पत्रु येरूसलेमते मल्सि वांतोर
11
1 वेरे जातितोर इंका पेंदा पोल्लेतुन स्विकार कीतुर इत्ता, संगति प्रेरितुल्क आनि यहुदिया एरियाते मत्ता विस्वासि दादालोर केंजतुर. 2-3 गानि बस्के अय्ते पत्रु येरूसलेमते वातोर अस्के कोंदर यहुदि विस्वासुल्कa, “निमे वेरे जाति लोकुल्कुbना लोहकुने होंचि ओरतोनि गाटो बारि तित्तिन.” इंचि ओनातोनि जगडम दोस्तुर.4 अस्के पत्रु बतल अय्ते जरुगुतानो अद बल्हा मत्तद अल्हे ओर्कु ई परकारम तेळियागोट्सि वेहतोर. 5 “नना यापा सहरते पारतना कीसेक मनानेंके उंदि दर्सनम हूळतन. अद दर्सनमते, पेद्दा सेदरतसोंटा उंदि वस्तुन नालुं मूलां पीसि मब्बुनाल हिडु रेहानद हूळतन. अद हिड रेय्सि नना मत्तागेन वाता. 6 नना दान लोप्पो बेस हूळतस्के नाकु अव्टे बूमिपोर्रो मनना नालुं काल्कुना जिवरासीं, केडा जिवरासीं, बेंगना जीवरासीं आनि मब्बुने परियाना पिट्टें दिसतां. 7 अस्के नाकु, ‘पत्रु तेदा, अवुन हव्कीसि तिन,’ इंचि वेहताप उंदि अल्कीर केंजा वाता. 8 अस्के, ‘मन्नि सामि, मुसान नियम परकारम तिनुमा इत्तद आनि अपवित्रमातद नना बस्केन तिना हिल्लेन,’ इंचि इत्तन. 9 अदे अल्कीर मब्बुनाल रोंडोव मल्का, “पेन पवित्र कीतद बदे वस्तु आयि, निमे दान अपवित्र इंचि इनुमा,’ इंचि केंजा वाता. 10 इल्हा मूंड मल्कां आता. पजा अदुन मर्रा पोर्रोड्क तेहाकुंचि मब्बुनहेके ओयमड़ जर्गुता.
11 अस्केने नाकुन केयसि ओयालय कैसरियाताल वाता मुव्वुर मनकलोर नना मत्ता लोतागा वासि निल्तुर. 12 बतले अनमानम कियाकोंटा ओरतोनि पेय्सि होन. इंचि पेंदा आत्मा नाकु वेहता. आनि ईर हारुर विस्वासि दादालोरगुडा नावातोनि वातुर. मोमोट अंटोरम माकुन केया वेहता मनकना लोते होळियतोम. 13 आ मनकल माकु वेहतद बतल इत्ते, ओर उंदि पेंदा दूतातुन ओना लोते नितिस वळकातदुन हूळतोर. आ पेंदा दूता, ‘यापाते मनकलोर्कुन लोहचि पत्रु इनना सिमोनुन केयकुन. 14 ओर नीकु आनि नीवा लोतोर्कगुडा मुक्ति बल्हा दोर्कंता, अदुन बारेमते वेहांतोर’ इंचि वेहता.
15 नना वळकमड़ सुरु कीतारित्ते पवित्र आत्मा मुन्ने मनापोर्रो बल्हा रेय्तानो अल्हेन ओरापोर्रो इंका रेय्ता. 16 अस्के नाकु, ‘योहान एततोनि बापतिस्मा हीतोर, गानि मीकु पवित्र आत्माते बापतिस्मा हियमड़ जर्गंता.’ इंचि सामि इत्ता आ पोल्ले मति वाता.c 17 येसु किरिस्तुन मनम सामि इंचि विस्वासम कीतास्के मनाकु हीता वरमे ओर्कु इंका हीता. अय्ते पेंदुक अड्डम तिरियानोन नना बोन आंदुन?”
18 ई पोल्लें केंजसि सपुडदाका आतुर. आनि ‘पेन वेरे जातितोर्कगुडा पिसवर दोर्किच्कुननाहाटीं मनसु मार्सकुनना वरम हीता,’ इंचि पेंदा स्तुति कीतुर.
सिरिया एरियाता अंताकिया सहरते पेंदा बेसता पोल्ले एवंता
19 स्टिपन हासोत्ता पज्जो वेल्लेन कस्टाल्क वातां, अदुनहाटीं लोकुल्क सिल्लर आसि हिके-हेके पायसि होत्तुर. आ लोकुल्कु पिनिके, साइप्रस, अंताकिया इनना सहरकुने होंचि अगा सिराप यहुदिल्कुंके पेंदा बेसता पोल्ले वेहचेके मत्तुर. 20 ई विस्वासुल्कुनाले इच्चुर विस्वासुल्क साइप्रस आनि कुरेने इनना सहरतोर मत्तुर. ओर अंताकियाकु होंचि येसु सामिना बेसता कबुर युनानि लोकुल्कुंक इंका वेहतुर. 21 सामिना ताकत ओरतोनि मत्ता इंचि वेल्लेटुर लोकुल्कु विस्वास कीसि सामिनहेके तिरियतुर.
22 बस्के अय्ते ई कबुर येरूसलेमता चर्चुतोर्क तेळियता, अस्के ओर बरनाबासुन अंताकियाकु लोहतुर. 23 ओर अगा होंचि अगाटा लोकुल्कुनपोर्रो पेंदा दयाd हूळसि इरगा कूस आतोर, आनि सामिनतोनि बस्केळताहाटीं पूरा मनसुनाल बेस विस्वासमते नितिस मनना, इंचि ओर्क अंटोर्क दैर्यनेम हीतोर. 24 ओर बेस मनकल मत्तोर, अचोने आयका विस्वासम आनि पवित्र आत्माते निंडिस मत्तोर. इल्हा वेल्लेन मंदि सामिन नम्मिसि विस्वासुल्क आतुर.
25 पजा बरनाबास साऊलुन पहकालय तरसुस इनना सहर होत्तोर. 26 अगा ओन दोर्किच्कुंचि अंताकियाकु पीसि वातोर. अगा ओर इव्वुर अगाटा चर्चुतोर्क कलियसेके, वेल्लेन लोकुल्कुंक कराहसेके मत्तुर. इल्हा ओर इव्वुर उंदि एडादिमेड अंताकियातेन मत्तुर. अय्ते मोट्टा मोदाला सिस्युल्कुन “क्रिस्चनe” इंचि इन्मड़ ई अंताकियातेन जर्गुता.
27 अवे तूकुल्कुने इच्चुर पेंदा कबुरतोर येरूसलेमताल अंताकियाक वातुर. 28 ओराव्टे वरोर अगबुस पोर्रोलतोर मत्तोर. ओर पवित्र आत्माते निंडसि, ‘पूरा दुनियाते उंदि पेद्दा कर्वु अरानद मंता,’ इंचि वेहतोर. आनि इदु कर्वु कलादियुस इनना राजाना कालमते अर्सि मत्ता. 29 अस्के अंताकियाते मत्ता अंटोर सिस्युल्क ओरा ताकतनुसार यहुदियाते मनना विस्वासुल्कुंक सहायमहाटीं बतलन्ना लोहना इंचि निरनायम एतुतुर. 30 ओरा निरनायमनुसार सहायम कोसम जमा कीता सोम्मुन ओर बरनाबास आनि साऊलना कय्दे यहुदियाते मनना पेद्दाल्कुनहेके लोहचितुर.