स्टिपनुना बासन
7
1 पजा पेद्दा पेर्माल, “इर वेहना पोल्लें निजमे ना?” इंचि स्टिपनुन पूसकीतोर. 2 अस्के स्टिपन ओर्कु इल्हा वेहालय दल्गुतोर, “नावा दादालोर आनि बाबानसोंटा पेद्दाल्कुनिटा! नना वेहनद केंजट. मना एनकटा पेदा मनकल अब्राहाम मात्रल मेसोपोटामिया देसेमतुन होळसि हारान इनना सहरते हेराका मुन्नेन पेन दाना महिमाते ओन्कु दिसता. 3 आनि दिस्सि, ‘निमे नीवा देसेम आनि नीवा जीवातोर्कुन होळसिस नना नीकु हुपिचना देसेमते होन,’ इंचि वेहता. 4 अस्के अब्राहाम कसदिल्कुना देसेम होळसि हारान एरियाते होंचि मनालय दल्गुतोर. ओना बाबाल हासोत्तांका पेन ओन अगटाल इंदके मिमेट मनना ई देसेमते लोहता. 5 अयना पेन इग्गे ओन्कु अळगुमेड बूमिगुडा हिय्या हिल्ले. गानि ओन्कु संतानम हिलुवा रोजकुनेगुडा पेन, ‘ई देसेमतुन, ई बूमितुन नीकु हींतन, आनि नीवा पजोटाल वायाना नीवा वंसमतोर्कुंक हींतन,’ इंचि ओन्कु पोल्ले हीता.6 अचोने आयका पेन ओनातोनि, ‘नीवा वंसमतोर वेरे देसेमते होंचि मनांतुर आनि अगाटा लोकुल्कु नीवा वंसमतोर्कुन नालुं नुहकुना वर्सांनदाका गुलामगिरीते इरसि, वेल्ले तकलिप हींतुर. 7 गानि बोरय्ते नि वंसमतोर्कुन गुलामगिरीते इर्रांतुरो ओर्कु नना सिक्सा हींतन, आनि पजा नीवा लोकुल्कु अगटाल पेय्सि वासि इद जेगाते नाकु पूजा कियानुर,’ इंचि वेहता.
8 पजा पेन अब्राहामुनतोनि “कतनाa” इनना उंदि करार कीता. अदुनहाटीं अब्राहामुंक इसहाक पुटतस्के ओर एनमिदि रोजकुनोर मनानेंकेन ओना कतना कीतोर. इल्हेन इसहाकुंक याकोब पुटतोर. पजा याकोबुंक पन्नेंडु मंदि मर्कु पुटतुर. ईरद अंटोरदगुडा कतना आता. इल्हा ई पन्नेंड मंदि मर्कुनाले मुन्ने इस्राएलता पन्नेंड वंसाल्कु तयार आतां. आनि ईरे ई पन्नेंड वंसाल्कुना मोदोल मनकलोर आतुर.
9 याकोबुना मर्कु ओराव्टेटाल योसेप इनानोन पोर्रो अळूंदुर. अदुनहाटीं ओर ओन इजिप्त देसेमते गुलामगिरी कियालय अमतुर, गानि ओना पेन ओन्क सायता मत्ता. 10 आनि ओन अन्नि कस्टाल्कुनाल दक्किस्ता. इंका पेन ओन्कु बेस बुद्दि हीता. पेन हीता बुद्दितोनि ओर इजिप्त देसेमता परोन राजाना मनसु गेल्स्कुत्तोर. पजा इजिप्त देसेमता परोन राजाल ओना देसेमपोर्रो आनि ओना राजवाडानपोर्रो अदिकारि इंचि इरतोर.
11 अचोटेने कनान आनि इजिप्त देसेमते पेद्दा करवु अर्सि लोकुल्कु इरगा कस्टाल्कुने अरतुर. इंका मना एनकटा पेद्दाल्कुंक तिनालय बतल दोर्काकोंटा आता. 12 इजिप्त देसेमते गाटो मंता इंचि तेळियतस्के याकोब मना एनकटा पेद्दाल्कुन अगा मोट्टा-मोदाट मल्का लोहचितोर. 13 ओर रोंडो मल्का होतस्के योसेप ओना बारेमते ओना दादालोर-तम्मुंक वेहतोर. आनि अस्केन परोन राजांकुगुडा योसेपना कानदानता बारेमते एरपाट आता. 14 अस्के योसेप ओना बाबाल याकोब आनि कानदानता अंटोर्कुन इत्ते पूरा डेब्बै हेय्युर मंदितुन इजिप्तते केया लोहतोर. 15 अस्के याकोब इजिप्त देसेमते होत्तोर. अगेने याकोब आनि मना अंटोर एनकटा पेद्दाल्क इंका हातुर. 16 पजा ओरा पीनगुल्कुन इस्राएल देसेमता सेकेम इनना सहर ओसी अगा हामोर इनना मनकना मर्कुनहेंदाल नगदी कोत्तां हीसि अब्राहाम उंदि बोंदा अस्सि मत्तोर, अदे बोंदाते ईरदगुडा गति कीतुर.
17 अब्राहामुंक पेन हीता पोल्ले पूरा आयना वेला दग्गेर्क एव्ता, अस्के इजिप्त देसेमते मना लोकुल्कु वेल्लेन आतुर. 18 कोनि रोजकु आतारित्ते योसेपुन बारेमते बतले एरपाट हिलुवा बोरो वरोर दुस्ट मनकल इजिप्त देसेमता राजाल आतोर. 19 ओर राजाल मना लोकुल्कुंक वेल्ले तकलिप हीतोर. मना लोकुल्कुना पिलाल्क पिसा मन्नि इंचि ओर्कुन पलाते पोहचियालय वेहतोर.
20 अदे कालमते मूसल पुटतोर. पेंदा नदरते आ पेडल बारां सक्कगा मत्तोर. आ पेडल मूंड नेल्क ओना बाबाना लोते मत्तोर. 21 पजा बस्के अय्ते आ पेडन ओना तलुर-बाबो पलाते होडसीतुरो अस्के परोन राजाना मिय्यड ओन तेहकुंचि ओता आनि दाना मर्रिनलेसिं पोस कीता. 22 मूसांक इजिप्त देसेमता बेसता विद्दे कराहमड़ जर्गुता. मूसल पोल्लेने आनि कबळते रोंडुने इंका बेस हुसार मत्तोर.
23 ओर नल्पै वर्सानोर आतोर अस्के ओना लोकुल्कुंक इत्ते इस्राएल लोकुल्कुंक होंचि कलियना मनसु आता. 24 पजा अगा होत्तस्के इस्राएल लोकुल्कुनाल वरोन मनकनपोर्रो इजिप्त देसेमता वरोर मनकल अन्यायम कियानद हूळतोर. आनि आ अन्यायम कियना इजिप्त मनकन हव्किसी आ इस्राएल मनकन कापाडसि ओना बदला एततोर. 25 इस्राएल लोकुल्कुन पिसागोटनाहाटीं पेन ओन वाडकुंचंता इत्ता संगतितुन ओना लोकुल्कु एरपाट कींतुर इंचि ओर इन्कुत्तोर, गानि अद ओर्क तेळिया हिल्ले. 26 इंकुंदी रोजु ओना लोकुल्कुनाले बोरो इव्वुर मनकलोर उर्रें अर्रनद हूळसि ओर्कुन कलपाना उद्देसमते, ‘अरे मिमेट बसंटा मनकलोर आंदिर? अन्नादमुल्क आसिगुडा, वरोंक वरोर उर्रें अरसंतिर!’ इंचि ओर्कुन इत्तोर. 27 अस्के ओना पक्कातोन तोनि उर्रें अर्सेक मत्ता मनकल मूसन पकाक दोब्बिसी, ‘माकुन जगडमताल पापसि, मावा न्यायम कियना अदिकारम नीकु बोर हीतोर? 28 निन्ने आ इजिप्त मनकन हव्कुताप, नाकुनगुडा हव्कंतन इन्कुंचंतिना?’ इंचि इत्तोर.
29 इद पोल्ले केंजसि मूसल इजिप्त देसेम होळसिसि मिदान देसेमते पेय्सि होत्तोर. अगा होंचि वरोर परदेसिbनलेसिं पिसालय दल्गुतोर. अगा होंचि मरमीं आतोर, अस्के ओन्कु इव्वुर मर्कु पुटतुर.
30 इल्हा नल्पै वर्सां आसि होत्तां. अय्ते उंदि रोजु मूसांकु सिनाई इनना गुट्टा दग्गेरे उस्के बूमिते पोत्तना पोदाता लोप्पो उंदि पेंदा दूता दिसता. 31 अदुन हूळसि मूसांक इचंत्रंम आता. दग्गेर्क होंचि बेस हूळकोम इंचि मुन्नेड्क अळगु वाटनपेडकु ओन्कु पेंदा अल्कीर केंजा वाता. 32 पेन मूसनतोनि, ‘नना नीवा एनकटोरा तादो-बाबुरा पेंदुन आंदुन, इत्ते नना अब्राहाम, इसाक आनि याकोबना पेंदुन आंदुन,’ इंचि वळ्कुतोर. अस्के मूसल इरगा वेरियकुत्तोर आनि ओन्कु तला तेहचि पोर्रोड्क हूळना हिम्मत आया हिल्ले. 33 अस्के पेन ओन, ‘निमे नितिस मनना जेगा पवित्र जेगा आंदु. नीवा काल्कुना हेरपुह्क तेंडा. 34 इजिप्त देसेमते मनना नावा लोकुल्कुना तकलिप नना हूळतन, ओरा अळमड नना केंजतन. इंचि ओर्कुन कस्टाल्कुनाल तेंडानहाटीं नना हिडु रेयतन. अय्ते वा! इंदके नना नीकुन मर्रा इजिप्त देसेमते लोहंतन.’ इंचि इत्ताc.
35 बा मूसन अय्ते इस्राएलता लोकुल्कु, ‘माकुन जगडमताल पापसि, मावा न्यायम कियना अदिकारम नीकु बोर हीतोर?’ इंचि हय्साकोंटा पकाक दोबसितुरो, आ मूसाने पेन पोत्ताना पोदाते दिसता पेंदा दूताता हेंदाल ओरा राज्येम कियानोर आनि पिसागोटनोर इंचि लोहता. 36 इल्हा मूसल, एर्रा समुद्रम आनि उस्के बूमिते नल्पै वर्सान दाका अद्बुतामाता कबाह्क कीसेक आनि चमत्काराल्क हुपिचेक आ लोकुल्कुन इजिप्त देसेमताल पलातुक पेचाहचि तत्तोर. 37 dईर, ओरे मूसाल आंदुर, बोरय्ते इस्राएल लोकुल्कुन, ‘पेन मीवाहाटीं मीवा संतम लोकुल्कुनाले वरोन नावासंटा पेंदा कबुरतोन लोहंता,’ इंचि इत्तोर. 38 मना इस्राएल लोकुल्कु उस्के बूमिते मत्तस्के ओरतोनि कलियसि मत्तोर ईरे मूसल आंदुर. इंका सिनाई गुट्टापोर्रो पेंदा दूतातोनि ईरे मूसल वळकुतोर. अचोने आयका पेन दाना पिसवर हियना पोल्लेन मनाकु एवसानाहाटीं बोन्कु अय्ते हीतानो ओर ईरे मूसल आंदुर.
39 गानि मना एनकटा पेद्दल्कु मात्रम ओर वेहताप ताकालय तयार मना हिल्लुर. आनि मर्रा ओरा मनसु इजिप्त देसेमताहेकेन तिरीयता. 40 अस्के आ लोकुल्कु अहरोनe इनना वरोनतोनि, ‘माकुन इजिप्त देसेमताल पलातुक तत्ता आ मूसांक बतल आतानो माकु बतले तेळियसेक हिल्ले. अदुनहाटीं मावा मुन्ने ताकालय पेन्क तयार कीम,’ इंचि इत्तुर. 41 f पजा ओर अंटोर कलियसि पेय्यातसंटा उंदि बोम्मा तयार कीतुर आनि आ बोम्माक मोक्कुल्क हियालय दल्गुतुर. आ बोम्मातुन ओरे तयार कीता कुसिते दाना मुन्ने पेद्दा पंडुग कीतुर.
42 दानहाटीं पेन ओरा हेंदाल मोकम तिरहता. आनि ओर्कुन मब्बुने मनना पोडदुन, वेडसितुन, सुक्काना पूजा कियालय कुल्ला होडसीता. इदुन बारेमते पेंदा कबुरतोरा पुस्तकोमते:
“ए इस्राएल लोकुल्कुनिटा, मिमेट नल्पै वर्सां उस्के बूमिते मोक्कुल्कु, पूजें नावाहाटीं कीतिरा? हिल्ले!
43 मिमेट मोलेक इनना पेंदा डेरा आनि मीवा रिपानg इनना सुक्का पेंदा बोम्मातुन इंका मीवातोनि ओतिर.
मिमेट मोळकनाहाटीं मिमेटे तयार कीकुत्ता अन्नि बोम्मां ओतिर. अदुनहाटीं नना मीकुन वेल्लेन लक्कु मनना बाबेलोन सहरकन्ना हब्बेर लोहांतन.”h इंचि राससि मंता.
44 jमना एनकटा पेद्दाल्क केडाते मत्तस्के ओरगा उंदि गवाइता डेरा iमत्ता. अद डेरा मूसाल तयार कीता डेरे आंदु. अद डेरा तयार कियाका मुन्ने पेनू मूसांक उंदि डेराता नमुना हुपिचि ‘अद मत्तापे तयार कीम’ इंचि पेन ओन्कु आदेस हीता. 45 मना एनकाटोरा मुन्नेटाल पेन पेचाहचि गेदुमता वेरे जातितोरा बूमितुन मना लोकुल्कु जोसुवाल इनना वरोर मनकन मुन्ने अराहचि एतकुत्तुर. अस्केगुडा इद डेरा ओरगा मत्ता. आनि अद डेरा दाविद राजाना कालमदाका ओरागेन मत्ता. 46 दाविद राजांक पेन आसिर्वादम हीता, अदुनहाटीं ओर याकोबुना पेंदाहाटीं kउंदि गुळि दोहाना इंचि आसे पडतोर. 47 गानि पेंन्दाहाटीं गुळि मात्रम सुलेमान राजाल दोहतोर.
48 बच्चो बतल अय्नागानि पेन मनकल दोहता गुळिते मन्नो. बारित्ते इदुन बारेमते पेंदा कबुरतोर इल्हा रासतोर:
49 “पेन इत्ता, स्वर्गम नावा राजगद्देl आंदु,
आनि ई बूमि नना काल्कु इर्रना पीटे आंदु.
अय्ते मिमेट नावाहाटीं बसोंटा गुळि दोहा परांतिर?
आनि नावा आराम किना जेगा बल्हा मंदार?
50 इव अन्नि नावा कय्दे कीतव आयोंगा?”m
51 अरे पिस्सा लोकुरिटा, मीवा मनसु बारे वेरे जातितोरा मनसुन लेह्का मंता, आनि मीवा केव्क बारे पेंदा पोल्लें केंजाकोंटा डोप्पां अरसोत्तां. मिमेट बस्केळ्क पवित्र आत्मातुन पकाक दोबसेके, इंदके मिमेटगुडा मीवा एनकटा पेद्दाल्कुना लेहका कीसंतिर. 52 मीवा पेद्दाल्क तकलिप हियाकोंटा पेंदा कबुरतोन वरोन गुडा होळसा हिल्लुर. ‘वरोर नितिमंतुड वायनोर मंतोर’ इंचि वेहानोर्कुन मीवा एनकटा पेद्दाल्क हव्कुतुर. आनि इंदके मिमेट बारे, ओर बा नितिमंतुना बारेमते वेहचि मत्तुरो आ नितिमंतुन दोकाते पीसि हव्कतिर.
53 पेंदा दूतानाहेंदाल मीकु मुसाना नियम अय्ते दोर्कुता गानि मिमेट दाना परकारम ताका हिल्लिर.”
स्टिपनुन हव्कंतुर
54 ओना पोल्लें केंजसि पंचादिते मत्ता पेद्दाल्क वेल्ले होंगुंक वातुर आनि ओनाहेके हूळसि पटपटा पल्कु कोर्कालय दल्गुतुर. 55 गानि पूरा पवित्र आत्मातोनि निंडसि मत्ता आ स्टिपन स्वर्गेमतेके हूळतोर. अस्के ओर पेंदा महिमातुन आनि पेंदा तिना बाजुंक नित्तिसि मत्ता येसुन हूळतोर. 56 अस्के ओर, “हूळाट, स्वर्गम बय्यर आयानद आनि मनकना पीटे पुटता पेंदा मर्रि पेंदा तिना बाजुंक नित्तिसि मत्तद नना हूळसंतन,” इंचि इत्तोर.
57 अस्के आ मंदि केव्क मुचकुत्तुर आनि जोरसे वरगेयसेके अंटोर उंदेदम ओना पोर्रो वासि अरतुर. 58 ओन इग्गुसेके नाटेन पलाते ओसी बंडाने तनालय दल्गुतुर. इद जरगनदान हूळता गवाइदारकु ओरा कपडिं तेंडसि साऊल इनना वरोर लेय्योना काल्कुन मुन्ने इरतुर. 59 लोकुल्कु बंडाने तनानेंके स्टिपन, “येसु सामि, नावा आत्मातुन निमे एतकुन.” इंचि पारतना कीतोर. 60 पजा ओर टोंगरां ऊनसि, “हे सामि, ई पापम ईरापोर्रो तासुमा,” इंचि जोरसे वरगेयतोर आनि कळ्क मुचतोर. इल्हा साऊलगुडा ओना हामुरते पोत्तु आतोर.