कुंटी बेस आतोर
3
1 उंदि मल्का पियटा पारतना वेलाक इत्ते मूंड एगनेंके पत्रु आनि योहान गुळिते होंचेके मत्तुर. 2 अस्के इच्चुर लोकुल्क पुटतगाटाल कुंटी मत्तोन वरोन तेहकुंचि तत्तुर. गुळिते होना-वाया कियानोर्कुन बिच्चम तल्कागोम इंचि ओन ओर रोजु गुळिता सक्कगा इनना गलमातगा उपिचि इर्रुंदुर. 3 पत्रु आनि योहान गुळिते होडियनद हूळसि ओर ओर्कुन बिच्चम तल्कतोर. 4 अस्के पत्रु योहानतोनि ओनाहेके उंदेतीर हूळसि, “माहेके हूळा” इंचि इत्तोर. 5 पजा ओरा हेंदाल बतलन्ना दोर्कार बारे इंचि आसेते, ओराहेके हूळसेके मत्तोर. 6 अस्के पत्रु, “नना अय्ते एंडी बंगाराल्क मत्तोन आयोन, गानि नहगा बतलय्ते मंतनो अदे नीकु हींतन, नासरेत नाटेना येसु किरिस्तुना पोर्रोल बलमते नितिस ताका,” इंचि इत्तोर. 7 आनि ओर ओना तिना कय पीसि तेहतोर. तेह्ता तेहामड़े ओना काल्कुने आनि ओना टोमराने ताकत वाता. 8 अस्के ओर दुनकिस तेदतोर आनि ताकालय दल्गुतोर, आनि ताकसेके, दुन्किसेके, पेंदा स्तुति कीसेके ओरतोनि गुळिते होत्तोर. 9 ओर ताकानदुन आनि पेंदा स्तुति कियमड़तुन अंटोर लोकुल्क हूळतुर. 10 ईर गुळिता सक्कगा इनना गलमातगा बिच्चम तल्कुकुनानोर इंचि लोकुल्कु एरपाट कीकुत्तुर आनि ओर बेस आतद हूळसि, इद बल्हा आता इंचि अंटोर वेरियसि इचंत्रमते अर्तुर.पत्रु पेंदा पोल्लें वेहतोर
11 आ कुंटी मनकल पत्रु आनि योहानुन पीसि नित्तिसि मत्तोर. ओर सुलेमान राजाना पंदिरतगा मत्तस्के अंटोर लोकुल्कु इचंत्रम आसि आ जेगातगा विच्चि वातुर.
12 ओर्कुन हूळसि पत्रु, “ए इस्राएलता लोकुल्कुनिटा, मिमेट जर्गुतादान हूळसि इल्हा बारी इचंत्रम आसि माहेके हूळसेक मंतिर? मोमोट मावा ताकतते, मावा बक्तिते ईन ताकानाल-तिरियानाल किया हिल्लोम. 13 अब्राहाम, इसाहाक आनि याकोबुना पेन, इत्ते मना एनकटोरा पेन, दाना सेवक येसुंक कदर हीता. गानि मिमेट ओन दोर्का पीसी हव्कलय हीतिर. अयना पिलातुस ओन होळसियाना विचारम कीतस्के मिमेट ओन होळसिया मन्नि इत्तिर. 14 पवित्र आनि सत्तेमंतुडa मत्ता येसुन ओप्पुकुना हिल्लिर, गानि वेरेतोरा जीवां तेंडाना पापी मनकन गावाले इत्तिर. 15 मिमेट लोकुल्कुंक बस्केळ्क पिस्साना पिसवरता हर्री हूप्सानोन हव्कतिर, गानि पेन ओन हातोराव्टेटाल मर्रा जीवा अर्राहता, दीना मोमोट गवाइ मंतोम. 16 मोमोट येसुन नमताहाटीं ओना पोर्रोलतेने ईर कुंटी बेस आतोर. ई मनकन मिमेट हूळतिर, एरपाट कींतिर. येसुना पोर्रोटा विस्वासमतेने ई मनकल पुरागा बेस आतोर. इदंता मी मुन्नेन जर्गुता.
17 नावा दादालोर तम्मुह्कनिटा! मिमेट आनि मीवा राज्येम कियानोर बतल कीतिरो अद मीकु तेळियवा हेंकेन कीतिर इंचि नाकु एर्के. 18 येसु किरिस्तुंक तकलिप अर्रा पींता इंचि पेन दाना कबुरतोर्कुना हेंदाल मुन्नेन वेहचि मत्ता, अद इंदके पूरा आता. 19 दानहाटीं मिमेट मनसु मार्सकुंचि पेंदाहेके तिरियसि वाते, मीवा पापाल्क पाय्सि दांता. अस्के मीकु पेंदा मुन्ने आत्मिक सांतिता वेला वायार. 20 पेन मुन्नेटाले तयार कीसि इरता येसु किरिस्तुन मीहाटीं लोहार. 21 गानि पूरा दुनियातुन मोदाटालेसिं बेस कींतन, इंचि पेन वेल्ले मुन्नेने पवित्र कबुरतोराहेंदाल वेहचि मत्ता. अद कालम वायनादाका किरिस्तु स्वर्गमतेन मनंतोर.
22-23 मीवा लोपोटाले वरोन पेन नावालेसिं पेंदा कबुरतोन लोहार, ओर वेहतापे मिमेट ताकाना, आनि बोरय्ते ओर वेहताप ताकोर, ओर वेहताप ताकानोराव्टेटाल वेरे आसि नासडेम आंतोर, इंचि मूसाल वेहचि मत्तोर. 24 अचोने आयका, समवेल आनि ओना पज्जो वाता पेंदा कबुरतोर अंटोर इव रोजकुना बारेमते वळ्कुतुर. 25 ‘नीवा वंसमतोरा हेंदाल बूमि पोर्रोटोर्क अंटोर्क आसिर्वादम दोर्कंता’ इंचि पेन अब्राहामुनातोनि इत्ता. मिमेट अय्ते आ करार कीता एनकाटोरा आनि पेंदा कबुरतोरा पिलाल्क आंदिर. 26 पेन ओना सेवक येसुन मर्रा जीवा अराहतस्के, मीकुन कराब हरदाल तप्पिचि आसिर्वादम हियनाहाटीं मोदाला मीहेके लोहता,” इंचि पत्रु इत्तोर.