पौलुसुंक तिमोति कलियंतोर
16
1 पजा पौलुस मर्रा दिरबे इनना सहर होंचि अगटाल लिसरा इनना सहर होत्तोर. हुळा! अगा तिमोति पोर्रोलतोर वरोर सिस्युड मत्तोर. ओना तल्लुर यहुदि जातितद उंदि विस्वासि मुर्तड आंद. गानि ओना बाबाल वेरे जातितोर (युनानि जातितोर) मत्तोर. 2 लिसरा आनि इकोनिया सहरकुने मनना विस्वासि लोकुल्कु ओन बेस मनकल इनुंदुर. 3 अय्ते पौलुस तिमोतिन ओना पज्जेके ओयाना विचारम कीतोर. गानि अद एरियाते मनना अंटोर यहुदि लोकुल्कुंक, तिमोति वेरे जातितोना(युनानि जातितोना मर्रि) मर्रि इंचि एर्का मत्ता, अदुनहाटीं यहुदिल्कुंक समादानम आयना इंचि पौलुस तिमोतिना कतना कियागोटतोर. 4 अस्के ओर येरूसलेमता प्रेरितुल्क आनि पेद्दाल्क वेहता पोल्लेन सहर-सहर होंचि वेहचि, अव पोल्लेन परकारम ताकना इंचि वेहासेक होत्तुर. 5 इल्हा अगाटा चर्चुनोरा विस्वासम गट्टि पडसि इंका वेल्लेन लोकुल्क विस्वासमते वासि रोज-रोज वेल्लेन मंदि आतुर.पौलुसुन मेसिडोनिया एरियाते केयमड
6 ओर्कुन पवित्र आत्मा, एसिया एरियाते पेंदा पोल्ले वेहा मन्नि इंचि इत्ताहाटीं ओर अदे एरियाता पुगरिया आनि गलातिया एरियाताल होत्तुर. 7 पौलुस आनि तिमोति मूसिया एरियाता सर्दुदाका एवतस्के ओर बितुनिया एरिया होनालय कोसिस कीतुर. गानि येसुना आत्मा अगा इंका होन्ना हिया हिल्ले. 8 अय्ते ओर मूसियाताल त्रोआस सहरते एवतुर. 9 अदे नर्का मेसिडोनिया एरियातोर वरोर मनकल विनंति कीसेके, ‘निमे मेसिडोनियाते वा आनि मावा सहायम कीम, इंचेक मंतोर. इल्हा पौलुस दर्सनमते हूळतोर.’ 10 a ओन्कु इल्हा दर्सनम आतारित्ते, आ लोकुल्कुंक पेंदा बेसता पोल्लें वेहालय पेन माकुन केयता इल्हा इनकुंचि मोमोट अस्केन मेसिडोनिया होनानद विचारम पक्का कीतोम.
लिदिया मुरताटद मनसु मारियमड
11 इल्हा मोमोट त्रोआस सहरताल डोंगाते समुद्रम हर्रि पीसि सवरगा सुमात्राके सहरते एव्सि, इंकुंदी रोजु नियापुलिस इनना सहर होत्तोम. 12 पजा अगटाल पिलिप्पि इनना सहर होत्तोम. अद मेसिडोनिया एरियाता मेन सहर आंदु. अगा रोमि लोकुल्कु मनुंदुर. अद सहरते मोमोट कोन्नि रोजकु मत्तोम.
13 उंदि नोमकेम रोजुने यहुदिल्कुना पारतना कियाना जेगा, सहरता पलाते बेरेड ओड्डुंक मंदार इंचेके मोमोट होत्तोम. आनि अगा पारतनाकु वासि मत्ता मुरताहकुनतोनि उदिस वळकसेके मत्तोम. 14 अवुन लोप्पो उंदि लिदिया पोर्रोलता मुरतड़ मत्ता. अद तुयतीरा सहरतद आंद. दान्कु पेंदापोर्रो वेल्लेन विस्वासम मत्ता. अद वेल्लेन दराता नेडि पंडि रंगुना कपडीं अम्मुंदु. अद बेस मनसु दोस्सि मावा पोल्लें केंजसेके मत्ता. सामि दाना मनसुन पौलुस वेहना पोल्लेंन बेस केंजालय तयार कीतोर. 15 अद आनि दाना लोते मत्तोर अंटोर बापतिस्मा एततारित्ते अद मावातोनि, “मिमेट गिंटा नाकुन पेंदा निजम विस्वासि मुरतड़ इंचि इनकुनानय्ते नावा लोन वासि आगाटु,” इंचि विनंति कीता. अस्के मोमोट दाना लोन होत्तोम.
पौलुस आनि सिलास जेलने अर्रांतुर
16 उंदि मल्का मोमोट पारतना कियाना जेगातेके होंचेके मत्तोम, अस्के माकु उंदि दासि पेगिड कलियता, दाना लोप्पो बविस्य वेहाना आत्माb मत्ता. अद लोकुल्कुंक ओरा बविस्य वेहचि दाना मालाकुल्कुंक वेल्लेन दनम संपलिचि हियुंदु. 17 अद पौलुस आनि मावा पज्जो, “ई मनकलोर अन्निंकना पेद्दा पेंदा सेवकुल्क आंदुर. ईर मीकु मीवा पापमताल मुक्ति दोर्कना हर्दा बारेमते वेहासेक मंतुर,” इंचि वरगेयसेके वाता. 18 अद वेल्ले रोजुकनाल इल्हेने वेहासेक मत्ता अय्ते पौलुस परेसान आतोर. अदुनहाटीं ओर पजोड्क तिरियसि आ आत्मातुन, ‘येसु किरिस्तुना पोर्रोलते नना नीकु आदेस हीसेक मंतन, ई पेगिडताल पेयसि होन,’ इंचि इत्तोर. अस्के आ आत्मा पेगिडताल बिराना पलाते पेय्सता.
19 पजा आ पेगिटा मालाकुल्कुंक दोर्कना दनम दोर्काकोंटा आताहेंके ओर पौलुसुन आनि सिलासुन दोर्का पीतुर आनि इगसेके नड्डुम सहरते अदिकारिल्कुन मुन्ने ओतुर. 20 रोमी अदिकारिल्कुना मुन्ने ओसि, “ईरु यहुदि लोकुल्कु आंदुर आनि मावा नाटेने वेल्ले तकलिप कीसंतुर. 21 ईर वेहना रीत-रिवाजुल्कुन परकारम ताकमड मावा रोमि लोकुल्कुना नियमकुंक विरोदमते मंता,” इंचि इत्तुर. 22 लोकुल्कुना मंदागुडा पौलुस आनि सिलासुना विरोदमते तिरियतुर. रोमी अदिकारिल्क, पौलुस आनि सिलासुना कपडिं हराहचि ओर्कुन दुड्डुकुने तनना आदेस हीतुर. 23 ओर्कुन पक्का तंतारित्ते जेलने वाटसि, ओरपोर्रो कडक पहारा इर्राना इंचि जेलना अदिकारिंक आदेस हीतुर. 24 ओन्कु इल्हा आदेस दोर्कुतारित्ते ओर्कुन जेलना लोप्पोटा अर्राते वाटसी, ओरां काल्कुन उंदि मोट्टुंकु बोल अराहचि दोहतोर.
25 नळजाम नर्काटा वेलाते पौलुस आनि सिलास पेंदा स्तुतिता पाटां पारसेके, पारतना कीसेक मत्तुर. अस्के जेलने मत्ता वेरेतुर केंजसेके मत्तुर. 26 अस्के उंदेदम बूमि इल्हा कदुलता गदा, जेलना पुनादि कदुलसि जेलनव अन्नि तल्पुकु उंदे मल्का कुल्ला आतां. आनि जेलने मत्ता अंटोरा बेडीं लेंगसि होत्तां. 27 जेलना अदिकारि निद्राताल तेदसि हूळतोर अस्के जेलना तल्पुकु कुल्ला दिसतां. अदुन हूळसि, ‘जेलने मत्तोर अंटोर पेयसि विततुर बारे’ इनकुंचि कसेर तेंडसि ओनाद ओरे कोहकुंचि हांतन इंचि कसेर तेहतोर. 28 गानि पौलुस, “मोमोट अंटोरम इगेने मंतोम, निवद निमेने नुकसान कीकुनमा,” इंचि जोरते वरगेयतोर.
29 अस्के वरोनतोनि वेडसि ताया वेहचि आ अदिकारि बिराना लोप्पो होत्तोर आनि वनकुसेके पौलुसना आनि सिलासुना काल्कुना पोर्रो अर्तोर. 30 आयंका ओर्कुन पलाते तच्चि, “दादालोरिटा, पापाल्कुनाल मुक्ति दोर्कालय नाकु बतल किया पींता?” इंचि पूसकीतोर. 31 अस्के, “निमे येसु सामिना पोर्रो विस्वासम इर्रा. अस्के नीकु आनि नीवा लोते मत्तोर अंटोर्कु मुक्ति दोर्कंता,” इंचि ओर इत्तुर. 32 ओर ओन्कु आनि ओना लोते मत्ता अंटोर्कु पेंदा पोल्लें वेहतुर. 33 अस्के जेलना अदिकारि अदे नर्का अदे वेलाते ओर्कुन अगटाल ओतोर आनि ओसि ओरां पुनकुन नोरतोर. पजा आल्सेम कियाकोंटा ओर आनि ओना लोते मत्तोर अंटोर बापतिस्मा एततुर. 34 पौलुस आनि सिलासुन ओर ओना लोन पीसि ओसि ओर्कु गाटो दोस्तोर. इंदके पेंदा पोर्रो विस्वासम इरताहेंके ओर आनि ओना लोते मत्तोर अंटोर इरगा कूस आतुर.
35 पंगातारित्ते रोमी अदिकारिल्क, ‘ओर्कुन होळसिंटु’ इंचि जेलना अदिकारिंक वेहालय इच्चुर सिपाइल्कुन लोहतुर. 36 जेलता अदिकारि पौलुसुन, “मीकुन होडसागोम इंचि रोमी अदिकारिल्कु सिपाइल्कुन लोहचितुर, इंदके मिमेट सांतिते पेय्सि होंटु,” इंचि इत्तोर.
37 अस्के पौलुस आ सिपाइल्कुन, “मोमोट इंका रोम देसेमता रहिवासिल्के आंदुम. अय्नागानि ओर मावा बतले तप्पु हूळाकेने माकुन लोकुल्कुना मुन्ने तंतुर आनि जेलने वाटसीतुर. आनि इंदके सपुडदाका बोर्कु एरपाट हिलाकोंटा माकुन होळसियालय हूळसंतुर, गानि इल्हा आया पर्रो. माकुन होडसनद मत्ते ओर कुद इगे वासि होळसियिरकांटी,” इंचि इत्तुर.
38 सिपाइल्कु होंचि रोमी अदिकारिल्कुंक इद संगति वेहचितुर. पौलुस आनि सिलास ईर रोम देसेमता रहिवासिल्क आंदुर इंचि रोमी अदिकारिल्कुंक तेळियतारित्ते ओर इरगा वेरियतुर. 39 आयंका रोमी अदिकारिल्क वासि ओर्कुन मापि तल्कीसि पलाते ओतुर. आनि ओर्क विनंति कीसि इद सहर होळसि होनालय वेहतुर. 40 पौलुस आनि सिलास जेलनाल पलाते पेय्सि लिदियाना लोन होत्तुर. विस्वासि दादालोर्कुंक कलियसि ओर्कु प्रोत्साहन हीतुर आनि अगटाल पेय्सि होत्तुर.