साऊलना मनसु मारियमड
9
1 अदे वेलाते साऊल सामिन पोर्रो विस्वासम कियानोर्कुन हव्कंतन इंचि बेदरिचेक मत्तोर. इंका ओर पेद्दा पेर्मानगा होत्तोर. 2 होंचि दमिस्क सहरते मनना दर्मसास्त्रम कराहना लोहकुनाल बोरन्ना सामि वेहता हर्रि पीसि ताकाना, मुरतड आयि मांडसा आयि दोर्कुते, ओर्कुन दोहाचि येरूसलेमते वापस तायाना अदिकारमता सिट्टि राससि हीम इंचि इत्तोर.3 इल्हा ओर दमिस्क एरियाक दगेर एवतोर. अस्के उंदेदम मब्बुनाल ओना सुट्टु उंदि वेलगु जग्गरा मेर्सता. 4 अल्हा आता आयमड़ ओर बूमिपोर्रो अर्तोर. पजा ओन्कु उंदि अल्कीर, “साऊल, साऊल निमे नाकुन बारी तकलिप कीसंतिन?” इंचि इत्ताप केंजा वाता.
5 अस्के साऊल, “सामि! निमे बोन आंदिन?” इंचि पूसकीतोर. अस्के “निमे बोन अय्ते तकलिप कीसंतिनो नना आ येसुन आंदुन. 6 निमे इंदके तेदसि सहरतेके होन. निमे बतल कियमड़ो अद नीकु अगा वेहमड़ जर्गंता.” इंचि इत्तोर.
7 ओनातोनि होंचेके मत्ता मनकलोर्कु अल्किर अय्ते केंजतुर, गानि ओर्क अगा बोरे दिस्सा हिल्लुर. अदुनहाटीं ओर मूकालोरलेसीं वळकाकोंटा अल्हे नितिस मत्तुर. 8 अस्के साऊल बूमि पोर्रोटाल तेदसि कड़कु उस्मिसी हूळते अगा ओन्कु बतले दिसा हिल्ले. पजा ओनातोनि मत्तोर ओना कय पीसि दमिस्कते ताकिच्चेके ओतुर. 9 मूंड रोजकुनदाका ओर गुड्डोनलेह्का आसि मत्तोर. अचोने आयका ओर बतल तिन्ना हिल्लोर उन्ना हिल्लोर.
10 दमिस्कते हनन्याल इनना पोर्रोल्तोर वरोर सिस्युड मत्तोर. सामि ओन्कु दर्सनम हीसि, “हनन्या!” इंचि केयतोर. अस्के ओर, “हां सामि,” इंचि इत्तोर. 11 अस्के सामि ओनतोन, “तेदा आनि ‘सवरगा’ इनना पोर्रोलता हरदुक होन. अगा यहुदियाना लोन मंता. ओना लोन तरसुस सहरताल वाता साऊल इनना वरोर मनकल मंतोर. अगा ओना बारेमते पूस कीम. ओर इंदके पारतना कीसेके मंतोर. 12 साऊल दर्सनमते, ‘हनन्या इनना मनकल ओनागा वासि ओन्कु मर्रा कळ्क दिसगोम इंचि ओनपोर्रो कय तासताप हूळतोर,’ इंचि इत्तोर.
13 अस्के हनन्याल, “सामि, ई मनकल येरूसलेमते मनना नीवा पवित्र लोकुल्कुन बच्चोनो तकलिप कीता संगति नना वेल्लेन लोकुल्कुना तोड़दाल केंजतन. 14 आनि इगेगुडा नीवा पोर्रोल एताना हरेक विस्वासिन दोहाचि ओयना अदिकारम, पेद्दा पेर्मालोर्कुन हेंदाल एतकुंचि वातोर.” इंचि वेहतोर.
15 अस्के सामि ओन, “नावा पोर्रोल्तुन वेरे जातितोरा नड्डुम, राजालोर मुन्ने आनि इस्राएलता लोकुल्कुन मुन्ने वेहनाहाटीं नना ईन नावा अस्त्रम इंचि पेर्कुत्तन, अदुनहाटीं निमे होन. 16 नावा पोर्रोल एतानाहाटीं ओन्कु बच्चोर कस्टाल्क अरापींतानो नना कुद ओन्कु हुप्सांतन,” इंचि इत्तोर.
17 अस्के हनन्याल अगटाल पेय्सि साऊल बद लोते मत्तोरो अद लोन होत्तोर आनि ओना पोर्रो कय इर्सि, “साऊल दादा, निमे हर्री पीसि वायानेंके नीकु दिसतोर हूळा! आ येसु सामिए नीकु मर्रा कळकु दिसगोम आनि निमे पवित्र आत्माते पुरागा निंडिस होनगोम इंचि नाकुन लोहतोर,” इल्हा वेहतोर.
18 अस्केने ओना कळ्कुनाल बतलो पोर्रानसंटव रालतां, आनि ओर हूळालय दल्गुतोर. पजा तेदसि बापतिस्मा एतुतोर. 19 आनि गाटो तित्तोर अस्के ओन्कु ताकत वाता. इल्हा ओर कोन्नि रोजकु दमिस्कते मत्ता सिस्युल्कुनतोनि अग्गेन मत्तोर.
साऊल दमिस्कते येसुना बारेमते वेहांतोर
20 पजा ओर आल्सेम कियाकोंटा, “येसे पेंदा मर्रि,” इंचेके यहुदि लोकुल्कुना दर्मसास्त्रम कराहना लोह्कुने होंचि येसुना बारेमते वेहालय सुरु कीतोर. 21 अगा ओना पोल्लें केंजतोर अंटोर इचंत्रमते अर्सि, “येरूसलेमते येसुन नम्मुतोर्कुन दोर्का पीसि ओर्कुन हव्कुता मनकल ईरे आयोरा? इंका इगेगुडा येसुन नम्मुतोर्कुन पीसि दोहाचि वाटसि पेद्दा पेर्मालोर्कुन मुन्ने ओयाना विचारमते वातोर गदा!” इंचि इनालय दल्गुतुर. 22 गानि साऊलना कराहना तेल्वि मात्रम रोज-रोज बेरसेकेन होत्ता. अदुनहाटीं दमिस्कते मनना यहुदिल्कुन, ‘येसु सामिए किरिस्तु’ आंदुर, इंचि रुजुव कीसि ओर्कुन वळकाकोंटा कियुंदुर.
साऊलुन हव्कना पिलान
23 इल्हा वेल्लेने रोजकु आतारित्ते यहुदिल्क साऊलुन हव्कना उपायम कीतुर. 24 गानि यहुदिल्कु ओन हव्कालय नर्का-पियल सहरता गेटकुनगा पोंचादोसि मनना संगति साऊलुंकु तेळियसि होत्ता. 25 अस्के साऊलना सिस्युल्क नर्कटा वेलाते ओन उंदि तट्टाते उपिच्चि सहरता सुट्टु मत्ता गूरे पोर्रोटाल वेलाड वाटसि हिडु रेहतुर.
येरूसलेमते साऊल
26 साऊल येरूसलेमते वातंका सिस्युल्कुनतोनि कलियसि मनालय हूळतोर. गानि सिस्युल्क मात्रम ईर निजम सिस्युड आदुंरो आयोरो, इंचि वेरियुंदुर. 27 गानि बरनाबास मात्रम साऊलुन पीसि प्रेरितुल्कुनहेके वातोर, आनि साऊल वायनेंके हर्दे येसु सामिन बल्हा हूळतोर, येसु सामि ओनातोनि बल्हा वळकुतोर आनि दमिस्कते ओर येसु सामिना पोर्रोलता बारेमते बल्हा वेरियाकोंटा वेहतोर, इव अन्नि पोल्लें ओर्कु वेहतोर. 28 इल्हा साऊल ओरतोनि कलियसि-मेलियसि मनुंदुर आनि वेरियाकोंटा येसु सामिना पोर्रोलता बारेमते वेहसेके येरूसलेमते तिरियुंदुर. 29 ओर युनानि बासा वळकना यहुदिल्कुनतोनि सामिना बारेमते वळ्कुंदुर, चर्चा कियुंदुर. गानि ओर मात्रम ओन हव्कालय हूळतुर. 30 बस्के अय्ते इद संगति विस्वासि दादालोर्कुंक तेळियतानो अस्के ओर ओन मुन्ने कैसरिया ओतुर आनि अगटाल ओना पुटता सहर तरसुसते लोहचितुर. 31 इल्हा यहुदिया, गलिल आनि सामरियाता चर्चुकनोर्कुंक कोनि रोजकु सांति मत्ता. आ चर्चुकनोर सामिंकु वेरियसि बेस बक्तितोनि पिसुंदुर, आनि पवित्र आत्मागुडा ओर्कु बेस प्रोत्साहन हिय्युंदु. अदुनहाटीं ओर बेस ताकतवान आतुर. इल्हा ओर वेल्लेन मंदि आसेक होत्तुर.
32 पजा पत्रु देसेमंता तिरियसेक-तिरियसेक लुद्दा इनना सहरते मनना पवित्र लोकुल्कुनगा होत्तोर. 33 अगा ओर, लकवा बिमार आसि एनमिदि वर्सानाल कटुल पीसि मत्ता आनियासु पोर्रोलता वरोर मनकंक कलियतोर. 34 अस्के पत्रु ओन, “आनियासु, येसु किरिस्तु नीकुन बेस कींतोर, निमे तेदसि नीवा कटुल्तुन हद्रा,” इंचि इत्तोर. अस्केटद अस्केन आ मनकल तेदतोर. 35 अस्के लुद्दा आनि सारोन सहरकुने मनना वेल्लेन लोकुल्कु आनियासुन हूळसि सामिनहेके तिरिय्तुर.
हासोत्ता मुरतड्कु पत्रु जीवा अरहांतोर
36 यापा सहरते उंदि विस्वासि मुरतड मनुंदु, दाना पोर्रोल तबिता. ‘तबिता’ इत्ते युनानि बासाते ‘दोरकस’ इत्ते तलुर दुप्पी इंचि अर्तम. अद मुरतड़ बस्केडक बेसता कबाह्क कीसेके आनि गरिबोर्कुंक दान-दर्मम कीसेके मनुंदु. 37 पत्रु लुद्दा सहरते मत्ता रोजकुनेन अद बीमार अर्सि हासोत्ता. अस्के दाना पीनगुंकु एर दोस्सि मिद्देता पोर्रोटा अर्राते इरतुर. 38 लुद्दा नार यापा सहरकु दग्गेरेने मत्ता. अय्ते पत्रु अगा मंतोर इत्ता संगति सिस्युल्कुंक तेळियतस्के इव्वुर मनकलोर्कुन ओनागा लोहचि, आलसेम कियाकोंटा ओरहेके वायालय विनंति कीतुर.
39 अस्के पत्रु बिराना तयार आसि ओरतोनि होत्तोर. ओर अगा एव्ता-एव्वुडे ओन मिद्दे पोर्रोटा अर्राते ओतुर. अगा ओर होत्तास्के अगा मत्ता मुंडामोस्ता मुरताह्क, दोरकस अवुनतोनि मननेंके कुटुता अंगिं आनि कपडिं पत्रुंकु हूपिच्चेके ओन सुट्टु आसि अळालय दल्गुतां. 40 गानि पत्रु अवुन अंटोर्कुन पलाते लोहचि टोंगरां उहासि पारतना कीतोर. पजा पीनगुनहेके तिरियसि, “तबिता, तेदा!” इंचि इत्तोर. अस्के अद हूळता आनि पत्रुन हूळसि तेदिस उदुता. 41 पजा अद दाना काल्कुनपोर्रो नित्तालय कय हीसि सहायम कीतोर आनि पवित्र लोकुल्कुन, मुंडामोस्ता मुरताह्कुन केयसि जीवाते मत्ता तबितान ओर्कु हूपिस्तोर. 42 ई संगति पूरा यापा सहर अंता तेळियसोत्ता, आनि वेल्ले लोकुल्कु सामिन नम्मुकुत्तुर. 43 आयंका पत्रु यापा सहरतेन सिमोन इनना वरोर तोलकुन कबळ कियानोनगा वेल्लेन रोजकु आगतोर.