पेंदा आत्मा विस्वासुल्कुना पोर्रो रेयमड
2
1 पेन्तेकोस्तुता पंडुगुa रोजुने अंटोर विस्वासुल्क उंदि जेगाते जमा आसि मत्तुर. 2 अस्के उंदे मल्का मब्बुनाल पेद्दा वळि-दुमारम लेह्का वाता. आनि ओर अंटोर उदिस मत्ता लोन दाना सप्पुडतोनि पूरा निंडसि होत्ता. 3 अस्के तडमितालेसिं पोत्तना नाल्कें ओर्कु दिसतां आनि अव अगा मत्तोरा पोर्रो उंद-उंदि रेय्तां. 4 ओर अंटोर पवित्र आत्माते निंडिस होत्तुर, आ आत्मा ओर्कु वळकाना बलम हीता परकारम ओर वेरे-वेरे बासाने वळकमड़ सुरु कीतुर.5 अद वेलाते, मब्बुना हिड मत्ता वेल्लेने देसेल्कुना यहुदि विस्वासुल्क येरूसलेमते मत्तुर. 6 आ सप्पुडु केंजतस्के ओर उंदगा जमा आतुर. ओर अंटोर ओरा संतम बासाते वळ्कनद केंजसि इचंत्रम आतुर. 7 अस्के ओर इचंत्रम आसी, “ईर वळ्कनुर अंटोर गालिल एरियातोरे गदा, 8 अरे मनम अंटोरम मना संतम बासातेने केंजसंतोम गदा! इद बल्हा मरि? 9 मनम पारति, मेदी, एलामि, मेसोपोटामिया, यहुदिया, कप्पुदूकिया, पुंतुस, एसिया 10-11 पुगरिया, पंपुलिया, ई जेगानाल आनि इजिप्त देसेमताल आनि कुरेने सहर दग्गेरे मत्ता लिबिया देसेमताल, रोम सहरताल वाता यहुदिल्कुम आनि यहुदि मतम पीतोरम, क्रेति आनि अरब देसेमताल वाता अंटोरम पेंदा इचंत्रमाता पेद्दा कबाह्कुन मना-मना संतम बासाने केंजसेके मंतोम.”
12 ओर अंटोर इचंत्रम आसि, “इद बतल आसंता” इंचि तेळियका वरोंक वरोर तल्कतुर. 13 गानि वेरेतोर अय्ते, “ईर अंगुर पंडिना पूना कल्लु उंचि मंतुर,” इंचि ओर्कुन कारेड्डाल्क कीतुर.
लोकुल्कुन मुन्ने पत्रुना बासन
14 अस्के पत्रु पदकोंडु मंदितोनि नित्तुतोर आनि लोकुल्कुंक अंटोर केंजा होनानाल जोरते वळकालय दल्गुतोर. “यहुदियाता दादालोरिटा आनि येरूसलेमते मनानोरिटा, नना वेहानद मीकु तेळियमड गावाले. इंचि मिमेट अंटोर नावा पोल्लेतुन बेस केव्वु दोस्सि केंजट. 15 मिमेट इन्कुत्ताप ईर कल्लु उंचि रिम्मां आया हिल्लुर. इंदके हक्केटां तोम्मिद एगसंतांb. 16 गानि इय्यला इगे मिमेट हूळता गटनाना बारेमते योएल इनना पेंदा कबुरतोर इल्हा जर्गंता इंचि मुन्नेने वेहासि मत्तोर, अद इल्हा मंता: 17 पेन इंता गदा,
‘आकिर रोजकुने नना अंटोर लोकुल्कुना पोर्रो नावा आत्मातुन वळियंतन.
अस्के मीवा मर्क-मियाहकु बविस्यवानिं कियानुर.
मीवा लेय्युरकुंक दर्सनाल्कु आंता
आनि मात्रालोरकु कलां हूळानुर.
18 आ रोजुकुने नना मुर्तड मांडसा इनाकुंटा अंटोर नावा दास-दासिह्कुना पोर्रो आत्मातुन वळियंतन आनि
ओर बविस्यवानिं कियानुर.
19 नना मब्बुने अद्बुताल्कु हुप्संतन
आनि बूमिपोर्रो चिन्ह इत्ते
नेत्तुर, तडमि आनि मब्बुनसोंटा पोया हूप्संतन.
20 पेंदा आ बच्चोनो पेद्दा आनि बेसता रोज वायाका मुन्ने पोडदु हीकट आनि
वेडसि बारे नेत्तुरता लेह्का आंतां.
21 अस्के बोरय्ते पेंदा पोर्रोल एतंतुरो, ओर्कुन पापाल्कनाल पिसागोटमड जर्गंता. c
22 इस्राएल लोकुल्कुनिटा, इव पोल्लें केंजट. पेनd नासरेत नाटेना येसुनाहेंदाल पेद्द-पेद्दा कबाह्क, अद्बुताल्कु आनि इचंत्रम आयना चिन्हां मीवा मुन्ने हूपिचि, पेन लोहतोर ईरे आंदुर इंचि रुजुव कीता, इद मीकु एरपाटे. 23 पेंदा उंदि पिलान आनि तेल्वि परकारमे येसुन मीवा कय्दे हियमड़ जर्गुता. आनि मिमेट सेड्डा मनकलोर्कुना सायता पीसि ओन क्रुस पोर्रो मोल्लां कोह्कीसि हव्कतिर. 24 गानि हामूर येसुन इर्रा परा हिल्ले, बारित्ते पेन ओन हामुटाल अलग कीसि मर्रा जीवा अरहता. 25 ओना बारेमते दाविद राजाल इल्हा इत्तोर:
“नना पेंदुन बस्केळ्क नावा मुन्नेन हूळसेक मत्तन,
नाकुन कस्टाल्कुनाल पिसागोटालय अद नावा तिना बाजुंक मंता,
26 इंचि नावा मनसु आनंदमते मंता आनि
नावा तोड्डी कुसिते वळ्कसेके मंता,
इचोने आयका नावा मेंदुल इंका आसेते मनंता.
27 निमे नावा आत्मातुन नरकमते होळसियिन,
निमे नीवा पवित्र मनकन कडियसि होना हियिन.
28 निमे नाकु पिसना हर्री हूपिस्तिन,
आनि नीवा लोपो नाकुन आनंदमते इरंतिन.”e इल्हा इत्तोर.
29 अय्ते नावा दादालोरिटा! नना मीवा मुन्ने एनकटा मनकल दाविद राजाना बारेमते विस्वासमते वेहा परांतन, ओर हातोर आनि ओन बोंदा दोस्तुर. ओना बोंदा इदवेरदाका इंका मना नड्डुम मंता. 30 ओर पेंदा कबुरतोर मत्तोर. ‘ओना वंसमताल वरोन राजगद्देपोर्रो उपसंतन’ इंचि पेन ओट्टु तिंचि पोल्ले हीता, अद ओन्कु एरपाटे मत्ता. 31 दानहाटीं मुन्ने बतल जर्गनद मंता अदुन एरपाट कीसि, ‘ओन नरकमते होळसिया हिल्ले आनि ओना मेंदुल कडियसि होना हिल्ले,’ इंचि वेहाचि मत्तोर. इत्ते किरिस्तु हासि मर्रा तेदुतदुन बारेमते वेहता पोल्ले आंद. 32 आ येसुन पेने मर्रा जीवा अरहता इंचि मोमोट अंटोरम गवाइ मंतोम. 33 आनि इंदके पेन येसुन दाना तिना बाजुंक उपिस्ता. पवित्र आत्मातुन हींतन इंचि पेन पोल्ले हीसि मत्ता अद ओन्कु दोर्कता. येसु अदे पवित्र आत्मातुन वळियतोर, अदुन मिमेट हूळसेक, केंजसेक मंतिर. 34-35 बारित्ते दाविद राजाल स्वर्गमते होना हिल्लोर, गानि दीना बारेमते ओर कुद वेहतोर:
‘पेनू नावा सामिनतोनि इत्ता गदा,
नना नीवा पगातोर्कुन नीवा काल्कुनगा तायनादाका निमे नावा तिना बाजुंक उदसि मन.’f
36 अदुनहाटीं इस्राएलता अंटोर लोकुल्कु बेस एरपाट कीकुनना पोल्ले बतल इत्ते मिमेट बा येसुन अय्ते क्रुस पोर्रो मोल्लां कोहकिस हव्कतिरो, पेनू ओन ‘सामि’ आनि ‘किरिस्तु’ कीता.”
37 इव पोल्लें केंजनेंके ओरा गुंडें दडेल इत्ता. अस्के ओर, “दादालोरिटा, इंदके मोमोट बतल कीकोम?” इंचि पत्रुन आनि अगा मत्ता प्रेरितुल्कुन तल्कुतुर.
38 अस्के पत्रु, “मिमेट कीता पापाल्क मापि आयागोम इंचि मनसु मार्सकुंचि पेंदाहेके तिरियट, आनि मिमेट अंटोर येसु किरिस्तुना पोर्रोलते बापतिस्मा एताट. अल्हा कीतिरित्ते मीकु पवित्र आत्माता वरम दोर्कंता. 39 आनि ई वरम मीहाटीं, मीवा पिलाल्कुनाहाटीं आनि बोरय्ते लक्कु मत्तोर्कुन मना सामि आता पेन दग्गेरे केयता ओरा अंटोराहाटीं हींता.” इंचि ओर्कु वेहतोर.
40 पजा पत्रु, इंका वेल्लेने पोल्लेनहेंदाल गवाइ हीसि, “ई युगमता कराब लोकुल्कुनाल मिमेट जगर्ता मंटु,” इंचि वेहतोर. 41 अस्के बोरय्ते ओना पोल्लेन स्विकार कीतुर, ओर अंटोर बापतिस्मा एततुर. ई परकारम ओर अंटोर कलियसि मूंड वेय्कुना मंदि आतुर.
42 ओर अंटोर, प्रेरितुल्कुना कराहमडते, कलियसि मनमड़ते, हारि उरुहमडते gआनि पारतना कियमड़ते उंदि आसि मनुंदुर.
विस्वासुल्क कलियसि मनमड़
43 प्रेरितुल्क तीराता अद्बुताल्कु, आनि चमत्काराल्कु कियुंदुर. अदुनहाटीं अंटोर पेंदा कदर कियालय दल्गतुर. 44 विस्वासुल्क अंटोर उंदि कलियसि मनुंदुर आनि बोनगा बतल मन्निना गानि दान अंटोर तूसकुंदुर. 45 अचोने आयका ओरा सम्सारमतुन, सामानतुन अम्मिसी अव्सरम मत्तोरकुंक तूसि हियुंदुर. 46 रोज गुळिते उंदि मनसुने जमा आयुंदुर. ओर लोन-लोन हारि उराहचि आनि आनंदमते पीटे बतले अन्सु-मन्सु हिलाकुंटा अंटोर कलियसि गाटो तिनुंदुर. 47 ओर रोज पेंदा स्तुति कियुंदुर, अंटोर ओरतोनि कुस मत्तुर. आनि पापमताल मुक्ति दोर्कतोर्कुन, सामि विस्वासुल्कुने कल्पुंदुर.