नना अव पोल्लें अंटोर लोकुल्कुना नड्डुम आनि लोन-लोन होंचि वेरियाकोंटा कराहतन, इद संगति मीकु एर्के मंता. 21 पापाल्कुनाल मनसु मार्सकुंटु आनि पेंदाहाटीं पिसाट, इंका मना येसु सामिना पोर्रो विस्वासम कीम्टु इंचि नना यहुदिल्कुंक आनि युनानि लोकुल्कुंक गवाइ हीसि वेहुंदुन. 22 आनि इंदके पवित्र आत्मा वेहताप कियना इंचि नना येरूसलेम सहर होंचंतन. गानि अगा होत्तारित्ते नावद बतल आंतो नाकु एर्का हिल्ले. 23 उंदि पोल्ले मात्रम नाकु एरपाट मंता. अद बतल इत्ते, अन्नि सहरकुने जेल आनि कस्टाल्क नावाहाटीं एदुर हूळसंतां इंचि पवित्र आत्मा नाकु वेहासेक मंता. 24 नाकु नावा जीवाता पिकिर हिल्ले. नना अय्ते सिराप अद पंदेमतुन आनि सेवातुन पूरा कींतन, बद अय्ते नाकु येसु सामिन हेंदाल दोर्कुता. अद बतल इत्ते, पेंदा दयाता बारेमते बेसता पोल्लेना गवाइ वेहामड़ आंद.
25 नना मी अंटोरतोनि कलियसि मंचि मीकु पेंदा राज्येमता बारेमते कराहसेक तिरियतन. मिवाव्टेटाल बोरे इंका नाकुन मर्रा बस्केन हूळा पर्रिर इंचि नाकु एर्के. 26 दानहाटीं इय्याला नना वेहासेक मंतन गदा, मीवा लोप्पोटाल बोरन्ना आयिर, हासोत्ते दान्कु जबाबदारी नना आयोन. 27 बारित्ते नना पेंदा पूरा इच्चातुन मीकु वेहालय बस्केने पजोड्कु होना हिल्लेन. 28 पवित्र आत्मा मीकुन मीवा चर्चुतोर पोर्रो कोहानोन-मेहानोन लेह्का पेर्कुत्ता. अद मंदातुन पेनु कुद्दु दाना मर्रिना नेत्तुर हीसि असकुत्ता. अदुनहाटीं मिमेट, मीवद मिमेट आनि मीवा जिम्मेदारित्ते मनना मंदातुन बेस कापाडसेके मंटु. 29 नना होत्तारित्ते कतरनाक तोडेल्लिनसंटा मनकलोर मीवा नड्डुम वासि मीकु नुकसान कींतुर इद नाकु एरपाट मंता. 30 अचोने आयका मीवा लोप्पोटाले इच्चुर इसंटा मनकलोर पेय्संतुर गदा, ओर सिस्युल्कुन ओरा पज्जो इग्गुकुनलासिंक आबद्दम पोल्लें वळकांतुर. 31 अदुनहाटिंगें मिमेट हुसारते मंटु. नना मूंड वर्सनदाका वर-वरोंकु नर्का-पियल अळसि-अळसि जगर्ता मननाहाटीं वेहमडते बस्केन पजोड्कु होना हिल्लेन इद मति इर्रटु.
32 इंदके नना मीकुन पेंदा कय्दे आनि दाना दयाता कबुरता कय्दे अपाजेपंतन. अद कबुरते मीकुन बेस बेरसागोटना ताकत मंता आनि बोर लोकुल्कुन अय्ते पेन पवित्र कीता असंटा अंटोर लोकुल्कुना लोप्पो मीकुनगुडा वारसदार किया पर्रंता. 33 नना बस्केने बोनहेंदाले एंडि-बंगारम हिलाकोंटे बेसता कपडि गावाले इंचि आसे पडा हिल्लेन. 34 नना नावा कय्कुनतोने कबड़ कीसि नावा अवसराल्कु आनि नातोनि मत्ता नावा दंटागाह्कुना अवसराल्कु पूरा कीता संगति मीकु कुद एरपाटे मंता. 35 वेल्लेन कस्टम कीसेके नादान मत्तोर्कुंक मनोम बल्हा सहायम कियगोम इत्ता संगतितुन नना मीकु नावा हरेक कबड़ताल कीसि हुपिस्तन. आनि “एतकुन्मड़कन्ना हियमड़तेन एक्को सुकम मंता,” इंचि कुद्दु येसु सामि इत्ता पोल्लेतुन मतिते इरमड़ बच्चोनो अवसरम मंता,” इंचि इत्तोर.