पौलुस आनि बरनाबास इकुनियुम सहरते सेवा कीतुर
14
1 इल्हा पौलुस आनि बरनाबास इकोनिया सहरते यहुदील्कुना दर्मसास्त्रम कराहना लोते होत्तुर. अगा पेंदा पोल्लें बेस वेहतुर. अदुनहाटीं यहुदिल्क आनि युनानि जातितोर वेल्लेटुर लोकुल्कु येसुनपोर्रो विस्वासम कीतुर. 2 गानि विस्वासम किवा यहुदिल्कु, विस्वासुल्कुतोनि जग्डम कियालय वेरे जातितोर्कुन एक्किस्तुर. 3 अय्नागानि पौलुस आनि बरनाबास अगा वेल्लेने रोजकु आगिसि मत्तुर, आनि सामिना दयाता बारेमे वेरियकुंटा वेहचेके मत्तुर. ओर वेहना पोल्लें निजम इंचि गवाइ हूप्सालय सामि ओरा कय्दाल चिन्हां आनि अद्बुताल्कुना कबाह्क हूप्सुंदु. 4 गानि हेके सहरते वरोनद वरोंकु अर्राकुंटा आता. इच्चुर यहुदिल्कुनहेके आनि इच्चुर बारे प्रेरितुल्कुनहेके आतुर. 5 वेरे जातितोर आनि यहुदिल्कु ओरा अदिकारिल्कुनतोनि कलियसि पौलुसुन आनि बरनाबासुना कदर रेहचि बंडां हुक्कालय तयार आतुर. 6-7 इद पोल्ले पौलुसुंक आनि बरनाबासुंक एर्का आता. अदुनहाटीं ओर लुकावनिया जिल्लाते विततुर. अद जिल्लाता लिसरा सहरते, दिरबे सहरते आनि दग्गेटा नाहकुने होंचि पेंदा बेसता कबुर वेहुंदुर.पौलुस आनि बरनाबास लुस्त्राते सेवा कीतुर
8 लिसराते वरोर कुंटि मनकल उदिस मत्तोर. ओर पुटतगाटाल बस्केन ताका हिल्लोर. 9 पौलुस वेहना पोल्लें ओर केंजसेके मत्तोर. अस्के पौलुस ओन उंदेतीर हूळसि, ई कुंटिन लोपो बेस आयना विस्वासम मंता, इंचि इनकुत्तोर. 10 अस्के पौलुस ओन, “तेदसि बेस नित्ता,” इंचि लगांचि इत्तोर, इत्तस्के ओर एगरिस तेदतोर आनि ताकालय दल्गुतोर.
11 लोकुल्कु पौलुस कीतदुन हूळसि, लुकावनिया बासाते, “पेनकु मनकना रूपमते मनागा रेय्सि वातां,” इंचि लगांचि इत्तुर. 12 ओर बरनाबासुन ‘जेयुस पेन’ aआनि पौलुस बारे वळ्कानंटे पेद्दा मत्तोर इंचि ओन, ‘हिरमेस पेन’b इत्तुर. 13 जेयुस पेंदा गुळि, नाटुक मुन्ने मत्ता. दाना पेर्माल, लोकुल्कुनतोनि कलियसि, पौलुस आनि बरनाबासुनहाटीं मोक्कु हियालय कोंदां आनि पुंगाह्कुना हारकु पीकुंचि सहरते नेंगनां गलमानगा तत्तोर.
14 गानि ओर इल्हा कीतद केंजसि, प्रेरित बरनाबास आनि पौलुस ओरां कपडिं हराह्कुत्तुरc आनि लोकुल्कुना लोप्पो वित्सि, 15 “ए लोकुरिटा, मिमेट इल्हा बारी कीसंतिर? मोमोट इंका मीवा असोंटा मनकलोरामे. मिमेट अंगडम पोल्लेन होळसिसि, जीवाते मनना पेंदाहेके तिरियटु. अदे पेन मब्बुन, बूमितुन, समुद्रमतुन आनि अव्टे मत्तव अन्निटवुन पुटिस्ता. इंचि अदे पेंदा बेसता कबुर वेहालय मोमोट वातोम. 16 मुनेटा कालमते पेन, अन्नि जातिनोर्कुंक ओरा इस्टमाताप ओर्कुन मोळ्का हीता. 17 गानि मीकु मब्बुनाल पिर्रु हीता, कालमनुसार पंटा पंडिस्ता, तिनालय गाटो हीसि, मीकुन आनंदमते इरसि, ‘ननाने निजम पेंदुन आंदुन’ इंचि दाना बेसता कबाह्कुना हेंदाल मीकु हूपिस्ता,” इंचि वेहतोर.
18 अचोने वेहना गानि वेल्ले तिप्पलते ओर्क मोक्कु हियालय वातोर्कुन आपा परतुर. 19 आयंका पीसिदियाता अंताकिया सहरताल आनि इकोनिया सहरताल इच्चुर यहुदिल्क वातुर. वासि लोकुल्कुन ओरा बाजुंक कीकुंचि, पौलुसुन पोर्रो बंडां हुक्तुर आनि ओर हातोर इनकुंचि ओन सहरता पलाते इग्गिस ओतुर. 20 पजा सिस्युल्कु ओनगा वासि सुट्टु निततुर. अस्के पौलुस तेदिस सहरते होत्तोर. मर्रा इंकुंदि रोज बरनाबासुनतोनि दिरबे सहरते होत्तोर.
पौलुस मोदाटा पय्नम महाचि सिरिया एरियाता अंताकिया सहरकु मलसि वायमड़
21 पजा पौलुस आनि बरनाबास दिरबे सहरता लोकुल्कुंक पेंदा बेसता कबुर वेहचि, वेल्लेटोर्कुन सिस्युल्कु कीतुर. पजा लिसरा, इकोनिया, पीसिदियाता अंताकिया सहरते मलसि होत्तुर. 22 अगा होंचि, “पेंदा राज्येमते होनना इत्ते तिप्पल्कु वांतां, दानाहाटीं विस्वासमते गट्टिगासि मंटु,” इंचि वेहाचि दैरनेम हीतोर.
23 पजा ओर, अगाटा हरेक चर्चुने पेद्दाल्कुन निलाहतुर. आनि ओराहाटीं उपासम पारतना कीसि, ओर बा सामिन पोर्रो अय्ते विस्वासम कीतुर, आ सामिंक अप्पाजेपतुर. 24 आयंका ओर पीसिदियाताल पंपुलिया एरियाते होत्तुर. 25 अगा होंचि, पिरगा सहरते पेंदा बेसता पोल्लें वेहचि अतलिया सहरते होत्तुर. 26 अगटाल डोंगा उदसि सिरियाता अंताकियाते मलसि होत्तुर. बद कबळ अय्ते ओर पूरा कीतुरो, अद कबळ पेंदा दयाते अदे जेगाताल सुरु कीसि मत्तुर.