येरूसलेमते उंदि पंचादि
15
1 पजा यहुदियाताल इच्चुर लोकुल्क अंताकियाक वासि, “मूसाना सास्त्रम परकारम मीवद कतना आयाकुंटे मीकु मुक्ति दोर्का पर्रो” इंचि अगाटा दादालोर्कुंक करहालय दल्गुतुर. 2 ओर लोकुल्क करहता पोल्लें पौलुसुंक आनि बरनाबासुंक नच्चा हिल्लें. अदुनहाटीं ओरा नड्डुम वेल्लेन लोल्लीं आतां. अय्ते ई लोल्लींकु समादानम पूस कियनाहाटीं पौलुस, बरनाबास आनि इच्चुर विस्वासुल्क येरूसलेम होंचि अगाटा प्रेरितुल्कुंक आनि पेद्दल्कुंक कलियना इंचि निर्नायम कीतुर. 3 पजा अगाटा चर्चुतोर ओर्कुन सार्ला कीतुर. अय्ते ओर पिनिके, सामरिया इनना एरियानाल तिरियसेक येरूसलेम होत्तुर. होननेंके वेरे जातितोर ओरा मनसु बल्हा मारसकुत्तुर, अदुन बारेमते वेहासेक होत्तुर. इल्हा ओर अगाटा विस्वासि दादालोर्कुन इरगा कूस कीतुर. 4 ओर येरूसलेम एवतुर अस्के, अगाटा चर्चुतोर, प्रेरितुल्क आनि पेद्दाल्क ओर्कु बेस आनंदमते कलियतुर. पजा पौलुस आनि बरनाबास पेन ओरतोनि मंचि बता-बता कबाह्क कीता, अदंता वेहतुर. 5 अस्के परिसिल्कुनाल इच्चुर विस्वासुल्क तेदतुर आनि, “वेरे जातितोरद कतना तप्पाकोंटा आये पींता आनि मूसल वेहता नियम परकारम ओर ताके पींता,” इंचि इत्तुर.6 अस्के ई पोल्लेन बारेमते विचारम कियालय प्रेरितुल्क आनि पेद्दाल्क उंदगा जमा आतुर. 7 बच्चोनो जेम विचारम कीतारित्ते पत्रु तेदतोर. तेदसि, “नावा दादालोरिटा, वेरे जातितोर नावा तोडदाले पेंदा बेसता कबुर केंजसि विस्वासमते वायाना इंचि, वेल्लेन रोजकु मुन्ने पेन मना अंटोर नड्डुमताल नाकुन पेर्कुत्ता. आनि इद संगति मीकु अंटोर्क एर्के मंता. 8 मनकलोर्कुना मनसुन एरपाट कियाना पेन, बल्हा मनाकु पवित्र आत्मातुन हीता, अल्हेने ओर्कु इंका हीसि ओरतोन कलियसि मत्ता संगति मनाकु वेहता. 9 ओर विस्वासम कीताहेंका पेन ओरा मनसुकुन इंका बेस कीसि, ओर्कु, मनाकु बतले बेदबावम इर्रा हिल्ले. 10 अय्ते मरि, मनम इंका मना पेद्दाल्क इंका कांजा पर्रुवा कांडितुन मिमेट सिस्युल्कुना हट्टानपोर्रो ताससि, मीकु बतल पेंदा परिक्सा हूळानद मंताना? 11 येसु सामिना दयाते मनाकु मुक्ति दोर्कंता इंचि मनम नम्मांतोम गदा! अल्हेन ओर्कगुडा मुक्ति दोर्कंता इंचि विस्वासम मंता.” इंचि इत्तोर.
12 अस्के बरनाबास आनि पौलुस, पेन ओर्कुन वेरे जातितोर लोप्पो लोहचि ओरा हेंदाल बसंटा अद्बूताल्क आनि चमत्काराल्क कीता, अदुन ओर वेहालय दल्गुतुर अय्ते अंटोर लोकुल्कु सपुडदाका आसि ओरा पोल्लें केंजालय दल्गुतुर.
13 ओरा वळकुमड आतारित्ते याकोब इल्हा वळकालय दल्गुतोर, “नावा दादालोर्कुनिटा, जरा नना वेहनद केंजट. 14 पेन मोट्टा मोदाला वेरे जातितोर पोर्रो इंका दाना दया हुपिच्चि ओरागटाल इच्चुर्कुन दाना लोकुल्कुन लेह्का बल्हा कीकुत्ता, इदुन बारेमते सिमोन पत्रु मनाकु वेहचि मत्तोर. 15 पेंदा कबुरतोर वेहता पोल्लें इंका इद गटनकु कलियंतां. अव पोल्लें इल्हा रासि मंतां:
16 “नना तिरियसि वासि दाविद राजाना अरसोत्ता राज्येमतुन मर्रा निल्हंतन,
दाना नासडेम आता मुक्का-मुक्कातुन कलपीसि अद मुन्ने मत्ताप मर्रा कींतन.
17 अस्के पेर्कुत्ता वेरे जातितोर आनि मिगिलसि मत्ता अन्नि वेरे जातितोर पेंदुन पहकानुर.” इव पोल्लें पेन वेहता.a 18 आनि पेन कुद इदुन बारेमते वेल्लेन रोजकु मुन्ने वेहासि मत्ता.
19 इंचि नावा विचारम बतल मंता इत्ते, मनसु मारसकुंचि पेंदा हेके तिरियता आ वेरे जातितोर्कुन मनम तकलिप किया मन्नि. 20 गानि ओर्कु मनम, बोम्मांक मोळकुतदुन तिना मन्नि, मरमींक मुन्ने आयि मरमीं आतंका आयि, वेरे बोगमतनम किया मन्नि, गोंदके पिसकीसि हव्कता जिवरासिना हव्वीं आनि नेत्तुर तिना मन्नि इंचि रासि लोहकोम.
21 बारित्ते ओर एनकाटाल मूसल वेहता नियमतुन अन्नि सहरकुने वेहासेक इंका हरेक नोमकेम रोजुननाडु दर्मसास्त्रम कराहना लोते हदविसि वेहासेक मत्तोर आंदुर,” इंचि इत्तोर.
वेरे जाति विस्वासि लोकुल्कुंक उंदि सिट्टि
22 पजा प्रेरितुल्क, पेद्दाल्क आनि चर्चुतोर अंटोर कलियसि, अगाटा विस्वासुल्कुनाल इच्चुर लोकुल्कुन पेरसि पौलुस आनि बरनाबासुनतोनि अंताकियाक लोहना निर्नायम कीतुर. पजा बरसब्बाbन आनि सिलासु इनना इव्वुर्कुन पेरतुर. ईर इव्वुरगुडा विस्वासुल्कुनाल मेन मनकलोर मत्तुर. 23 ओर होननेंके ओरा कय्दे उंदि सिट्टि हीतुर, अद सिट्टिते इल्हा राससि मंता:
‘अंताकिया, सिरिया, किलिकिया सहरकुने मनना अंटोर वेरे जाति विस्वासुल्कुंक, येरूसलेमते मनना मीवा पेद्दाल्क आनि प्रेरित दादालोर हेंदाल सेनार्ति.
24 मावा पावरमगल्ला दादालोरिटा, माकुन पूस कियाकोंटेन महागटाल इच्चुर लोकुल्कु मिहगा वासि ओरा मनसुंक वाताप वळकीसि मी मनसुने अनमानम पुटिचि मीकु तकलिप हीतुर इत्ता संगति मोमोट केंजतोम. 25 अदुनहाटीं मना पावरमगल्ला बरनाबास आनि पौलुसुनतोनि पेर्कुत्ता इच्चुर लोकुल्कुन मीहेके लोहना इंचि मोमोट अंटोरम कलियसि निर्नायम कीतोम. 26 मना अंटोरा किरिस्तु येसु सामिना पोर्रोलहाटीं बरनाबास आनि पौलुस ईर ईरा जीवातुन इंका हियालय तयार आता मनकलोर आंदुर. 27 अय्ते मोमोट सिट्टिते रासता अन्नि पोल्लें यहुदल आनि सिलासु ओर ओरा तोडदाल मीकु वेहना इंचि ओर्कुन मीहेके लोहसेक मंतोम. 28-29 बोम्मांकु मोळकुतदुन मिमेट तिनमटु, गोंदके पिसकीसि हव्कता जीवरासिना नेत्तुर आनि हव्विं तिनमटु, मरमींक मुन्ने आयि मरमीं आतंका आयि बोगमतनमताल लक्कु मंटु. इसंटा अवसरमाता नियमकुंक तप्पा इंका वेरे बद्दे बर्वु मी पोर्रो वाटा मन्नि इत्ता पोल्ले पवित्र आत्माकु आनि माकु बेस अन्पिस्ता. मिमेट गिंटा इव पोल्लेनाल लक्कु मत्ते मीके बेस आयार. मीकु अंटोर्कु सेनार्ति.
30 इल्हा राससि ओर्कुन अगटाल सार्ला कीतुर आनि ओर पजा अंताकियाकु एवतुर. अगा एव्ता पजा ओर अंटोर विस्वासुल्कुन जमा कीसि अद सिट्टि तुन ओरा कय्दे हीतुर. 31 सिट्टिते राससि मत्ता प्रोत्साहन हियना पोल्लें हदविसि ओर्क अंटोर्क वेल्लेन कुसि आता. 32 यहुदल आनि सिलासु, ईर इव्वुरगुडा पेंदा कबुरतोर आंदुर. अदुनहाटीं अगाटा विस्वासि दादालोरतोनि वेल्लेनजेम वळकीसि ओर्कुन विस्वासमते गट्टिगा कीसि ओर्कु प्रोत्साहन हीतुर. 33 इल्हा यहुदल आनि सिलासु कोनि रोजकु अगा मत्तुर. पजा अंटोर विस्वासुल्क जमा आसि, ओर्कुन बोरय्ते अंताकियाक लोहतुरो ओरहेके वापोस येरूसलेम होनालय सांतिते सार्ला कीतुर. 34 c गानि सिलास मात्रम अंताकियातेन मनना विचारम कीतोर. 35 पजा पौलुस आनि बरनाबास कोनि रोजकु अंताकियातेन आगतुर. आनि अगाटा वेल्लेन लोकुल्कुनतोनि कलियसि सामिना पोल्लें कराहसेक आनि बेसता कबुर वेहासेक मत्तुर.
पौलुसनद रोंडोव पय्नम (प्रे. १५:३६–१८:२२)
पौलुस आनि बरनाबास वेरे-वेरे आंतुर
36 इच्चुं रोजकु आतारित्ते पौलुस बरनाबासुन, “मनम सामिना पोल्लें बव-बव सहरकुने वेहतोमो अव अन्नि सहरकुने मर्रा दाकोम, आनि पेंदुन नम्मुकुत्ता पजा अगाटा दादालोरा पिसवरकु बल्हा बतल मंतांगो हूळसि वाकोम” इंचि इत्तोर. 37 अय्ते बरनाबासुंक मरकुसुन(ईन योहान इंचि इंका इंतुर) इंका पज्जेके ओयाना मनसु मत्ता. 38 गानि पौलुसुंक मात्रम, बोरय्ते पेंदा कबळते आकिरदाका कलियसि मनाकोंटा नड्डुमे पंपुलिया एरियाताल होळसि वापोस होत्ता मरकुसुन पज्जो ओयमळ पसंद मनाहिल्ले. 39 इल्हा ओर इव्वुर नड्डुम वेल्लेन पोल्लें आसि ओर वेरे-वेरे आतुर. अस्के बरनाबास मरकुसुन पीकुंचि डोंगाते उंदसि साइप्रस इनना दीबेक होत्तोर. 40 पजा पौलुस ओनातोनि मननाहाटीं सिलासुन पेर्कुंचि अगटाल होत्तोर. अय्ते अगाटा विस्वासि दादालोरगुडा पौलुसुंक आनि सिलासुंक पेंदा दया दोर्कानाहाटीं पारतना कीसि ओर्कुन पेंदा कय्दे अप्पाजेपतुर. 41 अस्के ओर सिरिया, किलिकिया इनना एरियानाल तिरियसेके अगाटा चर्चुकनोर्कुंक कलियसि पेंदा विस्वासमते बेस एदगानाहाटीं ओर्कु बेसता पोल्लें वेहासेक होत्तुर.