कुरिंति इनना सहरते पौलुस
18
1 पजा पौलुस एतेंस सहर होळसिसि कुरिंति सहरते होत्तोर. 2 अगा ओर अकविला इनना पोर्रोलता यहुदि मनकंक कलियतोर. ई अकविलाल पुंतुस इनना एरियाते पुटतोर. रोम सहरते मनना अंटोर यहुदिल्कुन कलादियुस राजाल पेयसि होंटु इंचि आदेस हीतोर. अदुनहाटीं ओर इटलि एरियाताल ओना मुत्तो प्रिसकिलानतोनि इगे(कुरिंतिते) वातोर. अय्ते पौलुस ओर्क कलियालय होत्तोर. 3 पौलुसुनद आनि अकविलानद इव्वुरद इंका डेरां निलहाना दंदे मत्ता. अदुनहाटीं पौलुस ओरगा वासि आगतोर आनि ओर अंटोर कलियसि कबळ कियालय दल्गुतुर. 4 ओर हरेक नोमकेम रोजुननाड यहुदिल्कुना दर्मसास्त्रम कराहना लोहकुने होंचि युनानि आनि यहुदि लोकुल्कुनतोनि चर्चा कीसि ओर्कु बेस तेळियागोट्सि वेहुंदुर.5 सिलास आनि तिमोति मेसिडोनिया एरियाताल वातुर अस्के, पौलुस ओना पूरा टाइम पेंदा पोल्लें करहमड़तेन तासुंदुर. इंका यहुदिल्कुनतोनि वळकीसि, ‘येसे किरिस्तु आंदुर’ इंचि वेहासि गवाइ हियुंदुर. 6 गानि यहुदि लोकुल्कु पौलुसुन हय्सा हिल्लुर. ओना अपमानम कीतुर. अस्के पौलुस ओना कपडिं दुल्पसेके ओर्कुन, “मीवा नेत्तुर मीवा तलापोर्रो अर्री. अव्टे नावद बतल दोसम हिल्ले. इंदकेटाल नना वेरे जातितोर हेके दांतन,” इंचि इत्तोर.
7 इल्हा पौलुस दर्मसास्त्रम कराहना लोताल पेय्सि दाना बाजूंक मनना तितुस-युसतुस पोर्रोलता वरोर वेरे जाति विस्वासिन लोन होत्तोर. 8 यहुदिल्कुना दर्मसास्त्रम कराहना लोतुक अदिकारि मत्ता वरोर क्रिसपुस पोर्रोलता मनकल आनि ओना लोतोर अंटोर सामिना पोर्रो विस्वासम कीतुर. अचोने आयका कुरिंति सहरतोर वेल्लेटुर लोकुल्क पौलुसना पोल्लें केंजसि, सामिन पोर्रो विस्वासम कीतुर आनि बापतिस्मा एततुर. 9 उंदि नर्का सामि दर्सनमते पौलुसुन, “निमे वेरियकोंटा वळकासेके होन, सपुडदाका मनमा. 10 इद सहरते नावा वेल्लेन लोकुल्कु मंतुर, नना इंका नीवातोनि मंतन. नीवा पोर्रो बोरे कय तेहुर आनि नीकुन बोरे तकलिप किय्युर,” इंचि वेहतोर. 11 इल्हा पौलुस एडादी नरा दाका अग्गेन मंचि ओर्कु पेंदा पोल्लें करहतोर.
पौलुस गल्लिया इनना राज्यपालुन मुन्ने
12-13 गल्लिया पोर्रोलतोर वरोर अकाया इनना एरियाक राज्यपाल मत्तोर, अस्के यहुदिल्क अंटोर उंदि आसि, पौलुसुंक अड्डम तिरियतुर आनि ओन कोरटते पीसि वासि, “ई मनकल नियम परकारम हिलुवा पदतकुने पेंदुक मोळकालय लोकुल्कुंक वेहासेक मंतोर,” इंचि इत्तुर.
14 पौलुस वळ्कालय आतोर अच्चोटेने गल्लिया राज्यपाल यहुदिल्कुनतोनि, “मिमेट वेहना पोल्ले बदाना तप्पु कीतदुन बारेमते, हिलाकुंटे पेद्दा अन्यायमता बारेमते आसि मत्ते, नना मीवद केंजालय अर्तम मनवड. 15 गानि इद केस पोल्लें, पोर्रोलकु आनि मीवा दर्मसास्त्रमता बारेमते मंता. अदुनहाटीं दीनु मीवद मिमेटे नेमाहकुंटु. इसोंटा केसकुना न्यायम नना किय्योन,” इंचि इत्तोर. 16 इल्हा इंचि गल्लियाल ओर्कुन कोरटताल पलाते पेचाहतोर.
17 पजा यहुदिल्क, दर्मसास्त्रम कराहना लोतुक अदिकारि मत्ता सोसतेस पोर्रोलतोन पीतुर आनि कोरटना मुन्नेने तंतुर. अय्नागानि गल्लियाल मात्रम जर्गनदाना बारेमते विचारम किया हिल्लोर.
पौलुस सिरिया एरियाता अंताकिया सहरते मल्सि वांतोर
18 पौलुस वेल्लेन रोजकुनदाका अगाने कुरिंति सहरते आगिस मत्तोर. आयंका अगा मत्ता विस्वासुल्कुन होळसि, मोळुक्कुत्ता परकारम पौलुस किंकिरया सहर होंचि केल्कु कोरियकुत्तोर. पजा ओनतोनि प्रिसकिला आनि आकविलाa इर्कुन पीकुंचि सिरिया एरियाकु होनना डोंगाते उदसि इपिसुस सहर होत्तोर. 19 इल्हा ओर इपिसुस सहरते एवतुर. पजा पौलुस प्रिसकिलान आनि आकविलान अगेने होळसतोर आनि ओर वरोरे दर्मसास्त्रम कराहना लोते होंचि यहुदिल्कुनतोनि चर्चा कियालय दल्गतोर. 20 आयंका ओर अंटोर ओन इंका इच्चुं रोजकु अगाने मननाहाटीं विनंति कीतुर गानि ओर ‘मनोन’ इत्तोर. 21 गानि अगटाल पेयसका मुन्ने मात्रम ओर, “ओकला पेंदाद गिंटा मनसु मनानय्ते नना मिहगा मर्रा वांतन,” इंचि इत्तोर आनि इपिसुसताल डोंगाते उदसि पेसतोर.
22 पजा ओर कैसरिया सहरते एवतोर आनि अगटाल येरूसलेम सहर होत्तोर. अगा होंचि अगाटा चर्चुतोर्कुंक कलियसि नमस्ते कीतोर, पजा अगटाल अंताकिया सहर होत्तोर.
पौलुसुना मूंडो पय्नम (१८:२३–२१:१६)
अपुलोस इनानोर इपिसुस सहरते
23 अगा इच्चुं रोजकु मत्तारित्ते मर्रा ओर गलातिया आनि पुगरिया एरियाताल अंटोर सिस्युल्कुना विस्वासम गट्टिगा कीसेके तिरियतोर. 24 अच्चोटेने अपुलोस इनानोर वरोर यहुदि मनकल इपिसुस सहरते वातोर. ओर सिकंदरिया इनना सहरते पुटतोर. ओर वेल्लेन तेल्वि मत्ता मनकल मत्तोर. ओन्कु दर्मसास्त्रम पुरागा तेळियुंदु. 25 ओर सामि वेहता हर्दा बारेमते करियसि मत्तोर. ओर येसुना बारेमते कराहनेंके वेल्ले कुसिते बल्हा मत्तद अल्हेन बरोबर करहुंदुर. गानि बापतिस्माता बारेमते अय्ते सिराप योहानुना बापतिस्माता बारेमतेन एरपाट मत्ता. 26 अय्ते ओर यहुदिल्कुना दर्मसास्त्रम कराहना लोते होंचि वेरियाकोंटा वळकालय सुरु कीतोर. उंदि मल्का ओर वळकनेंके प्रिसकिला आनि आकविला ईर इव्वुर ओना पोल्लें केंजतुर. केंजसि ओन दग्गेर्क केयकुंचि ओन्कु पेंदा हर्दा बारेमते इंका बेस तेळियागोट्सि वेहतुर. 27 अय्ते अपुलोस अकाया इनना एरियाक होनना विचारम कीतोर. अस्के विस्वासि दादालोर गुडा ओन्कु बेस दैर्यनेम हीतुर. अचोने आयका अकाया एरिया पीसि मनना सिस्युल्कुंक ‘ईन बेस दगेर गीकुंटु’ इंचि उंदि सिट्टि रासतुर. ओर अगा एव्तारित्ते, पेंदा दयाहेंदाल विस्वासमते वाता लोकुल्कुंक वेल्ले सहायम कीतोर. 28 बारित्ते, अंटोर लोकुल्कुन मुन्ने यहुदिल्कुनतोनि जिद्दुने चर्चा कियुंदुर. इंका दर्मसास्त्रमते, ‘येसु सामिए किरिस्तु आंदुर’ इंचि ओर्क हूपिचि दान रुजुव कियुंदुर.