पौलुस मोदाटा पय्नमकु पेय्संतोर (प्रे. १३:१–१४:२८)
बरनाबासुन आनि पौलुसन (साऊल) बेस कबळताहाटीं पेरमड़
13
1 अंताकिया सहरता चर्चुतोराव्टे इच्चुर पेंदा कबुरतोर आनि ओरे कराहना गुरूल्कु इंका मत्तुर. ओर बोर इत्ते, बरनाबास, सिमोन ओन निगर (इत्ते कर्रेटोर) गुडा इनुंदुर, कुरेने सहरता लूकियुस, साऊल, हेरोद अंतिपास राजानतोनि बेर्सतोर मनाहेम ईर आंदुर. 2 उंदि रोज ओर उपासम मंचि सामिंक आरादना कीसेके मननेंके पवित्र आत्मा ओर्कुन, “नना बद कबाटाहाटीं बरनाबासुन आनि साऊलुन पेर्कुत्तनो, अदुन कियानाहाटीं ओर्कुन अलग कीम्टु,” इंचि इत्ता. 3 अस्के ओर उपासम मंचि पारतना कीसि ओरापोर्रो कय इरसि ओर्कुन लोहचितुर.पौलुस आनि बरनाबास सायप्रस दीबेते दांतुर
4 पवित्र आत्मातेंदाल ओर्कुन लोहतारित्ते ओर सिलुकिया सहरते होत्तुर, आनि अगटाल उंदि डोंगाते उद्दिसि साइप्रस दीबेतेके पेय्स्तुर. 5 पजा अदे दीबेते मनना सलमीस इनना सहरतुक एवतुर, एवतारित्ते यहुदिल्कुना दर्मसास्त्रम कराहना लोहकुने होंचि पेंदा पोल्लें वेहालय दल्गतुर, आनि योहान (ईन मरकुसगुडा इनुंदुर) ओर्कु सहायम कियालय ओरतोनि मत्तोर. 6 पजा ओर पूरा दीबेतुन तिरियसेक पापूस इनना नाटुक एवतुर. अगा ओर्कु वरोर मंत्राल्कुनोर बार-येसु पोर्रोलतोर यहुदि मनकल कलियतोर. ओर ‘नना पेंदा कबुरतोन’ इंचि बोंकिचि वेहकुंदुर. 7 अगा वरोर सिरगु पौलुस इनना तेल्विता अदिकारि मत्तोर, ओनतोने बार-येसु मत्तोर. आ अदिकारि पेंदा पोल्लें केंजंतन इंचि बरनाबासुन आनि साऊलुन ओनगा केयतोर. 8 गानि एलिमल इनना मंत्राल्कुनोर (युनानि बासाते बार-येसुना पोर्रोल एलिमल मत्ता), बरनाबास आनि साऊलुंकु अड्डम आसि आ अदिकारि विस्वासम किया मन्नि इंचि आपालय हूळतोर. 9 अस्के साऊल (ईन पौलुस इंका इनुंदुर) पवित्र आत्माते निंडिसी, एलिमलनेके उंदेतीर हूळसेक, 10 अरे! निमे दोका कियानोन आनि अन्नि तीरुकुना नडेह कियाना बुद्दिं निंडसि मत्ता देय्याल्कुना मुक्यनसंटोन आंदिन, अन्नि बेसतावुंक अड्डम मनांतिन. बच्चोदाका सामिना निजम पोल्लेतुन आबद्दम वळ्कसेक मनांतिन? 11 इंदके हूळा! सामि नीवा पोर्रो कय तेहातोर, निमे गुड्डिन आंतिन आनि कोन्नि रोजकुनदाका पोडदुन इंका हूळाकुंटा आंतिन,” इंचि इत्तोर. इत्तस्केने एलिमलना कळकु मागुर-मागुर आतां. आनि हिर्र हीकट आसि दिसाकुंटा आतां, अस्के ओर हीके हेके, ‘नाकुन बोरन्ना कय पीसि ओयागोम’ इंचि पहकालय दल्गुतोर. 12 एलिमलुंक अल्हा आतदुन हूळसि आनि सामिना बारेमते वेहता पोल्लें केंजसि इचंत्रम आसि, आ अदिकारि सामिन विस्वासम कीतोर.
पौलुस आनि बारनाबास पिसादिया एरियाता अंताकियाते पेंदा कबुर वेहतुर
13 आयंका पौलुस ओना दंटातुरतोनि पापूस सहरताल डोंगाते उदसि, पंपुलिया एरियाते मनना पिरगा सहरते होत्तुर. अगा होत्तारित्ते योहान ओर्कुन होळसिसि येरूसलेम मल्सि होत्तोर. 14 हेके पौलुस आनि बरनाबास पिरगा सहरताल तिरियसेके पीसिदिया एरियाते मनना अंताकिया सहरते एवतुर. आनि नोमकेम रोजुने यहुदिल्कुना दर्मसास्त्रम कराहना लोते होंचि उदतुर. 15 अगा बोरो मूसाना नियम आनि पेंदा कबुरतोर रासतव पुस्तकाल्कुन हदवुतुर. हदवुतारित्ते दर्मसास्त्रम कराहना लोता अदिकारिल्कु पौलुसुन आनि बरनाबासुन, “दादालोर्कुनिटा! लोकुल्कुंक कराहनाहाटीं मिहगा बदाना प्रोत्साहन कियाना पोल्ले मत्ते कराहटु,” इंचि पूसकियालय लोहतुर.
पौलुसना बासन
16 अस्के पौलुस नित्तिसि, लोकुल्कुन सपुडदाका कियालय कय तेहाचि वळ्कालय दल्गुतोर, “इस्राएलता लोकुरिटा आनि पेंदुक वेरियना वेरे जातितोरिटा, केंजटु. 17 ई इस्राएल लोकुल्कुना पेन, मना एनकटा पेद्दाल्कुन पेर्कुत्ता. आनि ओर इजिप्त देसेमतोरा कय्दा हिडु बस्कय्ते मत्तुरो, अस्के ओर्कुन पेद्दा कीसि, दाना पेद्दा बलमतोने ओर्कुन आ देसेमताल पलाते तता. 18 मना पेद्दाल्क पेंदा पोल्लें केंजा कोंदुर, अय्नागानि ओर्कुन दगेर-दगेरा नल्पै वर्सनदाका उस्के बूमिते ओर्सकुत्ता. 19-20 आनि कनान देसेमता एडुं जातिन नासडेम कीसि, अद बूमि इस्राएल लोकुल्कुंक ‘इद मीवा बूमि’ इंचि हीता. इव अन्नि आयालय नालुं नुह्कुना एबै वर्सां दल्गतां. पजा समवेल पोर्रोलता पेंदा कबुरतोर वायानादाका पेन ओर्कु बच्चुरो न्यायम कियानोर्कुन हीता. 21 आयंका ओर वरोर राजाल गावाले इत्ताहाटीं, पेन ओर्कु बेंजामिनना वंसमतोर कीस इननोना मर्रि साऊलुन हीता, ओर नल्पै वर्सां राज्येम कीतोर. 22 मर्रा साऊलुनगाटाल राज्येम तेंडसि दाविदुंक हीता. दाविदुना बारेमते पेन इल्हा गवाइ वेहता, “यिसे पोर्रोलतोना मर्रि दाविद, नना इन्कुत्ताप नाकु दोर्कतोर, नना वेहतव अन्नि ओर पूरा कींतोर,” इंचि वेहता.
23 “पेन इत्ता परकारम ईना वंसमताले इस्राएल लोकुल्कुन मुक्ति हियानोर इंचि येसुन, पेन लोहता. 24 येसु वायाका मुन्ने, बापतिस्मा हियना योहान इस्राएलता अंटोर लोकुल्कुन ‘मनसु मार्सकुंचि बापतिस्मा एतट’ इंचि वेहतोर. 25 योहान ओना कबाटुन पूरा महाना वेलाते, ‘नना बोन इंचि मिमेट इन्कुंचंतिर? मिमेट बोनय्ते एदुर हूडसंतिर, ओन नना आयोन. ओर नावा पज्जो वायानुर, नना ओना काल्कुना हेर्पुह्कु तेंडना लायक इंका हिल्लेन,” इंचि इत्तोर.
26 “मावा दादालुरिटा, अब्राहामुना वंसमतोरिटा आनि पेंदुक वेरियना वेरे जातितोरिटा! मुक्ति हियना बेसता कबुरतुन पेन मनागा लोहचिता. 27 येरूसलेमते मनानुर आनि ओरा अदिकारिल्कु येसुन एरपाट किया हिल्लुर. वारा-वारम नोमकेम रोजुने पेंदा कबुरतोरा पोल्लें हदवुंदुर, गानि दान एरपाट किया हिल्लुर. एरपाट कियवा येसुन हव्कीसि आ पेंदा कबुरतोरा पोल्लेन पूरा कीतुर. 28 येसुनपोर्रो हव्कना सिक्सा हियानसोंटा बतले तप्पु दोर्काकुन्ना गानि ओन हव्कगोम इंचि पिलातुस राज्यपालुंक विनंति कीतुर. 29 आनि येसुन बतल-बतल कियानुर इंचि रासि मत्तानो, अव अन्नि पूरा आतस्के ओन क्रुसुनपोर्रोटाल हिडु रेहाचि बोंदा दोस्तुरa. 30 गानि पेन ओन हामुरताल मर्रा तेहता. 31 तेहतारित्ते, गलिलताल येरूसलेम दाका ओनतोनि होत्तोर्कुंक वेल्लेने रोजकुनदाका ओर दिसेक मत्तोर. इंदके ओरे, लोकुल्कुना मुन्ने येसुना गवाइ मंतुर. 32 पेन मना पेद्दाल्कुंक मुन्नेने पोल्ले हीसि मत्ता. अदे पोल्लेता कबुरतुन मोमोट मीक वेहासेक मंतोम. 33 इल्हा पेन येसुन हामुरताल मर्रा तेहाचि, मना पेद्दाल्कुंक मुन्नेने हीता पोल्ले, इंदके मनाहाटीं निजम आता. इदु, बजन संहितता रेंडो बजनते इल्हा रासि मंता:
‘निमे नावा मर्रिन आंदिन,
इय्यला नना नीकु बाबोन आतन.’ b
34 पेन ओन हातुरा लोप्पोटाल तेहता, ओर मर्रा बस्केने कडियसि होन्नोर.
‘नना दाविदुंक तप्पाकुंटा हींतन इत्ता पवित्रमाता आसिर्वादम निक हींतन,’ इंचि इत्ता. c
35 अल्हेने इंकुंदी बजनते ओर इल्हा इत्तोर:
‘नीवा पवित्र मनकन कडियसि होना हियिन.’d
36 “दाविद पेंदा इच्चा मत्तापे ओन्कु हीता सेवा-कबाटुन ओना कालमते माहचि हातोर. हातस्के ओना पेद्दाल्कुन बगा बोंदा दोस्तुरो, अगाने ओन इंका बोंदा दोस्तुर आनि कडियसि इंका होत्तोर. 37 गानि पेन तेहतोर मात्रम कडियसि होना हिल्लोर.”
38 “अदुनहाटीं मावा दादालोरिटा! मिमेट दीनु तेळियागोटकुंटु. येसुनाहेंदाले मीवा पापाल्कुन पेन मापि कींता इंचि मोमोट वेहासेक मंतोम. 39 मूसाना नियम हेंदाल मीकु पापाल्कुनाल मापि दोर्को, गानि येसुना पोर्रो विस्वास इर्रानुर अंटोर्क ओरा पापाल्कुनाल मापि दोर्कंता. 40 अदुनहाटीं पेंदा कबुरतोर रासता पोल्लें मीवापोर्रो वायाकुंटा उसारते मंटु, इंचि पेन इल्हा इत्ता:
41 नावा पोल्लेतुन पास्कानोरिटा हूळाट,
इचंत्रम आसि, हासि दांतिट.
बारित्ते, मीवा वेलाते
नना इसोंटा कबळ कींतन गदा,
अदुना बारेमते बोर वेहना गानि मिमेट विस्वास कियिर,”e इंचि पेन वेहता.
42 पौलुस, बरनाबास दर्मसास्त्रम कराहना लोताल पलाते पेय्सतस्के, “इव पोल्लें वायाना नोमकेम रोजुने इंका एक्को माकु वेहाटु,” इंचि लोकुल्कु ओरतोनि विनंति कीतुर. 43 वेल्लेटुर यहुदिल्कु आनि यहुदि जातिते वाता वेरे जातितोर पौलुस आनि बरनाबासुना पज्जो होत्तुर. ओर, लोकुल्कुनतोनि वळकसेके ओर्कु, “पेनदा दयाते बस्केळ्क मंटु,” इंचि वेहतुर.
44 इंकुंदी नोमकेम रोजुने सामिना पोल्लें केंजालय, पूरा नाटेनोर इत्ताप जमा आतुर. 45 अच्चो वेल्ले मंदितुन हूळसि यहुदिल्कुना जीवा मसुल्ता, अदुनहाटीं ओर पौलुसना पोल्लेंक विरोद कीसि ओर्कुन तेंडिस पोहताप पोल्लें इत्तुर. 46 गानि पौलुस आनि बरनाबास वेरियाकुंटा, “मीकु पेंदा पोल्ले मुन्नेने वेहना अव्सरम मत्ता, गानि मिमेट दान हय्सका, बस्केळ्क पिस्सना पिसवरकु लक्कु आताप हूपिस्तिर. अदुनहाटीं इंदके मोमोट यहुदि आयवोरहेके दांतोम. 47 बारित्ते पेन माकु इल्हा आदेस हीता:
‘सामि लोकुल्कुन बल्हा पिसागोटंतोर इंचि दुनियांता वेहकिन,
बारित्ते, नना नीकुन वेरे जातितोरहाटीं वेडसि हूप्सानोन कीतन,” इंचि इत्तोर.
यसया ४९:६
48 ई पोल्ले केंजसि वेरे जातितोर वेल्ले कूस आसि, सामिना पोल्लेता कदर कीतुर. आनि बचटूर्कुन अय्ते बस्केळ्क पिस्सना पिसवरताहाटीं पेन पेर्कुत्तनो, अचटुर येसुनपोर्रो विस्वास कीतुर.
49 इल्हा सामिना पोल्लें पूरा एरियता लोकुल्कुंक तेळियतां. 50 गानि यहुदी लोकुल्कु मात्रम निजामाता पेंदुन मोळ्कना सहरता कदर मत्ता वेरे जातिता मुरताह्कुन आनि पेद्दाल्कुन एक्किस्तुर. अस्के ओर पौलुस आनि बरनाबासुन पक्का तकलिप कीसि ओर्कुन आ एरियाताल पलाते पेचहतुर. 51 अस्के ओर इव्वुर ओरा काल्कुना दुब्बा अग्गेने दुल्पीसि ओरापोर्रो विरोदम हुपिस्तुर आनि इकोनिया सहरते पेय्सि होत्तुर. 52 गानि अंताकियाता विस्वासुल्क पवित्र आत्माते पूरा निंडिस आनंदमते मत्तुर.