पत्रुन आनि योहानुन पेद्दा पंचादिता मुन्ने निलाहतुर
4
1 पत्रु आनि योहान लोकुल्कुनतोनि वडकसेके मननेंके पेर्मालोर्कु, गुळिता कावेल कियनोरा दरोगाल आनि सदुकिर ओरगा वातुर. 2 पत्रु आनि योहान, लोकुल्कुंक कराहनद आनि येसु बल्हा हातोरा लोप्पोटाल मर्रा तेदतोर, अल्हेने हातोरु मर्रा तेदंतुर इंचि वेहमड केंजसि ओर्कु बागा होंग वाता. 3 पजा ओर ओर्कुन पीतुर गानि पोडदु होत्ता इंचि इंकुंदि रोजुनदाका ओर्कुन जेलने बंद कीसि इरतुर. 4 गानि बोरय्ते ओरा पोल्लें केंजतुरो अंटेताल वेल्लेन मंदि येसुनपोर्रो विस्वासम कीतुर. विस्वासम कीतोरा लोप्पोटाल मांडसा दगेर-दगेरे हेय्युं वेयकुनदाका आतुर.5 इंकुंदी रोजु यहुदि पेद्दल्कु, राज्येम कियानोर आनि दर्मसास्त्रम कराहना गुरुल्कa येरूसलेमते जमा आतुर. 6 इंका पेद्दा पेर्माल हन्नाल ओना जीवातोर कयपाल, योहान, सिकंदर आनि ओना लोतुर अंटोर अगा मत्तुर. 7 ओर पत्रुन आनि योहानुन ओरा नड्डुम निलाहचि, “मिमेट बद सक्तिते, आनि बोना पोर्रोलते इव कबाहकु कीतिर?” इंचि ओर्कुन पूसकीतुर.
8-9 अस्के पत्रु पवित्र आत्माते निंडसि, “ए लोकुल्कुना पोर्रो राज्येम कियानोरिटा आनि पेद्दल्कुनिटा! इय्याला वरोन कुंटिन बेस कीताहेंके ‘ओर बल्हा बेस आतोर’ इंचि माकुन तल्किसेक मंतिर 10 अय्ते मीकु अंटोर्कु आनि इस्राएलता लोकुल्कुंक, ‘नासरेत नाटेना येसु किरिस्तुना पोर्रोलतेन ई मनकल बेस आसि मी मुन्ने नित्तिसि मंतोर इंचि तेळियमड गावाले. मिमेट आनि मीवा लोकुल्क, येसु किरिस्तुन क्रुस पोर्रो मोल्लां कोहकीसि हव्कतिर गानि पेन ओन हातोरा अव्टेटाल मर्रा जीवाते तेहता.
11 ‘मिमेट लोन दोहालय कबळकु वायो इंचि पोहता बंडे,
इंदके लोतुक अम्सरमाता बंडा आता,’ इंचि दर्मसास्त्रमते रासि मंता. अदे बंडा ई येसु आंदुर.b
12 येसुना पोर्रोल तप्पा मब्बुना हिड मनानोरा बोना पोर्रोले मनाकुन पापमताल पिसागोटो, इंका बोरे मनाकुन पिसागोटोर,” इंचि वेहतोर.
13 ओर पत्रुन आनि योहानुन हूळसि इस्कुल करियवोर, सादा मनकलोर आंदुर इन्कुत्तुर, गानि ओरा दैर्नेम हूळसि इचंत्रम आतुर. अस्के ईर येसुनतोनि मत्तोर आंदुर इंचि ओर्कुन एरपाट कीतुर. 14 बेस आता कुंटि ओरतोनि नित्तिसि मत्तद हूळसि ओर्कु अड्डम बतल वळका परा हिल्लुर. 15 अदुनहाटीं ओर पत्रुन आनि योहानुन इगेटाल पलाते होंट इंचि इत्तुर आनि वरोंक-वरोर विचारम कियालय दल्गतुर गदा, 16 ई मनकलोर्कुन मनम बतल कीकोम? येरूसलेमते मंदनुर अंटोर्क ईर कुंटिन बेस कीतद एरपाटे, दान मनम ‘निजम आयो’ इंचि इना परोम. 17 गानि इद पोल्ले एक्को लोकुल्कुंक तेळिया मन्नि इत्ते ओर्कुन मनम, ‘मिमेट येसुना पोर्रोल इंका बोना मुन्ने एतमट’ इंचि वेराहकोम, इत्तुर. 18 अस्के ओर्कुन मर्रा केयसि, “मिमेट येसुना पोर्रोलते बतले वळ्कमट आनि बतले कराहमट,” इंचि आदेस हीतुर.
19 गानि पत्रु आनि योहान, “पेंदा पोल्ले केंजाका मीवा पोल्ले केंजमड इद पेंदा मुन्ने न्यायामेना? मिमेटे वेहाटु. 20 बदाय्ते मोमोट हूळतोम आनि केंजतोम अदुन वेहाकोंटा मनमड मावातोनि आया परो,” इंचि इत्तुर.
21 अगा जर्गुतादुन हूळसि अंटोर लोकुल्कु पेंदा स्तुति कियालय दल्गतुर. अदुनहाटीं लोकुल्कुना वेर्रेक ओर्क सिक्सा हियाका, ओर्कुन मर्रा वेराहचि होडसीतुर. 22 बोर मनकल अय्ते चमत्कारम आसि बेस आतोरो, आ मनकल नल्पै वर्साना पोर्रो मत्तोर.
पत्रु आनि योहान विस्वासुल्कुनगा मल्सि वातुर
23 पत्रु आनि योहानुन होळसितस्के ओर ओरा दंटातुरगा वापस वातुर, आनि पेद्दा पेर्मालोर्कु, यहुदि पेद्दल्कु इत्ता पोल्लें अंता ओर्कु वेहतुर.
24 ओर वेहतद केंजसि, ओर अंटोर कलियसि उंदे पेद्दा आवाजते पेंदुक पारतना कियालय दल्गतुर, “सामि! मब्बु, बूमि, समुद्रम आनि अवुना लोप्पो बतल अय्ते मंता, अवुन निमेन पुटिस्तिन. 25 नीवा पवित्र आत्माता हेंदाल नीवा सेवक, मावा एनकटा पेदा मनकल दाविद राजाना तोड़दाल निमे इल्हा वेहतिन गदा:-
‘वेरे जाति लोकुल्कु बारि लोल्लिं कीतुर?
लोकुल्कु वट्टिदे अव्सरम हिल्वा पिलानकु बारिंक कीसेके?
26 ई बूमिपोर्रोटा राजालोर पेंदुक अड्डम लडाईहाटीं तयार आतुर.
राज्येम कियानोर अंटुर उंदि आसि, पेंदुक आनि दाना किरिस्तुंक अड्डम, आतुर.’c
27 निजमे, निमे पेर्कुंचि लोहचीता नीवा सेवक येसुना विरोदमते हेरोद आनि पंतु पिलातुसगुडा वेरे जातितोरतोनि आनि इस्राएल लोकुल्कुनातोनि कलियसि उंदि आतुर. 28 बारित्ते नीवा ताकत आनि इच्चाते इल्हा जर्गना इंचि निमे मुन्नेने निरनायम कीतिन. अल्हेने जर्गसि पूरा आता. 29 अदुनहाटीं, सामि! इंदके ओर वेराहसेक हूळा, नीवा पोल्ले दैर्यनेमते वेहालय सेवकुल्कुंक बलम हीम. 30 रोगाल्कु बेस कियालय, नीवा पवित्र सेवक येसुना पोर्रोलते चमत्काराल्कु, अद्बुताल्कु किया परालय नीवा कय हाहचि बलम हीम,” इंचि पारतना कीतुर.
31 पारतना कीतारित्ते, ओर जमा आसि मत्ता जेगा मेदुलता आनि ओर अंटोर पवित्र आत्माते निंडिसोंचि पेंदा पोल्ले वेरियाकुंटा वेहलय दल्गुतुर.
विस्वासुल्क उंदि आसि मनुंदुर
32 विस्वासुल्क अंटोर उंदि मनसु आनि उंदि जीवा आसि मत्तुर. बोरन्ना आयी बदे सोम्मु ‘इद नावद’ इंचि इना कोंदुर, गानि बोनगाना बतलन्ना मत्ते दान तूस कुनुंदुर. 33 ‘येसु सामि हासि मर्रा तेदुतोर’ इंचि ओना पेद्दा ताकतते प्रेरितुल्क गवाइ हियुंदुर. इल्हा ओर अंटोरपोर्रो पेंदा आसिर्वादम मत्ता. 34-35 ओरा लोपो बोनके बतल तक्को मनाहिल्ले. बूमि-लोह्कु मत्तोर, अवुन अम्मिसि वाता कोत्तन तच्चि प्रेरितुल्कुंक हियुंदुर. बोन्कु बच्चोर गरज मंता अच्चोर तूसि हियुंदुर.