विस्वासुल्कुंक कस्टाल्क वांता
8
1 अवे रोजुकुनाल येरूसलेमता चर्चुतोर पोर्रो पेद्दा कस्टाल्क वायालय सुरु आता. प्रेरितुल्कुन होळसि कडमतोर अंटोर विस्वासि लोकुल्कु यहुदिया, सामरिया एरियाता नाहकुने बेकेटोर हेके सिलर-सिलर आतुर. 2 बोरो इच्चुर विस्वासुल्क स्टिपनुन गति कीसि ओनाहाटीं वेल्ले दुक्कमते मत्तुर. 3 साऊल बारे चर्चुतोर्कुन तकलिब हियमड सुरु कीतोर. आनि ओर लोन-लोन होंचि मुरताह्क इनाका मांडसा इनाका अंटोर्कुन इग्गिसि ओसि जेलने वाटालय दल्गुतोर. 4 गानि सिलर-सिलर आसि होत्ता विस्वासि लोकुल्कु मात्रम बगा-बगा अय्ते होत्तुरो अगा-अगा ओर लोकुल्कुंक पेंदा बेसता कबुर वेहुंदुर.पिलिपुस सामरियाते होंचि येसुना बारेमते वेहांतोर
5 पिलिपुस सामरिया सहरते होंचि अगाटा लोकुल्कुंक किरिस्तुaना बारेमते वेहामड़ सुरु कीतोर. 6 पिलिपुस कीता चमत्काराल्कुन हूळसि लोकुल्कु ओर वेहाना पोल्लेन मनसु ताससि केंजतुर. 7 वेल्लेन मंदिक देय्याल्क पीसि मत्तां, आ देय्याल्क इंका इरगा मोत्कुंचेके पलातुक पेय्सि विततां. अचोने आयका अगा वेल्लेन मंदि कुंटोर्क आनि कय-काल्क अरसोनना रोगमतोर इंका मत्तुर, ओर अंटोरगुडा बेस आतुर. 8 अदुनहाटीं अद सहरते आनंदमे आनंदम मत्ता.
9 अद नाटे सिमोन पोर्रोल्तोर वरोर मनकल मनुंदुर. ओर होदें-मंत्राल्कुना बलमते इचंत्रमाता कबाह्क कीसि, ‘नाके एक्को तेळियंता’ इंचि वेहकुंचेके सामरिया सहरता लोकुल्कुन इचंत्रमते अरहुंदुर. 10 सिन्नाल्कु, पेद्दाल्क अंटोर, “पेंदा पेद्दा ताकत इत्ते ईरे आंदुर,” इन्कुनुंदुर आनि ओना पोल्लें केव्वु ताससि केंजुंदुर. 11 बारित्ते ओर वेल्ले रोजकुनाल ओना मंत्राल्कुना बलमते लोकुल्कुन अंटोर्कुन इचंत्रमते अरहचि मत्तोर. दानहाटींगे लोकुल्कु ओर बतल वेहिना दान नम्मुंदुर. 12 गानि पेंदा राज्येम आनि येसु किरिस्तुना पोर्रोलता बारेमते पिलिपुस वेहता बेसता कबुर केंजसि मुरताहकु-मांडसा नम्मिसि बापतिस्मागुडा एतुतुर. 13 कुद सिमोन इंका नम्मुतोर आनि बापतिस्मा एतुतोर. इल्हा ओर पिलिपुस बेके होत्ते हेके होंचेके ओनतोने मनालय दल्गुतोर. पजा पिलिपुस कियना चमत्काराल्क आनि अद्बुताल्कुन हूळसि इचंत्रमते अर्रुंदुर.
सामरिया सहरते पत्रु आनि योहान
14 सामरिया एरियाता लोकुल्कु पेंदा पोल्लेन स्विकार कीतुर इंचि बस्के अय्ते येरूसलेमते प्रेरितुल्कुंक तेळियतानो अस्के ओर पत्रुन आनि योहानुन सामरिया एरियाकु लोहचीतुर. 15 पजा ओर अगा वासि अगाटोर्कुंक पवित्र आत्मा दोर्कना इंचि पारतना कीतुर. 16 बारित्ते दीनकन्ना मुन्ने ओरा बोरापोरेन पवित्र आत्मा वाया हिल्ले. ओर्कु सिराप येसु सामिन पोर्रोलते बापतिस्मा दोर्कुता अचोने. 17-18 पजा पत्रु आनि योहान ओरापोर्रो कय इरता इर्रुडे ओर्कु पवित्र आत्मा दोर्कुता. इद संगतितुन सिमोन हूळतोर आनि प्रेरितुल्कुनगा होंचि, 19 “नना मीकु कोत्तां हींतन, गानि नना बोन पोर्रो अय्ते कय इरंतनो ओन्कु पवित्र आत्मा दोर्कागोट्टना ई सक्तितुन नाकुगुडा हीम्टु,” इंचि इत्तोर.
20 अस्के पत्रु ओन, “निमे कोत्ताने पेंदा वरमतुन अस्सा परांतन इंचि इन्कुत्तिन. अदुनहाटीं नीवा कोत्तां नितोने नासडेम आंतां. 21 पेंदा नदरते नीवा विचारम बेसतद आयो, इंचि ई सेवा कबाह्कुने नीकु पोत्तु हिल्ले, पालु हिल्ले. 22 निमे कराब विचाराल्क कियमड़ होळसिसि मनसु मार्सकुंचि पेंदुक पारतना कीम. अस्के नीवा असोंटा विचाराल्कुनहाटीं नीकु मापि दोर्का पर्रार. 23 नना नीकुन बेस हूळसंतन, नीवा लोप्पो वेल्लेन विसम निंडिस मंता आनि निमे पुरागा तप्पुड कबाह्कुनतोनि दोहाचि मंतिन,” इंचि इत्तोर.
24 अस्के सिमोन, “मिमेट इत्तद बद्दे पोल्लेना पोर्रो वायामन्नि इंचि मिमेट सामिंक नाहाटीं पारतना कींम्टु,” इंचि इत्तोर.
25 पजा पत्रु आनि योहान सामिना बारेमते बतल अय्ते केंजतुर, हूळतुर अदुना गवाइ हीतुर आनि सामि वेहता पोल्लेन वेहाचि येरूसलेम मल्सि होनालय पेय्स्तुर. ओर होननेंके सामरिया नाहकुने वेल्लेन जेगाने पेंदा बेसता पोल्लें वेहचेके होत्तुर.
पिलिपुस आनि इतोपिया देसेमता मनकल
26 अस्के सामिनद उंदि पेंदा दूता पिलिपुसुंक वेहता गदा, “निमे तयार आसि, बद हर्री अय्ते येरूसलेमताल गाजा सहरतेके दांता, अदे हर्री पीसि दक्सिनतेके होन्नु, आ हर्री उस्के बूमिताल दांता.” 27-28 पजा ओर तयार आसि होत्तोर. होन्नेंके हर्दे ओन्कु इतोपिया देसेमतोर वरोर आड़िगुंल्ला मनकल कलियतोर. ओर इतोपिया देसेमता रानि कंदाकेनगा कोत्ताना लेक्का हूळाना पेद्दा अदिकारिनलेहका कबऴ कियुंदुर. आनि दाना पूरा कजाना ओना कय्दा हिडे मत्ता. ओर आरादानाbहाटीं येरूसलेम वासि, मल्सि होननेंके रतमते उदसि यसया इनना पेंदा कबुरतोना पुसताकोम हदविसेके मत्तोर. 29 अस्के पेंदा आत्मा पिलिपुसुंक, “निमे आ रतम दगेर्क होंचि दानतोनि ताका,” इंचि वेहता.
30 अस्के पिलिपुस वित्सि होंचि आ रतमतुन अंदकुत्तोर. आनि रतमते उदिस मनना मनकल यसयाल रासता पुसकोमतुन हदवानदुन हूळतोर. अस्के ओर आ मनकन, “निमे बतल अय्ते हदविसंतिनो अदुना अर्तम नीकु तेळियसेके मंतना?” इंचि पूसकीतोर.
31 अस्के आ मनकल, “इदुना अर्तम बतलो, बोरन्ना वेहुवद नाकु बल्हा तेळियंता?” इंचि इत्तोर. आनि पिलिपुसुन रतम पोर्रो एक्किस ओना पक्काते उद्दालय वेहतोर. 32 ओर आ पुसताकोमते बतल अय्ते हदविसेके मत्तोरो अद इल्हा मंता:
“हव्कालय ओयना गोर्रेतालेसिं ओन ओतुर,
गोर्रे दाना मेंदुल्ता बूरातुन कतरिचिनेंके बल्हा सपुडदाका मनंता, अल्हेने ओर इंका सपुडदाका मत्तोर, ओना तोडदाल उंदि पोल्लेगुडा पेय्सा हिल्ले.
33 ओना अपमानम कीसि ओनपोर्रो अन्यायम कीतुर, बूमिपोर्रोटाल ओना जीवातुन तेंडतुर, ओना वंसमतोर बोरे हिल्लुर.” c
34 अस्के आ आड़िगुंल्लोड पिलिपुसुन, “असलु ई कबुरतोर बोना बारेमते वेहचंतोर? ओना सतता बारेमतेना, हिलाकोंटे मरि इंका बोरन्ना वेरेतोना बारेमतेना? दया कीसि नाकु तेळियनाल वेहा,” इंचि इत्तोर.
35 अस्के पिलिपुस, आ मनकल हदवुसेके मत्ता वचनाल्कुनाल मोदोल पीसि, येसुना बेसता कबुरदाका अन्नि ओन्कु वेहतोर.
आड़िगुंल्ला मनकल बाप्तिस्मा एतांतोर
36 इल्हा हर्री पीसि होननेंके-होननेंके ओर उंदि एर मत्ता जेगातगा एव्तुर. अस्के एतुन हूळसि आ आड़िगुंल्ला मनकल, “हूळा! इगे एर मंता. इंदके नाकु बापतिस्मा एतालय बतलन्ना तकलिप मंतना?” इंचि इत्तोर. 37 d(“निमे गिंटा मनसुनाल पुरागा विस्वासम कियानय्ते बापतिस्मा एता परांतिन,” इंचि पिलिपुस वेहतस्के, ओर “हां, येसु सामिए पेंदा मर्रि आंदुर इंचि नना विस्वासम कींतन,” इंचि जवाब हीतोर.) 38 अस्के ओर रतमतुन आपालय वेहतोर. पजा पिलिपुस आनि आ आड़िगुंल्ला मनकल ईर इव्वुर एते रेयतुर. आनि पिलिपुस आ मनकंक बापतिस्मा हीतोर. 39 ओर एताल पलाते पेय्स्तस्के पिलिपुसुन सामिना आत्मा बेकेनो ओता. आनि आ आड़िगुंल्लोड ओन मर्रा बस्केने हूळा हिल्लोर. अय्ना आ आड़िगुंल्ला मनकल आनंदमते ओना हर्री पीसि ओर होत्तोर.
40 इल्हा पिलिपुस अजोतु इनना सहरते दिसतोर. पजा ओर होननेंके हर्री पीसि कलियता नाहकंता पेंदा बेसता कबुर वेहचेके कैसरिया सहरते एवतोर.