एडुर्कुन पेर्कुन्मड
6
1 इल्हा विस्वासुल्क वेल्लेन बेरसेक होत्तुर. अय्ते अवे रोजकुने युनानि बासा वळकाना यहुदिल्कु, इब्रानि बासा वळकाना यहुदिल्कुनतोनि, “रोज हियना गाटोता बारेमते मावा मुंडामोस्ता मुरताह्कुनहेके बेस हूळसेक हिल्लिर,” इंचि ओरतोनि जगडम दोस्तुर. 2 अस्के आ पन्नेंड मंदि प्रेरितुल्क अंटोर विस्वासुल्कुन उंदागा केयसि, “पेंदा पोल्लें कराहमड़ पकाक इरसि गाटो पंचि तासेक मनमड़़ मावाहाटीं बेस आयो. 3 अदुनहाटीं मावा दादालोरिटा! मिमेट मीवाव्टेटाले बेस कदर, बुद्दि आनि पवित्र आत्माते निंडिस मत्ता एडुर मांडसातुन पेर्कुंटु. मोमोट ओर्कुन ई कबळ पोर्रो इर्रांतोम. 4 अस्के पारतना आनि पेंदा पोल्लें कराहना मावा कबऴ आगाकोंटा ताकसेक मनंता.” इंचि वेहतुर.5 इद पोल्ले अंटोर्कुंक नच्चुताहेंका ओर विस्वासम आनि पवित्र आत्माते निंडिस मत्ता स्टिपन इनानोन पेर्तुर. इन वरोने आयका पिलिपुस, परकोरस, निकानोर, तिमोन, परमिनास आनि अंताकिया नाटेना निकोलस(ईर ओना जाति होळसि यहुदि जातिते वातोर) पोर्रोलतोर्कुन पेर्तुर. 6 पजा ईर एडुरकुन प्रेरितुल्कुना मुन्ने निलाहतुर. अस्के प्रेरितुल्क ओरपोर्रो कय इरसि पारतना कीतुर.
7 इल्हा पेंदा पोल्ले वेल्लेन मंदिक एवसेक होत्ता. आनि येरूसलेमते विस्वासुल्क इंका वेल्लेन आतुर. अचोने आयका वेल्लेन मंदि यहुदि पेर्मालोर्क इंका विस्वासमते वातुर.
यहुदिल्क स्टिपनुन पोर्रो एकरेवुल्क वेहांतुर
8 पेंदा दयाते आनि ताकतते निंडसि मत्ता स्टिपन लोकुल्कुन मुन्ने इचंत्रम आयना चमत्काराल्क आनि अद्बुताल्कुना कबाहक कियुंदुर. 9 गानि स्वतंत्रम दोर्कुता यहुदि लोकुल्कुनाa दर्मसास्त्रम कराहना लोताल इच्चुर लोकुल्कु वासि स्टिपनुनतोनि जगडम तासकुत्तुर. आ लोकुल्कुने कुरेने, सिकंदरिया इनना सहरकुने मनना यहुदि लोकुल्कु आनि किलिकिया, एसिया इनना एरियान पीसि मनना यहुदिल्कु मत्तुर. 10 गानि वळकानाहाटीं पवित्र आत्मा स्टिपनुंक तेल्वि हीता. अदुनहाटीं आ लोकुल्कु ओना पोल्लेंक अड्डम वळका परा हिल्लुर.
11 पजा आ यहुदि लोकुल्क वेरेतोर्क तेळियाकुंटा इच्चुर लोकुल्कुंक लंचम हीसि, ‘स्टिपन, मूसानद आनि पेंदाद अपमानम आयना पोल्लें वळकानेंके मोमोट केंजतोम.’ इल्हा आबद्दम वळकालय वेहतुर. 12 इल्हेने ओर अगाटा लोकुल्कुन, यहुदि पेद्दल्कुन आनि दर्मसास्त्रम कराहना गुरुल्कुन इंका एक्किस्तुर. अस्के ओर स्टिपनुन दोर्का पीसि यहुदिल्कुना पेद्दा पंचादिते तत्तुर. 13 अय्ते आ पंचादिते लंचम तित्ता गवाइदारकु निलसि, “ई मनकल पवित्रमाता जेगा इत्ते गुळिता बारेमते आनि मूसल वेहता नियमता बारेमते तप्पुड पोल्लें बस्केळ्क वळ्कसेक मनांतोर. 14 बारित्ते नासरेत नाटेना येसु इद गुळितुन कूलहसि नासडेम कियानुर आनि मूसाल वेहता रिती-रिवाजकुन बदलांचानुर’ इंचि वेहानेंके मोमोट केंजतोम” इल्हा गवाइ हीतुर.
15 अस्के अगा पंचादिते उद्दिस मत्ता अंटोर लोकुल्कु स्टिपनुनहेके बागा हूळतुर. अय्ते ओर्कु स्टिपनुना मोकम पेंदा दूताता मोकमलेह्का दिसता.