हेरोद राजल पत्रुन जेलने वाटंतोर
12
1 अवे रोजकुने हेरोद अग्रिपा राजाल चर्चुनोराव्टेटाल इच्चुर मंदितुन तकलिप कियालय सुरु कीतोर. 2 ओर योहानुना दादाल याकोबुन कसेटे तलातुन कोय्सि हव्का वेहतोर. 3 ओर कियना कबाह्क यहुदि लोकुल्कुंक बेस अनपिस्ता इन्कुंचि हेरोज राजाल पत्रुन इंका दोर्का पीतोर. (इद गटना होयवा पिंडिता हारिना पंडुगुaना रोजु जर्गुता.) 4 दोर्का पीसि जेलने वाटतोर. पजा तेपाक नालुर सिपाइल्क ओनगा कावेल कियना इंचि, पदाहारुर सिपाइल्कुना कय्दे ओन अप्पजेपतोर. पस्के पंडुगुb आतारित्ते पत्रुना न्यायम कियालय लोकुल्कुना मुन्ने तायाना विचारम हेरोज राजाना मनसुने मत्ता.5 इल्हा पत्रुन ओर जेलने वाटसि इरतोर. गानि ओनाहाटीं चर्चुतोर मात्रम आगाकोंटा उंदेतीर पेंदुक पारतना कीसेके मत्तुर.
पत्रु जेलनाल पेय्संतोर
6 हेरोद राजाल पत्रुन पलाते पीसि वायना उंदि रोज मुन्ने, नर्काटा वेलाक पत्रु इव्वुर सिपाइल्कुना नड्डुम निद्रा होंचेके मत्तोर. सिपाइल्क ओन रोंडु गोल्सुकुने बेडीं वाटसि इरतुर. पलाते तल्पुनगा कावेल कियानोर जेलूंक कावेल कीसेके मत्तुर. 7 अचानक सामिनद उंदि पेंदा दूता अगा दिसता. आ अर्रांता पूरा वेलगुनतोनि निंडिस होत्ता. आ पेंदा दूता पत्रुन मेलाहचि, ‘बिराना तेदा!’ इंचि ओन तेहाता. ओना कय्कुना बेडीं लेंगसि हिडु कुसर्तां. 8 अस्के पेंदा दूता, ‘बिराना तयार आसि हेरपुह्क केर्रा,’ इंचि ओन्कु वेहता. अस्के अद वेहतापे ओर कीतोर. पजा पेंदा दूता, ‘नीवा सेदर मुचकुंचि नावा पज्जो वा,’ इंचि इत्ता. 9 ओर पेंदा दूताता पजो-पजो होंचि जेलनाल पलाते अय्ते पेय्सतोर, गानि पेंदा दूता बतल अय्ते कीसंतनो अद अंता निजमे जर्गुसंता इंचि ओर इन्कुना हिल्लोर. ओर उंदि दर्सनम हूळसंतन बारे इत्ताप अनपिस्ता. 10 पजा ओर मोदाटोन आनि ओना पज्जोटा कावेल कियानोन दाटसि सहरकु होनना कच्चि तल्पुनगाह्कु वातुर. अस्के आ तल्पु ओराहाटीं दानद अदे पेय्स्ता. अस्के ओर दान दाटसि पलाते पेय्सि होत्तुर. इच्चोन लक्कु होतंका अचानक आ पेंदा दूता ओन होळसि होत्ता. 11 पजा पत्रुंक तेल्वि अर्ता. अस्के ‘निजमे! सामिए ओना उंदि पेंदा दूतातुन लोहचि नाकुन हेरोद राजाना कय्दाल तपिस्तोर. आनि यहुदि पेद्दाल्क नाकुन बतल-बल्हा कियाना इंचि विचारम कीसेक मत्तुरो, अव अन्निटावुनालगुडा सामिए नाकुन पिसागोटतोर,’ इंचि इन्कुत्तोर.
12 इदंता तेळियता पजा ओर मरियल इनना मुरतटा लोन होत्तोर. ई मरियल योहान (ईन मरकुसगुडा इंतुर) इनानोना यावल आंद. अगा वेल्लेन मंदि उंदगा जमा आसि पारतना कीसेके मत्तुर. 13 पत्रु पलाताल तल्पुन तंतस्के तल्पु तेंडालय रुदा इनना उंदि दासि पेगिड वाता. 14 पत्रुना लेंग एरपाट कीसि अद वेल्ले आनंदमते तल्पु तेंडाकोंटेन मल्सि लोप्पो वित्तुता आनि, “पत्रु तल्पुनगा नित्तिसि मंतोर,” इंचि वेहता.
15 अस्के अगा मत्तोर, ‘नीकु पिसा पीताना?’ इंचि इत्तुर. अद वेहनद निजमे इंचि बच्चोनो वेहता. अस्के ओर ओन, ‘अद ओना पेंदा दूता आयावच्चु,’ इंचि इत्तुर. 16 अय्ना पत्रु तल्पुन अल्हेन तंचेके मत्तोर. पजा ओर तल्पु तेंडतस्के पत्रुन हूळसि ओर्कु इचंत्रम आता. 17 अस्के पत्रु ओर्कुन सपुडदाका मंटु इंचि कय्दे सय्गे कीसि वेहतोर. आनि सामि ओन जेलनाल बल्हा पलाते तत्तोर, इद ओर्कु पूरा समजांचि वेहतोर. पजा ‘ई संगति याकोबुंक(येसुना तम्मुर) आनि कळमता दादालोर्कुंक वेहाट,’ इंचि वेहचि अगटाल ओर इंकुंदि वेरे जेगाते पेय्सि होत्तोर.
18 पंग आतास्के, ‘पत्रु बेके होत्तोर, बतल आता?’ इंचि सिपाइल्क पेद्दा गाबर आतुर. 19 हेरोद राजाल ओन इरगा पहकुतोर. गानि पत्रु ओन्कु बग्गेन दोर्का हिल्लोर. अस्के ओर कावेल इरता सिपाइल्कुन पूस कीसि ओर्कुन हव्कना आदेस हीतोर. आनि हेरोद राजाल यहुदियाताल कैसरियाते वासि मनालय दल्गुतोर.
हेरोदना हामुर
20 हेरोद राजाल सूर आनि सैदा सहरकुना लोकुल्कुनपोर्रो वेल्ले होंग आसि मत्तोर. ओर अंटोर उंदि आसि ओनतोनि वळकालय होत्तुर. राजाना वरोर बेस दग्गेटा सेवक बलासतुस इनानोन मुन्ने अराहचि, ‘माकु सांति गावाले’ इंचि ओन्कु विनंति कीतुर. बारित्ते ईरा देसेमतोर्कु तिनालय तिंडि राजाना देसेमताले दोर्कुंदु. 21 इनकुत्ता उंदि रोजु हेरोद राजाल, राजाल केर्राना कपडीं केरसि ओना राजगद्देपोर्रो उदसि लोकुल्कुंक बासन हियालय दल्गुतोर. 22 अस्के लोकुल्कु, “इद अय्ते पेंदा लेंग आंदु, मनकनद आयो,” इंचि वरगेयालय दल्गुतुर. 23 अस्के राजाल पेंदा कदर कियाकोंटा पोंगसोत्तोर. अदुनहाटीं अस्केटद अस्केने सामिनद उंदि पेंदा दूता ओन बिमार अरहता आनि ओर पुड़कु अरसि हासि होत्तोर.
24 गानि पेंदा पोल्ले मात्रम पैलांचेके होत्ता आनि अद केंजसि वेल्लेन लोकुल्कु विस्वासमते वातुर.
25 बरनाबास आनि साऊल ओरा कबळ पूरा कीसि येरूसलेमताल वापस अंताकिया होत्तुर. होननेंके मरकुस इनना योहानुनगुडा पज्जो पीकुंचि होत्तुर.