पत्रु आनि कुरनेलियुस
10
1 कैसरिया सहरते कुरनेलियुस पोर्रोलतोर वरोर मनकल मनुंदुर. ओर इटली इनना पोलिस दलमते नूर मिल्ट्री पोलिसुल्कुन पोर्रो दरोगाल मत्तोर. 2 कुरनेलियुस बेस नितिमंतुड मत्तोर. ओर आनि ओना लोतोरगुडा पेंदुक वेरियुंदुर. ओर गरीब लोकुल्कुंक वेल्ले सहायम कियुंदुर आनि बस्केडकु पेंदुक पारतना कीसेके मनुंदुर. 3 ओर उंदि रोज पियल मूंड एगना पारतना कियनेंके दर्सनमते उंदि पेंदा दूता ओनागा निजम वासि, “कुरनेलियुस!” इंचि ओन केयताप हूळतोर.4 अस्के कुरनेलियुस वेर-वेरियसेके पेंदा दूताहेके हूळसि, “नीकु बतल गावाले वेहा,” इंचि इत्तोर. अस्के पेंदा दूता ओनतोनि, “नीवा पारतनां पेन केंजता आनि गरिबोर्कुंक निमे कियना सहायमतुन पेन हूळता. 5 निमे इंदके इच्चुर मनकलोर्कुन यापा सहर लोहचि सिमोन पोर्रोलता मनकन(ईन पत्रुगुडा इंतुर)निहगा केया. 6 ओर सिमोन इनना वरोर तोलकुन कबळ कियानोन लोन मंचंतोर. ओना लोन समुद्रम ओड्डुंक मंता.” इंचि इत्ता. 7 इल्हा ओनतोनि वळकसेके मत्ता पेंदा दूता अगटाल होत्ता होनमड़े, कुरनेलियुस ओना लोन कबळ कियाना जीतागाह्कुनाल इव्वुर जीतागाह्कुन आनि पेंदुक वेरियानोर इंका ओन्कु बेस सेवा कियना वरोर पोलिसुन, इल्हा मुव्वुर्कुन केयतोर. 8 पजा अगा बतल अय्ते जरुगुतनो, अद पूरा वेहचि ओर्कुन यापा सहरकु लोहचितोर.
पत्रु पेनदा दर्सनम हूळतोर
9 इंकुंदी रोजु ओर यापा सहर दग्गेरे एवतस्के पिय्यट वेलाकु पारतनाहाटीं पत्रु मिद्देपोर्रो होत्तोर. 10 अस्के ओन्कु कर्वेसि मत्ताहेंका बतलन्ना तिनकन बारे इंचि अन्पिस्ता. गाटो वेसेकेन मत्ता अच्चोटेने ओर उंदि दर्सनम हूळतोर. 11 अद दर्सनमते, मब्बु बय्यर आसी, पोर्रोटाल बतलो उंदि वस्तु हिडु वायनद ओर हूळतोर. अद उंदि पेद्दा सेदरलेह्का मंता. दान नालू मूलां पीसि हिडु रेयताप ओर हूळतोर. 12 अव्टे नालुं काल्कु मत्ता अन्नि तीरुकुना जिवरासीं, बेंगाना जीव-जंतुल्कु आनि मब्बुने परियना पिट्टें मत्तां.
13 अस्के पत्रुंक उंदि अल्कीर, “पत्रु, तेदा! अवुन हव्किस तिन,” इंचि केंजा वाता. 14 अस्के पत्रु, “मन्नि सामि, नना नावा पिसवरते बस्केन मुसान नियम परकारम तिनुमा इत्तद आनि अपवित्रमातद तिंडि बस्केन तिना हिल्लेन,” इंचि इत्तोर.a
15 पजा अद अल्किर, “पेन पवित्र कीतद बतले वस्तु आयि, दान अपवित्र इंचि इनुमा,” इल्हा रोंडो मल्का ओन्कु केंजा वाता. 16 इल्हा मूंड मल्कां जर्गुता. पजा अद सेद्दरतसोंटा वस्तु बिराने पोर्रोड्क मब्बुनहेके तिरियसि होत्ता.
17-18 पत्रु आ हूळता दर्सनमता अर्तम बतल आयावच्चु इंचि विचारम किसेकेन मत्तोर, अद हुळा! कुरनेलियुस लोहता मनकलोर सिमोनुना गुयमाकुल्कुनगा वासि, “पत्रु इनानोर इदे लोते मंचंतोरा?” इंचि पूसकीतुर. 19 पत्रु इंका अदे दर्सनमता बारेमते विचारम कीसेके मत्तोर. अच्चोटेन पेंदा आत्मा ओनातोनि, “हूळा, मुव्वुर मनकलोर नीकुन पहकसंतुर. 20 अय्ते तेदा आनि हिडु रेय्सि मनसुने बतले अनमानम इर्राकोंटा ओरतोनि होन्नु. ओर्कुन ननाने लोहतन,” इंचि इत्ता.
21 अस्के पत्रु हिडु रेय्सि ओरागा होत्तोर, आनि, “मिमेट बोन अय्ते पहकसंतिरो ओर ननाने आंदुन. अय्ते मिमेट हीके बारिंक वातिर?” इंचि पूसकीतोर.
22 अस्के आ मनकलोर, “माकुन उंदि पोलिस दलमता दरोगाल कुरनेलियुस इनानोर लोहतोर. ओर बेस नितिमंतुड आनि पेंदुक वेरियसि ताकाना मनकल आंदुर. यहुदि जातिता लोकुल्कुने ओर बेस पोर्रोल होत्तोर. नीकुन ओना लोन केया वेहासि, निहेंदाल ओन्कु पोल्लें वेहालय उंदि पवित्र पेंदा दूता ओन्कु वेहता,” इंचि इत्तुर. 23 पजा पत्रु ओर्कुन लोप्पो केयसि ओर्कुन हेडमितोरलेह्का हूळकुत्तोर. इल्हा इंकुंदी रोजु तयार आसि ओरतोनि होत्तोर. होन्नेंके यापा सहरता इच्चुर विस्वासि दादालोरगुडा ओनतोनि होत्तुर. 24 इंकुंदी रोजु ओर अंटोर कैसरिया सहरते एवतुर. अगा कुरनेलियुस ओना जीवातोर्कुन आनि दग्गेटा दंटातोर्कुन केयसि ओना एदुर हूळसेके मत्तोर. 25 पत्रु लोप्पो होळियतोर अस्के कुरनेलियुस ओना काल्कुनपोर्रो अर्सि ओना काल्कु मोळकुतोर. 26 गानि पत्रु ओन तेहचेके, “अरेरे! नित्ता, नना इंका नीवासोंटा वरोन मनकाने आंदुन, पेंदुन आयोन,” इंचि इत्तोर.
कुरनेलियुस दरोगान लोन पत्रु
27 पजा पत्रु कुरनेलियुसुनतोनि वळकसेके-वळकसेके लोप्पो होत्तोर. अस्के अगा ओर वेल्लेने मंदि जमा आसि मत्तद हूळतोर. 28 हूळसि पत्रु ओर्कुन, “मीकु उंदि पोल्ले अय्ते एरपाटे, अद बतल इत्ते, यहुदि मनकल वेरे जातिता मनकनगा होनमड़, ओनातोनि बेसता संबंदम इरमड़ यहुदि रीति-रिवाजकुने बेस आयो. गानि पेन मात्रम नाकु हुपिस्ता गदा, नना बोने मनकन पास्का मन्नि आनि बोने अपवित्र इना मन्नि. 29 अदुनहाटीं नाकुन मिमेट केयतस्के नना बतले विचारम कियाकोंटा मीतोनि पेय्सि वातन. अय्ते मिमेट नाकुन बारी केयतिर नाकु वेहाट,” इंचि इत्तोर.
30 ओर अल्हा पूसकीतादान्कु कुरनेलियुस, “मूंड रोजकु मुन्नेb इदे वेलाकु पियल मूंड एगानेंके नना नावा लोनु पारतना कीसेके मत्तन, अस्के उंदेदम तलातला मेरसना कपडीने वरोर मनकल नावा मुन्ने वासि नित्तुतोर. 31 आनि, ‘कुरनेलियुस, नीवा पारतना पेन केंजता आनि गरीबोर्कुंक निमे कियना सहायमतुन पेन हूळता. 32 अदुनहाटीं यापाते बोनना लोहचि पत्रुन केया लोहा. ओर समुद्रम ओड्डुनगा सिमोन इनना तोलकुन कबळ कियानोन लोन आगसि मंतोर,’ इंचि इत्तोर. 33 अदुनहाटीं नना बिराना नीकुन केया लोहतन, आनि निमे इगे वासि बच्चोरो बेस आता. इंदके नीकु पेन बतल वेहतानो अव अन्नि केंजालय मोमोट अंटोरम इगे पेंदा मुन्ने जमा आतोम,” इंचि वेहतोर.
पत्रुना बासन
34 अस्के पत्रु वळकमड़ सुरु कीतोर. ओर इत्तोर, “इंदके नाकु निजम तेळियता गदा पेन हरेक मनकन उंदेतीर हूळंता. 35 गानि वेरे जातितोर बोरन्ना मनकल आयिर ओर पेंदुक वेरियसि, पेंदा हर्दे ताकानय्ते पेन ओनपोर्रो कूस मनंता. 36 येसु किरिस्तु अंटोरा सामि आंदुर. ओनहेंदाल पेन दाना सांतिता बेसता कबुर इस्राएलता लोकुल्कुंक हीता, अद कबुर इदे आंदु. 37 बापतिस्माता बारेमते योहानना वेहमड़ सुरु कीता पज्जो, गलिलते उंदि गटना सुरु आता. इद गटनाता बारेमते पूरा यहुदियांता पैलांचता संगति मीकु एरपाटे मंता. 38 नासरेत नाटेना येसुन पेन पवित्र आत्मातोनि अबिसेकम कीसिc अद्बूतामाता ताकत हीता. पेन ओनतोनि मत्ताहेंका, ओर अंटोरहाटीं बेसता कबाह्क कियुंदुर आनि देय्याल्कुना मुक्याना कय्दा हिडु मत्तोर्कुन बेस कीसेके तिरियुंदुर, इद मीकु एरके. 39 येरूसलेम, यहुदिया देसेमते ओर कीता अन्नि कबाह्कुन मोमोट प्रेरितुल्कुम, कळकुने हूळतोम. इंका ओर ओन क्रुसुनपोर्रो वेलाड वाटसि हव्कतुर. 40 गानि पेन मात्रम ओन मूंड रोजकुने मर्रा जीवाते तेहता आनि दिसनाल कीता. 41 अंटोर लोकुल्कु ओन हूळा हिल्लुर. गानि पेन माकुन मुन्नेन गवाइदारकु इंचि पेर्कुत्ता. अदुनहाटीं मोमोटे ओन हूळतोम. ओर हासि तेदतारित्ते मोमोट ओनातोनि कलियसि तित्तोम, उट्टोम. 42 जीवाते मत्तोर्कुंक आनि हासोत्तोर्कुंक न्यायम कियानोर इंचि पेन ईने पेर्कुत्ता. इदुना बारेमते लोकुल्कुंक बेसता पोल्लें कराहना आनि गवाइ वेहना इंचि ओरे माकु आदेस हीतोर. 43 येसुनपोर्रो विस्वासम इर्रना हरेक मनकंक येसुना पोर्रोलते पापाल्क मापि आंतां, इंचि अंटोर पेंदा कबुरतोर्क गवाइ हीसि मत्तुर.”
वेरे जातितोर पोर्रो पवित्र आत्मा रेय्ता
44 पत्रुना वळकमड़ सुरु मनेंकेने पेंदा बेसता पोल्लें केंजचेक मत्तुरा अंटोरपोर्रो पवित्र आत्मा रेयता. 45 पवित्र आत्माता वरम वेरे जातितोर पोर्रो इंका वळियतदुन हूळसि पत्रुनतोनि वाता यहुदि विस्वासुल्कुंक इचंत्रम आता. 46-47 ओर अंटोर्कुन ओर्कु तेळियवा बासाने पेंदा स्तुति कीतद केंजतुर. अस्के पत्रु, “मनाकु दोर्कुताप इर्कगुडा पवित्र आत्मा दोर्कुता. ईर एते बापतिस्मा एता मन्नि इंचि बोरन्ना अड्डम वळकानोर मंतुरा?” इंचि इत्तोर. 48 इल्हा पत्रु, येसु किरिस्तुना पोर्रोलते ओर्कु बापतिस्मा हियना इंचि आदेस हीतोर. इदंता आता पज्जो कोन्नि रोजकु पत्रु ओरतोनि मननाहाटीं अंटोर कलियसि पत्रुंक विनंति कीतुर.