पौलुस आनि पवित्र आत्मा तेळियवा सिस्युल्कु
19
1 अपुलोस कुरिंति सहरते मनानेंके, पौलुस सिन्ने-सिन्ने नाह्कु तिरियसेके इपिसुस सहरते वातोर. अगा ओन्कु इच्चुर सिस्युल्क कलियतुर. 2 पौलुस ओर्कुन, “मिमेट विस्वासमते वातस्के मीवापोर्रो पवित्र आत्मा वाताना?” इंचि पूसकीतोर. अस्के आ सिस्युल्क, “मोमोट अय्ते पवित्र आत्मा मंता इंचिगुडा केंजा हिल्लोम,” इंचि इत्तुर. 3 पजा पौलुस, “अय्ते मरि मिमेट बोना बापतिस्मा एततिर?” इंचि पूस कीतस्के, “योहानुना बापतिस्मा एततोम,” इंचि ओर वेहतुर. 4 अस्के पौलुस, “योहान अय्ते पापाल्कुनाल मनसु मार्सकुनना बारेमता बापतिस्मा हियुंदुर. इंका ओर लोकुल्कुंक, ओना पजोटाल वरोर वायानोर मंतोर, ओनपोर्रो इत्ते येसुनपोर्रो विस्वासम कीम्टु, इंचि वेहुंदुर,” इंचि इत्तोर.5 इद केंजिस ओर येसु सामिना पोर्रोलते बापतिस्मा एततुर. 6 पजा बस्के अय्ते पौलुस ओरापोर्रो कय इरतोरो अस्के ओर अंटोरपोर्रो पवित्र आत्मा रेयता आनि ओर वेरे-वेरे बासाने वळकालय आनि बविस्यवानि कियालय दल्गुतुर. 7 ओर अंटोर कलियसि पन्नेंडु मंदि मत्तुर.
8 आयंका पौलुस मूंड नेल्कुनदाका यहुदिल्कुना दर्मसास्त्रम कराहना लोते होनुंदुर आनि वेरियाकोंटा ओरतोनि चर्चा कीसि पेंदा राज्येमता बारेमते ओर्कु तेळियागोट्सि वेहुंदुर. 9 गानि ओरंटे इच्चुर जिद्दि मनकलोर मत्तुर. ओर विस्वासम किया हिल्लुर. अचोने आयका लोकुल्कुना मुन्ने पेन वेहता हर्दा बारेमते रोता-रोता पोल्लें वळकसेक मत्तुर. अदुनहाटीं पौलुस सिस्युल्कुन ओना पज्जो केयकुत्तोर. आनि आ लोकुल्कुन अग्गेन होळसि रोज तरन्नुसना मिटिंग बंगलाते होंचि चर्चा कियुंदुर. 10 रोंडु वर्सनदाका इल्हे ताकसेके मत्ताहाटीं एसिया एरिया पीसि मनना अंटोर यहुदि आनि युनानि लोकुल्क पेंदा पोल्लेतुन केंजतुर.
इसकिवा पोर्रोलता पेद्दा पेर्माना मर्कु
11 पौलुसना कयदाल पेन पेद्दा-पेद्दा इचंत्रम आयना कबाह्क कीसेक मत्ता. 12 इंका लोकुल्कु पौलुस इटता दस्तिगुड्डान आनि ओना सेल्लान रोगम मत्तोरगा ओते ओरा रोगाल्कंता होनुंदु आनि देय्याल्क इंका होळसि वित्तुंदुं.
13 इच्चुर यहुदि लोकुल्कु सुट्टु-मट्टु एरियाने देय्याल्क पीसि मत्तोर्कुन मंत्राल्कुना बलमते बेस कीसेके तिरियुंदुर. ओर, “पौलुस बोना बारेमते अय्ते वेहचंतोरो आ येसुन पोर्रोलते आदेस हीसंतन, पलाते पेय्सा” इंचि देय्याल्कुन इनुंदुर. 14 इसकिवा इनना वरोर यहुदि पेद्दा पेर्मांक एडुर मर्कु मत्तुर. ओर इल्हे कियुंदुर. 15 अय्ते उंदि मल्का उंदि देय्यम ओर्कुन, “येसु अय्ते नाकु एरके, इंका पौलुसगुडा नाकु एरके. मरि मिमेट बोर आंदिर? इंचि पूसकीता. 16 पजा आ देय्यम पीसि मत्ता मनकल ओरापोर्रो अरसि, ओर्कुन इरगा तंतोर. अदुनहाटीं ओर इरगा देब्बां दलगिसि नेत्तुर पोंगनेंकेन अद लोताल कपडिं केराकोंटेन पेय्सि वित्तुतुर. 17 इद संगति इपिसुसते मनना अंटोर यहुदिल्कुंक आनि युनानि लोकुल्कुंक तेळियता. अदुनहाटीं ओर अंटोर इरगा वेरियतुर. आनि येसु सामिना पोर्रोलता कदर बेरसेके होत्ता. 18 इल्हा बोर लोकुल्कु अय्ते विस्वासुल्क आतुरो ओर अंटोर ओर कीता तप्पुकुन अंटोरा मुन्ने ओपकुनालय दल्गतुर. 19 होदें-मंत्राल्कु कियानोर वेल्लेटुर लोकुल्कु ओरा पुस्तकाल्कु उंदगा जमा कीसि अवुन अंटोरा मुन्ने बोळसतुर. पजा आ पुस्तकाल्कुना दरा लेक्का कीते एबै वेय्कुना (५०,०००) एंडि कोत्तानच्चोर मत्ता. 20 इल्हा सामिना पोल्ले बेस मजबुत आसेके नालुं मूलां पैलांचसेके होत्ता.a
पौलुस पिलान कींतोर
21 इदंता जर्गुता पज्जो, पौलुस मेसिडोनिया आनि अकाया इनना एरियानाल येरूसलेम होनना पिलान पवित्र आत्माता सहायमतोनि कीतोर. अगा होत्ता पज्जो ‘बल्हा कीसि अय्ना रोम सहरतुन हूळा पींता,’ इंचि इत्तोर. 22 दानहाटीं ओर तिमोति आनि एरासतुस पोर्रोलता इव्वुर सेवाकुल्कुन मेसिडोनिया एरियाते लोहचीतोर आनि ओर कुद बारे इंका इच्चुं रोजकु एसिया एरियातेन आगतोर.
इपिसुस सहरते जगडाल्क
23 अव रोजकुने पेन वेहता हर्दा बारेमते वेल्लेन लोल्लिं आतां. 24 देमेत्रि पोर्रोलतोर वरोर कमसालोड मत्तोर. ओर अर्तेमिb इनना पेंदा गुळितालेसींटव एंडिता गुळिं तयार कीसि अम्मुकुनुंदुर. दीनहेंदाल ओनगा कबळ कियानोर्क रिकम हिलाकोंटा कबळ दोर्कुंदु. 25 आ कमसालोड, ओनगा कबळ कियानोर्कुन आनि ओनालेसीं कबळ कियाना इंका वेरेतोर्कुन अंटोर्कुन जमा कीसि ओर्कुन, “दादालोरिटा! मीकु अय्ते एरपाटे गदा, ई दंदाता हेंदाल मनाकु बेस कोत्तां दोर्कंतां. 26 ई पौलुस इपिसुस आनि दगेर-दगेरा पूरा एसिया एरियाता लोकुल्कुंक, ‘मनकल कीता पेनकु निजम पेनकु आयों,’ इंचि ओर्क एकरेवुल्क वेहसेक ओर्कुन बदलांचतोर. इद संगतितुन मिमेट हूळतिर आनि केंजतिर गुडा. 27 दीनहेंदाल मना दंदाक मत्ता बेस पोर्रोल बदनाम आंता. आनि मना पेद्दा पेन अर्तेमिना गुळिता इलवागुडा दांता. इचोने आयका सिराप एसिया एरियातेन आयो गानि पूरा दुनियाता अंटोर लोकुल्क मोळकनासोंटा ई पेंदुक मत्ता पेदातनमगुडा हिलाकोंटा आंता,” इंचि इत्तोर.
28 इसोंटा पोल्लें केंजसि ओर इरगा होंगुंक वासि, “इपिसुसतोरा पेन अर्तेमि अन्नि पेनकुंकन्ना पेद्दा पेन आंद,” इंचि वरगेयालय दल्गुतुर. 29 अदुनहाटीं सहरते लोल्लि आता. पजा लोकुल्कु मेसिडोनिया एरियाताल वाता गयुस आनि अरिसतरकुस पोर्रोलतोर इव्वुर्कुन दोर्का पीतुर. ईर इव्वुरगुडा पौलुसुनतोनि कलियसि पय्नम कियुंदुर. अय्ते लोकुल्कु अंटोर उंदि आसि ओर्कुन पीसि नाटकम बंगलातगा जोरसे इग्गिसेके पीसि वितुतुर. 30 पौलुस लोकुल्कुना मुन्ने होनना इनकुत्तोर गानि सिस्युल्कु ओन होना हिया हिल्लुर. 31 एसिया एरियाता इच्चुर अदिकारिल्क पौलुसना दंटातोर मत्तुर, ओर इंका ओन, ‘निमे नाटकम बंगलाते होंचि दोकाते अरमा,’ इंचि कबुर लोहचि विनंति कीतुर. 32 अस्के बोरो बतलो, बोरो बतलो इल्हा पेद्दा लोल्लि कियालय दल्गुतुर. वेल्ले मंदिक अय्ते ओर अगा बताहाटीं जमा आतुर अदुगुडा एर्का हिल्ले. 33 यहुदि लोकुल्कु सिकंदर पोर्रोलतोन वरोर मनकन मंदिताल पेरसि मुन्ने निलाहतुर. सिकंदर कय ऊपसि-ऊपसि लोकुल्कुंक समजांचलय हूळतोर. 34 गानि ओरगुडा वरोर यहुदि मनकल आंदुर इंचि तेळियतारित्ते ओर अंटोर रोंडु गंटान दाका उंदे आवाजते, “इपिसुसतोरा पेन अर्तेमि अन्नि पेनकुंकन्ना पेद्दा पेन आंद,” इंचि वरगेयसेके मत्तुर.
35 अस्के सहर अद्यक्सल मंदितुन सांत कीतोर. सांत कीसि, “अरे इपिसुस लोकुल्कुनिटा, बेस पोर्रोल होत्ता अर्तेमि पेंदा गुड़ितुन आनि स्वर्गमताल अर्ता दाना पवित्र बंडा बोम्मातुन बेस कापाडना सहर इपिसुस सहर आंद, इद पोल्ले दुनियाकंता एरपाटे मंता. 36 आनि इद पोल्लेतुन बोरे हिल्ले इन्नोर. अदुनहाटीं मिमेट सांत मंटु, विचारम कियाकोंटा गाबर आसि बतले कियमटु. 37 ईर मनकलोर अय्ते मना पेंदा गुड़िताल बतले दोंगा किया हिल्लुर आनि मना पेंदा अपमानमगुडा किया हिल्लुर. अय्नागानि मिमेट इर्कुन इगे पीसि वातिर. 38 ओकला देमेत्रिसुंक आनि ओनतोनि कलियसि कबळ कियानोर्कुंक गिंटा बोरादन्ना विरोदमते बतलन्ना वेहनद मनानय्ते कोरटकुना तल्पुकु कुल्ले मंतां, अगा ओर वरोनपोर्रो वरोर तप्पुकु-दोसाल्कु वेहकुना परांतुर. आनि ओरां केंजालय अगा अदिकारिल्कगुडा मंतुर. 39 अयना इंका बतलन्ना वेरेतदुन बारेमते वळकानद मनानय्ते दाना पय्सला मना पंचादिते किया वच्चु. 40 इय्याला इगे बतल अय्ते जर्गुतानो दीनद पूरा दोसम मना तलापोरेन अर्रानलायक मंता. इद जर्गुता गटना बेसताहाटींगें जर्गुता इंचि रुजुव कियालयगुडा मनागा बतले उद्देसम हिल्ले.” इंचि इत्तोर. 41 इल्हा इत्ता पजा ओर पंचादि मारता इंचि वेहतोर.