हनन्या आनि सपीरा
5
1 हनन्या पोर्रोलतोर वरोर मनकल आनि ओना मुत्तो सपीरा इर इव्वुर कूडसि ओरादे इच्चो बूमितुन अमतुर. 2 वाता कोत्तानाल इच्चुं कोत्तां इरकुत्तोर इंचि ओना मुत्तोंक एर्के मत्ता, कडमता कोत्तां ओसि प्रेरितुल्कुंक हीतोर.3 अदुन हूळसि पत्रु, “हनन्या! निमे बूमि अम्मुता कोत्तानाल इच्चूं कोत्तां इरकुत्तिन. अय्ते पवित्र आत्मातोनि आबद्दम वळकालय नीवा मनसुने देय्यम बारि होडियता? 4 आ बूमि अम्मका मुन्ने निवदे मत्ता गदा! आनि अम्मुतंकागुडा वाता कोत्तन पोर्रो निवदे अदिकारम मत्ता. अय्नागानि पेंदुक इस्टम हिलवद कबळ कियालय नीवा मनसुने बल्हा वाता? निमे मनकलोरतोनि आयो गानि पेनतोनि आबद्दम वळकातिन,” इंचि इत्तोर.
5 ई पोल्लें केंजतारित्तेने हनन्याल हिडारतोर आनि जीवा होळ्सतोर. अचोने आयका ई पोल्लें केंजतुर अंटोर्क पेद्दा वेर्रे दल्गुता. 6 अस्के लेय्युर्क तेदसि ओन्कु कपडि हुटतुर aआनि पलाते ओसि बोंदा दोस्तुर.
7 दगेर-दगेरा मूंड गंटां आतंका ओना मुत्तो लोप्पो वाता. अगा बतल जर्गुता दान्कु तेळिया हिल्ले. 8 अस्के पत्रु अद वातद हूळसि, “मीवा बूमि इच्चोट्के अमतिरा वेहा!” इंचि तल्कुतस्ते, “आ इच्चोट्के अमतोम,” इंचि अद इत्ता.
9 पत्रु दान मर्रा, “मिमेट इव्वुर सामिना आत्माता परिक्सा बारि हूळालय दल्गतिर? हूळा नीवा मुय्दोन बोंदा दोसतोर गलमातगेन एवतुर, आनि ओर नीकुन इंका अल्हेने ओयानुर.” इंचि इत्तोर. 10 ओर अल्हा इत्ता इन्मडे अद ओना काल्कुन मुन्ने अर्ता आनि अल्हेन जीवा होळसीताb. पजा दाना मुय्दोन बोंदा दोस्ता लेय्युर्कु लोप्पो वासि हूळतस्के अद मुरतड़ हासी दिसता. ओर दान इंका तेहकुंचि ओसि दाना मुय्दोना पक्काते बोंदा दोस्तुर. 11 अस्के येरूसलेमता चर्चुतोर अंटोर आनि ई पोल्लें बोरय्ते केंजतुरो ओर अंटोर बागा वेरियतुर.
प्रेरितुल्कुना कय्दे इचंत्रमाता कबाह्क
12 अल्हेने प्रेरितुल्कुना कय्दाल वेल्ले अद्बुतामाता कबाह्क आनि चमत्कारल्कु लोकुल्कुना मुन्ने आयुंदुं. विस्वासुल्क अंटोर गुळिते सुलेमान राजाना पंदिरतगा बस्केळ्क उंदि मनसुने जमा आयुंदुर. 13 विस्वास किवोर ओरतोनि कलियालय वेरियुंदुर, गानि विस्वासुल्कुना बेस कदर कियुंदुर. 14 अय्ना वेल्लेन मंदि मुरताह्क-मांडसा किरिस्तुन विस्वासम कीसि ओरगा वासि कलियुंदुर, इल्हा एक्कोते एक्को मंदि बेरस्सेके होत्तुर. 15 प्रेरितुल्कुना कबाह्कुन हूळसि लोकुल्कु बीमार मत्तोर्कुन कटुल्कुने, केत्तिने पत्रु होनना हर्दगा तच्चि इरुंदुर. पत्रु होननेंके ओना निडाय्ना बीमारतोरा पोर्रो अर्ते ओर बेस आयनुर इंचि लोकुल्कुना आसे मनुंदु. 16 अचोने आयका येरूसलेम सहरता पक्का पीसि मत्ता नाहकुनाल वेल्लेटुर बीमार मत्तोर्कुन, देय्याल्कु पीतोर्कुन अगा पीसि वायुंदुर. ओर अंटोर प्रेरितुल्कुना कय्दे बेस आयुंदुर.
प्रेरितुल्कुन जेलने वाटमड
17 अस्के पेद्दा पेर्माल आनि ओनातोनि मत्ता सदुकीरकु, प्रेरितुल्कुन हूळसि ओरा मनसु मस्लुंदु. 18 आनि ओर्कुन पीसि जेलने वाटतुर. 19 गानि अदे नर्का उंदि पेंदा दूता वासि जेलना तल्पु तेंडता. आनि ओर्कुन पलाते ओसि, 20 “होंटु, आनि गुळिते नित्तिसि ई पूना पिसवरता अन्नि पोल्लें अंटोर लोकुल्कुंक वेहाटु,” इंचि ओर्कु वेहता. 21 पेंदा दूता वेहतद केंजसि ओर पोडदु पेय्सतंका गुळिते होंचि लोकुल्कुंक कराहलय दल्गतुर. गानि हीके, पेद्दा पेर्माल आनि ओना दंटातुर, इस्राएलता अंटोर पेद्दल्कुन पंचादिते केयसि, प्रेरितुल्कुन जेलनाल तायालय लोहतुर. 22 गानि सिपाइल्कु जेलने होंचि हूळतस्के अगा प्रेरितुल्क मना हिल्लुर, अदुनहेंके ओर मल्सि वासि, 23 “जेलता तल्पुल्कुंक अय्ते तालम वाटसि मत्ता आनि सिपाइल्क इंका गलमानगा नित्तिसि मत्तद मोमोट हूळतोम, गानि तल्पु तेंडसि लोप्पो हूळतस्के लोप्पो बोरे मना हिल्लुर,” इंचि ओर वेहतुर.
24 गुळितगा कावेल कियानोरा अदिकारि आनि पेद्दा पेर्मालोर इद केंजसि, “इंदके बतल आयार” इंचि वेल्ले विचारम कियालय दल्गुतुर. 25 अस्के बोरो वरोर मनकल वासि, “हूळट, मिमेट जेलने वाटतुर गुळितगा नित्तिसि लोकुल्कुंक येसुना पोल्लें कराहसेक मंतुर.” इंचि वेहतोर.
26 अस्के आ अदिकारि, गुळिता कावेल कियानोर्कुन पीसि गुळितगा होत्तोर, होंचि ‘लोकुल्कु माकुन बंडां हुक्सि हव्कना आयो,’ इंचि ओर्कुन बतले बल्मि कियाकोंटा पंचादितगा तत्तोर. 27 ओर्कुन पीसि तच्चि पंचादिता मुन्ने निलाहतोर. अस्के पेद्दा पेर्माल ओर्कुन, 28 “ई येसुना पोर्रोलते करुहमट इंचि मोमोट मीकु कडक आदेस हीयिना गानि मिमेट पूरा येरूसलेम अंता ओना पोर्रोलते कराहतिर. अचोने आयाका ओन मोमोटे हव्कतोम इंचेके मावा पोर्रो तप्पु दोस्सालय हूळसेक मंतिर,” इंचि ओर्कुन इत्तोर.
29 अदुनहाटीं पत्रु आनि कळमता प्रेरितुल्क इत्तुर, “माकु मनकलोरा पोल्लें आयो, गानि पेंदा पोल्ले केंजा पींता. 30 मिमेट येसुन क्रुस पोर्रो वेलड वाटसि हव्कतिर गानि मावा पेद्दाल्कुना पेन ओन हामुरताल मर्रा तेहता. 31 हामुरताल तेहचि ओने पेन, राजाल आनि पिसागोटनोर इंचि निलाहता. मावा इस्राएलता दादालोर्कुंक मनसु मार्सकुनालय, आनि पापाल्कुनाल मापि कियालय पेंदा तिना बाजुंक ओन कदर हीसि उपिस्ता. 32 इव अन्नि पोल्लेनहाटीं मोमोट गवाइ मंतोम. पेंदा पोल्लें केंजसि ताकानोरा पोर्रो पवित्र आत्मा इंका गवाइ मंता,” इंचि इत्तुर.
गमलियेल पेद्दा पंचादिता लोकुल्कुन सांत कीतोर
33 ओरा पोल्लें केंजसि, आ पंचादिता पेद्दल्कुंक होंग वासि ओर्कुन हव्कना विचारम कीतुर. 34 गानि पंचादितगा गमलियेल पोर्रोलतोर वरोर परिसि, ओर मूसाना नियमता गुरुजीगुडा मत्तोर, ओन अंटोर कदर कियुंदुर. ओर तेदसि प्रेरितुल्कुन गडसेम पलाते ओयालय वेहतोर. 35 ओर्कुन पलाते ओतस्के, ओर पंचादिता मुन्ने, “मावा इस्राएलता लोकुल्कुनिटा! मिमेट ओर्कुन बतल कींतोम इंचंतिरो, बेस विचारम कीसि कीम्टु. 36 बारित्ते कोनि रोजकु मुन्ने तियुदास पोर्रोलतोर वरोर मनकल, ‘नना पेद्दोन’ इंचि वेहकुत्तोर. ओना पज्जो नालुं नुह्कुना मंदि इंका मत्तुर. गानि ओन हव्कतुर, अस्के ओना पज्जो ताकानोर अंटोर बेंदोर-हेके पायसि होत्तुर. 37 अद आता पज्जो सिरगंतिता वेलाते गालिल एरियाता यहुदल इनानोर वातोर. ओर इंका वेल्लेने लोकुल्कुन ओनाहेके कीकुत्तोर गानि ओन इंका हव्कतुर. ओना पज्जो ताकानोर अंटोर बेंदोर-हेके पायसि होत्तुर. 38 अदुनहाटीं इंदके इंका नना मीकु वेहसेक मंतन, मिमेट पीतोर्कुन बतले किमटु, ओर्कुन होळ्सीम्टु. ओरां विचाराल्क, ओरां कबाह्क मनकानव मनानय्ते मायसि दांतां. 39 गानि पेंदा हेंदाल मनानय्ते दान मिमेट आपा पर्रीर, मिमेट आपालय हूळते मात्रम पेंदुक अड्डम आंतिट,” इंचि इत्तोर.
40 अस्के पंचादितगाटुर गमलियेलना पोल्ले केंजतुर. पजा प्रेरितुल्कुन लोप्पो केयसि ओर्कुन पोट्टेते तन्ना वेहचि, येसुना पोर्रोलते बगाने वेहमटु इंचि वेहचि होळसितुर. 41 प्रेरितुल्कुन होळसितस्के, ‘येसुना पोर्रोलताहाटीं मोमोट देब्बां तित्तोम’ इंचि बेस आनंदमते पंचादिताल पेय्सि होत्तुर. 42 रोज गुळितगा आनि लोन-लोन होंचि, ‘येसु ईरे किरिस्तु आंदुर’ इंचि पेंदा बेसता पोल्लें कराहमड आनि वेहमड होडसा हिल्लुर.