तिसलनूका सहरते पौलुस आनि सिलास
17
1 पजा ओर अंपिपुलि आनि अपुलोनिया सहरकंता तिरियसेके-तिरियसेके तिसलनूका सहरते एवतुर. अगा यहुदिल्कनद उंदि दर्मसास्त्रम कराहना लोन मत्ता. 2 पौलुस ओना अलबट परकारम यहुदिल्कुना दर्मसास्त्रम कराहना लोतागा होत्तोर. होंचि मूंड नोमकेमकुन दाका ओरतोनि दर्मसास्त्रमता बारेमते वळकसेक मत्तोर. 3 अगा ओर, ‘किरिस्तुना हायमड़ आनि हामुरताल तिरियसि तेदमड़ बचोनो अवसरम मत्ता,’ इत्ता संगतितुन दर्मसास्त्रमताल हदविसि ओर्कु बेस तेळियागोट्सि वेहतोर. पजा ‘बा येसुना बारेमते अय्ते नना मीवा मुन्ने वेहसेक मंतनो आ येसे किरिस्तु आंदुर,” इंचि ओर्कु वेहतोर. 4 इल्हा इच्चुर लोकुल्कुंक निजम अनपिच्चि ओर पौलुस आनि सिलासुनहेके कलियतुर. पेंदुक वेरियना लेक्का हिल्वा युनानि लोकुल्कु इंका ओरतोनि कलियतुर. अचोने आयका वेल्लेन बेस पोर्रोल होत्ता मुर्ताह्क इंका ओरतोनि कलियसि मत्तां.5 गानि यहुदिल्कुंक मात्रम मंटा अरसेके मत्ता. ओर इच्चुर बदमासुल्कुन जमा कीसि सहरते लोल्लीं कीतुर. बल्हा कीसन्ना गानि पौलुस आनि सिलासुन लोकुल्कुना मुन्ने तायागोम इंचि ओर यासोन इनानोना वरोन लोतपोर्रो होंचि अरतुर. 6 पौलुस आनि सिलास ओर्कु दोर्का हिल्लुर अय्ते यासोनुन आनि इच्चुर विस्वासि दादालोर्कुन सहरता अदिकारिल्कुन मुन्ने इगिस ओतुर. ओसि, “ईर मनकलोर पूरा दुनियातुने हिडु-पोर्रो कीतुर आनि इंदके इगे इंका वातुर. 7 ईर्कु यासोन ओना लोन मनालय जेगा हीतोर. इंका ईर अंटोर रोम देसेमता राजाaना नियमकुंक अड्डम कबळ कींतुर. अचोने आयका ओर, ‘इंका वरोर राजाल मंतोर ओना पोर्रोल येसु आंद,’ इंचि वेहांतुर.
8 इद पोल्लेतुन केंजसि अगा मत्ता लोकुल्कु आनि सहरता अदिकारिल्कु इरगा होंगुंक वातुर. 9 पजा यासोनुन हेंदाल आनि कळमातुर हेंदाल दंडगु तेंडकुंचि, रासकुंचि ओर्कुन होडसीतुर.
बिरिया इनना सहरते पौलुस आनि सिलास
10 पजा बिराना नर्काटद-नर्केन विस्वासि दादालोर पौलुस आनि सिलासुन बिरिया इनना सहर लोहचितुर. ओर अगा एवतारित्ते यहुदिल्कुना दर्मसास्त्रम कराहना लोते होत्तुर. 11 तिसलनूका सहरता यहुदिल्कुंकन्ना इगेटा यहुदिल्क बच्चोरो बेस मत्तुर. ईरु पौलुस वेहना पोल्लेन बेस मनसु ताससि केंजूंदुर आनि हरेक रोजु दर्मसास्त्रमतुन हदविसि पौलुस वेहना पोल्लें निजमेना इंचि बेस अर्तम कीकुनुंदुर. 12 इल्हा वेल्लेन मंदि यहुदिल्क विस्वासम कीतुर. यहुदिल्कुन लेह्कने बेस कदर मत्ता युनानि मुरताह्क आनि मांडसागुडा विस्वासम कीतुर. 13 गानि बस्के अय्ते पौलुस, पेंदा पोल्लें बिरिया सहरतेगुडा होंचि कराहचंतोर इंचि तिसलनूका सहरता यहुदिल्कुंक तेळियतानो, अस्के ओर अगा वासि लोल्लीं कियमड़ आनि लोकुल्कुंक एकरेवुल्क वेहमड़ सुरु कीतुर. 14 दानहाटीं विस्वासुल्क पौलुसुन बिराना समुद्रम ओड्डुनहेके लोहचितुर. गानि सिलास आनि तिमोति मात्रम अगाने आगतुर. 15 पौलुसुनतोनि बोरय्ते होत्तुरो ओर पौलुसुन एतेंस इनना सहरदाका अराहतुर. आनि पौलुसुन हेंदाल, ‘सिलासु, आनि तिमोति बिराना ओनगा वायागोम,’ इंचि इत्ता आदेस पीकुंचि ओर अगटाल मलसि बिरिया सहरकु वातुर.
एतेंस सहरते पौलुस
16 पौलुस, एतेंस सहरते सिलास आनि तिमोतिना एदुर हूळसेके मत्तस्के, अद सहर बोम्मानतोनि निंडिस मत्तद हूळसि ओना मनसुने बागा दुक्कम वाता. 17 दानहाटीं ओर रोज-रोज दर्मसास्त्रम कराहना लोह्कुने होंचि यहुदिल्कुनतोनि आनि पेंदुक वेरियना वेरे जाति लोकुल्कुनतोनि चर्चां कियुंदुर. अचोने आयका चौकुल्कुने होंचि बोर दोर्कुते ओरतोने चर्चा कियुंदुर. 18 अस्के इच्चुर इपीकुरि आनि स्तोइकीb इनना एक्को तेल्वि मत्ता लोकुल्कु ओनतोनि जगडम दोस्कुत्तुर. आनि अव्टेटाल इच्चुर, ‘ई पिचुर-पिचुर वळकानोर बतल वेहांतन इंचंतोर?” इंचि इत्तुर. इंका इच्चुर बारे, “ईर अय्ते वेरे जातितोरा पेंदा बारेमते कराहनोर दिसंतोर” इंचि इत्तुर. पौलुस येसुना बारेमते आनि ओर हासि मर्रा जीवाते तेदतदुन बारेमते करहुंदुर इंचि ओर अल्हा इत्तुर. 19 आयंका ओन पीसि अरियपगुसc इनना पंचादिते ओसि, “निमे कराहना ई पूना पोल्लें बतांगो माकु तेळियानाल वेहा. 20 इंका निमे माकु मोमोट बस्के केंजुवा, तेळियवा पोल्लें वेहचंतिन. ई पोल्लेना अर्तम बतलो माकु तेळियागोट्सि वेहा.” इंचि विनंति कीतुर. 21 एतेंस सहरता लोकुल्कु आनि वेरेटागटाल वासि अगा मनना पलाता लोकुल्कु, बस्केळ्क बतलन्ना पूनद केंजालय आनि दाना बारेमते चर्चा कियमड़ तप्पा इंका वेरे बतले कबळ कियाकोंदुर.
22 अस्के पौलुस अरियपगुस इनना पंचादिते नित्तिसि इल्हा वळकालय दल्गुतोर, “ए एतेंसता लोकुल्कुनिटा! मिमेट अन्नि तीरकुने पेंदा कदर कीसंतिर इत्ता संगति नाकु दिससंता. 23 नना मीवा सहर अंता तिरियसि मिमेट मोळकना अन्नि वस्तुकुन हूळतन. अचोने आयका, “एरपाट हिलवा पेंदाहाटीं” इंचि राससि मत्ता उंदि गद्देतुन इंका नना हूळतन. अय्ते मीकु एरपाट हिलाकोन्ना मिमेट मोळकना आ पेंदा बारेमतेतेन नना मीकु वेहंतन. 24 इद दुनियातुन आनि इद दुनियाते मनना अन्निटवुन पुटिस्ता पेने, बूमि आनि स्वर्गमता सामि आंद. अदुनहाटीं मनकलोर तयार कीता गुळिने अद मन्नो. 25 दानगा बतले तक्को हिल्ले. इंका अदे अंटोर्क ऊपिरि, पिसवर आनि गावाले मत्तव अन्नि वस्तुक हींता. अय्ते असोंटा पेंदुक मनकना कय बतल हिया पर्रंता? 26 पेन वरोर मनकन तयार कीता. आनि आ वरोर मनकनतोनि ई दुनियांता निंडिस मननाहाटीं अन्नि जातिना मनकलोर्कुन तयार कीता. इंका ओराहाटीं उंदि वेला, ओर मनना जेगांक गेट्टुकु, इल्हा पेने कीता. 27 मनकलोर पेंदुन पहकागोम इंचि दाना मनसु मत्ता. ओकला पहकिस-पहकिस दान ओर दोर्काबेटकुनानुर. अय्ना अद मनागटाल बोर्के लक्कु हिल्ले. 28 मनम दानतोने पिस्सेक मंतोम, दानतोने तिरियसेक मंतोम, अद मंता इंचे मनम मंतोम. इचोने आयका, ‘मनम दाना पिलाल्क आंदुम,’ इंचि मीवा लोप्पोटोरे इच्चुर पाटां रासाना लोकुल्कगुडा वेहातुर.
29 अय्ते मनम पेंदा मर्कुम आसिगुडा, मनकल ओना तेल्विनुसार तयार कीता एंडि, बंगारम आनि बंडाता बोम्मान लेह्का पेन मनंता इंचि बस्केन इननायो. 30 मुन्नेटा लोकुल्कुना पेंदा बारेमते तेल्वि तक्को लेक्कनहेंका पेन ओर्कुन हूळसि इंका हूळवाप कीता. गानि इंदके मात्रम दुनियाता अंटोर लोकुल्क मनसु मार्सकुननाहाटीं आदेस हीसंता. 31 अद पेर्कुत्ता मनकना हेंदाल, इद दुनियाते मनना हरेक मनकना न्यायम नितिते कियानाहाटीं पेन उंदि रोजुन पिक्स कीता. अचोने आयका अद पेर्कुत्ता मनकन हातोराव्टेटाल मर्रा जीवा अराहचि अंटोर मनकलोर्कुंक अद हीता पोल्लेतुन रुजुव कीता.”
32 बस्के अय्ते लोकुल्कु, हातोराव्टेटाल मर्रा जीवा अर्ता इत्ता पोल्ले पौलुसुन तोड़दाल केंजतुरो अस्के इच्चुर लोकुल्क ओन कारेडम कीसि कवतुर. गानि इंका इच्चुर मात्रम, “निमे वेहना पोल्ले मर्रा बस्केनना केंजंतोम,” इंचि इत्तुर. 33 अस्के पौलुस पंचादिताल पेय्सि होत्तोर. 34 इच्चुर लोकुल्कु विस्वासम कीसि पौलुसुंक कलियतुर. ओराव्टेटाल वरोर दियोनुस इनानोर मत्तोर, ओर अरियपगुस पंचादिता मेंबर मत्तोर. अचोने आयका दामेरा इनना पोर्रोलतद उंदि मुर्तड आनि इल्हा ओरतोनि मत्ता इंका लोकुल्कु मत्तुर.